¿Ken uelis ok techpaleuis tlen otikmatkej ijkuak opejki timomachtiaj Biblia?

1. ¿Tleka otechpakti timomachtiskej Biblia?

OTIKPATLAKEJ tonemilis ijkuak opejki timomachtiaj Biblia. ¿Tleka ijkon tikijtouaj? Porque opejki timouikaj iuan toTajtsin Dios ijkuak otikmatkej itoka Jehová (Is. 42:8). Noijki otimoyolseuijkej ijkuak otikmatkej amo tlajyouiaj akinmej ixpoliuij porque ayakmo itlaj kimatij (Ecl. 9:10). Noijki otiyolpakej ijkuak otikmatkej toTajtsin Dios kijtoua uelis nochipa tiyoltoskej itech se xochitlali uan amo san tiyoltoskej san kanaj 70 noso 80 xiuitl (Sal. 37:29; 90:10).

2. ¿Tleka tikijtouaj tlen otikmatkej ijkuak opejki timomachtiaj techpaleuia maski yimiak xiuitl tiktekichiuiliaj Jehová? (2 Pedro 1:​12, 13).

² Nochipa techpaleuis tlen otikmatkej ijkuak opejki timomachtiaj. Apóstol Pedro okinmijkuilili okse carta tokniuan kanin okinmilui: “Nankineltokaj tlen melauak onanmomachtijkej” (xiktlajtolti 2 Pedro 1:​12, 13). Ye okinekiaya kinyolchikauas tokniuan porque amo okinekiaya ikaj makinkajkayaua itech tlanechikol. Itech tlanechikol miakej otlamachtiayaj tlen amo melauak uan amo okatkaj yolkualmej (2 Ped. 2:​1-3). Ikinon okinmilnamikti seki tlamantli tlen yomomachtijkaj porque okinekiaya kinpaleuis amo makikauakan Jehová.

3. Xikyekijto tleka techpaleuia tla timokuayejyekouaj tlen otikmatkej ijkuak opejki timomachtiaj.

³ Timomachtiaj okseki tlamantli tla tikilnamikij tlen otikmatkej ijkuak opejki timomachtiaj. Matikitakan tleka ijkon tikijtouaj. Akin yikimati tlakualchiuas uan akin yikin opejki tlakualchiuas, xamo san se tlamantli kinejnekiskej para tlakualchiuaskej. Pero akin yimiak xiuitl tlakualchiua, kita ken uelis kichijchiuas okseki tlakuali ika non tlamantli tlen kinejneki. Ijkon kipanoua akin peua momachtia porque kita ken kipaleuis textos uan okseki tlamantli tlen momachtijtok. Pero akin yikipia miak xiuitl momachtijtok kita ken uelis okachi kipaleuis tlen okimatki ijkuak opejki momachtia. ¿Tleka ijkon tikijtouaj? Xamo omopatlak inemilis desde ijkuak omoapolakti noso kichiua okseki tekitl itech tlanechikol. Matimokuayejyekokan tlen otikmatkej ijkuak opejki timomachtiaj uan matikitakan ken uelis okachi techpaleuis. Axkan tikitaskej eyi tlamantli tlen otikmatkej ijkuak opejki timomachtiaj uan tikitaskej ken techpaleuis maski yimiak xiuitl tiktekichiuilijtokej Jehová.

JEHOVÁ OTLACHIJCHI

4. ¿Ken omopatlak tonemilis ijkuak otikmatkej Jehová otechchijchi?

⁴ Hebreos 3:4 kijtoua: “ToTajtsin Dios okichijchi nochi tlen onka”. Kuali tikmatij toTajtsin Dios sapanoua ixtlamatki uan kipia miak chikaualistli porque ye okichijchi tlaltikpak uan nochi tlen onka. Ye otechchijchi ikinon kuali techixmati. Noijki techtlasojtla uan kimati tlen techpaleuis. ¿Ken otechpaleui ijkuak otikmatkej nin tlamantli? Otikajsikamatkej Jehová otechchijchi ikinon tikmatij tleka tiyoltokej.

5. ¿Tlen techpaleuia matiyetokan tiyolyamankej? (Isaías 45:​9-12).

⁵ Otikmatkej Jehová otlachijchi uan non techpaleuia matiyetokan tiyolyamankej. Matikitakan tlen okipanok Job. Ye san okitekipachouaya tlen okipanotoka ikinon Jehová okilnamikti ye otlachijchi uan kipia miak chikaualistli (Job 38:​1-4). Non okipaleui amo mamokuayejyeko Jehová kichiua tlen amo kuali. Satepan profeta Isaías okijkuilo: “¿Moneki sokitl kiluis akin kichijchiua: ‘¿Tlen tikchiua?’?” (xiktlajtolti Isaías 45:​9-12).

6. ¿Tleka moneki matimokuayejyekokan san ye Jehová okachi ueyititok? (Noijki xikinmita fotos).

⁶ Se tokni tlen yikipia miak xiuitl kitekichiuilia Jehová xamo kichiuas tlen mokuayejyekoua uan ayakmo kikauilis Jehová makiyekana nion kitlakamatis tlen kijtoua iTlajtol (Job 37:​23, 24). Tla amo kineki ijkon makipano moneki mamokuayejyeko Jehová sapanoua ixtlamatki uan ye okachi ueyititok (Is. 40:22; 55:​8, 9). Non kipaleuis mayeto yolyamanki uan kilnamiktos Jehová amo mokuayejyekoua ijkon ken tejuan timokuayejyekouaj.

7. ¿Tlen okipaleui Rahela makiseli tlen okipatlak ialtepe Jehová?

⁷ Matikitakan tlen okichi se tokni itoka Rahela tlen chanti Eslovenia. Ye okipaleui makiseli tlen okipatlak ialtepe Jehová ijkuak omokuayejyeko ye otlachijchi. Okijto: “Ualeua nikita oui nikchiuas tlen techiluiaj tokniuan tlen kiyekanaj ialtepe Jehová. Ijkon onechpanok ijkuak onikitak se tokni okipiaya ibarba ijkuak otlamachtijtoka. Amo onechpakti ken omotaya maski yonikitaka video Cuerpo Gobernante techiluia tlen panotok 2023 (parte 8). Ikinon oniktlatlaujti Jehová manechpaleui manikseli tlen okipatlak ialtepe”. Rahela okajsikamatki Jehová okichijchi iluikak uan tlaltikpak ikinon kimati ken kiyekanas ialtepe. Tla tikitaj oui tikchiuaskej tlen technauatia ialtepe Jehová noso ijkuak techyekiluiaj tlen tikneltokaj, matimokuayejyekokan sapanoua ixtlamatki akin otechchijchi uan kipia miak chikaualistli (Rom. 11:​33-36).

¿TLEKA TOTAJTSIN DIOS KITEKAUILIA MATITLAJYOUIKAN?

8. ¿Ken yotechpaleui tikmatiskej tleka toTajtsin Dios kitekauilia matitlajyouikan?

⁸ ¿Tleka kitekauilia toTajtsin Dios matitlajyouikan? Sekimej kualanij iuan toTajtsin Dios porque amo kajsikamatij tleka titlajyouiaj noso kineltokaj ye amo kajki (Prov. 19:3). Pero tejuan tikmatij titlajyouiaj porque titlajtlakolejkej. Noijki tikmatij miakej yokixmatkej Jehová porque ye kimati mochias uan noijki yotikmatkej tlen kichiuas para ayakmo matitlajyouikan (2 Ped. 3:​9, 15). Techyolseuia tikmatij tlen kichiuas toTajtsin Dios uan okachi tiktlasojtlaj.

9. ¿Keman moneki matimokuayejyekokan tleka Jehová kitekauilia matlajyouikan?

⁹ Tejuan tikmatij moneki timochiaskej hasta ijkuak Jehová makipojpolo nochi tlen techtlajyouiltia. Pero titlajyouiaj ijkuak ixpoliui se tofamiliar noso ijkuak ikaj techtlajyouiltia. Ijkuak ijkon techpanoua xamo timokuayejyekouaj tleka Jehová amo san niman kipojpoloua tlen techtlajyouiltia (Hab. 1:​2, 3). Ikinon miak ipati matimokuayejyekokan tleka Jehová kitekauilia matlajyouikan akinmej yolkualmej (Sal. 34:19).a Noijki matimokuayejyekokan Jehová kipojpolos nochi tlen techtlajyouiltia.

10. ¿Tlen okipaleui Anne amo okachi mamoyolkoko porque oixpoliuik imama?

¹⁰ Noijki techpaleuia matitlaxikokan ijkuak tikmatij tleka Jehová kitekauilia matitlajyouikan. Se tokni itoka Anne tlen chanti itech isla Mayotte tlen kajki ompa océano Índico, okiyekijto: “Yikipia seki xiuitl oixpoliuik nomama uan sapanoua onimoyolkoko. Pero nimokuayejyekoua Jehová amo techtlajyouiltia. Ye kineki kipojpolos nochi tlen techtlajyouiltia uan kinyolitis tofamiliares tlen yoixpolikej. Sapanoua nimoyolseuia ijkuak nimokuayejyekoua tleka Jehová kitekauilia matitlajyouikan uan nimokuayejyekoua tlen kichiuas satepan”.

11. ¿Tleka techyolinia nochipa matitetlapouikan ijkuak tikmatij tleka Jehová kitekauilia matitlajyouikan?

¹¹ Noijki techpaleuia nochipa matitetlapouikan ijkuak tikajsikamatij tleka toTajtsin Dios kitekauilia matitlajyouikan. Jehová kimati mochias uan non kinpaleuia akinmej tlajtlakolchiuaj. Pero yejuan uelis momakixtiskej tla moyolkopaskej. Ijkon okiyekijto Pedro uan satepan okijkuilo: “¡Ximokuayejyekokan ken moneki nankipiaskej namoyelis! Xiyetokan nanyolchipauakej uan xikteititikan nankiueyichiuaj toTajtsin Dios” (2 Ped. 3:11). Tejuan tikteititiaj tikueyichiuaj toTajtsin Dios ijkuak titetlapouiaj. Tikintlasojtlaj oksekimej ijkon ken Jehová kintlasojtla uan noijki tiknekij mayetokan itech xochitlali. Jehová kimati mochias ikinon kineki noijki makixmatikan akinmej tikintlapouiaj ik kanin tichantij uan makiueyichiuakan. Sapanoua tikpatioitaj tikpaleuiskej toTajtsin Dios uan ijkon miakej makixmatikan. Ikinon timochijchikauaj miakej tikintlapouiskej porque satepan toTajtsin Dios kipojpolos tlen axkan panotok (1 Cor. 3:9).

TIKATEJ “ITLAMIAN TONALMEJ”

12. ¿Tlen tikneltokaj ijkuak tikitaj mochijtok profecía tlen kijtoua tikatej “itlamian tonalmej”?

¹² Biblia kijtoua ken kipiaskiaj inyelis personas “itlamian tonalmej” (2 Tim. 3:​1-5). Ijkuak tikinmitaj ijkon kipiaj inyelis tikmatij mochijtok nin profecía. Tikmatij melauak tlen kijtoua iTlajtol toTajtsin Dios porque tikitaj okachi fiero inyelis personas (2 Tim. 3:​13-15).

13. ¿Tlen moneki matimotlajtlanikan? (Lucas 12:​15-21).

¹³ Ijkuak timokuayejyekouaj tikatej itlamian tonalmej techpaleuia matikitakan tlen okachi miak ipati uan tlen okachi moneki tikchiuaskej. Jesús okijto amo matimotonalpolokan ijkuak okijto tlen kijtoua Lucas 12:​15-21 (xiktlajtolti). ¿Tleka okijto “xoxo” tlakatl tlen okipiaya miak tomin? Porque amo okichijtoka tlen okachi miak ipati. Ye san okinekiaya kipias miak tlamantli pero amitlaj okipiaya ixpan toTajtsin Dios. ¿Tleka amo omonekiaya mamotonalpolo? ToTajtsin Dios okilui: “Nin youak timikis”. ¿Tlen techmachtia tlen okipanok non tlakatl? Ayakmo miak poliui kipojpoloskej nochi tlen amo kuali. Ikinon moneki matimotlajtlanikan: “¿Nikteititia nikneki nikchiuas tlen okachi miak ipati? ¿Nikinmiluia nokoneuan makichiuakan tlen okachi miak ipati? ¿Nochi tlen nikchiua kiteititia nikneki nikpias miak tlamantli noso nikchiuas tlen kineki toTajtsin Dios?”.

14. ¿Ken techpaleuia matimokuayejyekokan tikatej itlamian tonalmej ijkon ken okichi Ema?

¹⁴ Techpaleuis matikchiuakan tlen okachi miak ipati tla timokuayejyekouaj tikatej itlamian tonalmej. Matikitakan tlen okipanok se tokni itoka Ema.b Ye okijto: “Ijkuak otlanki onimomachti escuela oniknekiaya nias universidad porque oniknekiaya nimomachtis ken chijchitokej yolkamej. Pero noijki oniknekiaya nimochiuas precursora regular uan nitlapaleuiti kanin okachi moneki. Sekimej tokniuan tlen kipiaj chikauak intlaneltokilis onechiluijkej kuali manimokuayejyeko kox uelis nimomachtiti universidad uan noijki okachi niktekichiuilis Jehová. Onechilnamiktijkej ayakmo miak poliui kipojpoloskej nochi tlen kinauatia Satanás uan itech xochitlali uelis nimomachtis ken chijchitokej yolkamej. Ikinon amo onimomachti universidad uan san onimomachti ken nikchiuas se tekitl. Non onechpaleui manitekipano san kanaj keski tonal uan manitlapaleui ken precursora regular. Satepan onitlapaleuito Ecuador kanin okachi moneki mamotetlapoui”. Axkan Ema uan inamik tlapaleuiaj itech circuito ompa Ecuador.

15. ¿Tlen techmachtia tlen okipanok Santiago? (Noijki xikinmita fotos).

¹⁵ Amo matimosotlauakan tla amo techkakij ijkuak titetlapouiaj. Matikilnamiktokan xamo se tonal kinekiskej techkakiskej akinmej tikintlapouiaj. Matikilnamiktokan tlen okipanok itlakpaikni Jesús tlen omotokayotiaya Santiago. Ye uan Jesús san sekan omoskaltijkej, okitak ijkuak Jesús omochi Mesías uan okitak san ye kuali otlamachtiaya. Pero ye amo san niman okineltokak maski okitak nochi non tlamantli. Ye omochi idiscípulo Jesús hasta ijkuak okiyolitijkej uan okichi miak tlamantli para kitekichiuilis toTajtsin Dios (Juan 7:5; Gál. 2:9).c Ikinon matikintlapouikan tofamiliares tlen axkan amo techkakij uan amo matimosotlauakan tikintlapouiskej oksekimej. Matikilnamiktokan tikatej itlamian tonalmej uan axkan okachi moneki titetlapouiskej. Tlen axkan tikinmiluiskej uelis kinpaleuis satepan noso ijkuak panotos ueyi tlajyouilistli kilnamikiskej tlen otikinmiluijkej uan xamo kinekiskej kixmatiskej toTajtsin Dios.d

MATIKPATIOITAKAN NOCHI TLAMACHTIL TLEN TECHMAKA IALTEPE JEHOVÁ

16. ¿Ken yomitspaleui nochi tlen kiyektlalia ialtepe Jehová? (Noijki xikita recuadro “Matiknejnekikan nin tlamantli para tikinpaleuiskej oksekimej”).

¹⁶ Ialtepe Jehová kiyektlalia miak tlamachtil tlen kinpaleuia akinmej amo okachi kimatij tlen kijtoua Biblia. Yejuan kinpaleuia tlamachtil tlen kitemaka se tokni itlamian semana, seki tlamachtil uan videos tlen katej itech jw.org uan revistas tlen ikaj titetlapouiaj. Pero nochi non tlamantli tinochtin techpaleuia okachi matiktlasojtlakan Jehová, matikneltokakan iTlajtol uan techpaleuia okachi kuali matitlamachtikan (Sal. 19:7).

17. ¿Keman uelis techpaleuis tlen otikmatkej ijkuak opejki timomachtiaj Biblia?

¹⁷ Akinmej yimiak xiuitl tiktekichiuiliaj Jehová tipakij ijkuak techyekiluiaj se tlamachtil. Pero noijki tikpatioitaj tlen otikmatkej ijkuak opejki timomachtiaj. Pero ijkon ken yotikitakej ok uelis techpaleuis matimomachtikan okseki tlamantli. Ualeua tikitaj oui tikchiuaskej tlen technauatia ialtepe Jehová porque tlatlamantli timokuayejyekouaj uan amo tiknekij tikchiuaskej ijkon ken technauatiaj. Pero matiyetokan tiyolyamankej uan matikilnamiktokan Jehová kiyekana ialtepe porque ye otechchijchi, ixtlamatki uan kipia miak chikaualistli. Ijkuak titlajyouiskej noso itlaj kipanos akin tiktlasojtlaj, amo matimosotlauakan uan matikilnamiktokan tleka Jehová kitekauilia matitlajyouikan. Matikilnamiktokan tikatej itlamian tonalmej uan yitlamis nochi tlen axkan panotok. Non techpaleuis amo matimotonalpolokan uan kuali matiknejnekikan tlen tikpiaj. Matimochijchikauakan matiyetokan tiixtlamatkej uan non techpaleuis amo matikkauakan toTajtsin Dios.