¿Sionistas iTlaixpantijkauan Jehová?

Amo. ITlaixpantijkauan Jehová tikchiuaj ken Cristo uan nochi tlen tikneltokaj kisa itech Biblia. Seki religiones kineltokaj sekimej profecías tlen katej itech Santos Escritos, kijtouaj moneki judíos yetoskej san sekan itech Palestina, pero iTlaixpantijkauan Jehová amo ijkon kijtouaj. Amo kineltokaj Biblia tlajtoua itech nin tlamantli político. Biblia amo kipaleuia nion se tekiua tlen kajki nikan tlaltikpak, nion se altepetl noso tlanechikol. Revista Akin Tetlapouijtok, amatlajkuilol tlen kichiuaj iTlaixpantijkauan Jehová yokijto Biblia “amo tlajtoua itech sionismo político”.

Encyclopædia Britannica kijtoua sionismo non se “nechikol judío nacionalista tlen kineki mamochiua uan mayeto se estado nacional judío itech Palestina”. Kisa itech religión uan política. ITlaixpantijkauan Jehová amo kipaleuiaj sionismo uan amo mokajkalakiaj itech sionismo político.

ITlaixpantijkauan Jehová san tlaneltokaj itech toTajtsin Dios uan amo kipaleuiaj política nion sionismo. Techixmatij porque amo timokajkalakiaj itech política, ikinon itech sekimej altepemej techtlajyouiltiaj. Melauak tikmatokej tekiuajkej noso nechikolmej, amo uelis kitlaliskej yolseuilistli itech tlaltikpak tlen uejkauas. San iTekiuajkayo toTajtsin Dios uelis kichiuas.

Onka se tlamantli tlen kichiuaj nochtin iTlaixpantijkauan Jehová, maski san kanin katej kintlakamatij itlanauatiluan tekiuajkej. Nion se iTlaixpantijka Jehová amo kinmixnamiki tekiuajkej uan noijki amo mokajkalakia ijkuak moteuiaj.