Sekimej kijtouaj oui kitlasojtlaskej toTajtsin Dios, porque mokuayejyekouaj amo ueli kitaj, uejka kajki noso tetlajyouiltia. Xikita tlen kijtouaj sekimej:

• “Maski oniktlatlaujtiaya toTajtsin Dios, onikmachiliaya amo onechkakiaya porque uejka kajki. Noijki onikijtouaya amo techajsikamati uan amo kitekipachoua tlen techpanoua” (Marco, Italia).

• “Oniknekiaya niktekichiuilis toTajtsin Dios, pero onimokuayejyekouaya amo ueliskia ijkon nikchiuas porque uejka kajki. Onikijtouaya toTajtsin Dios san kineki techtlajyouiltis. Noijki onikijtouaya amo yolkuali” (Rosa, Guatemala).

• “Ijkuak ok onikatka takotsin onikijtouaya toTajtsin Dios san kita tlen amo kuali tikchiuaj para techtlajyouiltis. Satepan onikitaya uejka kajki, yetoskia ken se tekiua akin amo motekipachoua intech oksekimej” (Raimunda, Canadá).

¿Uan tejuatsin tlen tikijtoua? ¿Uelis tiktlasojtlaskej toTajtsin Dios? Akinmej kichiuaj ken Cristo yiuejkika ijkon motlajtlaniaj. Yiuejkika miakej amo okitlatlaujtiayaj toTajtsin Dios. ¿Tleka? Porque okimauiliayaj. Historiador Will Durant okijto: “¿Ken uelis se tlakatl tlen tlajtlakole kitlatlaujtis toTajtsin Dios akin uejka kajki uan amo yolkuali?”.

¿Tleka miakej ijkon mokuayejyekouaj itech toTajtsin Dios? ¿Tlen melauak tlamachtia Biblia? ¿Okachi tiktlasojtlaskej tla tikixmatij?

SEKIMEJ KIJTOUAJ

“Amo tikmatij kox ToTajtsin Dios melauak kipia itoka. Uan tla kema, amo tikmatij ken itoka” (Profesor David Cunningham, en su libro Theological Studies).

TLEN KIJTOUA BIBLIA

ToTajtsin Dios okijto: “Ne niJehová. Ijkon notoka” (Isaías 42:8). Tokayotl Jehová ika tlajtoli hebreo kijtosneki “Ye Kichiua ma Mochiua” (Génesis 2:4, nota).

Jehová kineki ma tiknotsakan ika itoka. Biblia kijtoua: “Xiknotsakan ika itoka uan xikinmatiltikan oksekimej altepemej tlen ye yokichi Xikteititikan itoka sapanoua ueyititok” (Isaías 12:4).

Jesús nochipa okinotski iTajtsin ika itoka uan ijkon okinmilui ma kichiuakan imachtijkauan. Se tonal okitlatlaujti iTajtsin uan okilui: “Ne onikinmatilti motoka”. ¿Tleka ijkon okichi? Ye okijto: “Para tlasojtlalistli tlen ika otinechtlasojtlak ma yeto inmiuan uan ne noijki ma niyeto inmiuan” (Juan 17:26, TNM).

TLEKA MONEKI TIKMATIS

Ixtlamatki Walter Lowrie okijkuilo: “Tlakatl akin amo kimati itoka toTajtsin Dios amo melauak kixmati [...] uan amo uelis kitlasojtlas tla san mokuayejyekoua amo melauak uelis kipaleuis”.

Victor nochipa oyaya teopan, pero amo melauak okixmatiaya toTajtsin Dios. Ye kijtoua: “ijkuak onikmatki toTajtsin Dios itoka Jehová, onikijto axkan melauak nikixmati. Axkan nimouika iuan toTajtsin Dios porque yetoskia ken melauak nikita”.

Jehová motokia innauak “akinmej [mokuayejyekouaj] itech itoka” uan kijtoua: “Nikinmiknomatis, ijkon ken se tlakatl kiknomati ikone tlen kitekichiuilia” (Malaquías 3:16, 17). ToTajtsin Dios kinteochiua akinmej kinotsaj ika itoka. Biblia kijtoua: “Nochi akin kijtos itoka Jehová momakixtis” (Romanos 10:13, TNM).

SEKIMEJ KIJTOUAJ

Diccionario Akal crítico de Teología kijtoua: “ToTajtsin Dios ye se Trinidad, ye Teta, Tekone uan Espíritu Santo. Ik non, amo uelis tikajsikamatiskej”. Noijki Diccionario abreviado del cristianismo kijtoua: “Católicos, ortodoxos, anglicanos uan protestantes ijkon kineltokaj”.

TLEN KIJTOUA BIBLIA

Jesús, ikone toTajtsin Dios, amo keman okijto ueyititok ijkon ken iTajtsin. Ye okijto: “Nio íwa Notajtsi, porke Notajtsi okachi weyijkatitok ke Ne” (Juan 14:28). Noijki okilui se imachtijka: “Nitlejkos íwa Notajtsi, Akin noiwa Nomotata, íwa Nodios, akin noiwa Nomodios” (Juan 20:17).

Espíritu santo amo se tlakatl. Achto imachtijkauan Cristo “okiselijkeh n Espíritu Santo”, uan Jehová okijto: “Niktitlanis no Espíritu itech nochteh n tlaltikpaktlakah” (Hechos 2:1-4, 17). Espíritu santo amo poui itech se Trinidad, ye ichikaualis toTajtsin Dios tlen ika kichiua tlen ye kineki.

TLEKA MONEKI TIKMATIS

Karl Rahner uan Herbert Vorgrimler akinmej momachtiaj Biblia, kijtouaj: “Amo uelis tikixmatiskej Trinidad tla amikaj kiteititis uan amo keman uelis tikajsikamatiskej”. Pero, ¿uelis tiktlasojtlaskej ikaj akin amo tikixmati uan amo tikajsikamatij? Amo. Ik non, amo uelis tiktlasojtlaskej toTajtsin Dios tla tikneltokaj poui itech se Trinidad.

Marco okitaya oui mouikas iuan toTajtsin Dios porque omokuayejyekouaya poui itech se Trinidad. Ye okijto: “Onimokuayejyekouaya toTajtsin Dios amo kineki ma tikixmatikan, ik non, onikijto amo uelis nikixmatis”. Pero, “Dios amo se Dios tlen san techtlapololtia” (1 Corintios 14:33, La Biblia de las Américas). Ye kineki ma tikixmatikan, ik non, amo motlatia. Jesús okijto: “Tejwah [...] tikixmatih Akin tikweyijkachiwah” (Juan 4:22).

Marco ok okijto: “Ijkuak onimomachti toTajtsin Dios amo poui itech se Trinidad, opejki kuali iuan nimouika”. Ik non, tla tikitaj Jehová ken toyolikni uan amo ken ikaj tlen amo tikixmati, uelis tiktlasojtlaskej. Biblia kijtoua: “Akin amo tetlasojtla ayamó kixmati Dios, porke Dios Ye n tlasojtlálistli” (1 Juan 4:8).

SEKIMEJ KIJTOUAJ

“Akinmej sapanoua tlajtlakolchiuaj ijkuak ixpoliuij kintlajyouiltiaj ijtik tlitl, kanin ‘nochipa tlatlatoskej’” (Catecismo de la Iglesia Católica). Sekimej teopixkej kijtoua tlitl kanin kintlajyouiltiaj akinmej otlajtlakolchijkej, kichiua amo ma mouikakan iuan toTajtsin Dios.

TLEN KIJTOUA BIBLIA

“Alma tlen tlajtlakolchiuas... ye mikis” (Ezequiel 18:4). Akinmej yoixpolikej “ayakmo itlaj kilnamikij” (Eclesiastés 9:5). Ik non, tla alma miki uan ayakmo itlaj kimatij, ¿tleka kijtoua “tlajyouijtos ijtik tlitl” noso ayakmo keman mouikas iuan toTajtsin Dios?

Itech Biblia kijtoua tlajtoli “infierno” ika hebreo uan griego kijtosneki kanin “kintokaj” akinmej yoixpolikej. Ijkuak Job sapanoua omokokouayaj okitlatlaujti toTajtsin Dios: “Tla techtlatiskia ijtik tlakoyoktli” (Job 14:13, Nueva Versión Internacional). Noso ken kijtoua La Sagrada Biblia, tlen okijkuilo Guillermo Jünemann, “ijtik tlitl”. Job amo okinekiaya tlajyouis noso tlatlatoskia, ye san okinekiaya moseuis, ik non, okinekiaya ixpoliuis.

TLEKA MONEKI TIKMATIS

Tla tikitaj toTajtsin Dios ken ikaj akin tetlajyouiltia amo uelis inauak timotokiskej. Rocío akin chanti México okijto: “Ijkuak ok onikatka takotsin onechmachtijkej onka tlitl kanin nochipa tlatlatoskej akinmej tlajtlakolchiuaj. Onikijtouaya toTajtsin Dios amo yolkuali uan onikmauiliaya. Onimokuayejyekouaya nochipa kualani uan tetlajyouiltia”.

Rocío ayakmo ijkon omokuayejyeko ijkuak omomachti itech Biblia toTajtsin Dios tetlasojtla uan akinmej yoixpolikej ayakmo itlaj kimati. Ye kilnamiki: “Onimoyolseui ijkuak onikajsikamatki toTajtsin Dios techtlasojtla uan noijki uelis niktlasojtlas. Axkan nikita ken se teta akin kinmaluia ikoneuan uan kineki kuali ma yetokan” (Isaías 41:13).

Miakej kitekichiuiliaj toTajtsin Dios porque momojtiaj tlatlatoskej, pero ye amo kineki ma tikmauilikan. Jesús okijto: “Xiktlasojtla Moteko Dios [Jehová] ika nochi moyolo” (Marcos 12:29, 30). Ijkuak tikajsikamatij toTajtsin Dios yolmelajki, techpaleuia ma tikneltokakan satepan ye tlaixkomakas ika melajkayotl. Ijkon ken Elihú, iyolikni Job, uelis tikijtoskej: “¡ToTajtsin Dios amo kichiua tlen amo kuali, akin sapanoua chikauak tlaixkomaka ika melajkayotl!” (Job 34:10, Nueva Versión Internacional).

Se tonal ijkuak Jesús okatka Jerusalén okintlapoui sekimej tlen melauak itech iTajtsin uan okijto teopixkej okipiayaj ome inmixko (Juan 8:12-30). Tlen okijto kichiua ma timokuayejyekokan tlen melauak tlamachtia Biblia itech toTajtsin Dios. Jesús okijto: “Tla nomejwah nochipa nonkitlakitaskeh notlajtol, milák nonyetoskeh notlamachtijkawah. Iwa nonkixmatiskeh tlan milák, iwa tlan milák nomechmakixtis” (Juan 8:31, 32).

Ijkuak Jesús okijto: “Tla nomejwah nochipa nonkitlakitaskeh notlajtol”, techititia ken uelis tikmatiskej tla se tlamachtil melauak noso amo. Ijkuak itlaj mitsmachtiskej ximotlajtlani: “¿Ijkon otlamachti Jesús? ¿Ijkon tlamachtia Biblia?”. Xikchiua ijkon ken akinmej okintlapoui Pablo: xikita tlen kijtoua Biblia kox mouika ika tlen mitsiluiaj oksekimej (Hechos 17:11).

Ijkon okichijkej Marco, Rosa uan Raimunda, ijkuak opejki momachtiaj inmiuan iTlaixpantijkauan Jehová. ¿Tlen okajsikamatkej?

Marco: “Ijkuak tokni otechmachtiaya, nochipa okitekitiltiaya Biblia para technankilis tlen otiktlajtlaniayaj. San niman opejki tiktlasojtlaj Jehová, axkan ne iuan nosiua okachi kuali timouikaj”.

Rosa: “Onimokuayejyekouaya Biblia se amatlajkuilol tlen okijkuilojkej tlakamej uan san okitlalijkej tlen yejuan omokuayejyekouayaj. Pero axkan nikmati miak tlamantli tlen achto amo onikmatiaya. Noijki okachi kuali nimouika iuan Jehová porque yetoskia ken melauak nikita uan nikneltoka techpaleuis”.

Raimunda: “Onikilui toTajtsin Dios nikneki nikixmatis. Satepan opejki nimomachtia Biblia iuan nonamik. ¡Axkan melauak tikixmatij Jehová! Tiyolpakij porque otimomachtijkej toTajtsin Dios melauak tetlasojtla”.

Itlajtol toTajtsin Dios, amo san tlamachtia tlen melauak noijki kijtoua ken iyelis Jehová. Techpaleuia ma tikixmatikan “nochi tlan Dios itech iteiknomatilis otechtliokoli” (1 Corintios 2:12). ¿Tleka amo timomachtia tlen melauak tlamachtia Biblia itech toTajtsin Dios uan tlen kichiuas satepan? Uelis okachi timomachtis itech www.jw.org kanin kijtoua “Biblia tlamachtia > ¿Tlen kijtoua Biblia?”. Uelis tiktlajtlanis se iTlaixpantijka Jehová ma mitsmachti. Tla ijkon tikchiuas, tikajsikamatis uelis tiktlasojtlas toTajtsin Dios.