“Axkan xikpejpenakan akin nankinekij nankitekichiuiliskej”

1. ¿Tlen moneki tikchiuaskej tla tiknekij tiyolpakiskej uan tleka? (Isaías 48:​17, 18).

TOTAJTSIN DIOS sapanoua techtlasojtla ikinon kineki kuali matiyetokan axkan uan satepan (Ecl. 3:​12, 13). Tikmatij tikchiuaskej seki tlamantli porque ye ijkon otechchijchi. Pero Jehová amo otechchijchi san toselti matimonauatikan nion technamiki matikijtokan tlen kuali noso tlen amo kuali (Ecl. 8:9; Jer. 10:23). Ye kimati tiyolpakiskej tla tiktekichiuiliskej uan tiktlakamatiskej (xiktlajtolti Isaías 48:​17, 18).

2. ¿Tlen kineki Satanás matikneltokakan uan tlen yokichi Jehová?

² Satanás kineki matikneltokakan okachi tipakiskej tla san tejuan timonauatiskej uan amo moneki matechnauati Jehová (Gén. 3:​4, 5). Ikinon Jehová kinkauilia inselti mamonauatikan akinmej amo tetlakamatij uan ijkon kiteititia amo melauak tlen kijtoua Satanás. Pero amo nochipa ijkon monauatijtoskej. Axkan sapanoua titlajyouiaj porque amikaj kuali monauatia. Biblia techiluia miakej tlakamej uan siuamej opakej ijkuak okitekichiuiliayaj Jehová. Pero Jesús okachi opakik okitekichiuili toTajtsin Dios. Achto tikitaskej tleka Jesús okipejpenki kitekichiuilis Jehová. Noijki tikitaskej tleka san Jehová kinamiki matikueyichiuakan. Saiktlami tikitaskej tleka otikpejpenkej tiktekichiuiliskej Jehová.

¿TLEKA JESÚS OKIPEJPENKI KITEKICHIUILIS JEHOVÁ?

3. ¿Tlen okijto Satanás kimakaskia Jesús uan ye tlen okichi?

³ Jesús omonekiaya kipejpenas akin kitekichiuilis ijkuak okatka nikan tlaltikpak. Ijkon omonekiaya kichiuas porque ijkuak omoapolakti, Satanás “okinmititi altepemej uan nochi tlen okipiayaj” uan okilui nochi kimakaskia tla ixpan motlankuaketsaskia uan san se uelta kiueyichiuaskia. Pero Jesús okinankili: “¡Xio Satanás! Porque iTlajtol Dios kijtoua: ‘Xikueyichiua Jehová moDios uan san ye xiktekichiuili’” (Mat. 4:​8-10). Matikitakan tleka Jesús okipejpenki ijkon kichiuas.

4, 5. ¿Tleka Jesús okipejpenki kitekichiuilis Jehová?

⁴ Jesús okipejpenki kitekichiuilis iTajtsin ika nochi iyolo (Juan 14:31). Noijki kitekichiuilia porque kimati non tlen okachi kuali (Juan 8:​28, 29; Apoc. 4:11). Jesús kimati Jehová otechmakak toyolilis, techmaka miak tlamantli uan uelis tikneltokiliskej tlen kijtoua (Sal. 33:4; 36:9; Sant. 1:17). Noijki Jehová nochipa kiluia tlen melauak uan okimakak nochi tlen okipiaya (Juan 1:14). Pero Satanás san otechtemoli mikilistli, san tlakajkayaua uan san kitekipachoua tlen ye kineki (Juan 8:44). Jesús kuali kixmati Jehová uan Satanás. Pero Jesús amo keman omokuayejyeko kichiuas ijkon ken Satanás nion okijto kixnamikis Jehová (Filip. 2:​5-8).

⁵ Jesús noijki okipejpenki kitekichiuilis Jehová porque okimatiaya non tlapaleuiskia mamoyektlali miak tlamantli (Heb. 12:2). Ye okimatiaya tla tetlakamatiskia tlapaleuiskia mamochipaua itoka toTajtsin Dios. Noijki tlapaleuiskia mapojpoliui nochi tlen kichiua Satanás.

¿TLEKA SAN JEHOVÁ KINAMIKI MATIKUEYICHIUAKAN?

6, 7. ¿Tleka miakej amo kitekichiuiliaj Jehová uan tleka san ye kinamiki matikueyichiuakan?

⁶ Miakej amo kitekichiuiliaj Jehová porque amo kixmatij. Amo kimatij ken iyelis uan amo kimatij tlen kichiua para kinpaleuis. Ijkon okinpanok akinmej okintlapoui apóstol Pablo ompa Atenas (Hech. 17:​19, 20, 30, 34).

⁷ Pablo okinyekilui akinmej ochantiayaj Atenas, toTajtsin Dios “kichiua tinochtin matiyoltokan, kichiua matimijyotikan uan techmaka nochi tlen onka”. Noijki okinmilui “ye kichiua nikan matiyetokan, matimolinikan uan matiyoltokan”. Saiktlami okinyekilui “san ika se tlakatl okinchijchi nochtin tlen pouij itech altepemej”. Ikinon san ye kinamiki matikueyichiuakan porque ye otechchijchi (Hech. 17:​25, 26, 28).

8. ¿Tlen amo kichiua Jehová?

⁸ Jehová otechchijchi uan ye kajki tekiua ipan nochi tlen onka. Ikinon uelis technauatiskia matiktekichiuilikan pero ye amo ijkon kichiua. Ye kineki miakej iuan mamouikakan uan nochipa matipakikan (1 Tim. 2:​3, 4). Ikinon okitlali miak tlamantli tlen kiteititia ye melauak kajki uan techtlasojtla miak. Techmachtia para matikinmachtikan oksekimej nochi tlen ye kineki kichiuas uan matikinmiluikan nochi tlen inpatka kichiuas (Mat. 10:​11-13; 28:​19, 20). Techtlalia matipouikan itech se tlanechikol kanin tikueyichiuaj. Noijki kintlalia tlayekankej matechpaleuikan porque yejuan techtlasojtlaj (Hech. 20:28).

9. ¿Ken kiteititia Jehová techtlasojtla?

⁹ Jehová noijki kiteititia sapanoua kintlasojtla akinmej amo kineltokaj ye kajki. Yimiak xiuitl miakej inselti kipejpenaj monauatiskej. Pero Jehová sapanoua yolkuali uan kinmaka tlen ika mopanoltiskej uan mapakikan (Mat. 5:​44, 45; Hech. 14:​16, 17). Ye kinteochiua porque kinpiaj infamilias tlen kintlasojtlaj, kinpiaj inkoneuan, kinpiaj inyolikniuan uan pakij ijkuak tekipanouaj (Sal. 127:3; Ecl. 2:24). Non techititia toTajtsin Dios tinochtin techtlasojtla (Éx. 34:6). Axkan matikitakan tleka otikpejpenkej tiktekichiuiliskej Jehová uan ken techteochiua.

¿TLEKA OTIKPEJPENKEJ TIKTEKICHIUILISKEJ JEHOVÁ?

10. (1) ¿Tleka otikpejpenkej tiktekichiuiliskej Jehová? (Mateo 22:37). (2) ¿Ken yomitspaleui Jehová kimati mochias uan techtlapojpoluia? (Salmo 103:​13, 14).

¹⁰ Tejuan tiktekichiuiliaj Jehová porque tiktlasojtlaj ika nochi toyolo ijkon ken kichiua Jesús (xiktlajtolti Mateo 22:37). Ijkuak okachi tikixmatij Jehová, okachi techpaktia ken kipia iyelis. Matikitakan tleka ijkon tikijtouaj. Ye kimati mochias uan techtlapojpoluia. Ijkuak israelitas amo okitlakamatiayaj, ye okintlatlaujtiaya ayakmo makichiuakan tlen amo kuali (Jer. 18:11). Jehová kilnamiktok tejuan titlajtlakolejkej (xiktlajtolti Salmo 103:​13, 14). Ijkuak tikmatij Jehová kipia kualtsin iyelis uan kimati mochias, tiknekij nochipa tiktekichiuiliskej.

11. ¿Tlen okseki tlamantli otechpaleui matikpejpenakan matiktekichiuilikan Jehová?

¹¹ Tejuan tiktekichiuiliaj Jehová porque tikmatij non tlen okachi kuali moneki tikchiuaskej (Mat. 4:10). Noijki ijkuak amo tikkauaj Jehová, tikmatij tlapaleuia mamochipaua itoka, tikyolpaktiaj uan tikteititiaj Satanás san tlakajkayaua. Noijki satepan uelis nochipa tiktekichiuiliskej Jehová tla axkan tikpejpenaskej ijkon tikchiuaskej (Juan 17:3).

12, 13. ¿Tlen techmachtia tlen okinpanok Yanet uan Pamela?

¹² Uelis tiktlasojtlaskej Jehová desde ijkuak peua timoskaltijtiuij uan satepan okachi uelis tiktlasojtlaskej. Matikitakan tlen okipanok Yanet uan ikni tlen motokayotia Pamela.a Yanet opejki momachtia Biblia ijkuak okipiaya 11 xiuitl uan ikni okipiaya majtlaktli xiuitl. Inpapauan amo okinekej momachtiskej Biblia pero okinmiluijkej kinkauiliskiaj tokniuan makinmachtikan. Pero okinmiluijkej uelis ijkon kichiuaskiaj tla chichikometika ok inuan yaskiaj teopan. Yanet okijto: “Tlen onechmachtijkej iTlaixpantijkauan Jehová onechpaleui manitlaxiko ijkuak onechiluiayaj manikchiua seki tlamantli akinmej inuan onimomachtiaya. Noijki onechpaleui amo manikyeko drogas nion maniauilnemi”.

¹³ Yanet uan Pamela opejki tetlapouiaj ijkuak okatkaj ichpochmej. Opanok seki xiuitl uan opejki tlapaleuiaj ken precursoras regulares uan noijki okinmaluiayaj inpapanuan tlen yokipiayaj miak xiuitl. Yanet ok kilnamiki tlen opanok uan okijto: “Onikitak Jehová kichiua tlen kijtoua 2 Timoteo 2:19. Ompa kijtoua: ‘Jehová kinmixmati akinmej iaxkauan’ ikinon ye kinmaluia iyolikniuan”. Non techititia Jehová kinmaluia akinmej kipejpenaj kitekichiuiliskej porque kitlasojtlaj.

14. ¿Ken uelis titlapaleuiskej mamochipaua itoka toTajtsin Dios? (Noijki xikinmita fotos).

¹⁴ Tejuan tiknekij titlapaleuiskej mamochipaua itoka toTajtsin Dios. Matikitakan tleka ijkon tikijtouaj. Matikijtokan tikpiaj se toyolikni tlen tetlasojtla, kipaktia kitemakas tlen kipia uan tetlapojpoluia. Pero se tonal ikaj kijtojtinemi toyolikni amo yolkuali uan tlakajkayaua. ¿Tlen tikchiuaskej? Tejuan san niman tikpaleuiskej porque tikmatij amo melauak tlen kijtojtinemij. Noijki ijkon tikchiuaj ijkuak kijtouaj Jehová amo yolkuali uan tikpaleuiaj ika nochi toyolo uan tikteititiaj amo melauak tlen kijtojtinemij (Sal. 34:1; Is. 43:10). Tlen tikijtouaj uan tlen tikchiuaj kiteititia tiknekij tiktekichiuiliskej Jehová ika nochi toyolilis.

15. ¿Tlen tlateochiualistli okiseli Pablo porque okipatioitak kitekichiuilis Jehová? (Filipenses 3:​7, 8).

¹⁵ Pablo amo okipatioitak ueyititos itech inreligión judíos. Ye okachi okipatioitak kichiuas ken Cristo uan kitekichiuilis Jehová (Gál. 1:14). Ikinon oyolpakik uan noijki okipejpenkej matlanauati iuan Cristo ompa iluikak. Ye nochipa okipatioitak kitekichiuilis Jehová uan amo keman okilnamik tlen okika uan tejuan noijki ijkon matikchiuakan (xiktlajtolti Filipenses 3:​7, 8). Noijki tiknekij tikpatlaskej seki tlamantli para okachi tiktekichiuiliskej Jehová uan tikyolpaktiskej.

16. ¿Tlen techmachtia tlen okichi Julia? (Noijki xikinmita fotos).

¹⁶ Jehová okachi techteochiuas axkan uan noijki satepan tla okachi tiktekichiuiliskej. Matikitakan tlen okichi se tokni itoka Julia. Ye otlakuikaya teopan inuan oksekimej ijkuak okatka takotsin. Julia kualtsin otlakuikaya ikinon opejki okachi kimachtiaj matlakuika ópera. Satepan miakej okixmatkej uan otlakuikaya kanin tlakuikaj akinmej ueyititokej. Ijkuak ye oyaya momachtiti kanin okimachtiayaj ken tlakuikas, se tokni tlen iuan omomachtiaya okitlapoui akin toTajtsin Dios uan okiyekilui ye itoka Jehová. Julia opejki momachtia iTlajtol toTajtsin Dios ome uelta sejse semana. Satepan okijto ayakmo tlakuikaskia ópera porque okinekiaya kitekichiuilis Jehová. Okitak oui kikauas tlakuikas. Ye okijto: “Miakej onechiluiayaj amo kuali tlen onikpejpenki nikchiuas pero ne oniknekiaya niktekichiuilis Jehová”. Yopanok treinta xiuitl. ¿Tlen mokuayejyekoua Julia? Ye okijto: “Nipaki uan nikmati Jehová satepan nechpaleuis manikchiua nochi tlen nikneki” (Sal. 145:16).

NOCHIPA MATIKTEKICHIUILIKAN JEHOVÁ

17. ¿Tlen moneki tikchiuaskej akinmej tiktekichiuiliaj Jehová uan tlen kinmilnamiktia akinmej amo kitekichiuiliaj?

¹⁷ Ayakmo miak poliui uan tlamis nochi tlen axkan panotok. Apóstol Pablo okijkuilo: “Porque ‘san niman’ ‘ajsiki akin uits uan amo uejkauas’” (Heb. 10:37). ¿Tlen techilnamiktia tlen okijto Pablo? Achto techilnamiktia oksekimej moneki kipejpenaskej kitekichiuiliskej Jehová porque ayakmo mokaua miak tonal (1 Cor. 7:29). Noijki techilnamiktia tla yotikpejpenkej tiktekichiuiliskej Jehová, nochipa matiktekichiuilikan maski tikixnamikiskej miak tlamantli uan matikilnamiktokan amo nochipa ijkon techpanotos.

18. ¿Tlen kichiaj Jehová uan Jesús nochipa matikchiuakan?

¹⁸ Jesús okinpaleui oksekimej mamochiuakan idiscípulos uan okinmilui nochipa makichiuakan tlen okinmachti (Mat. 16:24). Ikinon nochipa matimochijchikauakan matiktekichiuilikan Jehová maski yimiak xiuitl tiktekichiuilijtokej. Ijkon matikchiuakan maski ualeua tikitaj oui. Nochipa tipakiskej tla tiktekichiuiliskej uan ye techteochiuas (Sal. 35:27).

19. ¿Tlen techmachtia tlen okipanok Genaro?

¹⁹ Miakej kineltokaj moneki kikauaskej miak tlamantli para kitekichiuiliskej Jehová. Telpochmej uan ichpochmej, ¿nankitaj oui nankitekichiuiliskej toTajtsin Dios? Se telpochtli itoka Genaro okijto: “Onimokuayejyekouaya tiiTlaixpantijkauan Jehová amo techkauiliaj matikchiuakan miak tlamantli. Porque akinmej inuan onimoskalti oyayaj kanin oiluichiuayaj, onemiayaj inuan ichpochmej uan omauiltiayaj videojuegos tlen mota momiktiaj. Pero ne san onimonechikouaya uan onitetlapouiaya”. ¿Ken okijtlako Genaro tlen omokuayejyekouaya? Ye okijto: “Opejki nikpia ome noixko pero amo uejkika onimoyolpakti. Kuali onikmatiaya amo oniyolpakiaya ijkuak ijkon onikchiuaya. Opejki nikilnamiki tlen tlamachtia Biblia uan onimokuayejyeko ken nechpaleuiskia tla nikchiuaskia tlen ompa kijtoua. Ikinon onikijto niktekichiuiliskia Jehová ika noyolo. Ijkuakon opejki nikita Jehová nechkaki uan nechnankilia ijkuak niktlatlaujtia”.

20. ¿Tlen tiknekij nochipa tikchiuaskej?

²⁰ Akin okijkuilo Salmo okitlakuikili Jehová: “Mayolpaki tlakatl tlen te otikpejpenki uan tikualika para machanti mokaltempa” (Sal. 65:4). Ikinon matikijtokan ijkon ken Josué okijto: “Ne uan akinmej nouan chantij tiktekichiuiliskej Jehová” (Jos. 24:15).