Se telpochtli kinmita akinmej kalakij kanin monechikouaj iTlaixpantijkauan Jehová

TELPOCHMEJ UAN ICHPOCHMEJ TLAJTLANIJ

¿Tleka moneki nimonechikos?

ITlaixpantijkauan Jehová monechikouaj ome uelta sejse semana, ¿tlen kichiuaj ijkuak monechikouaj? ¿Ken mitspaleuis tla timonechikos?

¿Tlen kichiuaj iTlaixpantijkauan Jehová itech kali kanin monechikouaj?

Ompa momachtiaj Biblia uan kinmititiaj ken uelis kinpaleuis. Tla timonechikos mitspaleuis:

Xikixmati akin toTajtsin Dios.
Xikajsikamati tleka axkan panotok miak tlamantli.
Xiyeto tiyolkuali.
Ximouika inmiuan akinmej melauak mitstlasojtlaj.

¿Otikmatiaya? Kanin monechikouaj iTlaixpantijkauan Jehová kinmachtiaj itech iTekiuajkayo toTajtsin Dios (Mateo 6:9, 10, TNM; 24:14, TNM; Lucas 4:43, TNM).

¿Tleka moneki timonechikos?

Tlen ompa timomachtis mitspaleuis. Principios bíblicos tlen ompa timomachtis mitspaleuiskej xikmati tlen moneki tikchiuas (Proverbios 4:5). Biblia mitspaleuis xikpejpena tlen okachi kuali. Noijki Biblia technankilia:

Nikan moijtouaj seki tlamachtilmej tlen tikinkakij ijkuak timonechikouaj itlamian semana:

¿Tleka moneki tikchiuaskej itech tonemilis tlen kijtoua Biblia?
¿Akin uelis tikiluiskej ma techpaleui ijkuak timotekipachouaj?
¿Ken techpaleuijtok iTekiuajkayo toTajtsin Dios?

Se ichpochtli tlen itoka Brenda okijto: “Se telpochtli tlen iuan nimomachtia touan omonechiko, omotlali iuan nofamilia uan otiktlanetijkej toamatlajkuiloluan, satepan onechilui okipakti tlen tokniuan otlanankilijkej itech nechikol, noijki okijto kanin monechikoua amo kinpiaj amatlajkuilolmej tlen tejuan tikinpiaj”.

¿Otikmatiaya? Amitlaj tiktlaxtlauas nion mitstlajtlaniliskej tomin tla touan timonechikos.

Mitsyolchikauaskej akinmej ompa tikinmixmatis. Biblia kijtoua moneki timonechikoskej para timoyolchikauaskej (Hebreos 10:24, 25). Mitsyolchikauas ijkuak tiyetos iuan akinmej kitlasojtlaj toTajtsin Dios uan amo san kintekipachoua tlen kinpanoua.

Se ichpochtli tlen itoka Elisa okijto: “Ualeua nimosotlaua uan nimoyolkokoua pero ijkuak nimonechikoua, tokniuan nechyolchikauaj uan ijkuak nimokopa nokalijtik niyolpaki uan ayakmo nimoyolkokoua”.

¿Otikmatiaya? Itech nochi tlaltikpak katej kanaj 120,000 tlanechikolmej uan katej kanaj 60,000 kalmej kanin timonechikouaj. Sejse xiuitl kinchijchiuaj kanaj 1,500 kalmej kanin timonechikouaj porque okachi timomiaktilijtokej.a

Tlen mokuayejyekouaj sekimej telpochmej uan ichpochmej

Se ichpochtli tlen itoka Jessica okijto: “Se tonal se ichpochtli tlen iuan onimomachtiaya touan omonechiko uan okitlajtlachialti ijkuak okitak tinochtin san sekan timomachtiaj. Akin techyekana kanin nitekipanoua touan omonechiko uan okipakti porque okitak miak uelta tiktekitiltiaj Biblia, ijkuak onikitak okipakti, onechyolchika uan noijki onechpaleui ma nikpatioita ijkuak timonechikouaj”.

Se telpochtli tlen itoka Timothy okijto: “Ijkuak nimonechikoua nechpaleuia porque ayakmo nimokuayejyekoua tlen nechtekipachoua, ompa noijki timomachtiaj ken uelis tiyolpakiskej, ken uelis okachi kuali tikpiaskej toyelis uan okseki tlamantli, ijkuak nimokopa nokalijtik okachi niyolpaki uan nimoyolchikaua”.

Se telpochtli tlen itoka Jacob okijto: “Se tlakatl tlen onikilui touan ma monechiko onechilui: ‘Namouan onimonechiko para nikitas amo melauak tlen nankineltokaj, pero onikitak tlen onimokuayejyekouaya amo melauak. Melauak nantetlasojtlaj’. Noijki okijto: ‘Maski amo onikinmixmatiaya akinmej ompa okatkaj, kuali onechselijkej ken yinikinmixmatiskia’”.

Se ichpochtli tlen itoka Madison okijto: “Ualeua nimokuayejyekoua axkan san niman nimokopas nokalijtik ijkuak tlamis tlanechikol. Pero ijkuak ompa nika nikilkaua uan ijkuak yotlanki tonechikol nimotlapouia iuan oksekimej uan ayakmo nikilnamiki oniknekiaya san niman nimokopas. Tla amo nimonechikoskia amo nikinmixmatiskia akinmej inmiuan nimouika”.

a Tla tikneki tikmatis kanin uelis timonechikos xikalaki kanin kijtoua “Timonechikouaj” uan satepan kanin kijtoua: “Xiktemo kanin timonechikos”.