¿Kox ikaj uelis kiyektlalis tlaltikpak?

Miakej motekipachouaj porque kijtouaj tikijtlakojtokej tlaltikpak uan noijki nochi tlen yoltok. Sekimej ixtlamatkej tlen kimaluiaj tlaltikpak kijtouaj totlajtlakol yipolitokej miakej yolkamej uan okseki tlamantli tlen yoltok.

¿Tikijtlakoskej uan ayakmo moyektlalis tlaltikpak? ¿Noso tikmaluiskej uan ijkon kuali tiyetoskej?

¿Kox tlapaleuis tlen miakej kinekij kichiuaskej para tlayektlaliskej?

Ixtlamatkej kijtouaj uelis tikmaluiskej tlaltikpak uan ijkon kuali tiyetoskej. Sekimej ixtlamatkej kijtouaj para uelis tlayektlaliskej moneki mochijchikauaskej ijkon kichiuaskej uan san sekan tekipanoskej. Yejuan kijtouaj mamochiua nin tlamantli:

• Moneki matikmaluikan tlali, noijki kanin kojyo, kanin tlaameya uan mar.

• Moneki mopatlas ken tlatokaj uan ken motekitiltia seki tlamantli.

• Moneki mopatlas ken kichijchiuaj tlakuali uan ken moxexeloua uan ijkon amo miak ijtlakauis. Noijki moneki okachi kikuaskej okseki tlamantli tlen yoli itech tlali uan amo okachi kikuaskej nakatl nion michimej.

• Moneki matikpatlakan ken timokuayejyekouaj uan amo san matiknekikan tikpiaskej miak tlamantli.

¿Tejuatsin tlen timokuayejyekoua? ¿Kox uelis san sekan tekipanoskej tekiuajkej, akinmej tlanemakaj uan oksekimej para ijkon tlayektlaliskej? ¿Noso oui ijkon kichiuaskej porque san tlaixnekij, san kintekipachoua tlen yejuan kineki uan amo kimatij ken uelis tlayektlaliskej? (2 Timoteo 3:1-5).

Techyolchikaua tlen panos satepan

Biblia kijtoua amitlaj kipanos tlaltikpak. Noijki techyekiluia tleka oksekimej amo uelij tlayektlaliaj maski mochijchikauaj ijkon kichiuaskej. Pero noijki kijtoua ken moyektlalis tlaltikpak uan tlen moneki panos para mamoyektlali.

¿Tleka amo uelij kiyektlaliaj tlaltikpak akinmej mochijchikauaj ijkon kichiuaskej? Jehováa okichijchi tlaltikpak uan okilui se tlakatl uan siuatl makimaluikan (Génesis 1:28; 2:15). Yejuan kuali yetoskiaj tla kikauiliskiaj makinyekana akin okinchijchi uan tla kitlakamatiskiaj tlen okinmilui (Proverbios 20:24). Pero yejuan amo okitlakamatkej Jehová uan okichijkej tlen okinekiayaj (Eclesiastés 7:29). Ikinon maski oksekimej mochijchikauaj kiyektlaliskej tlaltikpak amo uelij ijkon kichiuaj porque san yetoskia ken kitlaliliaj se parche (Proverbios 21:30; Jeremías 10:23).

¿Tlen moneki mamopatla? ToTajtsin Dios amo kinkauilis oksekimej okachi makijtlakokan tlaltikpak (Apocalipsis 11:18). Ye kineki kinpatkayotis tekiuajkej uan amo san kinmiluis tlen moneki kichiuaskej para okachi kuali matlanauatikan uan ayakmo makijtlakokan tlaltikpak (Apocalipsis 21:1). Ikinon Jehová techilui itech itlajtol: “Ne nochi nikyankuilijtok” (Apocalipsis 21:5).

¿Ken kiyektlaliskej tlaltikpak? Jehová kinpatkayotis tekiuajkej uan kitlalis ikaj matlanauati desde ompa iluikak uan itoka iTekiuajkayo toTajtsin Dios. Non tekiuajkayotl kiyekanas Jesucristo uan tlanauatis ipan nochi tlaltikpak (Daniel 2:44; Mateo 6:10).

Non tekiuajkayotl techmachtis matikintlakamatikan itlanauatiluan toTajtsin Dios. Tejuan uelis tikmaluiskej tlaltikpak uan kuali tiyetoskej tla tikkauiliaj toTajtsin Dios matechyekana porque ye otlachijchi (Isaías 11:9). Biblia kijtoua ijkuak ualtlanauatis iTekiuajkayo toTajtsin Dios kuali tiyetoskej pero amo tikijtlakoskej tlaltikpak. ITekiuajkayo toTajtsin Dios kiyektlalis nin tlamantli:

• Nochtin kipiaskej tlen kikuaskej (Salmo 72:16).

• Kiyektlaliskej tlaltikpak (Isaías 35:1, 2, 6, 7).

• Akinmej chantiskej nikan tlaltikpak kinmaluiskej yolkamej uan yolkamej amitlaj techtoktiskej (Isaías 11:6-8; Oseas 2:18).

• Ayakmo itlaj panos tlen ualeua techtlajyouiltia (Marcos 4:37-41).

Ayakmo uejkauas ijkuak iTekiuajkayo toTajtsin Dios kiyektlalis nochi non tlamantli. Tla tikneki okachi tikmatis xiktlajtolti kanin kijtoua “¿Keman ualtlanauatis iTekiuajkayo toTajtsin Dios?”.