¿Tleka iTlaixpantijkauan Jehová amo kichiuaj Domingo de Pascua?
Tlen kijtouaj uan tlen melauak
Tlen kijtouaj: ITlaixpantijkauan Jehová amo kichiuaj Domingo de Pascua porque amo kineltokaj Cristo.
Tlen melauak: Tikmatij san Jesucristo uelis techmakixtis uan timochijchikauaj tikchiuaskej ijkon ken otechititi (1 Pedro 2:21; Lucas 2:11).
Tlen kijtouaj: Namejuan amo nankineltokaj okiyolitijkej Jesús.
Tlen melauak: Amo san tikneltokaj okiyolitijkej Jesús, noijki tikmatij akinmej tikchiuaj ken Cristo moneki titlaneltokaskej itech iyolitilis uan itech non titetlapouiaj (1 Corintios 15:3, 4, 12-15).
Tlen kijtouaj: Amo namechyolkokoua amo mayolpakikan namokoneuan itech Pascua.
Tlen melauak: Tikintlasojtlaj tokoneuan uan timochijchikauaj kuali tikinmachtiskej uan mayolpakikan (Tito 2:4).
¿Tleka iTlaixpantijkauan Jehová amo kichiuaj Domingo de Pascua?
Costumbres tlen kichiuaj itech seki altepemej itech Domingo de Pascua amo kisaj itech Biblia.
Jesús otlanauati matikilnamikikan imikilis uan amo ijkuak okiyolitijkej. TiiTlaixpantijkauan Jehová sejse xiuitl tikilnamikij imikilis itech tonal tlen kijtoua calendario lunar, tlen yiuejkika omotekitiltiaya (Lucas 22:19, 20).
Tikmatij miakej costumbres tlen mochiuaj itech Domingo de Pascua, tlen kisa itech miak tlamantli tlen achto okichiuayaj para kinpiaskiaj inkoneuan, amo kipaktia toTajtsin Dios. Jehová technauatia ‘san ye matikueyichiuakan’ uan moyolkokoua tla tikchiuaj tlen amo kipaktia (Éxodo 20:5; 1 Reyes 18:21).
Kuali tikmatij itech Biblia amo kanaj kijtoua matikchiuakan Domingo de Pascua ikinon amo tikchiuaj. Porque ompa techiluia ‘matikmaluikan ixtlamatilistli uan tokuayejyekolis’ uan amo san matikchiuakan costumbres (Proverbios 3:21; Mateo 15:3). Uan maski ijkuak techtlajtlaniaj tlen tikneltokaj kuali tikinyekiluiaj, tiktlakaitaj tlen oksekimej kipejpenaj kichiuaskej (1 Pedro 3:15).