¿Tlen moneki tikchiuaskej ijkuak oksekimej kitetoktiaj tlen amo kuali?

1, 2. ¿Tlen kichiuaj sekimej ijkuak kitaj oksekimej kitetoktiaj tlen amo kuali uan tlen xamo timotlajtlaniaj?

AXKAN miakej kintoktiaj tlen amo kuali. Kintlajyouiltiaj akinmej amo kipiaj miak tlamantli, akinmej uitsej itech okseki altepemej noso motaj okse tlamantli. Noijki sekimej tekiuajkej uan akinmej kinyekanaj empresas okachi kintekipachoua kitlaniskej miak tomin uan amo kintekipachoua tlen kinpanos oksekimej. Tinochtin titlajyouiaj ijkuak oksekimej kichiuaj tlen amo kuali.

² Tinochtin tiknekij kuali tiyetoskej uan amitlaj matechtoktikan. Ikinon miakej kinkualania ijkuak oksekimej kitetoktiaj tlen amo kuali noso ijkuak tetlajyouiltiaj. Miakej mosetiliaj inuan oksekimej porque kinekij kichiuaskej tlen kuali ikinon kinmixnamikij tekiuajkej, amo kinpaktia tlanauatilmej tlen kinpiaj tekiuajkej noso kipejpenaj se tekiua tlen kijtoua kiyektlalis tlen amo kuali panotok. Pero tejuan akinmej tiktekichiuiliaj toTajtsin Dios ‘amo tipouij inuan oksekimej’ uan tikneltokaj san iTekiuajkayo toTajtsin Dios kachiuas tlen amo kuali (Juan 17:16). Pero techyolkokoua uan techkualania ijkuak oksekimej kitetoktiaj tlen amo kuali. Ikinon xamo timotlajtlaniaj: “¿Tlen nikchiuas ijkuak nikitas oksekimej kitetoktiaj tlen amo kuali? ¿Uelis itlaj nikchiuas para ayakmo itlaj makintoktikan oksekimej?”. Axkan tikinnankiliskej nonmej tlajtlanilmej. Pero achto matikitakan ken momachilia Jehová uan Jesús ijkuak kitaj oksekimej kitetoktiaj tlen amo kuali.

JEHOVÁ UAN JESÚS AMO KINPAKTIA IJKUAK OKSEKIMEJ KITETOKTIAJ TLEN AMO KUALI

3. ¿Tleka amo techpaktia ijkuak oksekimej kitetoktiaj tlen amo kuali? (Isaías 5:7).

³ ITlajtol toTajtsin Dios techiluia tleka amo techpaktia ijkuak tikitaj oksekimej kitetoktiaj tlen amo kuali. Ijkon timomachiliaj porque Jehová otechchijchi ijkon ken ye uan ye kipatioita tlen melauak uan tlen kuali (Sal. 33:5; Gén. 1:26). Ye kichiua tlen kuali uan kineki tinochtin ijkon matikchiuakan (Deut. 32:​3, 4; Miq. 6:8; Zac. 7:9). Ijkon tikijtouaj porque yiuejkika ijkuak okatka profeta Isaías, Jehová okikak ijkuak sekimej israelitas otsajtsiayaj porque oksekimej israelitas okintlajyouiltiayaj (xiktlajtolti Isaías 5:7). Jehová okintlajyouilti akinmej ijkon okichiuayaj porque amo okintlakamatiayaj itlanauatiluan uan otetlajyouiltiayaj (Is. 5:​5, 13).

4. ¿Tlen techmachtia Jesús ijkuak okipajti tlakatl tlen amo ueli okoliniaya ima? (Noijki xikita dibujo).

⁴ Jesús kipatioita tlen kuali ijkon ken Jehová kichiua uan amo kipaktia ikaj makitetokti tlen amo kuali. Matikitakan tlen okichi ijkuak okatka nikan tlaltikpak. Se tonal okitak se tlakatl tlen amo ueli okoliniaya ima. Ye okiknomatki uan okipajti. Pero teopixkej okualankej ijkuak okitakej ijkon okichi. Yejuan amo okipaleuijkej tlakatl maski otlajyouijtoka porque yejuan okachi okipatioitayaj tonal sábado ijkuak amitlaj okichiuayaj. Ijkuakon “Jesús okualanki uan omoyolkoko ijkuak okitak okatkaj yoltlakuauakej” (Mar. 3:​1-6).

5. ¿Tlen moneki tikilnamiktoskej tla tikualanij ijkuak oksekimej kitetoktiaj tlen amo kuali?

⁵ Jehová uan Jesús kinkualania ijkuak oksekimej kichiuaj tlen amo kuali ikinon tejuan noijki techkualania (Efes. 4:26). Matikilnamiktokan amo uelis tikachiuaskej tlen kitetoktiaj oksekimej maski tikualaniskej. Noijki uelis timokokoskej uan amo kuali timomachiliskej tla san tikualantoskej (Sal. 37:​1, 8; Sant. 1:20). Ikinon matikitakan tlen okichi Jesús ijkuak okitak oksekimej okitetoktiayaj tlen amo kuali.

¿TLEN OKICHI JESÚS IJKUAK OKITAK OKSEKIMEJ OKITETOKTIAYAJ TLEN AMO KUALI?

6. ¿Tlen okitak Jesús ijkuak okatka nikan tlaltikpak? (Noijki xikita dibujo).

⁶ Jesús okitak okitetoktiayaj tlen amo kuali ijkuak okatka nikan tlaltikpak. Ye okimatiaya teopixkej okintlaliayaj miakej tlanauatilmej tlen oksekimej amo ueli okintlakamatiayaj (Mat. 23:​2-4). Noijki okimatiaya tekiuajkej romanos otetlajyouiltiayaj. Ikinon miakej judíos ayakmo okinekiayaj makinnauatikan nonmej tekiuajkej. Yejuan okintlalijkej grupos para mamomakakan inuan romanos. Pero Jesús amo otlapaleui para makinpatlakan nonmej tekiuajkej. Ye oyajki ijkuak okimatki okinekiayaj kitlaliskej tekiua (Juan 6:15).

7, 8. ¿Tleka Jesús amo otlapaleui makachiuakan tlen amo kuali ijkuak okatka nikan tlaltikpak? (Juan 18:36).

⁷ Jesús amo okinpaleui políticos para ayakmo makitetoktikan tlen amo kuali. ¿Tleka amo okinpaleui? Porque amikaj kinamiki matlanauati uan amo kimatij ken tlanauatiskej (Sal. 146:3; Jer. 10:23). Amo uelis kachiuaskej nochi tlen amo kuali. Noijki Satanás tlanauatia uan ye amo yolkuali ikinon miakej kichiuaj ijkon ken ye kichiua (Juan 8:44; Efes. 2:2). Noijki titlajtlakolejkej ikinon amo uelis tikachiuaskej tlen amo kuali maski tikpiaskej kuali toyelis (Ecl. 7:20).

⁸ Jesús okimatiaya san iTekiuajkayo toTajtsin Dios uelis kachiuas nochi tlen amo kuali. Ikinon ye okachi okipatioitak ‘tetlapouis kuali tlajtoli tlen kijtoua toTajtsin Dios ualtlanauatis ipan tlaltikpak’ (Luc. 8:1). Ijkon okinyolchika akinmej okintoktiayaj tlen amo kuali uan okinmilui satepan kipojpoloskej tlen amo kuali (Mat. 5:6; Luc. 18:​7, 8). Nin kiteititia san iTekiuajkayo toTajtsin Dios kachiuas tlen amo kuali porque “amo poui itech nin tlaltikpak” (xiktlajtolti Juan 18:36).

MATIKCHIUAKAN IJKON KEN JESÚS OKICHI IJKUAK TECHTOKTISKEJ TLEN AMO KUALI

9. ¿Tleka tikneltoka san iTekiuajkayo toTajtsin Dios uelis kachiuas tlen amo kuali?

⁹ Tikatej itlamian tonalmej ikinon axkan okachi panoua miak tlamantli tlen amo opanouaya ijkuak Jesús okatka nikan tlaltikpak. Axkan Satanás noijki ok tetlajyouiltia uan miakej kichiuaj ijkon ken ye kichiua (2 Tim. 3:​1-5, 13; Apoc. 12:12). Tejuan tikneltokaj ijkon ken Jesús kineltoka san iTekiuajkayo toTajtsin Dios kipojpolos Satanás porque kiyekana tlen amo kuali. Tejuan tikpaleuiaj iTekiuajkayo toTajtsin Dios ikinon amo timosetiliaj inuan oksekimej para titlapaleuiskej makachiuakan tlen amo kuali nion tikneltokaj tlayektlaliskej tekiuajkej. Matikitakan tlen okichi se tokni tlen itoka Nancy.a Ijkuak ayamo omomachtiaya iTlajtol toTajtsin Dios, ye omosetiliaya inuan oksekimej para tlapaleuis ayakmo makitetoktikan tlen amo kuali. Pero satepan omokuayejyeko kox tlapaleuiskia tlen okichijtoka. Ye okijto: “Ijkuak ijkon onikchiuaya, onimotlajtlaniaya kox melauak tlapaleuiskia tlen onikchijtoka. Pero axkan nikpaleuia iTekiuajkayo toTajtsin Dios porque nikmati san ye tlayektlalis. Nikneltoka san Jehová okachi uelis kinpaleuis akinmej kintoktiaj tlen amo kuali” (Sal. 72:​1, 4).

10. Ijkon ken kijtoua Mateo 5:​43-48, ¿tleka tejuan amo timosetiliaj inuan oksekimej para tikinpatlaskej tekiuajkej noso tlanauatilmej? (Noijki xikita foto).

¹⁰ Miakej mosetiliaj inuan oksekimej porque kinekij kinpatlaskej tekiuajkej. Pero miakej kintlajyouiltiaj oksekimej porque san niman kualanij uan amo kintlakamatij tlanauatilmej. Jesús amo kipaktia ijkon matikchiuakan porque amo ijkon otechmachti (Efes. 4:31). Se tokni tlen itoka Jeffrey okijto: “Miakej mosetiliaj inuan oksekimej porque kinekij itlaj makiyektlalikan tekiuajkej. Pero ijkuak ijkon kichiuaj, uelis kualaniskej, tlaijtlakoskej, tlachtekiskej uan kinkojkoskej oksekimej”. Pero Jesús otechmachti nochtin matikintlasojtlakan maski amo mokuayejyekouaj ijkon ken tejuan timokuayejyekouaj (xiktlajtolti Mateo 5:​43-48). Ikinon akinmej tiktekichiuiliaj toTajtsin Dios timochijchikauaj tikchiuaskej ijkon ken Jesús okichi uan tlen otlamachti.

11. ¿Tleka ualeua tikitaj oui tikchiuaskej ijkon ken Jesús okichi?

¹¹ Tejuan tikmatij san iTekiuajkayo toTajtsin Dios kachiuas tlen amo kuali. Pero xamo tikitaj oui tikchiuaskej ijkon ken Jesús okichi ijkuak techtoktiaj tlen amo kuali. Matikitakan tlen okipanok se tokni itoka Janiya. Ye okichikoitayaj porque okse tlamantli mota. Ye okijto: “Sapanoua onimoyolkokouaya. Noijki onikualaniaya uan oniknekiaya makitlaxtlauakan tlen onechtoktijkej. Ikinon opejki nimouika inuan akinmej kinekij makintlakaitakan uan amo makinchikoitakan. Ne onimokuayejyekouaya nimoyolseuiskia tla ijkon nikchiuaskia”. Non tokni satepan okitak omonekiaya kipatlas ken omokuayejyekouaya. Ye okijto: “Opejki nimokuayejyekoua ijkon ken oksekimej uan ayakmo onikneltokaya san Jehová uelis tlayektlalis. Ikinon ayakmo onimouikak inuan akinmej ijkon mokuayejyekouaj”. Xamo tinochtin techkualania ijkuak oksekimej kitetoktiaj tlen amo kuali. Matimomaluikan porque tlamo timouikaskej inuan akinmej ijkon mokuayejyekouaj noso timokajkalakiskej itech política (Juan 15:19).

12. ¿Tleka moneki kuali matikpejpenakan tlen tikitaj, tlen tiktlajtoltiaj uan tlen tikkakij?

¹² ¿Tlen techpaleuis matimoyolseuikan ijkuak oksekimej kitetoktiaj tlen amo kuali? Kuali matikpejpenakan tlen tikitaj, tlen tiktlajtoltiaj uan tlen tikkakij. Ijkon tikijtouaj porque itech internet kitlaliaj miak tlamantli tlen amo melauak para oksekimej makinteneuakan tekiuajkej. Miakej amo kijtouaj tlen melauak ijkuak itlaj panoua uan san kijtouaj tlen yejuan mokuayejyekouaj. Noijki amo uelis itlaj tikchiuaskej maski kijtoskej tlen melauak panotok. San timoyolkokoskej uan tikualaniskej tla san tikitoskej noso san tikkaktoskej noticias (Prov. 24:10). Ayakmo tikpatioitaskej iTekiuajkayo toTajtsin Dios uan tikilkauaskej san Jehová tlayektlalis uan kachiuas tlen amo kuali.

13. ¿Ken techpaleuis tla mojmostla tiktlajtoltiskej iTlajtol toTajtsin Dios?

¹³ Noijki techpaleuis tla mojmostla tiktlajtoltiskej iTlajtol toTajtsin Dios uan tla timokuayejyekoskej tlen kijtoua. Se tokni tlen itoka Alia sapanoua omoyolkoko ijkuak okitak okitetoktiayaj tlen amo kuali akinmej chantij ialtepe uan amitlaj okinmiluiayaj. Ye okijto: “Onikilnamik san Jehová kiyektlalis nochi tlen amo kuali panotok. Oniktlajtolti tlen kijtoua Job 34:​22-29 uan ompa kijtoua amikaj uelis motlatis ixpan Jehová. San ye kimati kichiuas tlen kuali uan tlayektlalis”. ¿Tlen tikchiuaskej axkan ijkuak ok tikchiaj iTekiuajkayo toTajtsin Dios makachiua tlen amo kuali?

¿TLEN UELIS TIKCHIUASKEJ AXKAN?

14. ¿Tlen techpaleuis amo matiktetoktikan tlen amo kuali? (Colosenses 3:​10, 11).

¹⁴ Tejuan amo uelis tikachiuaskej tlen amo kuali pero uelis tikpejpenaskej ken tikinmitaskej oksekimej. Yokitakej uelis titetlasojtlaskej ijkon ken Jesús okichi. Tla titetlasojtlaj techyolinis nochtin matikintlakaitakan maski kitetoktiaj tlen amo kuali (Mat. 7:12; Rom. 12:17). Jehová paki ijkuak kita titetlasojtlaj uan nochtin tikintlakaitaj (xiktlajtolti Colosenses 3:​10, 11).

15. ¿Ken kinpaleuis oksekimej ijkuak tikintlapouiaj?

¹⁵ Tejuan tikinpaleuiaj oksekimej ijkuak tikintlapouiaj tlen kijtoua iTlajtol toTajtsin Dios. ¿Tleka ijkon tikijtouaj? Porque “itlamatilis Jehová” uelis kinpatilis innemilis oksekimej uan ijkon tetlasojtlaskej uan kinekiskej kiyolpaktiskej Jehová (Is. 11:​6, 7, 9). Se tlakatl tlen itoka Jemal omosetili inuan akinmej kinekij kipatlaskej tekiua porque omokuayejyekouayaj okichiuaya tlen amo kuali. Ijkon okichi non tlakatl ijkuak ayamo omomachtiaya. Satepan okijto: “Amo uelis tikinkitskiskej personas uan tikinmiluiskej ayakmo makitetoktikan tlen amo kuali. Pero uelis tikinpaleuiskej ika iTlajtol toTajtsin Dios makipatlakan tlen mokuayejyekouaj. Non onechpaleui ayakmo manikchiua tlen onimokuayejyekouaya”. Ye opejki momachtia iTlajtol toTajtsin Dios uan non okipaleui makikaua non tlamantli. Ijkuak tikinmachtiaj oksekimej iTlajtol toTajtsin Dios uelis kinpaleuis ayakmo makitetoktikan tlen amo kuali.

16. ¿Tleka tikneki tiktematiltis tlen kichiuas iTekiuajkayo toTajtsin Dios?

¹⁶ Tejuan tikintlapouiaj oksekimej ijkon ken Jesús okichi. Tikinmiluiaj san iTekiuajkayo toTajtsin Dios kachiuas tlen amo kuali. Ijkon tikinyolchikauaj akinmej yokintoktijkej tlen amo kuali (Jer. 29:11). Itech párrafo chiknaui otimotlapouijkej tlen okipanok Nancy. Ye okijto: “Sapanoua nechpaleuia nimomachtia iTlajtol toTajtsin Dios porque ijkon nikxikoua ijkuak nechtoktiaj tlen amo kuali noso ijkuak oksekimej ijkon kintoktiaj. Jehová techyolchikaua ika iTlajtol”. Ikinon moneki kuali timomachtiskej tla tiknekij tikinyolchikauaskej oksekimej. Tla tikneltokaj san iTekiuajkayo toTajtsin Dios kachiuas tlen amo kuali, amo tikitaskej oui tikintlapouiskej oksekimej ijkuak itlaj techtlajtlaniskej akinmej inuan timomachtiaj noso akinmej inuan titekipanouaj.b

17. ¿Ken techyolchikaua Jehová maski oksekimej kitetoktiaj tlen amo kuali?

¹⁷ Tejuan tikmatij ok panotos tlen amo kuali porque Satanás ok tlanauatia tlaltikpak. Jehová yokijto techpaleuis uan ajsis tonal ‘kikixtis akin tlanauatia tlaltikpak’ (Juan 12:31). Noijki Biblia techyekiluia tleka panotok tlen amo kuali uan techiluia toTajtsin Dios moyolkokoua ijkuak kita titlajyouiaj (Sal. 34:​17-19). Jesús noijki otechmachti tlen moneki tikchiuaskej ijkuak tikitaj oksekimej kitetoktiaj tlen amo kuali. Noijki ayakmo miak poliui uan iTekiuajkayo toTajtsin Dios techpaleuis ayakmo matitlajyouikan (2 Ped. 3:13). Axkan matitetlapouikan kuali tlajtoli tlen kijtoua toTajtsin Dios ualtlanauatis ipan tlaltikpak ijkuak ok tikchiaj maajsi tonal mamochiua tlen melauak uan tlen kuali (Is. 9:7).