¿Moneki mokajkalakis religión itech política?

Miakej kijtouaj kichiuaj ken Cristo pero mokajkalakiaj itech política. Sekimej religiones kinpaleuiaj akinmej kinekij tlanauatiskej para noijki makinpaleuikan. Noijki políticos kichiuaj miak tlamantli para makinpaleuikan religiones. Ualeua akinmej tlayekanaj itech religiones kinekij tlayekanaskej itech política. Itech seki altepemej kajki se religión tlen kijtouaj kichiuaj ken Cristo.

Pero tlen tikijtoua tejuatsin, ¿kuali mamokajkalakikan itech política akinmej kichiuaj ken Cristo? ¿Tlen okichi Jesús? Ye okijto: “Porke ijkó kemi Ne onikchi moneki no ijkó xikchiwakah” (Juan 13:15). Matikitakan kox Jesús omokajkalaki itech política.

¿Omokajkalaki Jesús itech política?

Amo. Jesús amo keman omokajkalaki itech política.

Jesús amo okinek tlanauatis. Ijkuak Diablo okilui Jesús kinmakaskia “nochteh n tlalmeh kan tlanawatiah n tlaltikpaktlakah”, ye amo okinek kinselis porque amo okinekiaya ueyititos (Mateo 4:8-10).a Noijki sekimej okinekiayaj makinnauati Jesús uan okinekiayaj kichiualtiskej mamokajkalaki itech política. “Pero Jesús okinmitak yejwah omochijchikajtokah kiwikaskeh para mayeto Inrey. Yika, oksepa oyá iwa otlejkok ikpak tepetl san Ye iselti” (Juan 6:15). Jesús amo okichi tlen oksekimej okinekiayaj uan amo okinek mokajkalakis itech política.

Jesús amo okipaleui se tekiua. Judíos amo okinpaktiaya kitlaxtlauaskej impuestos, noijki okijtouayaj amo omonekiaya kitlaxtlauaskej. Yejuan okinekiayaj Jesús mamokajkalaki itech tlen okichiuayaj tekiuajkej pero ye amo okinek. Ye okinmilui: “Xikmakakah n César tlan iaxka n César, iwa xikmakakah Dios tlan iaxka n Dios” (Marcos 12:13-17). Ye amo okinek mokajkalakis itech política pero okijto omonekiaya kitlaxtlauaskej impuestos tlen okitlajtlaniayaj tekiuajkej. Pero amo nochipa omonekiaya kintlakamatiskej tekiuajkej porque san toTajtsin Dios omonekiaya kiueyichiuaskej uan amo se tekiua (Mateo 4:10; 22:37, 38).

Jesús okipaleui iTekiuajkayo toTajtsin Dios, non Tekiuajkayotl kajki iluikak (Lucas 4:43). Jesús amo omokajkalaki itech política porque okimatoka tekiuajkej amo uelis kichiuaskej tlen toTajtsin Dios kineki, san uelis kichiuas iTekiuajkayo (Mateo 6:10). Noijki okimatoka toTajtsin Dios amo tlayektlalis nikan tlaltikpak ika tekiuajkej, porque kinpatkayotis ika iTekiuajkayo (Daniel 2:44).

¿Omokajkalakijkej itech política tokniuan itech achto siglo?

Amo. Idiscípulos Jesús otetlakamatkej uan amo okichijkej tlen oksekimej okichiuayaj (Juan 15:19). Yejuan okichijkej ken Jesús uan amo omokajkalakijkej itech política (Juan 17:16; 18:36). Idiscípulos Jesús amo okinpaleuijkej tekiuajkej uan otlamachtijkej iTekiuajkayo toTajtsin Dios, ijkon okichijkej tlen okinnauatijkej (Mateo 28:18-20; Hechos 10:42).

Tokniuan itech achto siglo sapanoua okipatioitayaj kitlakamatiskej toTajtsin Dios. Pero noijki okimatokaj omonekiaya kintlakaitaskej tekiuajkej (Hechos 5:29; 1 Pedro 2:13, 17). Ik non, okitlakamatiayaj tlen okinnauatiayaj uan okitlaxtlauayaj impuestos (Romanos 13:1, 7). Yejuan amo omokajkalakiayaj itech política pero okinkauiliayaj tekiuajkej makinpaleuikan (Hechos 25:10, 11; Filipenses 1:7).

¿Mokajkalakiaj itech política akinmej axkan kichiuaj ken Cristo?

Biblia techyekiluia Jesús uan idiscípulos amo omokajkalakijkej itech política. Noijki iTlaixpantijkauan Jehová kichiuaj ken Cristo uan amo mokajkalakiaj itech política. Noijki kichiuaj ken akinmej okichiuayaj ken Cristo itech achto siglo, mochijchiuaj kichiuaskej tlen Jesús otlanauati, ik non, otetlapoui “kuali tlajtolmej itech Tekiuajkayotl” (Mateo 24:14).