TLAMACHTIL 15
TLAKUIKALI 30 Noyolikni, noTajtsin uan noDios
Techpaleuia matimouikakan iuan toTajtsin Dios
“Nimotokis itech toTajtsin Dios non okachi kuali” (SAL. 73:28).
NIN TLEN TIMOMACHTISKEJ
¿Tlen tikchiuaskej tla tiknekij okachi timouikaskej iuan toTajtsin Dios uan ken techpaleuis tla ijkon tikchiuaskej?
1, 2. (1) ¿Tlen tikchiuaskej tla tiknekij tikpiaskej se toyolikni? (2) ¿Tlen timomachtiskej?
XAMO tikilnamikij tlen otikchijkej para tikpiaskej se toyolikni. Xamo miak tonal iuan otikatkaj, otechilui nochi tlen yokipanok, otikmatkej tlen kipaktia uan tlen amo kipaktia. Noijki otikitakej kipia kualtsin iyelis uan xamo otiknekiayaj noijki ijkon tikpiaskej toyelis. Nochi non tlamantli otechpaleui okachi matiktlasojtlakan.
2 Moneki timochijchikauaskej tla tiknekij tikpiaskej se toyolikni. Noijki ijkon moneki timochijchikauaskej tla tiknekij timouikaskej iuan Jehová. Axkan timomachtiskej ken uelis okachi timouikaskej iuan toTajtsin Dios porque ye okachi kuali toyolikni. Achto tikitaskej tleka miak ipati matimouikakan iuan Jehová.
3. Xikyekijto tleka miak ipati matimokuayejyekokan ken techpaleuia timouikaskej iuan Jehová.
3 Miak ipati matimokuayejyekokan ken techpaleuia timouikaskej iuan Jehová (Sal. 63:6-8). Matikitakan tleka ijkon tikijtouaj. Tejuan tikmatij kuali tiyetoskej tla tikkuaskej tlakuali tlen techpaleuia. Noijki techpaleuia ijkuak tikonij atl, ijkuak tikchiuaj ejercicio uan ijkuak kuali tikochij. Pero miakej amo kichiuaj nin tlamantli uan mokokouaj. Amo oui tikchiuaskej nin tlamantli tla timokuayejyekoskej ken techpaleuis. Noijki ijkon techpaleuis tla timouikaskej iuan toTajtsin Dios. Okachi iuan timouikaskej tla timokuayejyekoskej ken techpaleuis tla ijkon tikchiuaskej (Sal. 119:27-30).
4. ¿Tlen okijto se salmista itech Salmo 73:28?
4 (Xiktlajtolti Salmo 73:28). Akin okijkuilo Salmo 73 opouiaya iuan ifamilia Leví uan otlatsotsonaya itech templo. Xamo yimiak xiuitl okitekichiuiliaya Jehová. Pero okajsikamatki omonekiaya kilnamiktos ken okipaleuiaya mouikas iuan Jehová. Ye noijki okinekiaya makitakan oksekimej ken kinpaleuiskia tla mouikaskiaj iuan toTajtsin Dios. Axkan matikitakan ken techpaleuis tla noijki ijkon tikchiuaskej.
TIPAKIJ IJKUAK TIMOUIKAJ IUAN TOTAJTSIN DIOS
5. (1) ¿Tleka tipakij ijkuak timouikaj iuan Jehová? (2) ¿Ken techpaleuia tla tiktlakamatij tlen kijtoua iTlajtol toTajtsin Dios? (Proverbios 2:6-16).
5 Okachi tipakiskej tla okachi timouikaskej iuan Jehová (Sal. 65:4). ¿Tleka ijkon tikijtouaj? Porque techpaleuia kuali matiyetokan tla tiktlakamatij tlen kijtoua iTlajtol. Non techpaleuia amo matimouikakan inuan akinmej amo kitekichiuiliaj toTajtsin Dios uan amo matitlajtlakolchiuakan (xiktlajtolti Proverbios 2:6-16). Ikinon Biblia kijtoua: “Mayolpaki tlakatl tlen kipia ixtlamatilistli uan tlakatl tlen kimati tlen kuali uan tlen amo kuali” (Prov. 3:13).
6. ¿Tleka ayakmo opakiaya akin okijkuilo salmo?
6 Pero non amo kijtosneki amo keman moyolkokoskej akinmej mouikaj iuan Jehová. Ijkon okipanok akin okijkuilo Salmo 73 ijkuak okitak amo kuali tlen okichiuayaj oksekimej. Ye okualaniaya ijkuak okitaya okachi kuali okatkaj akinmej amo okitekichiuiliayaj toTajtsin Dios. Noijki hasta okinekiaya kipias tlen yejuan okipiayaj. Ye omokuayejyekouaya okachi okipiayaj miak tlamantli akinmej amo yolkualmej, akinmej otetlajyouiltiayaj uan akinmej omoueyinekiayaj. Noijki okitaya amo omokokouayaj nion otlajyouiayaj. Pero amo melauak tlen ye omokuayejyekouaya (Sal. 73:3-7, 12). Sapanoua omotekipachouaya ikinon okijtouaya san nenka okitekichiuiliaya toTajtsin Dios. Sapanoua omoyolkokouaya uan okijto: “San nenka nikpia chipauak noyolo uan amo nikchiua tlen amo kuali” (Sal. 73:13).
7. ¿Tlen techpaleuis oksepa matipakikan? (Noijki xikita dibujo ).
7 Akin okijkuilo salmo omoyolkokouaya pero itlaj okichi para ayakmo ijkon momachiliskia. Ye okalak kanin okiueyichiuayaj Jehová uan ye okipaleui makipatla ken omokuayejyekouaya (Sal. 73:17-19). Jehová kimati ijkuak timoyolkokouaj porque iuan timouikaj. Ikinon matikiluikan matechyekana uan matikselikan tlen techiluia iTlajtol uan tlen techiluiaj tokniuan. Ijkon uelis tiktekichiuiliskej maski timoyolkokoskej. Jehová noijki techyolseuis ijkuak sapanoua timotekipachoskej (Sal. 94:19).a
Levita tlen okijkuilo Salmo 73 oyajki kanin okiueyichiuayaj Jehová. (Xikita párrafo 7).
TECHPALEUIA MATIPAKIKAN IJKUAK TIMOUIKAJ IUAN TOTAJTSIN DIOS UAN TIKMATIJ MOCHIUAS TLEN TIKCHIAJ
8. ¿Ken techpaleuia timouikaskej iuan Jehová?
8 Noijki techpaleuia matipakikan ijkuak okachi timouikaj iuan toTajtsin Dios. Noijki techpaleuia matikneltokakan melauak mochiuas tlen tikchiaj (Jer. 29:11). Matikitakan ken techpaleuia.
9. ¿Tleka techpaleuia matipakikan ijkuak timouikaj iuan Jehová?
9 Techpaleuia matipakikan ijkuak okachi timouikaj iuan Jehová. Miakej kijtouaj amo kajki toTajtsin Dios ikinon amo kimatij tleka nikan tikatej uan kineltokaj satepan ayakmo ikaj chantis nikan tlaltikpak. Pero tejuan yotimomachtijkej itech iTlajtol toTajtsin Dios “ye kajki uan kinteochiua akinmej mochijchikauaj kitemouaj” (Heb. 11:6). Tejuan tiknekij tikueyichiuaskej Jehová porque ijkon okitlali toyolipan ikinon tipakij ijkuak tiktekichiuiliaj (Deut. 10:12, 13).
10. ¿Tlen tikchiaj akinmej tiktekichiuiliaj Jehová ijkon ken kijtoua Salmo 37:29?
10 Miakej amo kimatij kox kuali tiyetoskej satepan. Yejuan san kintekipachoua tekipanoskej, kinmiskaltiskej inkoneuan uan kitlaniskej tomin para kipiaskej tlen ika mopanoltiskej ijkuak yikipiaskej miak xiuitl. Yejuan amo kimatij tlen kichiuas satepan toTajtsin Dios. Pero tejuan tlen tiktekichiuiliaj Jehová tikneltokaj ye techmaluis (Sal. 25:3-5; 1 Tim. 6:17). Tikneltokaj toTajtsin Dios porque iuan timouikaj uan noijki tikneltokaj kichiuas tlen yokijto. Tikchixtokej tikseliskej miak tlamantli itech xochitlali. Pero okachi tikchiaj nochipa tikueyichiuaskej Jehová (xiktlajtolti Salmo 37:29).
11. ¿Ken techpaleuia timouikaskej iuan toTajtsin Dios uan ken momachilia ijkuak ijkon tikchiuaj?
11 Noijki techpaleuia matimouikakan iuan toTajtsin Dios porque ye techiluia techtlapojpoluis tla titlajtlakolchiuaskej. Ijkon kichiuas tla timoyolkopaskej (Is. 1:18). Non techpaleuia amo matechkuejsojto totlalnamikilis tla otitlajtlakolchijkej (Sal. 32:1-5). Noijki kuali timomachiliaj porque tikyolpaktiaj Jehová (Prov. 23:15). Ye techteochiua miak ijkuak iuan timouikaj. ¿Tlen moneki tikchiuaskej tla tiknekij okachi iuan timouikaskej?
¿TLEN MONEKI TIKCHIUASKEJ TLA TIKNEKIJ OKACHI TIMOUIKASKEJ IUAN JEHOVÁ?
12. ¿Tlen moneki tikchiuas tla tikneki okachi timouikas iuan Jehová?
12 Tla tejuatsin yotimoapolakti kijtosneki yotikixmatki Jehová uan Jesucristo, ayakmo titlajtlakolchiua, tikteititia tikneltoka toTajtsin Dios uan timochijchikaua tikintlakamatis itlanauatiluan. Ikinon kuali timouika iuan toTajtsin Dios pero ok moneki tikchijtos nin tlamantli tla tikneki okachi iuan timouikas (Col. 2:6).
13. ¿Tlen okseki tlamantli techpaleuis okachi matimouikakan iuan Jehová?
13 ¿Tlen okseki tlamantli techpaleuis okachi matimouikakan iuan Jehová? Moneki tiktlajtoltiskej uan timomachtiskej Biblia. Pero amo san moneki tikmatiskej akin toTajtsin Dios. Noijki matimochijchikauakan matikajsikamatikan tlen kineki kichiuas uan matikintlakamatikan itlanauatiluan (Efes. 5:15-17). Noijki matimokuayejyekokan Jehová yokiteititi techtlasojtla uan non techpaleuis okachi matikneltokakan. Saiktlami matikkokolikan tlen kikokolia uan amo matimouikakan inuan akinmej kichiuaj tlen amo kuali (Sal. 1:1; 101:3).
14. ¿Ken uelis mojmostla tikyolpaktiskej Jehová? (1 Corintios 10:31; noijki xikinmita fotos).
14 (Xiktlajtolti 1 Corintios 10:31). Miak ipati matikchiuakan tlen kipaktia Jehová. Amo san ijkon matikchiuakan ijkuak titetlapouiaj uan ijkuak timonechikouaj. Moneki mojmostla makiyolpakti nochi tlen tikchiuaj. Tejuan tikmatij amo kipaktia matitlakajkayauakan uan kineki matikinmakakan oksekimej tlen tikpiaj (2 Cor. 8:21; 9:7). Noijki kineki matikpatioitakan toyolilis porque ye otechmakak. Ikinon tikchiuaj seki tlamantli para amo timokokoskej. Noijki amo sapanoua titlakuaj nion titlakonij miak. Jehová okachi techtlasojtla ijkuak kita timochijchikauaj tiktlakamatiskej (Luc. 16:10).
Tikyolpaktiskej Jehová tla kuali tikuikaj tocarro, tla tikchiuaj ejercicio, tla tikkuaj tlakuali tlen techpaleuis uan tla tiktemakaj tlen tikpiaj. (Xikita párrafo 14).
15. ¿Ken kineki Jehová matikinmitakan oksekimej?
15 Jehová kinmiknomati akinmej kichiuaj tlen kuali uan akinmej kichiuaj tlen amo kuali (Mat. 5:45). Ikinon ye noijki kineki matikinmiknomatikan uan amo matikinteneuakan. Noijki amo inuan matimokualanikan uan nochipa ‘matiyetokan tiyolyamankej inuan oksekimej’ (Tito 3:2). Ikinon tejuan amo tikijtouaj okachi tikmatij miak tlamantli uan amitlaj kimatij akinmej amo tlaneltokaj (2 Tim. 2:23-25). Ijkon okachi timouikaskej iuan Jehová tla tikinmiknomatij oksekimej.
MATIMOTOKIKAN INAUAK JEHOVÁ IJKUAK TIMOYOLKOKOSKEJ
16. ¿Ken omomachili akin okijkuilo Salmo 73?
16 ¿Tlen tikchiuaskej tla ualeua tikmachiliaj ayakmo okachi timouikaj iuan Jehová? Matikilnamikikan tlen okipanok akin okijkuilo Salmo 73. Ye okijto: “Nokxiuan oksekan yonechuikayaj uan yoniuetsiaya” (Sal. 73:2). Ye okijto oyolchichiak, amo kuali omokuayejyekouaya uan ixpan Jehová omomachiliaya ken se yolkatl tlen san tlen amo kichiua (Sal. 73:21, 22). ¿Omokuayejyeko Jehová ayakmo kitlasojtlaskia porque okatka tlajtlakole?
17. (1) ¿Tlen okichi salmista ijkuak omoyolkoko? (2) ¿Tlen techmachtia tlen okipanok? (Noijki xikinmita fotos).
17 Akin okijkuilo salmo amo uejkika omokuayejyeko ayakmo okachi omouikaya iuan Jehová. Ye okimatiaya omonekiaya mouikas iuan toTajtsin Dios maski omoyolkokouaya. Ijkon tikijtouaj porque ye okijto: “Pero axkan nochipa mouan nika uan te tikkitskijtok noyekma. Techyekana ika tlen techiluia uan satepan techueyitlalis” (Sal. 73:23, 24). Tejuan noijki matimotokikan inauak Jehová ijkuak timoyolkokoskej porque ye yetoskia ken se tepexitl tlen techpaleuis kuali matimomachilikan (Sal. 73:26; 94:18). Ikinon matikneltokakan uelis oksepa timouikaskej iuan Jehová maski timotlapololtiskej porque ye “tetlapojpoluia” (Sal. 86:5). Moneki okachi matimouikakan iuan toTajtsin Dios ijkuak timoyolkokouaj (Sal. 103:13, 14).
Okachi matiktekichiuilikan toTajtsin Dios ijkuak tikmachiliaj ayakmo okachi iuan timouikaj. (Xikita párrafo 17).
NOCHIPA MATIMOUIKAKAN IUAN JEHOVÁ
18. ¿Tleka nochipa uelis okachi timouikaskej iuan Jehová?
18 Nochipa uelis okachi timouikaskej iuan Jehová uan okachi tikixmatiskej. Biblia kijtoua toTajtsin Dios sapanoua ixtlamatki uan kimati miak tlamantli uan tejuan amo uelis tikmatiskej nochi tlen kichiua (Rom. 11:33).
19. ¿Tlen techiluia Salmo 73?
19 Salmo 79:13 kijtoua: “Tejuan, akinmej tipouij itech moaltepe uan ichkamej tlen te tikintlamaka, nochipa monauak timotlasojkamatiskej uan tikinmatiltiskej moueyitilis nochtin akinmej nesiskej”. Ikinon nochipa matimouikakan iuan Jehová uan ye techteochiuas uan uelis tikijtoskej “noDios yetoskia ken se tetl tlen kimaluia noyolo uan ye nochipa yetos noaxka” (Sal. 73:26).
TLAKUIKALI 32 ¡Nochipa niyetos inauak Jehová!
a Akinmej moyolkokouaj xamo moneki kitatiuij se tepajti makinpaleui. Noijki uelis tiktlajtoltis revista Akin Tetlapouijtok núm. 1 2023 kanin techiluia tlen uelis kinpaleuis akinmej amo kuali momachiliaj.