¿Ken kinyolitis toTajtsin Dios akinmej yoixpolikej?

Biblia kijtoua

Tlajtoli griego anástasis itech Biblia motlajtolkopa ken “yolitilistli” uan kijtosneki “timoketsaskej noso oksepa timeuaskej”. Ijkuak ikaj kiyolitiaj yetoskia ken oksepa moketsa uan kiyolitiaj ijkon ken okatka achto mikiskia (1 Corintios 15:12,13).

Tlajtoli yolitilistli amo tikajsij itech Antiguo Testamento, nion itech Escrituras Hebreas, pero kema kijtoua sekimej okineltokayaj oksepa kinyolitiskiaj. ToTajtsin Dios okilui profeta Oseas kinyolitiskiaj akinmej katej itech mikakoyoktli (Oseas 13:14; Job 14:13-15; Isaías 26:19; Daniel 12:2,13).

¿Kanin kinyolitiskej? Sekimej kinyolitiaj iluikak para tlanauatiskej iuan Cristo (2 Corintios 5:1; Apocalipsis 5:9). Biblia kijtoua “achto moyolitiskeh” akinmej yaskej iluikak (Apocalipsis 20:6; Filipenses 3:11). Ninmej tlajtolmej kiteititiaj satepan noijki kinyolitiskej oksekimej. Akinmej satepan kinyolitiskej mokauaskej nikan tlaltikpak (Salmo 37:29).

¿Ken kinyolitiskej? ToTajtsin Dios yokimakak chikaualistli Jesús para kinyolitis akinmej yoixpolikej (Juan 11:25). Ik non, uelis kinyolitis akinmej katej itech mikakoyoktli uan moyolitiskej ijkon ken achto okatkaj (Juan 5:28, 29). Akinmej kinyolitiskej nikan tlaltikpak, oksepa kipiaskej innakayo uan inmiomio, kuali yetoskej uan ayakmo mokokoskej (Isaías 33:24; 35:5, 6). Pero akinmej kinyolitiskej iluikak amo kipiaskej intlalnakayo ken tejuan porque kinyolitiaj ken espíritus (1 Corintios 15:42-44, 50).

¿Akinmej kinyolitiskej? Biblia kijtoua itech tlaltikpak “moyolitiskeh, akimeh otlájtlakolchijkeh iwa akimeh amó” noso akinmej yolmelauakej uan akinmej amo yolmelauakej (Hechos 24:15). Akinmej yolmelauakej pouij siuamej uan tlakamej ken Noé, Abrahán uan Sara (Génesis 6:9; Hebreos 11:11; Santiago 2:21). Akinmej amo yolmelauakej yejuan akinmej amo okixmatkej Jehová, ik non, amo okitlakamatkej.

Akinmej amo kinekij kipatlaskej innemilis uan amo kinekij kitlakamatiskej Jehová, ijkuak ixpoliuij ayakmo kinyolitiskej porque amo omoyolkopkej (Mateo 23:33; Hebreos 10:26, 27).

¿Keman kinyolitiskej? Biblia okijto itech xiuitl 1914, ijkuak Jesús opejki tlanauatia ompa iluikak, noijki opejki kinyolitiaj akinmej iuan tlanauatiskej (1 Corintios 15:21-23). Jesús tlanauatis nikan tlaltikpak mil xiuitl, ijkuakon miakej kinyolitiskej uan tlaltikpak mokopas se xochitlali (Lucas 23:43; Apocalipsis 20:6, 12, 13).

¿Tleka tikneltokaj melauak kinyolitiskej akinmej yoixpolikej? Porque Biblia kijtoua chiknaui okinyolitijkej uan sekimej okitakej ijkuak ijkon opanok (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Biblia kijtoua ken okiyolitijkej Lázaro. Ye yokipiaya naui tonal oixpoliuik uan miakej okitakej ijkuak Jesús okiyoliti (Juan 11:39, 42). Akinmej okikokoliayaj Jesús amo uelis kijtoskiaj amo melauak tlen opanok, ik non, okinekiayaj kimiktiskej Jesús uan noijki Lázaro (Juan 11:47, 53; 12:9-11).

Biblia kijtoua toTajtsin Dios uelis kinyolitis akinmej yoixpolikej. Jehová kuali kilnamiktok ken okatkaj achto ixpoliuiskiaj uan ye kipia miak chikaualistli, ik non, amitlaj uelis kitsakuilis para kinyolitis (Job 37:23; Mateo 10:30; Lucas 20:37, 38). Ye amo san kipia chikaualistli para kinyolitis, noijki kineki kinyolitis. Biblia kijtoua: “Tiknekis tikitas tlen otikchijchi ika momauan” (Job 14:15). Ijkon momachilis toTajtsin Dios, ijkuak kinyolitis nikan tlaltikpak akinmej yoixpolikej.

Seki tlamantli tlen amo melauak

Sekimej kijtouaj: Ijkuak ikaj kiyolitiaj, ialma oksepa mokopa ipan itlalnakayo.

Tlen melauak: Itech Biblia, alma kijtosneki toyolilis uan amo itlaj tlen ok yoltok ijkuak tiixpoliuij (Génesis 2:7; Ezequiel 18:4). Ijkuak ikaj kiyolitiaj, alma amo mosetilia iuan okse tlalnakayotl, san kiyolitiaj akin oixpoliuik.

Sekimej kijtouaj: Akinmej kinyolitiskej, sekimej san niman kinpojpoloskej.

Tlen melauak: Biblia kijtoua akinmej kichiuaskej tlen amo kuali kinmixkomakaskej (Juan 5:29). Pero amo kinmixkomakaskej ika tlen okichijkej achto mikiskiaj, kinmixkomakaskej ika tlen kichiuaskej satepan ijkuak kinyolitiskej. Jesús okijto: “Ijkuak non yomikkeh nechkakiskeh Ne Akin Ni Tekone de Dios, iwa akimeh nechkakiskeh [noso nechtlakamatiskej] yolitoskeh” (Juan 5:25). Tla akinmej kinyolitiskej kikakij uan kitlakamatij itlajtol Cristo, intoka yetos itech amochtli tlen kijtoua akinmej nochipa yoltoskej (Apocalipsis 20:12, 13).

Sekimej kijtouaj: Kinyolitiskej ika intlalnakayo tlen okipiayaj achto mikiskiaj.

Tlen melauak: Ijkuak ikaj ixpoliui, itlalnakayo ijtlakaui uan palani (Eclesiastés 3:19, 20).