¿Tlen techpaleuis ma timajxilikan?

Se: Xikita tlen moneki tikchiuas

Xikita tlen okachi ipati. Biblia kijtoua ma tikchiuakan tlen okachi ipati (Filipenses 1:10). Xikijkuilo tlen tikneki tikchiuas, uan tlen okachi moneki. Xikilnamiki moneki tikkouati tlen tikkuas ijkuak yiyouak noso tikitas itech televisión itlaj tlen mitspaktia pero non amo tlen okachi moneki.a

Xikita tlen moneki tikchiuas. Eclesiastés 10:10 kijtoua: “Tla hacha ayakmo tlateki uan amikaj kitentia, oui itlaj tiktekiskej. Pero tla tiixtlamatkej, kuali kisas tlen tikchiuaskej”. Ijkon ken achto tiktentiaj hacha para itlaj tiktekiskej, noijki moneki achto tikitaskej tlen tikchiuaskej para timajxiliskej. Moneki kuali tikitaskej tlen tikchiuaskej para amo san timotonalpoloskej uan timosotlauaskej. Tla yotikchi itlaj tlen otikijkuilo, uelis tikchiuas okse tlamantli tlen noijki otikijkuilo. Tla ijkon tikchiua, mitspanos ken tlakatl tlen achto kitentia ihacha para ika tekipanos, okachi miak tlamantli tikchiuas.

Xikchiua tlen tiueli. Amo xikchiua tlen amo okachi ipati porque san mitstonalpolos. Tla nochipa tikneki tikchiuas miak tlamantli, amo mitspaleuis xiyolpaki san kichiuas ximotekipachojto.

Ome: Amo xikchiua tlen mitstonalpolos

Xikpejpena tlen tikchiuas uan san niman xikchiua. Eclesiastés 11:4 kijtoua: “Akin kita ejekatl amo tlatokas uan akin kita mixtli amo pixkas”. Tla ikaj achto mochia nochi kuali ma yeto para tlatokas, amo keman kichiuas, san motonalpolos uan amitlaj kipixkas. Noijki tla sapanoua timokuayejyekouaj amo keman tikpejpenaskej tlen tikchiuaskej. Xamo noijki tiknekiskej tikmatiskej nochi para uelis itlaj tikpejpenaskej. Seki tlamantli moneki kuali timokuayejyekoskej para uelis tikpejpenaskej tlen tikchiuaskej. Ik non, Proverbios 14:15 kijtoua akin ixtlamatki mokuayejyekoua tlen kichiuas. Pero ualeua timotekipachouaj ijkuak moneki itlaj tikpejpenaskej (Eclesiastés 11:6).

Amo ximokuayejyeko nochi kuali ma kisa. Santiago 3:17 kijtoua: “Ixtlamatílistli non Dios kitemaka, [...] tepalewiah”. Kuali kajki tla tiknekij kuali ma kisa tlen tikchiuaj pero tla san timokuayejyekouaj nochipa ijkon ma pano, amo techpaleuis, san timoyolkokoskej. Ma tikijtokan ikaj kineki momachtis okse tlajtoli, moneki kilnamiktos amo nochi san niman kuali kitenkixtis uan yolik momachtijtias. Tla san mokuayejyekoua nochi kuali moneki kijtos, momojtia uan ayakmo kijtoua uan non kichiuas amo kuali ma momachti. Ik non, ma timokuayejyekokan ken moneki. Proverbios 11:2 kijtoua: “Ixtlamatilistli kajki iuan akinmej yolyamankej”. Akinmej yolyamankej kimatij ualeua amo kijtoskej nion kichiuaskej ken moneki uan ijkuak ijkon panoua hasta uetskaj.

Eyi: Xikita tlen tikchiuas uan kox uelis tikchiuas

Ijkuak titekipanoua uan ijkuak timoyolpaktia. “Okachi kuali tepitsin ma timoseuikan uan amo sapanoua ma titekipanokan porque yetoskia ken tiktokaj ejekatl” (Eclesiastés 4:6). Akin sapanoua tekipanoua amo majxilia moyolpaktis ika tlen kitlani. Akin tlatsiui, san kipaktia moseuis. Ik non, Biblia techiluia ma titekipanokan pero noijki techiluia ma timoseuikan uan ma timoyolpaktikan porque “non techtliokolia toTajtsin Dios” (Eclesiastés 5:19).

Kuali xikochi. “Ika yolseuilistli nimotekas uan nikochis” (Salmo 4:8). Akinmej xikipiaj miak xiuitl moneki kochiskej 8 horas, para kuali moseuiskej uan kualkan kuali momachiliskej. Ijkuak kuali tikochij techpaleuia para ma tikilnamiktokan tlen timomachtiaj uan amo san titlatsiuij. Pero tla amo kuali tikochij amo techpaleuis: xamo techpanotikisas itlaj tlen amo kuali, amo tikchiuaskej itlaj ken moneki uan san tikualantoskej.

Xikita kox uelis tikchiuas noso tikpias. “Okachi kuali ma tikpatioitakan tlen tikpiaj uan amo ma tiktemojtokan tlen tiknekij” (Eclesiastés 6:​9). ¿Tlen techmachtia? Akin ixtlamatki amo san kitemojtok tlen uelis kipias uan amo kitemoua tlen amo uelis kipias. Ik non, amo kikoua tla amo kajxilia uan yolpaki ika tlen kipia.

Naui: Ximoyekana ika tlen mitspaleuis

Xikita tlen ika timoyekana. Tlen ika timoyekanaj techpaleuis ma tikitakan tlen okachi ipati uan tlen moneki tikchiuaskej. Tla tonemilis yetoskia ken se flecha, tlen ika timoyekanaj yetoskia ken arco tlen techpaleuia ma tikmatikan kanin tiktitlaniskej flecha. Tlen ika timoyekanaj techpaleuia ma tikmatikan tlen moneki tikchiuaskej uan ijkon timajxiliskej. ¿Kanin tiktemoskej tlen ika timoyekanaskej? Miakej moyekanaj ika tlen kijtoua Biblia porque kimatij iTlajtol toTajtsin Dios (Proverbios 2:​6, 7).

Nochipa xitetlasojtla. Colosenses 3:14 kijtoua: “Tlasojtlálistli, ye tlan techyekseitilia”. Tla amo titetlasojtlaj, amo tiyolpakiskej uan amo kuali timomachiliskej. Amo tiyolpakiskej iuan tofamilia. Akinmej san kitemouaj kipiaskej miak tomin noso sapanoua momachtiaj, amo yolpakij. Ik non, Biblia kijtoua okachi ipati ma titetlasojtlakan (1 Corintios 13:​1-3; 1 Juan 4:8).

Ximajxili para timomachtis Biblia. Se tlakatl tlen itoka Geoff okipiaya isiua uan ome ikoneuan yolkualmej, okinpiaya iyolikniuan uan otekipanouaya ken tepajti. Pero ye nochipa okitaya miakej tlajyouiaj uan ixpoliuij. Ik non omotlajtlaniaya: “¿Tiyoltokej san para titlajyouiskej?”. Se tonal okitlajtolti se amatlajkuilol tlen kichijchiuaj iTlaixpantijkauan Jehová uan tlen okitlajtolti okiyolseui.

Geoff okitlapoui isiua uan ikoneuan tlen okitlajtolti uan yejuan okinpakti. Ik non, opejkej momachtiaj Biblia, non okinpaleui ma yolpakikan uan ma kichiuakan tlen moneki. Noijki okinpaleui para kineltokakan satepan yetoskej kanin amikaj tlajyouis (Apocalipsis 21:​3, 4).

Tlen okipanok Geoff techilnamiktia tlen okijto Jesús: “Ma yolpakikan akinmej kimatij moneki kitemoskej toTajtsin Dios” (Mateo 5:3, TNM). ¿Mitspaktiskia timajxilis para timomachtis Biblia? San non mitspaleuis melauak xiyolpaki.