Matitlapaleuikan ijkon ken ángeles tlapaleuiaj

1, 2. (1) ¿Tleka tejuan amo tikatej ijkon ken ángeles katej? (2) ¿Tlen tlamantli tikchiuaj ijkon ken ángeles kichiuaj?

JEHOVÁ kipia se familia uan ompa pouij nochtin tokniuan uan noijki ángeles. Ijkuak tejuan opejki timomachtiaj, opejki tipouij itech non familia. Ijkon nochtin ángeles uan tejuan tikueyichiuaj Jehová (Dan. 7:​9, 10). Ijkuak timokuayejyekouaj ken katej ángeles xamo tikitaj tejuan amo tikatej ijkon ken yejuan katej. Matikitakan tleka ijkon tikijtouaj. Ángeles achto okinchijchijkej (Job 38:​4, 7). Yejuan okachi chijchikauakej, amo tlajtlakolejkej, katej santos uan okachi yolkualmej. Ikinon amo uelis tiyetoskej ijkon ken yejuan porque tejuan titlajtlakolejkej (Luc. 9:26).

² Pero onka seki tlamantli tlen tejuan noijki tikchiuaj ijkon ken ángeles kichiuaj. Ijkon tikijtouaj porque tejuan noijki tikteititiaj iyelis Jehová. Noijki tikpejpenaj tlen tikchiuaskej, tikpiaj totoka, tlatlamantli timokuayejyekouaj uan tlatlamantli tiktekichiuiliaj Jehová. Jehová okitlali toyolipan matiknekikan tikueyichiuaskej uan ángeles noijki ijkon okinchijchi (1 Ped. 1:12).

3. ¿Tlen timomachtiskej?

³ Yotikitakej tejuan noijki tikchiuaj seki tlamantli ijkon ken ángeles kichiuaj. Ikinon tlen axkan tikitaskej techyolchikauas uan techmachtia miak tlamantli tlen techpaleuis. Axkan tikitaskej ken uelis tikchiuaskej ijkon ken kichiuaj ángeles. Yejuan yolyamankej, tetlasojtlaj, tlaxikouaj uan tlapaleuiaj mayeto chipauak totlanechikol.

ÁNGELES YOLYAMANKEJ

4. (1) ¿Ken kiteititiaj ángeles yolyamankej? (2) ¿Tleka ángeles yolyamankej? (Salmo 89:7).

⁴ Ángeles amo kikauaj Jehová uan yolyamankej. Yejuan kimatij miak tlamantli, chijchikauakej, ixtlamatkej uan nochipa kichiuaj tlen Jehová kinnauatia (Sal. 103:20). Noijki kichiuaj inteki ijkon ken Jehová kinmiluia uan amo moueyinekij nion kijtouaj yejuan okachi chijchikauakej. Yejuan pakij kitekichiuiliaj Jehová maski amikaj kimati tlen intoka (Gén. 32:​24, 29; 2 Rey. 19:35).a Pero amo kinekij makinueyichiuakan porque kimatij san Jehová kinamiki makiueyichiuakan. ¿Tleka ángeles yolyamankej? Porque kitlasojtlaj Jehová uan kitlakaitaj (xiktlajtolti Salmo 89:7).

5. ¿Ken okiteititi se ángel okatka yolyamanki? (Noijki xikita dibujo).

⁵ Biblia kijtoua ángeles yolyamankej. Matikitakan tleka ijkon tikijtouaj. Kanaj itech xiuitl 96, se ángel tlen amo tikmatij itoka okititi apóstol Juan itlaj tetlajtlachialti (Apoc. 1:1). Juan okitlajtlachialti tlen okitak ikinon omotlankuaketski ixpan ángel porque okinekiaya kiueyichiuas. Pero ángel amo okikauili ijkon makichiua uan okilui: “¡Amo! ¡Amo ijkon xikchiua! Ne san nitlakeuali ijkon ken te uan mokniuan […]. ¡Xikueyichiua toTajtsin Dios!” (Apoc. 19:10). Ángel okiteititi okatka yolyamanki porque amo okinek makiueyichiuakan. Ye okinekiaya Juan makiueyichiua san ye Jehová. Ángel amo omoueyinek maski okachi miak xiuitl yokitekichiuiliaya Jehová uan okatka okachi chikauak. Ikinon okilui Juan: “Ne san nitlakeuali ijkon ken te”. Ye kualtsin okitlapoui uan amo okajuak maski okilui tlen amo omonekiaya kichiuas. Okimatiaya apóstol Juan ijkon okichi porque okitlajtlachialti tlen okitak.

6. ¿Ken uelis tikteititiskej tikatej tiyolyamankej ijkon ken ángeles kichiuaj?

⁶ ¿Ken uelis tikteititiskej tikatej tiyolyamankej ijkon ken kichiuaj ángeles? Tiyetoskej tiyolyamankej tla amo timoueyinekij ijkuak tikchiuaj tekitl tlen techmakaj uan amo tikijtouaj okachi tikmatij tikchiuaskej miak tlamantli (1 Cor. 4:7). Noijki amo matimokuayejyekokan okachi tiueyititokej porque yiuejkika tiktekichiuiliaj Jehová noso porque techmakaj okachi miak tekitl. Moneki okachi tiyetoskej tiyolyamankej tla okachi tiktekichiuiliaj Jehová (Luc. 9:48). Tejuan tiknekij tikinpaleuiskej oksekimej ijkon ken ángeles kichiuaj uan amo tiknekij oksekimej matechitakan okachi tiueyititokej.

7. ¿Ken tikteititiaj tiyolyamankej ijkuak tikinyektlaliaj oksekimej?

⁷ Noijki moneki tiyetoskej tiyolyamankej ijkuak tikyektlaliskej se tokni noso ijkuak tikinyektlaliskej tokoneuan. Ualeua xamo ikaj tikiluiskej tlen moneki kichiuas. Ikinon matikchiuakan ijkon ken ángel okichi ijkuak okilui Juan amo makiueyichiua. Pero non ángel okiyektlapoui uan amo okiyolkoko. Tla amo timoueyinekij, tikintlakaitaskej oksekimej uan tikinmititiskej tikintlasojtlaj ijkuak tikinpaleuiskej ika iTlajtol toTajtsin Dios (Col. 4:6).

ÁNGELES TETLASOJTLAJ

8. (1) ¿Ken kiteititiaj ángeles techtlasojtlaj ijkon ken kijtoua Lucas 15:10? (2) ¿Ken techpaleuiaj ángeles ijkuak titetlapouiaj? (Noijki xikita foto).

⁸ Ángeles kintekipachoua tlen techpanoua porque techtlasojtlaj. Yejuan pakij ijkuak ikaj moyolkopa uan oksepa kitekichiuilia Jehová. Noijki pakij ijkuak ikaj peua momachtia Biblia, kipatla inemilis uan peua kitekichiuilia toTajtsin Dios (xiktlajtolti Lucas 15:10). Ángeles techpaleuiaj ijkuak titetlapouiaj (Apoc. 14:6). Yejuan amo tetlapouiaj pero techyekanaj uan techpaleuiaj matikinmajsikan akinmej kinekij kixmatiskej Jehová. Tejuan amo tikmatij keman yotechpaleuijkej. Porque Jehová noijki techyekana ika iespíritu santo uan kinpaleuia oksekimej makixmatikan (Hech. 16:​6, 7). Pero Jehová kinnauatia ángeles matechpaleuikan. Ikinon uelis tikneltokaskej yejuan techpaleuiaj ijkuak titetlapouiaj. (Xikita recuadro “ToTajtsin Dios okinnankili akinmej okitlatlaujtijkej”).b

9. ¿Ken uelis titetlasojtlaskej ijkon ken ángeles tetlasojtlaj?

⁹ ¿Ken uelis titetlasojtlaskej ijkon ken ángeles tetlasojtlaj? Matipakikan ijkon ken ángeles pakij ijkuak ikaj oksepa touan monechikoua. Kuali matikselikan uan matikiluikan tiktlasojtlaj (Luc. 15:​4-7; 2 Cor. 2:​6-8). Noijki matimochijchikauakan titetlapouiskej para titlapaleuiskej ijkon ken ángeles kichiuaj (Ecl. 11:6). Ángeles techpaleuiaj ijkuak titetlapouiaj ikinon tejuan noijki matikitakan ken tikinpaleuiskej tokniuan ijkuak inuan titetlapouiaj. Matitetlapouikan iuan se tokni tlen yikin opejki tetlapouia. Noijki uelis titetlapouiskej iuan se tokni tlen yikipia miak xiuitl noso iuan se tokni tlen mokokoua.

10. ¿Tlen techmachtia tlen okichi tokni Sara?

¹⁰ Xamo ayakmo titetlapouiaj ijkon ken achto otikchiuayaj. Pero matikitakan ken uelis ok titetlapouiskej uan ijkon timopaleuiskej inuan ángeles. Matikitakan tlen okichi se tokni itoka Sarac tlen chanti altepetl India. Ye okatka precursora kanaj 20 xiuitl pero satepan omokoko. Opejki moyolkokoua porque ayakmo omeuaya. Pero omoyolchika porque okipaleuijkej tokniuan uan noijki nochipa kitlajtoltia Biblia. Noijki okitak ken ok uelis tetlapouis. Opejki tetlapouia ika teléfono porque ayakmo omoketsaya para kinmijkuilos cartas. Opejki kinnotsa akinmej achto okintlajpalouaya uan yejuan okiluiayaj akinmej uelis kinekiskiaj momachtiskej Biblia. Satepan opejki kinmachtia kanaj 70 personas. Miakej okinmachtiaya uan ayakmo omajxiliaya nochtin kinmachtis. Ikinon okinmilui oksekimej tokniuan makinmachtikan. Miakej tlen okinmachtijtokaj opejki monechikouaj. Nin techititia ángeles pakij ijkuak inuan timosepanpaleuiaj ijkon ken okichi tokni Sara.

ÁNGELES KITEITITIAJ TLAXIKOUAJ

11. ¿Ken kiteititiaj ángeles tlaxikouaj?

¹¹ Ángeles kiteititiaj tlaxikouaj porque yimiak xiuitl kitokej panotok tlen amo kuali. Yejuan okitakej ijkuak Satanás uan oksekimej ángeles okixnamikej toTajtsin Dios (Gén. 3:1; 6:​1, 2; Jud. 6). Biblia kijtoua se ángel okimomakak iuan se ejekatl (Dan. 10:13). Noijki yimiak xiuitl ángeles yokitakej miakej amo kinekij kitekichiuiliskej Jehová. Pero pakij kitekichiuiliaj Jehová uan amo keman kikauaj. Yejuan kimatij ayakmo miak poliui toTajtsin Dios kipojpolos nochi tlen amo kuali.

12. ¿Tlen techpaleuis matitlaxikokan?

¹² ¿Ken uelis titlaxikoskej ijkon ken ángeles tlaxikouaj? Tejuan noijki tikitaj panotok tlen amo kuali uan oksekimej techixnamikij. Pero noijki tikmatij ajsis tonal ijkuak toTajtsin Dios kipojpolos nochi tlen amo kuali. Ikinon “matikchiuakan tlen kuali” ijkon ken ángeles kichiuaj (Gál. 6:9). Noijki Jehová techiluia techpaleuis matitlaxikokan (1 Cor. 10:13). Matikiluikan Jehová matechmaka iespíritu santo tlen techpaleuis matimochiakan uan matipakikan (Gál. 5:22; Col. 1:11). ¿Tlen tikchiuaskej tla oksekimej techtlajyouiltiaj? Amo matimomojtikan uan matikneltokakan Jehová techpaleuis. Ye techyolchikauas uan amo keman techkauas (Heb. 13:6).

ÁNGELES TLAPALEUIAJ MAYETO CHIPAUAK TOTLANECHIKOL

13. ¿Tlen tekitl miak ipati kichiuaj ángeles itlamian ninmej tonalmej? (Mateo 13:​47-49).

¹³ Jehová okinmilui ángeles makichiuakan se tekitl miak ipati itlamian ninmej tonalmej (xiktlajtolti Mateo 13:​47-49). Miakej kinpaktia matikintlapouikan kuali tlajtoli. Sekimej kipatlaj innemilis uan kitlakamatij Jehová pero oksekimej amo ijkon kichiuaj. Ikinon ángeles kinmitaj “akinmej yolkualmej uan akinmej amo yolkualmej”. Ijkon tlapaleuiaj ángeles mayeto chipauak totlanechikol. Akin ayakmo touan monechikoua amo kijtosneki ayakmo oksepa kitekichiuilis Jehová. Noijki amo kijtosneki amitlaj tikixnamikiskej itech totlanechikol. Nin techititia ángeles tlapaleuiaj miak porque kinekij mayetokan chipauakej tlanechikolmej.

14, 15. ¿Ken titlapaleuiskej mayeto chipauak totlanechikol ijkon ken ángeles tlapaleuiaj? (Noijki xikinmita fotos).

¹⁴ ¿Ken titlapaleuiskej mayeto chipauak totlanechikol ijkon ken ángeles tlapaleuiaj? Amo matikchiuakan tlen amo kuali uan matitlaneltokakan ijkon ken kineki toTajtsin Dios. Moneki kuali matikinpejpenakan akinmej inuan timouikaskej tla tiknekij tikmaluiskej toyolo uan noijki matikixtopeuakan tlen amo techpaleuis matimouikakan iuan Jehová. Ijkon titlapaleuiskej mayeto chipauak totlanechikol (Sal. 101:3). Noijki matikinpaleuikan tokniuan nochipa makitlakamatikan Jehová. Ikinon ¿tlen tikchiuaskej tla tikmatij se tokni otlajtlakolchi? Tejuan tiktlasojtlaj ikinon tikiluiskej mamotlapoui inuan tlayekankej. Pero moneki tikinmiluiskej tlayekankej tla ye amo kineki kinmiluis. Tejuan tiknekij makipaleuikan oksepa mamouika iuan Jehová (Sant. 5:​14, 15).

¹⁵ Sapanoua teyolkoko ijkuak sekimej tokniuan tlajtlakolchiuaj uan tlayekankej kinmiluiaj ayakmo pouiskej itech tlanechikol. Tejuan ayakmo inuan timouikaj ijkuak ijkon kinmiluiaj (1 Cor. 5:​9-13).d Ijkon titlapaleuiaj mayeto chipauak totlanechikol. Ayakmo inuan timouikaj uan ijkon tikteititiaj tikintlasojtlaj porque kinpaleuis oksepa makitekichiuilikan Jehová. Tla yejuan oksepa kitekichiuiliskej tipakiskej ijkon ken Jehová uan ángeles pakij (Luc. 15:7).

16. ¿Ken uelis tikchiuaskej ijkon ken ángeles kichiuaj?

¹⁶ Sapanoua tikpatioitaj Jehová techiluia tlen kichiuaj ángeles uan inuan timosepanpaleuiaj. Ikinon matimochijchikauakan matiyetokan tiyolyamankej, matitetlasojtlakan, matitlaxikokan uan matitlapaleuikan mayeto chipauak totlanechikol ijkon ken kichiuaj ángeles. Ijkon tejuan noijki uelis tipouiskej inuan akinmej nochipa kiueyichiuaj Jehová.