¿Tleka iTlaixpantijkauan Jehová amo iluichiuaj ijkuak ikaj kajxitia xiuitl?

TiiTlaixpantijkauan Jehová amo tiiluichiuaj ijkuak ikaj kajxitia xiuitl porque kuali tikmatokej toTajtsin Dios amo kipaktia. Maski Biblia amo techiluia amo matiiluichiuakan ijkuak ikaj kajxitia xiuitl, kema techiluia seki tlamantli para tikmatiskej ken kita toTajtsin Dios non iluitl. Matikitakan tlen kijtoua Biblia.

1. Nin iluitl poui itech religión tlen amo melauak. Se diccionario enciclopédico kijtoua, ijkuak kichiuaj nin iluitl kineltokaj “amo kuali ejekamej kinekij itlaj amo kuali kichiuiliskej akin kajxitia xiuitl” uan ijkuak “iyolikniuan kiluiaj makipia suerte kipaleuiaj amitlaj mamochiua” (Funk & Wagnalls Standard Dictionary of Folklore, Mythology, and Legend). Okse amochtli kijtoua yiuejkika okinmijkuilouayaj akinmej onesiayaj para kimatiskiaj keski oneskej, nin okatka miak ipati “porque kitaskiaj tlen horóscopo kipiaskiaj” uan okisayaj itech “akinmej kinmitaj sitlalimej”. Non amochtli kijtoua: “Kineltokaj velas tlen kintekitiltiaj itech cumpleaños kipiaj magia para uelis kitlajtlaniskej tlen kinekij” (The Lore of Birthdays).

   Pero Biblia kijtoua magia amo kuali, nion tetlajchiuilistli, adivinación noso akinmej kijtouaj tlen panos satepan noso okseki tlamantli (Deuteronomio 18:14; Gálatas 5:​19-​21). Ikinon toTajtsin Dios okintlajyouilti babilonios porque okinmitayaj sitlalimej noso kitekitiltiaj adivinación (Isaías 47:11-​15). Maski tejuan amo san tiktemojtokej kanin uits se iluitl, moneki tiktlakamatiskej tlen kijtoua Biblia uan amo tikchiuaskej tetlajchiuilistli.

2. Akinmej opejkej kichiuaj ken Cristo amo oiluichiuayaj ijkuak ikaj okajxitiaya xiuitl. Se enciclopedia kijtoua, akinmej okichiuayaj ken Cristo itech achto siglo, “yejuan okitayaj nin iluitl ijkuak ikaj okajxitiaya xiuitl, poui itech religión tlen amo melauak” noso tlen okineltokayaj itech non religión (The World Book Encyclopedia). Biblia techiluia iapóstoles Jesús uan oksekimej tlen okinmachti ijkuak okatka nikan tlaltikpak, yejuan otechmachtijkej para tinochtin ijkon matikchiuakan (2 Tesalonicenses 3:6).

3. Akinmej kichiuaj ken Cristo kichiuaj san se iluitl tlen okinnauatijkej: makilnamikikan imikilis Jesús (Lucas 22:17-20). Biblia kijtoua “okachi kuali [...] tonal ijkuak timikij uan amo ijkuak tinesij” (Eclesiastés 7:1). Itech nochi inemilis Jesús nikan tlaltikpak, okiyolpakti toTajtsin Dios ikinon imikilis okachi miak ipati uan amo ijkuak oneski (Hebreos 1:4).

4. Itech Biblia amo kanaj kijtoua itekipanojkauan toTajtsin Dios oiluichiuayaj ijkuak ikaj okajxitiaya xiuitl. Ijkon tikijtouaj porque itech iTlajtol toTajtsin Dios katej ome tlamachtilmej kanin kijtoua ome tlakamej okinmiluichiuilijkej ijkuak okajxitijkej xiuitl pero yejuan amo okitekichiuiliayaj Jehová uan itech ninmej ome iluimej opanok itlaj tlen amo kuali (Génesis 40:20-​22; Marcos 6:​21-​29).

Inkoneuan iTlaixpantijkauan Jehová, ¿itlaj kuali kimopoliliaj porque amo kinmiluichiuiliaj ijkuak kajxitiaj xiuitl?

ITlaixpantijkauan Jehová noijki kintlasojtlaj inkoneuan ikinon san tlen tonal itlaj kintliokoliaj uan kichiuaj itlaj para mamauiltikan noso mamoyolpaktikan. Mochijchikauaj kichiuaskej ken toTajtsin Dios, akin nochipa kinmaka miak tlamantli kuali itekipanojkauan (Mateo 7:11). Ikinon inkoneuan iTlaixpantijkauan Jehová amitlaj kuali kimopoliliaj. Ninmej tlajtolmej ijkon kiteititiaj:

• “Okachi teyolpakti se tetliokolil ijkuak amo tikmati kox mitsmakaskej” (Tammy, kipia 12 xiuitl).

• “Amitlaj nechtliokoliaj ijkuak nikajxitia xiuitl pero nechmakaj itlaj okse tonal. Nechyolpaktia ijkuak itlaj nechtliokoliaj uan amo onikmatiaya kox nechmakaskiaj” (Gregory, kipia 11 xiuitl).

• “Konemej san kikuaj pastel uan tlakuikaj. Nonmej iluimej amo nechpaktiaj, tlen tikchiuaj itech nokalijtik okachi nechpaktia” (Eric, kipia 6 xiuitl).