Xikchiua ijkon ken okichi Marcos uan Timoteo

1, 2. ¿Tlen tlamantli amo kinkauiliskia Marcos uan Timoteo okachi makitekichiuilikan Jehová?

TIYOLPAKIJ tikinmitaj katej miakej telpochmej tlen kinekij kinpaleuiskej oksekimej (Sal. 110:3). Xamo te tikneki okachi tiktekichiuilis Jehová uan titlapaleuis kanin timonechikoua. Pero xamo timomojtia porque timokuayejyekoua mopatlas monemilis noso amo tikmati kanin kijtos Jehová xiktekichiuili. Xamo yomitsmakakaj se tekitl pero amo otikseli porque otikijto amo uelis tikchiuas. Amo ximotekipacho tla ijkon mitspanoua porque amo san te ijkon timomachilia.

² Marcos uan Timoteo noijki omomojtijkej porque amo okimatiayaj ken kinpaleuiskiaj oksekimej. Marcos ochantiaya iuan imama ijkuak Pablo uan Bernabé okiluijkej inuan mauia uejka matetlapouitij (Hech. 12:​12, 13, 25). Pero Marcos amo omomojti uan oyajki otetlapouito. Achto oyajki Antioquía iuan Pablo uan Bernabé uan satepan okachi uejka oyajkej (Hech. 13:​1-5). Noijki Timoteo ochantiaya inuan ipapanuan ijkuak Pablo okilui iuan matetlapouiti. Xamo Timoteo amo okinekiaya yas porque omokuayejyekouaya amo okimatiaya kichiuas miak tlamantli (noijki xikita 1 Corintios 16:​10, 11 uan 1 Timoteo 4:12). Pero ye oyajki iuan Pablo uan okiseli miak tlateochiualistli (Hech. 16:​3-5).

3. (1) ¿Ken tikmatij Pablo sapanoua okintlasojtlak Marcos uan Timoteo? (2 Timoteo 4:​6, 9, 11; noijki xikinmita dibujos). (2) ¿Tlen tlajtlanilmej tikinnankiliskej?

³ Marcos uan Timoteo omomachtijkej ken tlapaleuiskej itech tlanechikol ijkuak okatkaj telpochmej. Pablo sapanoua okintlasojtlak ninmej telpochmej ikinon okinekiaya iuan mayetokan ijkuak yiixpoliuiskia (xiktlajtolti 2 Timoteo 4:​6, 9, 11). ¿Tleka Pablo sapanoua okintlasojtlak Marcos uan Timoteo? ¿Ken kinpaleuis telpochmej tlen okichijkej Marcos uan Timoteo? ¿Ken kinpaleuis telpochmej tlen okijkuilo Pablo?

XIKINPALEUI OKSEKIMEJ IJKON KEN OKICHI MARCOS

4, 5. ¿Ken okiteititi Marcos okinekiaya tepaleuis?

⁴ Se amochtli kijtoua tikinpaleuiskej oksekimej kijtosneki nochipa timochijchikauaskej san niman titepaleuiskej. Marcos ijkon okichi. Xamo ye omoyolkoko ijkuak Pablo ayakmo okiuikak ijkuak oksepa uejka otetlapouito (Hech. 15:​37, 38). Pero ye ok okinpaleui tokniuan maski ijkon omomachiliaya.

⁵ Marcos oyajki oksekan otetlapouito iuan iprimo tlen omotokayotiaya Bernabé. Opanok kanaj once xiuitl uan Pablo okitsakej ompa Roma pero Marcos ompa iuan okatka para kipaleuis (Filem. 23, 24). Apóstol Pablo okitlasojkamatili Marcos porque okipaleui uan okijto ye ‘sapanoua okiyolchika’ (Col. 4:​10, 11).

6. ¿Ken okipaleui Marcos omouikak inuan tokniuan tlen okipiayaj chikauak intlaneltokilis? (Xikita nota).

⁶ Marcos sapanoua okipaleui omouikak inuan tokniuan tlen okipiayaj chikauak intlaneltokilis. Marcos okatka iuan Pablo ompa Roma pero satepan oyajki iuan Pedro tlen okatka ompa Babilonia. Yejuan kuali omouikakej ikinon Pedro okijto ye ‘okitaya ken ikone’ (1 Ped. 5:13). Ijkuakon Pedro okitlapoui Marcos tlen okipanok Jesús ijkuak okatka nikan tlaltikpak. Satepan Marcos okijkuilo itech Evangelio tlen kipia itoka.a

7. ¿Ken okipaleui Alberto tlen okichi Marcos? (Noijki xikita foto).

⁷ Marcos nochipa omochijchika okachi kitekichiuilis Jehová uan omouikak inuan tokniuan tlen okipiayaj chikauak intlaneltokilis. ¿Ken mitspaleuis tlen okichi Marcos? Xamo yotikijto tikneki titlapaleuis kanin timonechikoua pero ayamo mitsmakaj seki tekitl. Tla ijkon mitspanoua ximochia uan xiktemo ken okachi tiktekichiuilis Jehová uan ken tikinpaleuis tokniuan. Matikitakan tlen okichi Albertob tlen axkan tlapaleuia ken tlayekanki. Ijkuak okatka telpochtli okachi okitaya ken otlapaleuiayaj tokniuan uan ye noijki okinekiaya ijkon kichiuas. Ikinon omoyolkokouaya ijkuak okitaya oksekimej telpochmej okinmakayaj seki tekitl uan ye amo. Satepan okinmilui tlayekankej ken omomachiliaya uan se tlayekanki okilui mamochijchikaua makinpaleui tokniuan maski oksekimej amo kitaj. Ikinon opejki kinpaleuia tokniuan tlen yikipiaj miak xiuitl uan noijki akinmej omonekiaya kinuikas mamonechikotij. Ye okijto: “Nikilnamiki opejki nipaki ijkuak onikinpaleuiaya tokniuan”.

XIKINMAJSIKAMATI TOKNIUAN IJKON KEN OKICHI TIMOTEO

8. ¿Tleka Pablo okipejpenki Timoteo? (Filipenses 2:​19-22).

⁸ Pablo omonekiaya oksepa tetlajpaloti kanin yokitlajyouiltijkaj ikinon omonekiaya kinuikas tokniuan tlen yolchikauakej. Achto okipejpenki Silas tlen yimiak xiuitl okitekichiuiliaya Jehová (Hech. 15:​22, 40). Satepan noijki okilui Timoteo iuan mauia. ¿Tleka okipejpenki non telpochtli? Porque ye okipiaya kuali iyelis (Hech. 16:​1, 2). Noijki Pablo okimatiaya Timoteo okitekipachouaya tlen okinpanouaya oksekimej (xiktlajtolti Filipenses 2:​19-22).

9. ¿Ken okiteititi Timoteo okitekipachouaya tlen okinpanouaya tokniuan?

⁹ Timoteo okachi okiteititi okitekipachouaya tlen okinpanouaya oksekimej ijkuak opejki tetlapouia iuan Pablo. Ikinon Pablo okikajte ompa Berea porque okimatiaya kinyolchikauaskia akinmej yikin omomachtijtokaj (Hech. 17:​13, 14). Silas okimachti miak tlamantli Timoteo porque iuan omoka ompa Berea. Satepan Pablo okitlanki Timoteo ompa Tesalónica makinyolchikauati tokniuan (1 Tes. 3:2). Opanok 15 xiuitl uan Timoteo sapanoua yokintlasojtlaya tokniuan. Sapanoua okintlasojtlaya ikinon hasta inuan ochokaya ijkuak ochokayaj (Rom. 12:15; 2 Tim. 1:4). ¿Ken uelis kichiuaskej telpochmej ijkon ken okichi Timoteo?

10. ¿Tlen okipaleui Gadiel makinmajsikamati tokniuan?

¹⁰ Se tokni tlen itoka Gadiel okinekiaya kimatis ken kinmajsikamatis tokniuan. Ijkuak okatka telpochtli okitaya oui motlapouis inuan tokniuan tlen yokipiayaj miak xiuitl. Ikinon san okintlajpalouaya ijkuak okinmitaya kanin timonechikouaj. Se tlayekanki okilui kipaleuiskia tla kinmiluiskia tokniuan tlen kualtsin kichiuaj. Tlayekanki noijki okilui mamokuayejyeko tlen kintekipachoua. Ye ijkon okichi uan axkan tlapaleuia ken tlayekanki. Okijto: “Axkan amo nikita oui nimotlapouis inuan nochtin tokniuan. Noijki kuali nimomachilia porque axkan nikajsikamati tlen kinpanoua uan ijkon nikmati ken nikinpaleuis ijkuak monekis”.

11. ¿Tlen uelis kichiuaskej telpochmej tla kinekij kinmajsikamatiskej tokniuan? (Noijki xikita foto).

¹¹ Te noijki uelis tikmatis ken tikinmajsikamatis tokniuan. Nochtin inuan ximotlapoui ijkuak timonechikoua. Xikintlajtlani ken katej uan kuali xikkaki tlen mitsiluiskej. Ijkon tikmatis ken tikinpaleuis satepan. Noijki xamo uelis tikmachtis se tokni iuan isiua tlen yikipia miak xiuitl makinejnekikan JW Library^® noso uelis tias inuan titetlapouiti. Tokniuan kitaskej tlen tikchiua para tikinpaleuis oksekimej.

MITSPALEUIS TLEN OKIJTO PABLO

12. ¿Tlen uelis tikchiuas tla tikneki noijki mamitspaleui tlen okijto Pablo?

¹² Pablo okitlasojtlaya Timoteo ken yetoskia ikone ikinon okilui tlen kipaleuiskia kuali mayeto uan kuali makitekichiuili toTajtsin Dios (1 Tim. 1:18; 2 Tim. 4:5). ¿Tlen uelis tikchiuas tla tikneki noijki mamitspaleui tlen okijto Pablo? Xikintlajtolti ome cartas tlen Pablo okinmijkuilili Timoteo. Ximokuayejyeko Pablo te omitsinmijkuilili uan xikita ken tikchiuas tlen ompa kijtoua. Matikitakan seki tlamantli tlen uelis tikchiuas.

13. ¿Tlen mitspaleuis xikueyichiua toTajtsin Dios?

¹³ “Ximochijchikaua xikueyichiua toTajtsin Dios” (1 Tim. 4:7b). ¿Tlen kijtosneki tikueyichiuas toTajtsin Dios? Kijtosneki amo keman tikkauas uan timochijchikauas tikchiuas tlen kipaktia. Pero moneki timochijchikauaskej tikchiuaskej nin tlamantli porque amo ijkon tinesij. ¿Tlen mitspaleuis ijkon xikchiua? Pablo okijto “ximochijchikaua”. Ika griego nin tlajtoli okinejnekiayaj para kijtoskej ken sapanoua omochijchikauayaj akinmej omotlatlaniayaj. Yejuan omochijchikauayaj kuali moyektlaliskej para tlatlaniskej. Tejuan noijki matimochijchikauakan matikchiuakan seki tlamantli tlen techpaleuis okachi matimouikakan iuan Jehová.

14. Xikyekijto tlen mitspaleuis xiktlajtolti Biblia.

¹⁴ Mojmostla xiktlajtolti Biblia uan xikilnamikto non mitspaleuis ximouika iuan Jehová. Matikitakan ken uelis tikchiuas. Ximokuayejyeko tiktlajtoltijtok ijkuak Jesús omotlapoui iuan tekiua tlen okatka telpochtli uan okipiaya miak tomin (Mar. 10:​17-22). Non telpochtli okineltokaya Jesús okatka Mesías pero amo omoyolchikauaya mochiuas idiscípulo. ITlajtol toTajtsin Dios kijtoua Jesús okiknomatki non telpochtli. Xamo timotlajtlania tleka Jesús okiyektlapoui. Ye okiknomatki porque okinekiaya kuali makipejpena tlen kichiuaskia non telpochtli. ¿Tlen kineki mitsmachtis Jehová? Jesús kiteititia iyelis iTajtsin ikinon tlen okilui telpochtli okiteititi Jehová okitlasojtlaya (Juan 14:9). Ximokuayejyeko tlen okipanok non telpochtli uan ximotlajtlani: “¿Tlen nechpaleuis okachi manimouika iuan Jehová uan ken nikinpaleuis oksekimej?”.

15. ¿Tleka okachi miak ipati tlen tikchiua uan amo tlen tikijtoua? (1 Timoteo 4:​12, 13).

¹⁵ “Xikinmachti akinmej kitekichiuiliaj toTajtsin Dios uan kineltokaj” (xiktlajtolti 1 Timoteo 4:​12, 13). Pablo okilui Timoteo miak ipati mamomachti kitlajtoltis se amatl uan kuali matlamachti. Noijki okilui matetlasojtla, matlaneltoka uan makipia chipauak inemilis. ¿Tleka? Porque okachi miak ipati tlen tikchiuaj uan amo tlen tikijtouaj. Matikijtokan tikpanoltis se tlamachtil tlen kijtoua ken uelis okachi titetlapouiskej. Kuali timomachilis ijkuak titlamachtis tla timochijchikaua okachi titetlapouis. Ijkon okachi kinpaleuis tokniuan tlen tikinmiluis (1 Tim. 3:13).

16. (1) ¿Tlen makuili tlamantli mitspaleuis makitakan oksekimej kuali tlen tikchiua? (2) ¿Tlen uelis tikchiuas tla tikneki kualtsin tikintlapouis oksekimej?

¹⁶ Uelis timomachtis tlen kijtoua 1 Timoteo 4:12 kanin Pablo okijto makuili tlamantli tlen mitspaleuis makitakan oksekimej kuali tlen tikchiua. Matikijtokan tikneki okachi kualtsin tikintlapouis oksekimej. Achto ximokuayejyeko tlen tikinmiluis uan ijkon tikinyolchikauas. Tla tichanti inuan mopapanuan uelis tikintlasojkamatilis tlen kichiuaj para kuali xiyeto. Kuali ximomachti uan ijkon ijkuak timonechikoskej kinyolchikauas tokniuan tlen titlanankilis. Noijki ijkuak tlamis nechikol uelis tikiluis se tokni tlen omitspakti ijkuak otlamachti. Tokniuan kitaskej timochijchikaua tiktekichiuilis toTajtsin Dios tla ijkon tikchiuas (1 Tim. 4:15).

17. ¿Tlen mitspaleuis okachi xiktekichiuili Jehová? (2 Timoteo 2:22).

¹⁷ “Amo xikchiua tlen kinyoltilana telpochmej” uan “ximochijchikaua xikchiua tlen kuali” (xiktlajtolti 2 Timoteo 2:22). Pablo okilui Timoteo makixtopeua tlen amo kuali porque non amo kipaleuiskia mamouika iuan toTajtsin Dios nion makitekichiuili. Xamo tikchiua seki tlamantli tlen amo tlajtlakoli pero san mitstonalpoloua uan amo timajxilia okachi tiktekichiuilis Jehová. Ximokuayejyeko keski horas timauiltia, keski horas titlatemoua itech internet uan keski horas timauiltia videojuegos. Xamo uelis tiknejnekis seki horas para okachi tiktekichiuilis Jehová uan tikinpaleuis tokniuan. Uelis tikinmiluis tokniuan tikneki titlapaleuis ijkuak kiyektlaliskej kali kanin timonechikouaj noso tikneki titetlapouis ika carrito. Non mitspaleuis xikinmajsi moyolikniuan tlen mitsyolchikauaskej okachi xiktekichiuili Jehová.

JEHOVÁ MITSTEOCHIUAS TLA TIKINPALEUIS OKSEKIMEJ

18. ¿Tlen tlateochiualistli okiselijkej Marcos uan Timoteo?

¹⁸ Marcos uan Timoteo okikajkej miak tlamantli porque okinekiayaj kinpaleuiskej oksekimej. Ikinon opakej porque okiselijkej miak tlateochiualistli (Hech. 20:35). Marcos otlapaleuito itech miakej altepemej porque okinekiaya kinpaleuis tokniuan. Noijki okijkuilo tlen okichi Jesús. Timoteo otlapaleui mamochiuakan miakej tlanechikolmej uan okinyolchikauaya tokniuan. Jehová oyolpakik porque Marcos uan Timoteo okikajkej miak tlamantli para kitekichiuiliskej.

19. ¿Ken mitspaleuis tla tikchiuas tlen okijkuilo Pablo?

¹⁹ ¿Tlen techmachtiaj cartas tlen toTajtsin Dios okinauati Pablo makinmijkuilili Timoteo? Achto techititia Pablo okitlasojtlaya iyolikni. Noijki kiteititia Jehová mitstlasojtla uan kineki xipaki uan kuali xiyeto. Ikinon moneki xikchiua tlen Pablo okijkuilo uan xikinpaleui tokniuan. Tla ijkon tikchiuas mitspaleuis xiyolpaki axkan uan satepan tikselis “yolilistli tlen melauak” (1 Tim. 6:​18, 19).