Lunes 24 de noviembre
Tetlapojpoluia (Prov. 19:11).
Matikijtokan timoyolpaktijtok inuan sekimej tokniuan uan tikneki inuan tikmokixtilis se foto. Te tikinkixtia eyi fotos pero tikita se foto amo kuali okiski se tokni. Ikinon tikpojpoloua non foto uan tikinmokauia ome fotos kanin nochtin kuali okiskej. Ualeua tikilnamiktokej ijkuak otimoyolpaktiayaj inuan tokniuan. Pero xamo tikilnamikij se tokni okijto noso okichi itlaj tlen amo kuali. ¿Tlen tikchiuaskej? Uelis tikilkauaskej ijkon ken ijkuak tikpojpolouaj se foto (Efes. 4:32). Matikilnamikikan kuali iuan timouikaj. Okachi kuali tla tikintlatiaj “fotos tlen kuali okiskej”. w23.11 12 párrs. 16, 17
Martes 25 de noviembre
Siuamej mamoyektlakentikan [...]. Ijkon ken moneki kichiuaskej siuamej tlen kiueyichiuaj toTajtsin Dios (1 Tim. 2:9, 10).
Ika griego kijtosneki siuamej kuali mamotlakentikan uan mamokuayejyekokan ken momachiliskej oksekimej ijkuak kinmitaskej. Tiyolpakij ijkuak tikinmitaj siuamej kiueyichiuaj Jehová porque kuali kipejpenaj intlaken. Xikita tlen kuali uan tlen amo kuali. Nin kijtosneki kuali timokuayejyekos para tikmatis tlen kuali uan tlen amo kuali. Non mitspaleuis xikchiua tlen okachi kuali. Matikitakan tlen okichi Abigaíl. Inamik amo kuali okipejpenki tlen okichi pero Abigaíl san niman omokuayejyeko tlen uelis kinpanoskia akinmej inuan ochantiayaj. Ikinon ye san niman itlaj okichi para oksekimej amitlaj makinpano (1 Sam. 25:14-23, 32-35). Tla tikitaj tlen kuali uan tlen amo kuali, techpaleuis matikmatikan keman itlaj tikijtoskej. Noijki techpaleuis matikitakan ken tikinpaleuiskej oksekimej uan amo tikinyolkokoskej (1 Tes. 4:11). w23.12 20 párrs. 8, 9
Miércoles 26 de noviembre
Matipakikan porque tikchiaj matechueyitlali toTajtsin Dios (Rom. 5:2).
Ijkuak apóstol Pablo okintlajkuilili tokniuan tlen omonechikouayaj Roma. Yejuan yokixmatiayaj Jehová uan okimatiayaj akin Jesús, otlaneltokayaj uan okichiuayaj ken Cristo. Ikinon toTajtsin Dios okinmitaya yolkualmej porque otlaneltokayaj uan okinpejpenki ika iespíritu santo (Rom. 5:1). Desde ijkuakon yokimatiayaj melauak mochiuas tlen okinmiluijkej. Pablo okinmilui tlapejpenalmej tlen okatkaj Éfeso ken mochiuaskia tlen okichiayaj. Okinyekilui kiseliskiaj se “kualtsin tlateochiuali [...] akinmej yolchipauakej” (Efes. 1:18). Noijki tokniuan tlen okatkaj Colosas okinmilui kanin kiseliskiaj tlen okichiayaj. Okinmilui kinmakaskiaj ‘intetliokolil ompa iluikak’ (Col. 1:4, 5). Ikinon tokniuan tlapejpenalmej kinyolitiskej, nochipa chantiskej iluikak uan ompa tlanauatiskej iuan Cristo (1 Tes. 4:13-17; Apoc. 20:6). w23.12 9 párrs. 4, 5