Okitlajtolkopkej ueyi nechikol regional 2020 tlen itoka “¡Nochipa xiyolpakikan!”

Itech 2020 ipan nochi tlaltikpak, nochtin tokniuan san sekan okitakej ueyi nechikol itech metstli julio uan agosto. Nin ueyi nechikol okitlajtolkopkej ika kanaj 500 tlajtolmej uan noijki okichijkej grabación. Nin tekitl uejkaua kanaj se xiuitl kichiuaskej. Pero itech xiuitl 2020 okitlajtolkopkej nin ueyi nechikol “¡Nochipa xiyolpakikan!” san ipan kanaj eyi metstli porque onka kokolistli coronavirus.

Otlapaleuijkej tokniuan tlen tekipanouaj itech departamento Mundial de Compras uan departamento de Servicios de Traducción tlen katej ompa kanin tlayekanaj. Tokniuan tlen tlapaleuiaj itech Servicios de Traducción, okitakej akinmej tlajtolkopaj omonekiaya kintekitiltiskej kuali micrófonos uan okseki tlamantli. Tokniuan tlen tlapaleuiaj itech departamento Mundial de Compras, okinkojkej mil micrófonos uan okintitlankej kanaj itech 200 altepemej.

Okinkojkej miakej micrófonos uan ijkon amo patio okintlaxtlajkej. Ompa san sekan okinyektlalijkej uan okintitlankej ipan nochi tlaltikpak. Sejse micrófono ipati okiski kanaj 3,000 pesos (170 dólares) uan amo okitlaxtlajkej ijkuak okintitlankej. Ijkon kanaj 20% amo okitekitiltijkej tomin.

Tokniuan tlen tlapaleuiaj itech departamento Mundial de Compras, otlakojkej itech abril uan mayo 2020 uan nochi oksekan okititlankej. Ijkuakon akinmej otlanemakayaj amo ueli okachi otekipanouayaj porque yokatka coronavirus. Pero itlamian mayo, itech kalmej Betel uan oksekan kanin tlajtolkopaj yokipiayaj nochi tlen kitekitiltiskiaj.

Tokni Jay Swinney tlen kiyekana departamento Mundial de Compras, okijto: “Nochtin tokniuan kuali otlapaleuijkej uan noijki akinmej tlanemakaj. Iespíritu Jehová otlapaleui san niman ma kipiakan tokniuan nochi tlen moneki uan amo patio”.

Tokni Nicholas Ahladis tlen tlapaleuia itech Servicios de Traducción, okijto: “Tokniuan tlen tlajtolkopaj amo ueli kisaj, pero opakej ijkuak okiselijkej tlen ika tekipanoskiaj. Maski nonmej tokniuan amo san sekan okatkaj, otlajtolkopkej, okinchijkej grabaciones tlen otlamachtijkej tokniuan, okinchijkej videos uan tlakuikalmej. Nochi nin okichijkej ika kanaj 500 tlajtolmej”.

Nin san seki tlamantli tlen otlapaleui ma mochiua ueyi nechikol regional 2020 tlen itoka “¡Nochipa xiyolpakikan!” uan nin okinpaleui nochtin tokniuan. Tomin tlen miakej kitemakaj ika nochi inyolo otechpaleui ma tikinkouakan micrófonos. Nin tomin kitemakaj kanin kijtoua donate.jw.org noso okse tlamantli kitemakaj.