Biblia kijtoua ijkuak itlaj tiktemakaj ma tikchiuakan ika nochi toyolo
Biblia kijtoua
Biblia techyoleua ma tiktemakakan tlen tikpiaj ika nochi toyolo. Ijkuak ijkon tikchiuaj tikinpaleuiaj oksekimej uan kuali timomachiliaj (Proverbios 11:25; Lucas 6:38). Jesús okijto: “Okachi yolpaki akin itlaj kitemaka uan amo ijkuak itlaj kiselia” (Hechos 20:35, TNM).
¿Keman kuali itlaj tiktemakaskej?
Ijkuak itlaj tiktemakaj ika nochi toyolo kinpaleuia oksekimej. Biblia kijtoua: “Xiktemakakah ijkó kemi yononkitlalijkeh itech nomoyolo, amo manomechixkoko nion xiktemakakah ijkuak nomechchijchikawah, porke Dios kitlasojtla akin kitemaka ika pakílistli” (2 Corintios 9:7).
ToTajtsin Dios kineki akinmej tikueyichiuaj ijkuak itlaj tiktemakaskej ma tikchiuakan ika nochi toyolo (Santiago 1:27, TNM). Tla tikinpaleuiaj akinmej itlaj kinpoloua, tikchiuaj tlen toTajtsin Dios kineki uan ye amo kilkaua ijkuak tikinpaleuiaj oksekimej porque tikinmakaj tlen tikpiaj (Proverbios 19:17). Biblia kijtoua satepan toTajtsin Dios techteochiuas (Lucas 14:12-14).
¿Keman amo kuali itlaj tiktemakaskej?
Ijkuak san totech timokuayejyekouaj, ken:
Ijkuak tiknekij san ma techitakan oksekimej (Mateo 6:2).
Ijkuak tiknekij itlaj ma techmakakan (Lucas 14:12-14).
Ijkuak san tiknekij ma techmakixti toTajtsin Dios (Salmo 49:6, 7).
Ijkuak itlaj tiktemakaj para ma kichiuakan tlen toTajtsin Dios amo kipaktia. Amo kuali ikaj ma tikmakakan tomin para ma tlauana, ma kimokoui droga noso ma motlatlani ika tomin (1 Corintios 6:9, 10, TNM; 2 Corintios 7:1). Noijki amo kuali ma tikmakakan tomin akin tlatsiui uan amo kineki tekipanos (2 Tesalonicenses 3:10).
Ijkuak itlaj tikinmakaj oksekimej uan amo tofamilia. Biblia kijtoua tetajmej moneki kinmakaskej tlen kinpoloua infamilia (1 Timoteo 5:8). Amo kuali tla achto itlaj tikinmakaj oksekimej uan amo tikmakaj tlen kipoloua tofamilia. Jesús noijki okijto amo kuali okichiuayaj akinmej amo okinekiayaj kinmakaskej tlen okinpolouaya intatajuan porque omokuayejyekouayaj tlen okipiayaj omonekiaya kimakaskej toTajtsin Dios (Marcos 7:9-13).