¿Tleka Jesús tinochtin techmakixtia?
Biblia kijtoua
Jehová techmakixtia itech tlajtlakoli uan mikilistli ika imikilis Jesús. Biblia kijtoua ika ieso Jesús otechmakixti (Efesios 1:7; 1 Pedro 1:18, 19). Ik non, Jesús okijto: ‘Omotemakako makimiktikah iwa ijkó miakeh mamomakixtikah’ (Mateo 20:28).
¿Tleka omonekiaya ikaj ma techmakixti?
ToTajtsin Dios okichijchi achto tlakatl tlen omotokayotiaya Adán uan amo okipiaya tlajtlakoli. Uelis yoltoskiaj nochipa, pero amo ijkon opanok porque amo okitlakamatki toTajtsin Dios (Génesis 3:17-19). Tlajtlakoli okinpanoltili ikoneuan (Romanos 5:12). Biblia kijtoua Adán iselti otlajtlakolchi uan okinpanoltili ikoneuan, ik non, axkan titlajtlakolejkej uan timikij (Romanos 7:14). Nion se tlakatl uelis techmakixtis porque tinochtin titlajtlakolejkej (Salmo 49:7, 8).
ToTajtsin Dios okinmiknomatki ixuiuan Adán porque nochtin tlajyouiskiaj (Juan 3:16). Pero ye nochipa kichiua tlen moneki, ik non, amo san ijkon kikauaskia tlen opanok nion amo ueliskia san niman kintlapojpoluiskia (Salmo 89:14; Romanos 3:23-26). ToTajtsin Dios techtlasojtla, ik non, okitemakak itlaj miak ipati para techtlapojpoluis uan para kipojpolos nochi totlajtlakoluan (Romanos 5:6-8). ToTajtsin Dios okitemakak Jesús, maski okatka iKone para techmakixtis.
¿Tlen kijtosneki ma techmakixtikan?
Itech Biblia kiteititia eyi tlamantli tlen kijtosneki ijkuak ikaj temakixtia:
Ijkuak itlaj kitlaxtlauaj (Números 3:46, 47).
Kimakixtiaj ikaj noso kinmakaj tlen okatka inmiaxka (Éxodo 21:30).
Omotlaxtlauaya tlen omonekiaya.a
Ma tikitakan tleka tikijtouaj imikilis Jesús otechmakixti.
Ijkuak itlaj kitlaxtlauaj. Biblia kijtoua “Dios onomechko saikpanoua patio” (1 Corintios 6:20; 7:23). Okitlaxtla ika ieso Jesús, “para matiyetokah iaxkawah Dios, itech nochteh n tlaltikpaktlakah, itech nochteh akimeh kipiah ok se intlajtol, itech nochteh n altepemeh iwa oksikimeh wejweyi tlalmeh” (Apocalipsis 5:8, 9).
Techmakixtia. Jesús okitemakak inemilis para techmakixtis itech tlajtlakoli (1 Corintios 1:30; Colosenses 1:14; Hebreos 9:15).
Omotlaxtlauaya tlen omonekiaya. Inemilis Jesús tlen okitemakak okatka ajsitok ijkon ken inemilis Adán tlen okipolo, porque amo okipiaya tlajtlakoli (1 Corintios 15:21, 22, 45, 46). Biblia kijtoua: “Por se tlakatl [Adán] non amo otetlakitak, miakeh omokopkeh tlajtlakolejkeh. Pero ijkó noiwa, por se tlakatl, Cristo non otetlakitak, miakeh yetoskeh chipawakeh de intlajtlakol” (Romanos 5:19). Nin texto techpaleuia ma tikajsikamatikan tleka imikilis se tlakatl uelis kinmakixtis miakej. Ik non, nochtin akinmej kineltokaj imikilis Jesús uelis momakixtiskej (1 Timoteo 2:5, 6).
a Ijkuak itech Biblia kijtoua ikaj okimakixtiayaj, kijtosneki okitemakayaj tomin noso okse tlamantli para itlaj kitlaxtlauaskiaj. Ika hebreo, tlajtoli kafár kijtosneki kitlakentia noso kitlapachoua (Génesis 6:14). Ik non, ijkuak itech Biblia kijtoua kintlakentia noso kitlapachoua totlajtlakoluan, kijtosneki techtlapojpoluia (Salmo 65:3). Tlajtoli kófer kijtosneki itlaj tlen tiktemakaj para tiktlaxtlauaskej noso para ikaj tikmakixtiskej (Éxodo 21:30). Noijki tlajtoli lýtron tlen kajki ika griego, motlajtolkopa ken ijkuak ikaj kimakixtiaj, noijki uelis motlajtolkopas ken “itlaj tlen tiktemakaj para ikaj tikmakixtiskej” (Mateo 20:28, The New Testament in Modern Speech, de R. F. Weymouth). Griegos okitekitiltiayaj tlajtoli lýtron para kijtoskej kimakixtiskej se tlakatl noso se tlakeuali.