Se siuatl judía kijtoua tleka axkan okse tlamantli kineltoka

Okachi techtlapoui.

Onineski itech xiuitl  1979, ompa Estados Unidos. Ijkuak onikpiaya eyi xiuitl notatajuan omokajkajkej inmixpan tekiuajkej. Nonantsin onechiskalti ken judía uan oniaya itech se escuela judía tlen itoka yeshivás. Ijkuak onikpiaya chikome xiuitl otichantitoj Israel uan oniaya itech se escuela tlen okatka ik kanin miakej otlatokayaj. Se xiuitl satepan otichantitoj México.

Maski amo okatka se sinagoga ik kanin otichantiayaj, onikchiuaya tlen onechmachti nonantsin, nochi sábados onikintlaliaya velas, oniktlajtoltiaya Torá [amatlajkuilol tlen judíos kitlajtoltiaj] uan onimotlatlaujtiaya ika se amochtli kanin kipia tlatlujtilismej tlen itoka sidur. Akinmej inmiuan onimomachtiaya onikinmiluiaya noreligión ye tlen okachi melauak. Ne amo oniktlajtoltiaya Nuevo Testamento kanin kijtoua tlen okichi uan tlen otlamachti Jesucristo, porque nonantsin onechiluiaya uelis kichiuas ma nikpatla tlen nikneltoka.

¿Tleka opejki tiktlajtoltia Nuevo Testamento?

Ijkuak onikpiaya 17 xiuitl onimokopki Estados Unidos para tlamis nimomachtis. Se noyolikni onechilui okichiuaya ken Cristo uan okijto tla amo nikneltoka Jesús amo itlaj ipati tlen nikneltoka.

—Ne onikilui: Akin kineltoka Jesús san mokajkayaua.

—¿Yotiktlajtolti Nuevo Testamento?

—Amo.

—Ik non, ¿tleka ijkon tikijtoua? Amo kuali tikijtoskej itlaj tla amo tikmatij, ijkon tlajtoua akin xoxo.

Tlen okijto okichi ma nimokuayejyeko porque ne noijki ijkon onikijtouaya. Ik non, onikseli Biblia tlen ye onechmakak para niktlajtoltis Nuevo Testamento.

¿Omitspakti tlen otiktlajtolti?

Achto, sapanoua onechtlajtlachialti nikmatis Nuevo Testamento okijkuilojkej judíos. Noijki ijkuak okachi oniktlajtoltiaya, onikitaya Jesús okatka yolkuali, yolyamanki uan melauak okinekiaya kinpaleuis oksekimej. Noijki onia itech se biblioteca uan onikintlajtolti seki amochmej tlen otlajtouaya itech Jesús. Pero amo okijtouayaj Jesús okatka Mesías. Seki amochmej okijtouayaj Jesús ye Dios uan non amo onikneltokaya. Onimokuayejyekouaya “¿Akin okitlatlaujtiaya Jesús? ¿San ye ineuian?”. Tla Jesús yetoskia Dios amo mikiskia porque Biblia kijtoua toTajtsin Dios amo ixpoliui.a

¿Tlen otikchi?

Tlen melauak amo motlajtolnamiki uan ne oniknekiaya nikmatis tlen melauak. Ik non, ika nochi noyolo oniktlatlaujti toTajtsin Dios —uan ayakmo oniktekitilti sidur—. Ijkuak otlanki onimotlatlaujti, ome iTlaixpantijkauan Jehová onechtlajpalojkej. Otimotlapouijkej uan onechkajteuilijkej se amatlajkuilol. Nin onechpaleui ma nikajsikamati, tlen yejuan tlamachtiaj kajki itech Biblia. ITlaixpantijkauan Jehová amo kijtouaj Jesús poui itech se Trinidad, yejuan tlamachtiaj Jesús iKone toTajtsin Diosb uan akin achto okichijchijkej.c

Satepan onimokopki México uan ok onimomachtiaya tlen kijtoua profecías mesiánicas inmiuan iTlaixpantijkauan Jehová. ¡Katej miakej profecías! Pero ualeua amo nochi onikneltokaya. Onimotlajtlaniaya: “¿San Jesús okipanok tlen kijtoua profecías? Xamo okijto okatka Mesías para kinkajkayauas oksekimej”.

¿Tlen omitspaleui xikneltoka tlen otimomachtijtokaj?

ITlaixpantijkauan Jehová onechititijkej seki profecías tlen san se tlakatl amo ueliskia ijkon kichiuaskia. Biblia kijtoua, setesientos xiuitl achto Miqueas okijto Mesías nesiskia ompa Belén.d ¿Akin uelis kijtos kanin nesis? Noijki Isaías okijkuilo Mesías kimiktiskiaj ijkon ken okinmiktiayaj akinmej okichiuaya tlen amo kuali uan kitokaskiaj inmiuan akinmej okipiayaj miak tomin.e Nochi ninmej profecías omochijkej itech Jesús.

Para nikneltokaskia omonekiaya nikmatis akin okatka ifamilia Jesús. Biblia kijtoua Mesías yetoskia iuejkaixui tekiua David.f Judíos okinpiayaj amochmej kanin okijkuilouayaj intoka nochi se familia, ik non, tla Jesús amo yetoskia iuejkaixui David akinmej okikokoliayaj kijtoskiaj Jesús amo iuejkaixui David, pero amo ijkon okichijkej porque kuali okimatiayaj David okatka ikoltsin Jesús. Miakej akinmej okixmatiayaj Jesús okiluiayaj “ikone n rey David”.g

Itech xiuitl  70, treinta y siete xiuitl satepan ijkuak okimiktijkej Jesús, romanos okipojpolojkej Jerusalén uan opolikej amochmej kanin oijkuilitokaj intoka nochtin judíos. Ik non, Mesías omonekiaya monextis achto, para kimatiskej akinmej okatkaj ikojkoluan.

¿Satepan ken otimokuayejyeko?

Itech Deuteronomio 18:18, 19, toTajtsin Dios okijto kitlaliskia ompa Israel se profeta ijkon ken Moisés, noijki okijto akin amo kikakiskia tlen kijtoskia nin tlakatl, toTajtsin Dios kixkomakaskia. Ijkuak onimomachti nochi Biblia onikajsikamatki Jesús tlen ochantiaya Nazaret, ye nin profeta tlen kijtoua Deuteronomio.