¿Tlen kijtoua Biblia makichiuakan akinmej yomonamiktijkej?

Biblia kijtoua

ToTajtsin Dios okichijchi Adán uan Eva, satepan okinnamikti. Ijkon okichi para san sekan yetoskej tlakatl uan siuatl uan uelis kinpiaskej inkoneuan (Génesis 1:27, 28; 2:18).

ToTajtsin Dios kineki mayolpakikan akinmej yomonamiktijkej (Proverbios 5:18). Ikinon Biblia kijtoua tlen moneki kichiuaskej para uelis yolpakiskej.

Itech nin tlamachtil timomachtiskej:

• ¿Tlen kinnauatia toTajtsin Dios akinmej yomonamiktijkej?

• ¿Ken kita toTajtsin Dios ijkuak moxelouaj noso mokajkauaj inmixpan tekiuajkej?

• ¿Moneki mamoijkuilokan inmixpan tekiuajkej para makinseli toTajtsin Dios?

• ¿Tlen kijtoua Biblia moneki kichiuas tlakatl uan siuatl?

• ¿Kinnauatia toTajtsin Dios akinmej yomonamiktijkej makinpiakan inkoneuan?

• ¿Uelis nechpaleuis Biblia tla yonimonamikti?

• Textos para akinmej yomonamiktijkej

¿Tlen kinnauatia toTajtsin Dios akinmej yomonamiktijkej?

ToTajtsin Dios kineki san mamonamiktikan se tlakatl iuan se siuatl (Génesis 2:24). ToTajtsin Dios kineki mamonamiktikan san iuan se, amo kipaktia mamonamikti se tlakatl iuan okse tlakatl noso se siuatl iuan okse siuatl, noijki amo kipaktia san sekan machantikan tla ayamo monamiktiaj (1 Corintios 6:9; 1 Tesalonicenses 4:3). Jesús okinmachti idiscípulos makitlakamatikan tlanauatilmej tlen toTajtsin Dios okinnauati akinmej yomonamiktijkej (Marcos 10:6-8).

ToTajtsin Dios kijtoua amo keman mamokajkauakan akinmej yomonamiktijkej. Ikinon ijkuak monamiktiaj kijtouaj nochipa motlasojtlaskej uan san sekan yetoskej hasta ijkuak ixpoliuiskej. ToTajtsin Dios kineki makichiuakan tlen okijtojkej (Marcos 10:9).

¿Ken kita toTajtsin Dios ijkuak moxelouaj noso mokajkauaj inmixpan tekiuajkej?

¿Tlen kijtoua Biblia ijkuak akinmej yomonamiktijkej moxelouaj noso mokajkauaj inmixpan tekiuajkej? Ualeua tlakatl noso siuatl moneki moxeloskej, xamo para kitatiuij se infamiliar tlen mokokoua. Pero Biblia amo kijtoua mamoxelokan tla mokualaniaj uan tlajyouiaj. Biblia kijtoua mamotlapouikan para kuali mamouikakan uan amo mamokajkauakan (1 Corintios 7:10).

Biblia kijtoua akinmej yomonamiktijkej san uelis mokajkauaskej inmixpan tekiuajkej tla ikaj auilnemi (Mateo 19:9). Pero tla amo ikaj oauilnenki uan mokajkauaj inmixpan tekiuajkej amo uelis oksepa monamiktiskej (Mateo 5:32; 1 Corintios 7:11).

¿Moneki mamoijkuilokan inmixpan tekiuajkej para makinseli toTajtsin Dios?

ToTajtsin Dios kinmiluia akinmej kichiuaj ken Cristo makintlakamatikan tekiuajkej, ken ijkuak tlanauatiaj mamoijkuilokan akinmej monamiktiaj (Tito 3:1). Tla kanin chantij akinmej kinekij monamiktiskej ijkon tlanauatiaj, moneki san niman makichiuakan. Tla ijkon kichiuaj, kiteititiaj kinekij san sekan nochipa yetoskej ken toTajtsin Dios kineki.a

¿Tlen kijtoua Biblia moneki kichiuas tlakatl uan siuatl?

• Tlen moneki kichiuaskej. Moneki motlasojtlaskej uan motlakaitaskej (Efesios 5:33). Moneki san yejuan moyolpaktiskej ijkuak motekaj uan moneki nochipa motlakaitaskej (1 Corintios 7:3; Hebreos 13:4). Tla kinpiaj inkoneuan, moneki san sekan makinmiskaltikan (Proverbios 6:20).

  

  ¿Akin moneki tekipanoti uan akin mokauas kalijtik? Biblia amo kinmiluia tlen moneki kipejpenaskej, ikinon kinkauilia akinmej yomonamiktijkej makipejpenakan tlen okachi kinpaleuis.

• Tlen moneki kichiuas tlakatl. Biblia kijtoua: “Tlakatl kiyekana isiua” (Efesios 5:23). Nin kijtosneki ye moneki kiyekanas ifamilia uan moneki kipejpenas tlen okachi kinpaleuis isiua uan ikoneuan.

  

  Moneki kinmakas tlen ika mopanoltiskej, kajsikamatis ken momachiliaj uan kinpaleuis mamouikakan iuan toTajtsin Dios (1 Timoteo 5:8). Kiteititia kitlasojtla isiua ijkuak kikaki tlen kijtoua uan kajsikamati ken momachilia (Proverbios 31:11, 28). Biblia kijtoua tla ijkon kichiua tlakatl kiteititia kitlasojtla isiua (Colosenses 3:19).

• Tlen moneki kichiuas siuatl. Biblia kijtoua: “Siuatl noijki makitlakaita inamik” (Efesios 5:33). ToTajtsin Dios yolpaki ijkuak kita siuatl kitlakaita inamik.

  

  Siuatl moneki kipaleuis inamik ijkuak itlaj kipejpenaskej uan kitlakaitas tlen kipejpena (Génesis 2:18). Biblia kijtoua siuamej tlen kitlakaitaj innamik, kuali kichiuaj (Proverbios 31:10).

¿Kinnauatia toTajtsin Dios akinmej yomonamiktijkej makinpiakan inkoneuan?

Amo. Yiuejkika kema okinnauati sekimej makinpiakan inkoneuan. Pero axkan akinmej kichiuaj ken Cristo kinkauilia makipejpenakan kox kinekij kinpiaskej inkoneuan noso amo (Génesis 1:28; 9:1). Jesús amo okinnauati idiscípulos makinpiakan inkoneuan, nion idiscípulos okinnauatijkej oksekimej ijkon makichiuakan. Akinmej yomonamiktijkej moneki kipejpenaskej kox kinpiaskej inkoneuan noso amo.

¿Uelis nechpaleuis Biblia tla yonimonamikti?

Kema. Biblia kinpia principios tlen uelis mitspaleuiskej xiyolpaki tla yotimonamikti, mitspaleuis tikixnamikis san tlen tlamantli ijkuak nantlajyouiskej.

Biblia uelis kinpaleuis akinmej yomonamiktijkej makichiuakan nin tlamantli:

• Melauak ximotlasojtlakan (1 Corintios 13:4-7; Colosenses 3:14).

• Amo xiktemo san tlen mitspaktia (1 Corintios 10:24).

• Kuali xitlakakikan (Santiago 1:19).

• Ximotlakaitakan (Romanos 12:10).

• Ximotlapojpoluikan (1 Pedro 4:8).

• Amo keman xikkaua monamik (Marcos 10:9).

• Xikmatikan nanmochiaskej (Efesios 4:2, 3).

• Ximopaleuikan (Eclesiastés 4:9).

• Okachi ximotlasojtlakan (El Cantar de los Cantares 8:7).