Jehová nochipa techpaleuis

1. ¿Ken okiteititi Moisés otlaneltokaya ijkuak okinkixti israelitas ompa Egipto?

AMOCHTLI Hebreos kijtoua intoka akinmej okiteititijkej okineltokayaj Jehová. Ompa noijki ijkuilitok itoka Moisés tlen otlaneltokak miak (Heb. 3:​2-5; 11:​23-25). Ye okiteititi otlaneltokaya ijkuak okinkixti israelitas ompa Egipto uan amo okimauili Faraón nion isoldados. Okineltokak Jehová kinmaluiskia israelitas ijkuak okinyekanki itech mar Rojo uan ijkuak oyajkej ik kanin tlauaki (Heb. 11:​27-29). Miakej israelitas amo okineltokakej Jehová kinmaluiskia pero Moisés amo ijkon omokuayejyeko. Kuali tlen okichi porque Jehová okintlamakak israelitas uan okinmakak atl uan ijkon amo oixpolikej kanin tlauaki (Éx. 15:​22-25; Sal. 78:​23-25).a

2. ¿Tleka Jehová okitlajtlani Moisés tlen kijtoua Números 11:​21-23?

² Ijkuak opanok kanaj se xiuitl Jehová okinkixti israelitas ompa Egipto, okinmilui kinmakaskia nakatl. Moisés otlaneltokaya pero amo okineltokak Jehová uelis kinmakaskia nakatl israelitas ompa kanin tlauaki porque okatkaj sapanoua miakej. Ikinon Jehová okitlajtlani Moisés: “¿Jehová amo uelis ijkon kichiuas?” (xiktlajtolti Números 11:21-23). Ijkuak okijkuilojkej nin tlajtoli ika hebreo okijtouaya ‘ima Jehová’. Non kijtosneki iespíritu santo toTajtsin Dios noso ichikaualis tlen kinejneki para kichiuas tlen kineki. Ikinon Jehová okitlajtlani Moisés: “¿Amo tikneltoka uelis nikchiuas tlen nikijtoua?”.

3. ¿Tleka miak ipati matikmatikan tlen okipanok Moisés uan israelitas?

³ ¿Tejuatsin yotimotlajtlani kox Jehová uelis mitsmakas tlen ika timopanoltis uan noijki kinmakas mofamilia tlen moneki? Xamo ualeua ijkon timotlajtlania. Ikinon axkan tikitaskej tlen okinpanok Moisés uan israelitas ijkuak amo okineltokakej Jehová uelis kinmaluiskia. Noijki tikinmitaskej seki textos tlen techpaleuiskej matikneltokakan Jehová nochipa techpaleuis.

¿TLEN TECHMACHTIA TLEN OKICHI MOISÉS UAN TLEN OKICHIJKEJ ISRAELITAS?

4. ¿Tleka miakej israelitas amo okineltokakej Jehová uelis kinmaluiskia?

⁴ ¿Tleka miakej israelitas amo okineltokakej Jehová uelis kinmaluiskia? Israelitas uan akinmej amo okatkaj israelitas tlen okiskej Egipto yimiak xiuitl onejnemiayaj kanin tlauaki para ajsiskiaj itech tlali tlen Jehová okijto kinmakaskia (Éx. 12:38; Deut. 8:15). Pero akinmej amo okatkaj israelitas opejki kualanij porque ayakmo okinekiayaj kikuaskej maná uan miakej israelitas noijki opejki ijkon kichiuaj (Núm. 11:​4-6). Yejuan okileuiayaj tlakuali tlen okikuayaj Egipto. Okiluiayaj Moisés okinekiayaj nakatl ikinon ye omokuayejyeko kanin kikuiskia nakatl tlen okitlajtlanilijtokaj (Núm. 11:​13, 14).

5, 6. ¿Tlen techmachtia tlen okinpanok israelitas?

⁵ Israelitas opejki kichiuaj ijkon ken akinmej amo okatkaj israelitas ikinon ayakmo okitlasojkamatilijkej Jehová tlen okinmakaya. Axkan miakej amo motlasojkamatij ikinon tejuan noijki uelis ijkon techpanos uan ayakmo tiktlasojkamatiliskej Jehová nochi tlen techmaka. Xamo oksepa tiknekij tikpiaskej tlen achto otikpiayaj noso tikixnekiskej tlen oksekimej kipiaj. Pero okachi tipakiskej tla tiktlasojkamatij tlen tikpiaj.

⁶ Israelitas okilkajkej tlen Jehová okinmilui kinmakaskia. Ye amo okinmilui kinmakaskia miak tlamantli ijkuak okatkaj kanin tlauaki. Ye okinmilui kinteochiuaskia miak ijkuak ajsiskiaj itech tlali tlen okinmilui kinmakaskia. Tejuan noijki moneki matimokuayejyekokan tlen tikseliskej itech xochitlali uan amo matechtekipacho tlen amo tikpiaj axkan. Noijki matimokuayejyekokan tlen kijtouaj seki textos tlen techpaleuiskej okachi matikneltokakan Jehová.

7. ¿Tleka moneki matikneltokakan Jehová nochipa techpaleuis?

⁷ Xamo timotlajtlaniaj tleka Jehová okitlajtlani Moisés: “¿Jehová amo uelis ijkon kichiuas?”. Xamo Jehová okinekiaya kipaleuis makajsikamati ye kipia miak chikaualistli uan uelis kinpaleuiskia israelitas maski san kanin yetoskiaj. Ikinon Jehová kinmakaskia miak nakatl maski okatkaj kanin tlauaki. ToTajtsin Dios okiteititi kipia chikaualistli porque okinpaleui akinmej opouiayaj itech ialtepe maski san kanin okatkaj (Sal. 136:​11, 12). Ikinon matikneltokakan Jehová techpaleuis ijkuak titlajyouiskej maski san kanin tiyetoskej (Sal. 138:​6, 7).

8. ¿Tlen moneki tikchiuaskej para amo matechpano tlen okinpanok israelitas? (Noijki xikita dibujo).

⁸ Jehová okichi tlen okinmilui israelitas uan okinmakak sapanoua miakej codornices. Pero israelitas amo okitlasojkamatilijkej Jehová ijkuak okichi non milagro. Yejuan otlaixnekiayaj ikinon se tonal uan tlajko okinmololojkej sapanoua miakej codornices. Jehová okualanki uan okintlajyouilti akinmej “otlaixnekiayaj” (Núm. 11:​31-34). ¿Tlen techmachtia tlen okichijkej israelitas? Moneki timomaluiskej para amo titlaixnekiskej. Tejuan moneki matiktemokan “tlen toTajtsin Dios kipatioita” uan ijkon okachi iuan timouikaskej. Noijki timouikaskej iuan Jesús maski tikpiaskej miak tlamantli noso amo (Mat. 6:​19, 20; Luc. 16:9). Tla ijkon tikchiuaskej uelis tikneltokaskej Jehová nochipa techmakas tlen moneki.

9. ¿Tlen moneki matikneltokakan?

⁹ Axkan Jehová noijki kineki kinpaleuis akinmej kitekichiuiliaj. Pero non amo kijtosneki amo keman techpolos tomin noso tlen tikkuaskej.b Pero matikneltokakan Jehová amo keman techkauas toselti. Ye nochipa techpaleuis matikixnamikikan tlen techpanos. Matikitakan tlen uelis tikchiuaskej para tikteititiskej tikneltokaj Jehová techmaluis ijkuak amo tikpiaskej tomin. Noijki tikitaskej tlen uelis tikchiuaskej para tikneltokaskej Jehová techmakas tlen moneki ijkuak tikokoxkatiskej noso tiueuejtiskej.

¿TLEN TECHPALEUIS IJKUAK AMO TIKPIASKEJ TOMIN?

10. ¿Tlen uelis techpanos?

¹⁰ Xamo okachi oui tikpiaskej tomin ijkuak okachi yitiyetoskej itlamian tonalmej. Uelis ijkon techpanos ijkuak kipiaj ouijkayotl políticos, ijkuak mochiuaj guerras, tlaxixini noso peua okseki kokolistli. Non tlamantli techouijtilis porque ayakmo tikpiaskej kanin titekipanoskej, uelis tikpoloskej tlen tikpiaj noso ayakmo tikpiaskej kanin tichantiskej. Ikinon xamo monekis tiktemoskej okse tekitl noso monekis oksekan tichantitiuij iuan tofamilia para tikpiaskej tlen moneki. ¿Tlen techpaleuis matikteititikan tikneltokaj Jehová ijkuak tikpejpenaskej tlen tikchiuaskej?

11. ¿Tlen techpaleuis matikmatikan tlen tikchiuaskej ijkuak amo tikpiaskej tomin? (Lucas 12:​29-31).

¹¹ Moneki matikiluikan Jehová tlen techtekipachoua (Prov. 16:3). Matikiluikan Jehová matechmaka ixtlamatilistli para kuali tikpejpenaskej tlen tikchiuaskej. Noijki matikiluikan matechyolseui para amo okachi ‘matimotekipachokan’ (xiktlajtolti Lucas 12:​29-31). Matiktlatlaujtikan matechpaleui matipakikan porque tikpiaj tlen moneki (1 Tim. 6:​7, 8). Matitlatemokan itech amatlajkuilolmej tlen tikinpiaj para tikmatiskej tlen tikchiuaskej ijkuak amo tikpiaskej tomin. Miakej yokinpaleui videos uan seki tlamachtilmej tlen katej itech jw.org porque ompa kijtoua tlen uelis tikchiuaskej ijkuak ijkon techpanos.

12. ¿Tlen moneki matimotlajtlanikan para kuali tikpejpenaskej tlen tikchiuaskej?

¹² Miakej okikajtejkej infamilia porque uejka otekipanotoj pero satepan okitakej amo kuali tlen okichijkej. Ikinon ijkuak tikpejpenaskej kanin titekipanoskej amo san matikitakan kech techtlaxtlauiskej. Noijki moneki matikitakan kox ok uelis tiktekichiuiliskej Jehová (Luc. 14:28). Matimotlajtlanikan: “¿Kox ok kuali nimouikas iuan nosiua noso nonamik tla uejka nitekipanoti? ¿Ok uelis nochipa nimonechikos, nitetlapouis uan niyetos inuan tokniuan?”. Tla tejuatsin tikinpia mokoneuan moneki ximotlajtlani: “¿Ken uelis ‘nikinmiskaltis, nikinyektlapouis uan nikinmachtis ken Jehová kineki’ tla amo inuan nika?” (Efes. 6:4). Matikiluikan toTajtsin Dios matechyekana ijkuak itlaj tikpejpenaskej tikchiuaskej uan amo matikchiuakan tlen techiluiaj tofamiliares noso toyolikniuan tlen amo moyekana ika principios bíblicos.c Se tokni itoka Tony uan chanti Asia ik kanin motlatia tonaltsin, miakej okiluijkej kitlaxtlauiskiaj miak tla yaskia tekipanoti itech okse altepetl. Ye omotlatlaujti uan omotlapoui iuan isiua uan okijto amo oksekan tekipanoti. Noijki okitakej tlen uelis kichiuaskiaj para amo kikouaskej tlen amo moneki. ¿Ken kita tokni tlen okichi? Ye okijto: “Miakej yonikinpaleui makixmatikan Jehová uan nokoneuan kinpaktia tlen tlamachtia Biblia. Yotikitakej Jehová techmaluia tla tikchiuaj tlen kijtoua Mateo 6:33”.

¿TLEN TECHPALEUIS MATIKMATIKAN TLEN TIKCHIUASKEJ IJKUAK TIKOKOXKATISKEJ NOSO TIUEUEJTISKEJ?

13. ¿Tlen uelis tikchiuaskej para satepan tikpiaskej tlen moneki?

¹³ Noijki uelis tikitaskej oui tikneltokaskej Jehová techmaluis ijkuak timokuayejyekoskej tlen tikchiuaskej ijkuak tikokoxkatiskej noso tiueuejtiskej. Biblia kijtoua kuali matitekipanokan para satepan tikpiaskej tlen moneki (Prov. 6:​6-11). Ikinon tla tiuelij matiktlatikan seki tomin tlen satepan uelis ika timopaleuiskej. Tejuan tikmatij tomin uelis techpaleuis pero amo san non tiktemojtokej (Ecl. 7:12).

14. ¿Ken techpaleuia Hebreos 13:5 matikmatikan tlen tikchiuaskej ijkuak tikokoxkatiskej noso tiueuejtiskej?

¹⁴ Jesús okijto se neskayotl para kiteititis amitlaj ipati “akin kipia miak tlamantli patio, pero amitlaj kipia ixpan toTajtsin Dios” (Luc. 12:​16-21). Porque amo tikmatij tlen techpanos satepan (Prov. 23:​4, 5; Sant. 4:​13-15). Jesús okijto moneki makikauakan tlen kipiaj akinmej kinekij kichiuaskej ijkon ken ye kichiua (Luc. 14:33). Tokniuan tlen okatkaj achto siglo okikajkej tlen okipiayaj pero opakej ijkuak ijkon okichijkej (Heb. 10:34). Axkan noijki miakej tokniuan yokipolojkej inteki noso tlen okipiayaj porque amo mokajkalakiaj itech política (Apoc. 13:​16, 17). Pero yejuan kiteititiaj kineltokaj tlen Jehová okijto: “Amo keman nimitskauas uan nochipa nimitspaleuis” (xiktlajtolti Hebreos 13:5). Ikinon timochijchikauaj tikpiaskej tlen monekis ijkuak tikokoxkatiskej noso tiueuejtiskej pero tikneltokaj Jehová techmaluis tla techpanos itlaj tlen amo tikchiaj.

15. ¿Ken moneki kinpaleuiskej tetajmej inkoneuan? (Noijki xikinmita fotos).

¹⁵ Itech seki altepemej kinpiaj miakej inkoneuan porque kinekij makinpaleuikan ijkuak kokoxkatiskej noso ueuejtiskej. Pero Biblia kijtoua tetajmej moneki makinmakakan inkoneuan tlen moneki (2 Cor. 12:14). Xamo telpochmej uan ichpochmej monekis kinpaleuiskej inpapanuan uan kinmakaskej tomin noso okseki tlamantli ijkuak kokoxkatiskej noso ueuejtiskej. Miakej ijkon kinpaleuiaj inpapanuan uan kichiuaj ika nochi inyolo (1 Tim. 5:4). Pero tetajmej tlen kichiuaj ken Cristo okachi pakij ijkuak kinpaleuia inkoneuan makitekichiuilikan Jehová. Ikinon amo kichiaj inkoneuan okachi makitlanikan tomin para uelis kinmaluiskej ijkuak kokoxkatiskej noso ueuejtiskej (3 Juan 4).

16. ¿Ken uelis kinpaleuiskej tetajmej inkoneuan? (Efesios 4:28).

¹⁶ Xikinmititikan namokoneuan makineltokakan Jehová ijkuak kimotlaniliskej tlen ika mopanoltiskej ijkon ken namejuan nankichiuaj. Xikinmititikan kuali matekipanokan ijkuak nankinmiskaltiskej (Prov. 29:21; xiktlajtolti Efesios 4:28). Uelis nankintemoskej principios bíblicos itech amatlajkuilolmej para nankinpaleuiskej namokoneuan makimatikan kox momachtiskej miak. Moneki xikinpaleuikan namokoneuan makimatikan tlen kichiuaskej para kipiaskej tlen ika mopanoltiskej. Ijkon okachi uelis tetlapouiskej noso tlapaleuiskej ken precursores.

17. ¿Tlen tikneltokaj kichiuas Jehová?

¹⁷ Akinmej tiktekichiuiliaj Jehová tikmatij ye kineki techmakas tlen ika timopanoltiskej. Okachi monekis ijkon matikneltokakan ijkuak okachi yitiyetoskej itlamian tonalmej. Jehová kipia chikaualistli para techmakas tlen moneki maski san tlen tlamantli techpanos. Ikinon tikneltokaj ye techpaleuis maski san kanin tiyetoskej.