Jehová techpaleuia matiyolpakikan

1, 2. (1) ¿Ken momachiliaj sekimej? (2) ¿Tlen timomachtiskej?

AXKAN nochtin kinekij yolpakiskej pero amo nochipa yolpakij maski sapanoua mochijchikauaj. Noijki miakej sapanoua moyolkokouaj uan kimachiliaj itlaj kinpoloua. Xamo sekimej iTlaixpantijkauan Jehová noijki ijkon momachiliaj. Axkan tikatej “itlamian tonalmej” ikinon tikixnamikij miak tlamantli uan ualeua amo tiyolpakij (2 Tim. 3:1).

² Axkan tikitaskej tleka ualeua ayakmo tiyolpakij uan tlen techpaleuis oksepa matiyolpakikan. Achto matikitakan akin techpaleuia melauak matiyolpakikan.

¿AKIN TECHPALEUIA MELAUAK MATIYOLPAKIKAN?

3. ¿Tlen techmachtia nochi tlen Jehová okichi? (Noijki xikinmita fotos).

³ Jehová nochipa yolpaki uan kineki tejuan noijki matiyolpakikan. Ikinon okichi miak tlamantli tlen techpaleuia matiyolpakikan, kualtsin okichi tlaltikpak, okinchi miakej colores, okichi uelik tlakuali uan tiyolpakij ijkuak tikinmitaj yolkamej mauiltiaj. Nin kiteititia Jehová techtlasojtla uan kineki matiyolpakikan.

Se elefantekonetl: Image © Romi Gamit/Shutterstock; pingüinokonemej: Vladimir Seliverstov/500px via Getty Images; tentsokonemej: Rita Kochmarjova/stock.adobe.com; ome delfines: georgeclerk/E+ via Getty Images

4. (1) ¿Tleka Jehová yolpaki maski kita ken titlajyouiaj? (2) ¿Ken techpaleuia Jehová? (Salmo 16:11).

⁴ Biblia kijtoua toTajtsin Dios “yolpaki” pero kimati tinochtin titlajyouiaj (1 Tim. 1:11). Pero non amo kijtosneki san moyolkokojtok. Ye kuali kimati keman kipojpolos nochi tlen techtlajyouiltia. Kichixtok maajsi tonal ijkuak kachiuas nochi tlen techyolkokoua uan tlen techtekipachoua. Jehová kimati ken timomachiliaj uan techpaleuia matiyolpakikan (xiktlajtolti Salmo 16:11). Matikitakan ken okipaleui Jesús mayolpaki.

5, 6. ¿Tleka Jesús yolpaki?

⁵ Jesús sapanoua yolpaki. ¿Tleka ijkon tikijtouaj? Jesús yolpaki porque “okimokixti toTajtsin Dios” uan kipia iyelis ijkon ken ye (Col. 1:15; 1 Tim. 6:15). Noijki ye yimiak xiuitl kajki iuan iTajtsin porque kimati san ye techpaleuia matiyolpakikan.

⁶ Jesús nochipa kichiua tlen kineki iTajtsin uan non kipaleuia mayolpaki (Prov. 8:​30, 31; Juan 8:29). ToTajtsin Dios kiselia Jesús porque ye nochipa kitlakamati (Mat. 3:17).

7. ¿Tlen techpaleuis matiyolpakikan?

⁷ Tiyolpakiskej tla timochijchikauaj okachi kuali timouikaskej iuan Jehová. Ikinon matimomachtikan tlen kichiua Jehová uan tlen mokuayejyekoua uan non techpaleuis matiyolpakikan uan okachi tikchiuaskej ijkon ken ye kichiua. Tejuan tipakij ijkuak tikchiuaj tlen Jehová kineki porque tikmatij ye techselia (Sal. 33:12).a Pero ualeua xamo tikmachiliaj amo tiyolpakij maski tikmatij non tlamantli. ¿Kijtosneki toTajtsin Dios ayakmo techselia? Amo. Jehová kimati tejuan titlajtlakolejkej ikinon ualeua timoyolkokouaj uan amo kuali timomachiliaj (Sal. 103:14). Matikitakan tleka ualeua ayakmo tiyolpakij uan noijki tikitaskej tlen uelis techpaleuis oksepa matiyolpakikan.

MATIMOCHIJCHIKAUAKAN TIYOLPAKISKEJ

8. ¿Ken timomachiliaj ijkuak itlaj techpanotikisa?

⁸ Ijkuak itlaj techpanotikisa. Xamo kanin tichantij techtlajyouiltiaj, tlaxixini, amo onka tomin noso yotikokoxkatikej. Non tlamantli amo techkauilia matiyolpakikan porque amo ueli tikpatlaj tlen techpanoua. ITlajtol toTajtsin Dios kijtoua ijkuak timoyolkokouaj amo kuali timomachiliaj (Prov. 15:13). Matikitakan tlen okipanok se tokni tlayekanki. Ye sapanoua otlajyoui porque achto omiki ikni uan satepan imama uan ipapa. Ye okijto ken omomachiliaya ijkuak ok oyoltokaj: “Onikmachiliaya noselti onikatka uan amikaj uelis nechpaleuiskia. Onikchiuaya miak tlamantli uan amo onikatka iuan nofamilia ijkon ken oniknekiaya uan non onechyolkokouaya”. Nin kiteititia sapanoua timoyolkokouaj ijkuak itlaj techpanotikisa.

9. ¿Tlen techpaleuis oksepa matiyolpakikan? (Jeremías 29:​4-7, 10).

⁹ ¿Tlen techpaleuis oksepa matiyolpakikan? Uelis tiyolpakiskej tla amo san techtekipachojtos tlen techpanoua uan noijki matiktlasojkamatikan tlen tikpiaj. Miakej kijtouaj melauak tiyolpakiskej tla nochi kuali yetos. Pero amo neli tlen mokuayejyekouaj porque Biblia amo ijkon kijtoua. Ijkon tikmatij porque ijkuak judíos okinuikakej Babilonia, Jehová okinmilui mamochijchikauakan mayolpakikan (xiktlajtolti Jeremías 29:​4-7, 10). ¿Tlen techmachtia tlen Jehová okinmilui? Amo san matechtekipachojto tlen techpanoua uan matiktlasojkamatikan tlen tikpiaj. Amo matikilkauakan Jehová touan kajki uan techpaleuia (Sal. 63:7; 146:5). Se tokni tlen itoka Efi omokojko uan ayakmo ueli nejnemi. Ye okijto: “Jehová sapanoua onechpaleui uan noijki nofamilia uan tokniuan tlen inuan nimonechikoua. Tla nikijtoskia ayakmo nimochijchikauas, yetoskia ken amo nikintlasojkamatilia tlen okichijkej. Ikinon nimochijchikaua amo san manechtekipachojto tlen techpanoua uan niyolpaki”.

10. ¿Tleka uelis tiyolpakiskej maski titlajyouiaj?

¹⁰ Uelis tiyolpakiskej maski itlaj techpanos noso ijkuak tofamiliares tlajyouiaj (Sal. 126:5).b ¿Tleka? Tejuan amo tiyolpakij san ijkuak kuali tikatej. Matikitakan tlen okijto se precursora itoka María. Ye okijto: “Amo sapanoua timoyolkokouaj ijkuak titlajyouiaj porque tikilnamiktokej tlen kichiuas Jehová. Non amo kijtosneki amo timoyolkokoskej, tichokaskej noso amo tikijtoskej ken timomachiliaj. ToTajtsin Dios techpaleuia matiyolpakikan maski san tlen techpanos”. Axkan techpanotok miak tlamantli. Pero matikilnamiktokan amo nochipa ijkon techpanos porque satepan nochi moyektlalis ijkon ken ijkuak kiaui kipojpoloua kanin titlaksaj. Ayakmo miak poliui uan Jehová kipojpolos nochi tlen techtlajyouiltia.

11. ¿Ken techpaleuia tlen okipanok Pablo?

¹¹ ¿Tlen tikchiuaskej tla timokuayejyekouaj titlajyouiaj porque Jehová ayakmo techselia? Techpaleuis tla timokuayejyekouaj tlen okijyouijkej akinmej yiuejkika okitekichiuilijkej toTajtsin Dios. Matikitakan tlen okipanok Pablo. Jesús okinauati makitematilti itoka “itech altepemej” uan noijki “makinmatilti tekiuajkej uan israelitas” (Hech. 9:15). Pero Pablo sapanoua otlajyoui (2 Cor. 11:​23-27). ¿Kijtosneki toTajtsin Dios amo okiseliaya? Amo. Pablo okixiko miak tlamantli porque Jehová iuan okatka (Rom. 5:​3-5). Ikinon tejuan noijki matiktekichiuilikan Jehová maski titlajyouiaj porque touan kajki uan techpaleuis.

12. ¿Tleka timoyolkokoskej tla amo mochiua tlen tikchiaj?

¹² Ijkuak amo mochiua tlen tikchiaj (Prov. 13:12). Tejuan tiktekichiuiliaj Jehová porque tiktlasojtlaj. Pero moneki tikitaskej kox melauak ijkon uelis tikchiuaskej porque tlamo timoyolkokoskej (Prov. 17:22). Se tokni precursora itoka Holly okijto: “Oniknekiaya nias nimomachtiti para okachi nitetlapouis Tekiuajkayotl. Noijki oniknekiaya nitetlapouiti itech okse altepetl noso nitlapaleuiti Ramapo. Pero amo ijkon onikchi uan non sapanoua onechyolkoko. Sapanoua onimoyolkoko porque amo omochi tlen onikchiaya mapano”. Miakej tokniuan noijki ijkon kinpanoua.

13. ¿Tlen uelis tikchiuaskej tla amo ueli okachi tiktekichiuiliaj Jehová?

¹³ ¿Tlen techpaleuis oksepa matiyolpakikan? Matikilnamiktokan Jehová amo technauatia matikchiuakan tlen amo uelis tikchiuaskej. Ye okachi kipatioita ken tikpiaj toyelis uan amo tlen tikchiuaj. Noijki okachi kipatioita tlen tikpiaj itech toyolo uan amo san kita kox tiktekichiuiliaj miak. Jehová kineki matiyetokan tiyolyamankej uan amo keman matikkauakan (Miq. 6:8; 1 Cor. 4:2). Ikinon matikchiuakan san tlen tiuelij tikchiuaj.c Jehová okachi kipatioita tlen timokuayejyekouaj, tlen tiknekij tikchiuaskej uan matikpiakan kualtsin toyelis maski amo ueli okachi tiktekichiuiliaj. ¿Uelis timouikaskej inuan tokniuan uan tikinpaleuiskej okachi makitekichiuilikan Jehová? ¿Uelis tiktlajkuililiskej se tokni para tikyolchikauaskej? Noso ¿uelis tiknotsaskej se tokni por teléfono noso tikitatiuij ikalijtik? Jehová techteochiuas tla timochijchikauaskej tikinpaleuiskej oksekimej. Matikilnamiktokan ijkuak Jehová kichiuas nochi tlen yokijto, tikchiuaskej miak tlamantli tlen axkan amo ueli timokuayejyekouaj. Tokni Holly tlen yotimotlapouijkej itech párrafo 12 noijki okijto: “Ijkuak nimoyolkokoua, nimokuayejyekoua uan nikilnamiki satepan nochipa niyoltos. Ikinon nikilnamiki Jehová nechpaleuis manikchiua tlen nikneki ijkuak tiyetoskej itech xochitlali”.

14. ¿Tlen okse tlamantli amo techpaleuia matiyolpakikan?

¹⁴ Ijkuak san tiknekij timoyolpaktiskej. Sekimej kitlaliaj itech redes sociales tlen kinpaleuia mayolpakikan. Kijtouaj yolpakij ijkuak kanaj yauij paxialotiuij, ijkuak motlakouiaj uan ijkuak kichiuaj tlen kinpaktia. Amo tlajtlakoli timoyolpaktiskej porque Jehová ijkon otechchijchi. Pero sekimej yokitakej amo pakij maski kipiaj tlen kinekij. Se precursora tlen itoka Eva okijto: “Amo niyolpaki ijkuak san nimokuayejyekojtok tlen nikneki nikchiuas uan san nochipa nikneki nikpias okseki tlamantli”. Akin ijkon kichiua, san moyolkokoua uan amo kuali momachilia.

15. ¿Tlen techmachtia tlen okipanok tekiua Salomón?

¹⁵ Matikitakan tlen okipanok Salomón. Ye okinekiaya kimatis kox uelis yolpakiskia tla san kichiuaskia tlen okinekiaya. Ikinon okikuaya tlen okipaktiaya, okikakiaya tlatsotsonali uan okimokoui miak tlamantli kuajkualtsin uan patio. Pero ¿tlen okipanok? San omoyolkoko uan okijkuilo: “Toixtololo amo kuali kajki san ika tlen kita, nion tonakas ika tlen kikaki” (Ecl. 1:8; 2:​1-11). Miakej mokuayejyekouaj pakiskej tla kipiaskej miak tomin uan tla kichiuaskej tlen kinekij. Pero tomin amo keman techpaleuis matiyolpakikan.

16. ¿Tleka tiyolpakiskej tla tikinpaleuiskej oksekimej? (Noijki xikinmita fotos).

¹⁶ ¿Tlen techpaleuis oksepa matiyolpakikan? Jesús okijto: “Okachi paki akin itlaj kitemaka uan amo ijkuak itlaj kiselia” (Hech. 20:35). Se tlayekanki itoka Alekos okijto: “Nimochijchikaua nikinpaleuis oksekimej. Ijkuak ijkon nikchiua amo san nikita tlen nechpanoua uan okachi niyolpaki”. ¿Ken uelis tikinpaleuiskej oksekimej? Matikinyolchikauakan tokniuan tlen moyolkokouaj. Xamo amo uelis tikyektlaliskej tlen kinpanoua pero uelis tikinkakiskej uan tikinmiknomatiskej. Noijki matikinmilnamiktikan makiluikan Jehová tlen kintekipachoua porque ye kineki kinkakis (Sal. 55:22; 68:19). Noijki matikinmilnamiktikan Jehová amo keman kinkauas inselti (Sal. 37:28; Is. 59:1). Matikintlakualchiuilikan noso kanaj inuan matinemitij. Matikinmiluikan touan matetlapouitij uan ijkon moyolchikauaskej. Tipakiskej tla tikinpaleuiskej oksekimej uan amo san tikilnamiktoskej tlen techpanoua (Prov. 11:25).

17. ¿Tlen moneki tikchiuaskej tla tiknekij tiyolpakiskej? (Salmo 43:4).

¹⁷ Okachi tiyolpakiskej tla timochijchikauaskej okachi kuali timouikaskej iuan Jehová. Biblia kijtoua Jehová techpaleuia matiyolpakikan (xiktlajtolti Salmo 43:4). Ikinon amo matimomojtikan maski san tlen tlamantli tikixnamikiskej. Kuali matimouikakan iuan Jehová uan non techpaleuis nochipa matiyolpakikan (Sal. 144:15).