¿Tlen iTekiuajkayo toTajtsin Dios?
Biblia kijtoua
ITekiuajkayo toTajtsin Dios se gobierno tlen Jehová okitlali. Biblia techmachtia nin Tekiuajkayotl kajki iluikak (Marcos 1:14, 15; Mateo 4:17). Maski nin Tekiuajkayotl kipia seki tlamantli ken tekiuajkej tlen nikan tlanauatiaj, okachi ueyititok.
Tekiuajkej. ToTajtsin Dios okipejpenki Jesucristo uan okimakak chikaualistli para matlanauati itech iTekiuajkayo, nion se tekiua okachi chikauak ken ye (Mateo 28:18). Ika ichikaualis, Jesús kichiua tlen kuali. Yokiteititi ye kuali tlanauatia uan teiknomati (Mateo 4:23; Marcos 1:40, 41; 6:31-34; Lucas 7:11-17). Jehová yokipaleui Jesús para makinpejpena akinmej iuan tlanauatiskej ompa iluikak (Apocalipsis 5:9, 10).
Nochipa yetos. Tekiuajkej tlen axkan katej amo nochipa tlanauatiaj, pero iTekiuajkayo toTajtsin Dios “amo keman kitlajtlamiskej” (Daniel 2:44).
Akinmej kinnauatis. Akinmej kichiuaskej itlanekilis toTajtsin Dios uelis yetoskej ijkuak ye ualtlanauatis maski san kanin chantij (Hechos 10:34, 35).
Tlanauatilmej. ITekiuajkayo toTajtsin Dios techmaka tlanauatilmej para amo matikchiuakan tlen amo kuali, noijki techpaleuia matikpiakan tonemilis ken Jehová kipaktia. Biblia kijtoua: “‘Xiktlasojtla Moteko Dios ika nochi moyolo, ika nochi moalma iwa ika nochi motlalnamikilis’. Ye nin tlanawátili non okachi tlayakantok iwa okachi weyi kijtosneki. Iwa onka ok se tlanawátili non kimoiknitia iwa kijtoa: ‘Xiktlasojtla mokni kemi te timotlasojtla’” (Mateo 22:37-39). Tla tiktlasojtlaj Jehová iuan oksekimej, techpaleuis kuali matimouikakan ijkuak ualtlanauatis iTekiuajkayo toTajtsin Dios.
Techmachtia. ITekiuajkayo toTajtsin Dios amo san techiluia tlen moneki tikchiuaskej, noijki techmachtia ken uelis titetlakamatiskej (Isaías 48:17, 18).
Tlen kichiuas. ITekiuajkayo toTajtsin Dios tlapaleuis mamochiua itlanekilis uan amo para akinmej tlanauatiskej makipiakan miak tlamantli. Nin tekiuajkayotl kichiuas nochipa mayoltokan itech se xochitlali akinmej kitlasojtlaj Jehová (Isaías 35:1, 5, 6; Mateo 6:10; Apocalipsis 21:1-4).