¿Melauak kajki Diablo?
Biblia kijtoua
Kema, Diablo melauak kajki, okatka se ángel pero satepan okixnamik toTajtsin Dios uan axkan ye “kinnawatia n tlakah de nin tlaltíkpaktli” (Juan 14:30; Efesios 6:11, 12). Biblia tlatlamantli kitokayotia Diablo. Xikinmita ninmej textos:
Satanás, kijtosneki “Teixnamiki” (Job 1:6).
Diablo, kijtosneki “akin tlakajkayaua kijtoua tlen amo melauak” (Apocalipsis 12:9).
Kouatl, itech Biblia ijkon kiluiaj porque tlakajkayaua (2 Corintios 11:3).
Techyejyekoua (Mateo 4:3).
Techkajkayaua (Juan 8:44).
Amo san kineskayotia tlen amo kuali
Miakej kineltokaj Diablo kineskayotia tlen amo kuali onka itech toyolo uan noijki itech iyolo toTajtsin Dios. Biblia kijtoua toTajtsin Dios omotlapoui iuan Diablo. ToTajtsin Dios amo kipia tlajtlakoli uan chipauak, ik non, tikmatokej amo san iselti omotlapouijtoka porque ye amo kipia tlen amo kuali (Deuteronomio 32:4; Job 2:1-6). Noijki Biblia kijtoua Diablo okiyejyeko Jesús akin amo kipia tlajtlakoli para ma tlajtlakolchiua (Mateo 4:8-10; 1 Juan 3:5). Biblia kijtoua Diablo melauak kajki uan amo san kineskayotia tlen amo kuali.
Miakej kineltokaj Diablo amo melauak kajki, ¿tleka ijkon kineltokaj? Biblia kijtoua Satanás tlakajkayaua para kichiuas tlen ye kineki (2 Tesalonicenses 2:9, 10). Ye kichiua oksekimej ma kineltokakan amo melauak kajki (2 Corintios 4:4).
¿Tlen kineltokaj miakej?
Sekimej kineltokaj: Diablo noijki kitokayotiaj Lucifer.
Tlen melauak: Ika tlajtoli hebreo itech seki Biblias “Lucifer” kijtosneki “petlani” (Isaías 14:12). Nin tlajtoli kajki itech se profecía tlen kijtoua akinmej yetoskiaj tekiuajkej ompa Babilonia, tlen toTajtsin Dios kinpojpoloskia porque omoueyinekiayaj (Isaías 14:4, 13-20). Itech nin profecía ijkuak okintlaniliayaj tekiuajkej babilonios, okinpinauiayaj uan okinmiluiayaj: “Tipetlani”.
Sekimej kineltokaj: Diablo kipaleuia toTajtsin Dios.
Tlen melauak: Diablo kikokolia toTajtsin Dios uan amo kipaleuia. Noijki kinkokolia akinmej kitekichiuiliaj toTajtsin Dios, ik non, kintlajyouiltia uan kijtoua amo melauak kitlasojtlaj toTajtsin Dios (1 Pedro 5:8; Apocalipsis 12:10).