Juan okijtoaya ijkuak otetlapouiaya: “San niman uits se tlakatl okachi ueyititok amo ken ne”. Ijkuak Jesús okipiaya kanaj 30 xiuitl, okatka altepetl Galilea uan oyajki kanin okatka aueyatl Jordán. Ompa Juan oteapolaktiaya. Jesús noijki okinekiaya Juan ma kiapolakti, pero Juan okilui: “Amo moneki ne nimitsapolaktis. Moneki te xinechapolakti”. Jesús okinankili: “Jehová kineki te xinechapolakti”. Ik non, okalakej ijtik aueyatl Jordán uan Juan okikalaki nochi itlalnakayo Jesús ijtik atl uan ijkon okiapolakti.

Ijkuak Jesús okiski itech atl, okitlatlaujti Jehová. Ijkuakon, iluikak omotlapo uan iespíritu santo toTajtsin Dios oualtemok ipan Jesús ken se paloma. Noijki, Jehová otlajto desde iluikak uan okijto: “Te tinoKone akin niktlasojtla. Yonimitsseli”.

Ijkon Jesús okiseli iespíritu santo Jehová uan non tonal omochi Cristo noso Mesías. Ijkuakon, Jesús uelis kipeualtiskia tekitl tlen Jehová okilui ma kichiua nikan Tlaltikpak.

Satepan ijkuak omoapolakti, Jesús oyajki kanin tlauaki uan ompa omoka 40 tonalmej. Satepan, omokuepki uan okitato Juan. Ijkuak Juan okitak Jesús, okijto: “Nin ichkatsin toTajtsin Dios akin kichiuas ayakmo ma yeto tlajtlakoli nikan Tlaltikpak”. Juan ijkon okijto para nochtin ma kimatikan Jesús okatka Mesías. ¿Tikmati tlen okipanok Jesús kanin tlauaki? Tikitaskej itech okse tlamachtil.

Satepan ijkuak Jesús omoapolakti, espíritu santo okiuikak kanin tlauaki. 40 tonalmej amo itlaj okikua, ik non, oapismikiaya. Ijkuakon, Diablo okiyejyeko Jesús. Achto okilui: “Tla melauak te ikone Dios, xikinmilui ninmej temej ma mokuepakan panes”. Pero Jesús okinankili ika tlen kijtoa iTlajtol toTajtsin Dios: “Kajki ijkuilitok, amo san moneki titlakuaskej para tiyoltoskej. Noijki moneki tikkakiskej nochi tlen kijtoa Jehová”.

Satepan, Diablo oksepa okiyejyeko Jesús. Okiuikak ipan teokali kanin okachi uejkapan uan okilui: “Tla melauak te ikone Dios, ximokajkaua. Porque kajki ijkuilitok, Dios kinualtitlanis iángeles para mitsmakixtiskej”. Pero Jesús oksepa okinankili ika iTlajtol toTajtsin Dios: “Kajki ijkuilitok, amo moneki tikyejyekos Jehová”.

Saiktlami, Satanás okititi Jesús nochtin tekiuajkayomej tlen oueyititokaj uan tomin tlen okipiayaj uan okilui: “Nimitsmakas nochtin ninmej tekiuajkayomej tlen ueyititokej tla san se uelta tinechueyichiua”. Pero Jesús okinankili: “¡Xio Satanás! Kajki ijkuilitok, san Jehová moneki tikueyichiuaskej”.

Diablo oyajki uan sekimej ángeles oualajkej uan okitlamakakej Jesús. Satepan, Jesús opejki tetlapouia kuali tlajtolmej itech Tekiuajkayotl. Non tekitl tlen Jehová okilui ma kichiua nikan Tlaltikpak. Miakej okinpaktiaya tlen otlamachtiaya Jesús uan omochiuayaj imachtijkauan.

Kanaj itech metstli abril, xiuitl 30, Jesús oyajki Jerusalén. Ompa miakej okichijtokaj Pascua. Itech non iluitl, okintemakayaj yolkamej ken tlamanali itech teokali. Sekimej okinuikayaj inyolkauan, pero oksekimej okinkoayaj Jerusalén.

Ijkuak Jesús oajsito teokali, okinmitak sekimej ompa okinnemakayaj yolkamej. ¡Otlanemakayaj kanin okiueyichiuayaj Jehová! ¿Tlen okichi Jesús? Ika se mekatl okinkixti ichkamej uan vacas tlen okatkaj itech teokali. Noijki okintlamochili inmesas akinmej okipatlayaj tomin uan ouetski nochi tomin. Jesús okinmilui akinmej okinnemakayaj palomas: “¡Xikixtikan nochi nin! ¡Amo xitlanemakakan ichan noTajtsin!”.

Akinmej ompa okatkaj omotlajtlachialtijkej ijkuak okitakej tlen okichi Jesús. Imachtijkauan okilnamikej tlen omoijkuilo kipanoskia Mesías: “Sapanoa niktlakaitas ichan Jehová”.

Itech xiuitl 33, Jesús oksepa okinkixti akinmej otlanemakayaj itech teokali. Ye okinekiaya nochipa ma kitlakaitakan ichan iTajtsin.

Seki kauitl satepan ijkuak otlanki Pascua, Jesús uan imachtijkauan omokuepkej altepetl Galilea. Yejuan opanokej ik Samaria uan omoseuijkej kanin okatka iatekoch Jacob ik altepetl Sicar. Jesús ompa omoseuijtoka uan imachtijkauan okikoatoj tlakuali.

Se siuatl okikixtito atl itech non atekochtli uan Jesús okilui: “Xinechmaka tepitsin atl”. Nin siuatl okilui: “Ne nisamaritana, ¿tleka tinechtlapouia? Judíos amo motlapouiaj iuan samaritanos”. Jesús okilui: “Tla tinechixmatiskia, tinechiluiskia ma nimitsmaka atl uan ne nimitsmakaskia atl tlen kichiuas xiyolto”. Siuatl okitlajtlani: “¿Tleka ijkon tikijtoa? Amo tikpia tlen ika tikixtis atl”. Jesús okinankili: “Akin konis atl tlen ne nikmakas ayakmo keman amikis”. Nin siuatl okilui: “Noteko, xinechmaka non atl”.

Satepan Jesús okilui: “Xiknotsati monamik”. Siuatl okinankili: “Amo nikpia nonamik”. Jesús okilui: “Melauak tlen tikijtoa, yotimonamikti makuili uelta uan axkan tika iuan se tlakatl, pero ayamo iuan timonamiktia”. Nin siuatl okinankili: “Nikita titeotlajtojki. Akinmej chantij noaltepe kineltokaj uelis tikueyichiuaskej toTajtsin Dios itech nin tepetl, pero judíos kijtoaj san uelis tikueyichiuaskej ompa Jerusalén. Ne nikneltoka ijkuak uits Mesías, ye techmachtis ken tikueyichiuaskej toTajtsin Dios”. Ijkuakon, Jesús okilui itlaj tlen amo ikaj okiluiaya: “Ne niMesías”.

Nin siuatl san niman oyajki ialtepe uan okinmilui samaritanos: “Nesi yonikajsik Mesías. Kimati nochi tlen yonechpanok. Xiualakan uan xikitakan”. Yejuan oyajkej iuan siuatl kanin okatka atekochtli para kikakiskiaj tlen otlamachtiaya Jesús.

Samaritanos okiluijkej Jesús inmiuan ma mokaua. Jesús ompa omoka ome tonal uan okinmachti miak tlamantli. Miakej opejkej kineltokaj. Saiktlami, okiluijkej siuatl samaritana: “Yotikakej nin tlakatl uan kuali tikmatij ye kimakixtis Tlaltikpak”.

Satepan ijkuak Jesús omoapolakti, opejki tetlapouia uan okijtoaya: “Yiuits iTekiuajkayo toTajtsin Dios”. Imachtijkauan iuan oyayaj itech nochi Galilea uan Judea. Ijkuak Jesús omokuepki ialtepe Nazaret, oyajki sinagoga, okitlapo rollo tlen okijkuilo Isaías uan okitlajtolti: “Jehová onechmakak espíritu santo para nitetlapouis kuali tlajtolmej”. ¿Tlen kijtosneki tlen okijto? Miakej okinekiayaj kitaskej milagros tlen okichiuaya Jesús. Pero ye amo okiseli espíritu santo san para kichiuaskia milagros. Okachi omonekiaya ma kitematilti iTekiuajkayo toTajtsin Dios. Saiktlami, okinmilui akinmej okikaktokaj: “Nin tonal mochiua tlen nikan ijkuilitok”.

Satepan, Jesús oyajki itempa mar de Galilea. Ompa okinmitak naui imachtijkauan tlen okinkitskiayaj michimej uan okinmilui: “Nouan xiualakan uan axkan nankintemoskej tlaltikpaktlakamej uan ayakmo michimej”. Yejuan omotokayotiayaj Pedro, Andrés, Santiago uan Juan. San niman, okikajtejkej nochi tlen okipiayaj uan oyajkej iuan Jesús. Okitematiltijkej iTekiuajkayo Jehová itech nochi Galilea. Otetlapouiayaj itech sinagogas, itech tiankistli uan noijki itech ojtli. Miakej inmiuan oyayaj. Itech miakej altepemej okixmatiayaj Jesús, hasta itech altepetl Siria tlen uejka okatka.

Satepan, Jesús okinmakak chikaualistli sekimej imachtijkauan uan ijkon yejuan otlapajtiayaj uan okinkixtiayaj amo kuali ejekamej. Oksekimej otetlapouiayaj iuan Jesús itech uejueyij altepemej uan altepetsitsintin. Noijki, inmiuan oyayaj sekimej siuamej yolmelajkej ken María Magdalena, Juana, Susana uan oksekimej. Yejuan okipaleuiayaj Jesús uan imachtijkauan.

Ijkuak Jesús okinmachti akinmej iuan okatkaj, okintitlanki ma tetlapouitij. Ijkuak onemiayaj itech Galilea, miakej omochijkej imachtijkauan Jesús uan omoapolaktijkej. Miakej okinekiayaj mochiuaskej imachtijkauan Jesús, ik non, ye okinneskayoti ken se tlali kanin yipixkaskiaj. Ye okijto: “Xiktlatlaujtikan Jehová ma kintitlani oksekimej tlen tlapixkaskej”. Satepan, okinpejpenki 70 imachtijkauan uan okintitlanki ojome ma tetlapouikan itech nochi Judea. Yejuan okintlapouijkej miakej itech iTekiuajkayo toTajtsin Dios. Ijkuak omokuepkej, okinekiayaj kiluiskej Jesús nochi tlen okinpanok. Diablo amo ueli okintsakuili ma tetlapouikan.

Jesús okinpaleui imachtijkauan para kichiuaskiaj nin tekitl tlen miak ipati ijkuak ye mokuepaskia iluikak. Okinmilui: “Xiktematiltikan iTekiuajkayo toTajtsin Dios itech nochi Tlaltikpak. Xikinmachtikan oksekimej iTlajtol toTajtsin Dios uan xikinapolaktikan”.

Jesús okitematiltiko iTekiuajkayo toTajtsin Dios nikan Tlaltikpak. Noijki, Jehová okimakak espíritu santo para kichiuaskia milagros uan ijkon okiteititi tlen kichiuas ijkuak tlanauatis. Se neskayotl, Jesús ueli okinpajtiaya akinmej omokokoayaj. San kanin ye okatka, akinmej omokokoayaj okiluiayaj ma kinpaleui uan ye nochtin okinpajtiaya. Okichiuaya ma tlachiakan akinmej amo otlachiayaj, ma tlakakikan akinmej amo otlakakiayaj uan ma nejnemikan akinmej amo onejnemiayaj. Opajtiayaj maski san okitelkoayaj noso okikitskiayaj itlaken. Jesús noijki okinkixtiaya amo kuali ejekamej. Miakej okinekiayaj yetoskej iuan Jesús uan ye nochipa okinseliaya maski ualeua okinekiaya yetos iselti.

Se tonal, Jesús okatka ijtik se kali uan okiuikilijkej se tlakatl tlen amo onejnemiaya. Pero okatkaj sapanoa miakej uan amo ueli opanoayaj, ik non, okikoyonijkej ikuapak kali uan okitemouijkej kanin okatka Jesús. Ijkuakon, Jesús okilui non tlakatl: “Ximoketsa uan xinejnemi”. Nochtin omotlajtlachialtijkej porque non tlakatl opejki nejnemi.

Okse tonal, Jesús oajsito se altepetl uan majtlaktli tlakamej tlen okipiayaj lepra desde uejka okiluijkej: “¡Jesús, xitechpaleui!”. Itech nonmej tonalmej, akinmej okipiayaj lepra amo okinkauiliayaj ma motokikan innauak oksekimej. Noijki, iTlanauatil Jehová okijtoaya ijkuak pajtiskiaj akinmej okipiayaj lepra omonekiaya yaskej teokali. Ik non, Jesús okinmilui ma yakan teokali. Yejuan opajtikej ijkuak oyayaj itech ojtli. Ijkuak se tlakatl tlen okipiaya lepra okitak opajtik, omokuepki okitlasojkamatilito Jesús uan okiueyichi toTajtsin Dios. Jesús okinpajti majtlaktli tlakamej tlen okipiayaj lepra pero san se okitlasojkamatilito.

Se siuatl yokipiaya 12 xiuitl chikauak omokokoaya, ayakmo okixikoaya uan okinekiaya pajtis. Ye opanok itlajkotia miakej, omotoki inauak Jesús uan okitelko noso okikitski itempa itlaken. San niman, nin siuatl opajtik. Ijkuakon, Jesús okintlajtlani: “¿Akin onechtelko?”. Siuatl omomojti, pero omotoki inauak Jesús uan okilui nochi tlen okipanotoka. Jesús okiyolseui uan okilui: “Nokone, xio ika yolseuilistli”.

Se tekiua tlen omotokayotiaya Jairo okitlatlaujti Jesús: “Xio nochan. Notakotsin chikauak mokokoa”. Pero takotsin omikik achto ajsiskia Jesús. Ijkuak Jesús oajsito, okinmitak miakej ochokatokaj. Ye okinmilui: “Amo xichokakan, takotsin san kochtok”. Jesús okimakitski takotsin uan okijto: “Takotsin, ¡ximeua!”. Takotsin san niman omejki uan Jesús okinmilui itatajuan ma kitlamakakan. ¡Itatajuan sapanoa oyolpakej!

Ijkuak Jesús yotetlapouijtoka kanaj se xiuitl uan tlajko, okipejpenki itlaj tlen miak ipati. ¿Akinmej iuan tekitiskiaj uan kiyekanaskiaj tlanechikol? Jesús okilui Jehová ma kipaleui ijkuak okipejpenki nin tlamantli tlen miak ipati. Ik non, oyajki iselti itech se tepetl uan nochi se yoak omotlatlaujti. Mostlatika, Jesús okinnechiko sekimej imachtijkauan uan okinpejpenki 12 itlatitlaniluan. ¿Tikmati ken omotokayotiayaj? Yejuan omotokayotiayaj Pedro, Andrés, Santiago, Juan, Felipe, Bartolomé, Tomás, Mateo, Santiago ikone Alfeo, Tadeo, Simón uan Judas Iscariote.

Ninmej 12 tlakamej nochipa onemiayaj iuan Jesús. Ye okinmachtijtia ken tetlapouiskiaj uan satepan inselti okintitlanki ma tetlapouitij. Noijki, Jehová okinmakak chikaualistli uan ijkon yejuan otlapajtiayaj uan okinkixtiayaj amo kuali ejekamej.

Jesús okinmitaya 12 itlatitlaniluan ken iyolikniuan uan intech otlaneltokaya. Fariseos omokuayejyekoayaj itlatitlaniluan Jesús amo itlaj okimatiayaj. Pero Jesús amo ijkon okinmitaya. Ye kuali okinmachti ken tetlapouiskiaj. Yejuan yetoskiaj iuan Jesús ijkuak kipanoskia tlen miak ipati itech inemilis. Se neskayotl, yetoskiaj iuan Jesús achto mikiskia uan ijkuak toTajtsin Dios kiyolitiskia. Miakej itlatitlaniluan Jesús oualayaj itech Galilea, ijkon ken ye. Uan sekimej yokipiayaj insiua.

Itlatitlaniluan Jesús okipiayaj tlajtlakoli, ik non, ualeua okichiuayaj tlen amo kuali. Ualeua amo omokuayejyekoayaj tlen okijtoayaj uan amo kuali okipejpenayaj tlen okichiuayaj. Oui okitayaj mochiaskej. Hasta omokualaniayaj para kimatiskiaj akin okachi oueyititoka. Pero okatkaj yolkualmej uan okitlasojtlayaj Jehová. Yejuan kiyekanaskiaj tlanechikol ijkuak Jesús ayakmo yetoskia nikan Tlaltikpak.

Satepan ijkuak okinpejpenki 12 itlatitlaniluan, Jesús otemok itech tepetl uan oyajki kanin miakej omonechikojkej. Ompa okatkaj akinmej oualayaj itech altepemej Galilea, Judea, Tiro, Sidón, Siria uan ik kanin okatka aueyatl Jordán. Okinuikakej akinmej omokokoayaj uan akinmej okinpiayaj amo kuali ejekamej uan Jesús nochtin okinpajti. Ijkuakon, Jesús omotlali itempa tepetl uan okinmachti akinmej ompa okatkaj. Okinmilui tlen moneki tikchiuaskej tla tiknekij kuali timouikaskej iuan toTajtsin Dios. Moneki Jehová ma techyekana uan ma tiktlasojtlakan. Pero amo uelis tiktlasojtlaskej toTajtsin Dios tla amo tikintlasojtlaj oksekimej. Moneki tiyetoskej tiyolkualmej uan tikinchiuiliskej tlen kuali oksekimej, noijki akinmej techkokoliaj.

Jesús okijto: “Amo san xikintlasojtla moyolikniuan, noijki xikintlasojtla akinmej mitskokoliaj uan xikintlapojpolui ika nochi moyolo. Uan tla ikaj mouan mokualania, san niman xikiluiti ma mitstlapojpolui. Xikinchiuili oksekimej tlen mitspaktiskia ma mitschiuilikan”.

Jesús noijki otlajto itech tomin. Okijto: “Okachi ipati kuali ximouika iuan Jehová uan amo ipati tikpias miak tomin. Porque se ichteki uelis mitsichtekilis motomin, pero amo ikaj uelis mitsichtekilis moyekuikalis iuan Jehová. Ik non, amo ma mitstekipacho tlen tikkuas, tlen tikonis noso tlen tikonakis. Xikinmita totomej. ToTajtsin Dios nochipa kinmaluia uan kintlamaka. Maski timotekipachos, amo okachi tiyoltos. Xikilnamiki: Jehová kimati tlen mitspoloa”.

Yejuan amo keman okikakiayaj se tlakatl ma tlajto ken Jesús. Akinmej otlayekanayaj itech tlaneltokalismej amo keman ijkon otlamachtiayaj. ¿Tleka Jesús kuali otlamachtiaya? Porque otlamachtiaya iTlajtol Jehová.

Fariseos okichiuayaj miak tlamantli para kintlajtlachialtiskiaj oksekimej. Okichiuayaj tlen kuali san para oksekimej ma kinmitakan. Se neskayotl, omotlatlaujtiayaj inmixpan oksekimej para ma kinmitakan. Omomachtiayaj ken uejkauas motlatlaujtiskiaj uan satepan ijkon okichiuayaj itech sinagogas uan itech ojtli san para ma kinkakikan. Miakej omotlajtlachialtijkej ijkuak Jesús okijto: “Amo ximotlatlaujtikan ken fariseos. Yejuan mokuayejyekoaj kitlajtlachialtiskej toTajtsin Dios tla kijtoaj miak tlamantli, pero non amo melauak. Amo ximotlatlaujtikan san para oksekimej ma namechitakan, xikchiuakan para Jehová ma namechkaki. Amo xikojpauikan tlen nankiluiaj. Jehová kineki xikiluikan tlen nankimachiliaj”.

Jesús noijki okinmachti ken motlatlaujtiskiaj: “ToTajtsin tlen tika iluikak, ma mochipaua motoka. Ma uiki moTekiuajkayo. Ma mochiua motlanekilis, ken itech iluikak, noijki nikan Tlaltikpak”. Satepan, Jesús okinmilui ma motlatlaujtikan para kitlajtlaniskiaj tlen kikuaskiaj uan noijki para kiluiskiaj toTajtsin Dios ma kintlapojpolui uan para kiluiskiaj tlen okintekipachoaya.

Jesús noijki okijto: “Nochipa ximotlatlaujtikan. Xiktlajtlanilikan toTajtsin Jehová ma namechmaka tlen namechpoloa. Nochtin tetajmej kinmakaj inkoneuan tlen kuali. Tla namokoneuan namechtlajtlaniliaj se pan, ¿nankinmakaskej se tetl? Uan tla namechtlajtlaniliaj se michin, ¿nankinmakaskej se koatl?”.

Jesús okiyekijto tlen techmachtia tlen okijto: “Tla tetajmej kintliokoliaj inkoneuan tlen kuali, ¡toTajtsin Dios akin okachi mitstlasojtla mitsmakas espíritu santo! San moneki xiktlajtlanili”. ¿Tikchiua tlen okijto Jesús? ¿Tlen tiktlajtlanilia Jehová ijkuak timotlatlaujtia?

Achto kichiuaskiaj Pascua itech xiuitl 32, itlatitlaniluan Jesús otetlapouitoj uan ijkuak omokuepatoj osotlajtokaj. Ik non, Jesús okinuikak altepetl Betsaida ika se barco para moseuiskiaj. Pero ijkuak oajsitoj, Jesús okinmitak sapanoa miakej okintokakej hasta ompa. Jesús okinekiaya yetos san iuan itlatitlaniluan, pero nochtin okinseli ika tlasojtlalistli. Okinpajti akinmej omokokoayaj uan okinmachti miak tlamantli. Nochi tonal okintlapoui itech iTekiuajkayo toTajtsin Dios. Satepan itlatitlaniluan okiluijkej: “Yitiotlak, xamo apismikij. Xikinmilui ma yakan ma tlakuatij”.

Jesús okinnankili: “Amo moneki yaskej. Namejuan xikintlamakakan”. Itlatitlaniluan okitlajtlanijkej: “¿Tikneki ma tikkoatij pan para tikintlamakaskej?”. Se itlatitlanil tlen omotokayotiaya Felipe okijto: “Maski tikpiaskiaj miak tomin amo uelis tikkoaskej miak pan, sapanoa miakej”.

Jesús okintlajtlani: “¿Tikpiaj miak tlakuali?”. Andrés okinankili: “Tikpiaj makuili panes uan ome michintsitsintin. Pero sapanoa miakej katej, amo kajxilis”. Jesús okijto: “Xinechualikilikan panes uan michimej”. Satepan, okinmilui ma motlajtlalikan ipan xiuitl sekimej 50 uan oksekimej 100. Ijkuakon okinkitski panes uan michintsitsintin, otlachixki iluikak uan omotlatlaujti. Satepan okinmakak tlakuali itlatitlaniluan para ma kixexelokan. Ompa okatkaj 5,000 tlakamej uan noijki siuamej uan konemej, nochtin oixuikej. Satepan tlatitlanilmej okololojkej tlakuali para kitlatiskiaj. ¡Okitemitijkej 12 chikiuitl! ¿Amo melauak tetlajtlachialti tlen okichi Jesús?

Nochtin okintlajtlachialti tlen okichi Jesús, ik non, okinekiayaj ma yeto inueyi tekiua. Pero Jehová ok ayamo okinekiaya ma tlanauati uan Jesús kuali okimatiaya. Jesús okichixki nochtin ma yakan uan okinmilui itlatitlaniluan ma yakan okse itempa mar de Galilea. Yejuan oyajkej ika se barco uan Jesús otlejkok iselti ipan se tepetl. ¿Tleka? Okinekiaya kitlatlaujtis iTajtsin. Jesús nochipa omotlatlaujtiaya maski okipiaya miak tekitl.

Jesús okinpajtiaya akinmej omokokoayaj uan okinyolitiaya akinmej omikej. Noijki okinauatiaya ejekatl uan kiauitl. Ijkuak otlanki omotlatlaujti ipan tepetl, Jesús otlachixki kanin okatka mar de Galilea uan okitak chikauak oejekakiaujtoka. Itlatitlaniluan okatkaj itech se barco uan omochijchikauayaj kiuikaskej barco maski chikauak oejekaya. Ijkuakon, Jesús otemok uan opejki nejnemi ipan atl uan oyajki kanin okatka barco. Itlatitlaniluan sapanoa omomojtijkej ijkuak okitakej ikaj onejnentoka ipan atl. Pero Jesús okinmilui: “Ne niJesús, amo ximomojtikan”.

Pedro okijto: “NoTeko tla melauak te, xinechilui ma nio kanin tika”. Jesús okilui: “¡Xiuiki!”. Pedro otemok itech barco uan okinamikito Jesús, onejnenki ipan atl itlajkotia ejekakiauitl. Pero ijkuak Pedro yoajsitoka kanin okatka Jesús, okitak ejekakiauitl uan omomojti. Okimachili oapolakiaya uan otsajtsik: “¡NoTeko xinechmakixti!”. Jesús okimakitski Pedro uan okilui: “¿Tleka otimomojti? ¿Amo titlaneltoka?”.

Jesús uan Pedro otlejkokej ipan barco uan san niman opanok ejekakiauitl. ¿Timokuayejyekoa ken omomachilijkej itlatitlaniluan Jesús? Okijtojkej: “Melauak te ikone toTajtsin Dios”.

Pero amo san ijkuakon Jesús okiketsalti ejekakiauitl. Okse tonal, ijkuak Jesús uan itlatitlaniluan oyayaj ipan barco itech ueyi atl, Jesús okochki. Ijkuak okochtoka, opejki chikauak ejekakiaui. Atl chikauak omoliniaya uan opejki kalaki atl ijtik barco. Tlatitlanilmej okixitijkej Jesús uan chikauak okiluijkej: “¡Tlamachti, timikiskej! ¡Xitechpaleui!”. Jesús omoketski uan okilui ueyi atl: “¡Ximoyekmana!”. San niman, omoketski ejekakiauitl. Jesús okintlajtlani itlatitlaniluan: “¿Amo nantlaneltokaj?”. Yejuan omoiluijkej: “¡Hasta ejekatl uan ueyi atl kitlakamatij!”. Tlatitlanilmej okajsikamatkej omonekiaya tlaneltokaskej itech Jesús uan ijkon amo momojtiskiaj.

Fariseos okikokoliayaj Jesús uan okitemoayaj ken kitsakuaskiaj. Okijtoayaj amo kuali okatka Jesús otlapajtiaya sábado porque non tonal omoseuiayaj. Se sábado, Jesús okitak se tlakatl tlen amo otlachiaya okitlajtlantoka tomin itech ojtli. Jesús okinmilui imachtijkauan: “Xikitakan ken ichikaualis toTajtsin Dios kipaleuis nin tlakatl”. Ijkuakon, Jesús okichijchi sokitl ika ichijcha uan tlali. Satepan okitlalili tlakatl itech ixtololouan uan okilui: “Xikinpakati moixtololouan itech atekochtli de Siloam”. Tlakatl okichi tlen okilui Jesús uan opejki tlachia.

Nochtin omotlajtlachialtijkej uan okijtojkej: “¿Amo nin tlakatl tlen okitlajtlaniaya tomin? ¿Noso okse?”. Tlakatl tlen amo otlachiaya okinnankili: “Ne amo onitlachiaya desde onineski”. Yejuan okitlajtlanijkej: “¿Uan tleka yiueli titlachia?”. Ye okinmilui tlen opanok. Ijkuakon, okiuikakej inmixpan fariseos para inmiuan motlapouiskia.

Tlakatl okinmilui fariseos: “Jesús onechtlalili sokitl itech noixtololouan uan okijto ma nikinpaka. Ijkon onikchi uan axkan nitlachia”. Fariseos okijtojkej: “Tla Jesús tlapajtia sábado, ichikaualis amo uits itech toTajtsin Dios”. Pero oksekimej okijtoayaj: “Tla ichikaualis amo uits itech toTajtsin Dios, ¿tleka ueli kinpajtia akinmej mokokoaj?”.

Fariseos okinnotskej itatajuan tlakatl uan okintlajtlanijkej: “¿Tleka namokone yiueli tlachia?”. Ijkuak okintlajtlanijkej non tlamantli omomojtijkej, porque fariseos okijtojkej kikixtiskiaj itech sinagoga akin tlaneltokaskia itech Jesús. Ik non, otlanankilijkej: “Amo tikmatij. Ye xiktlajtlanikan”. Fariseos okitlajtlanijkej okseki tlamantli tlakatl tlen Jesús okipajti uan ye okinnankili: “Yonamechilui tlen opanok. ¿Tleka ok nannechtlajtlaniaj?”. Fariseos okualankej uan okikixtijkej.

Satepan, Jesús okitato tlakatl tlen okipajti uan okitlajtlani: “¿Titlaneltoka itech Mesías?”. Tlakatl okinankili: “Nitlaneltokaskia tla nikixmatiskia”. Jesús okilui: “Ne niMesías”. Jesús okatka yolkuali porque okipajti tlakatl tlen amo otlachiaya uan okipaleui ma tlaneltoka.

Jesús okinpiaya eyi iyolikniuan tlen ochantiayaj altepetl Betania. Omotokayotiayaj Lázaro, María uan Marta uan yejuan eyi okatkaj iknimej. Se tonal, ijkuak Jesús okatka itempa aueyatl Jordán, María uan Marta okititlankej ikaj totoka ma kiluiti Jesús: “Lázaro chikauak mokokoa. Timitstlatlaujtiaj, totoka xiuiki”. Pero Jesús amo san niman oyajki. Omochixki ome tonal uan satepan okinmilui imachtijkauan: “Tiauij Betania. Lázaro kochtok uan nias nikixititi”. Itlatitlaniluan okiluijkej: “Tla Lázaro kochtok, kijtosneki pajtis”. Yejuan amo okajsikamatkej tlen okijto Jesús, ik non, ye okinyekilui: “Lázaro omikik”.

Ijkuak Jesús oajsito Betania, Lázaro yokipiaya naui tonal ijtik mikakoyoktli. Miakej okiyolseuitoj Marta uan María. Ijkuak Marta okimatki oajsito Jesús, totoka okinamikito uan okilui: “NoTeko, tla nikan tiyetoskia, nokni amo mikiskia”. Jesús okinankili: “Marta, mokni oksepa yoltos. ¿Tinechneltoka?”. Ye okinankili: “Ne nikneltoka oksepa yoltos ijkuak kinyolitiskej akinmej yomikej”. Ijkuakon, Jesús okilui: “Ne yolitilistli uan yolilistli”.

Marta okiluito María: “Youala Jesús”. María omotlalo kanin okatka Jesús uan akinmej ompa okatkaj okitokakej. Ijkuak María oajsito kanin okatka Jesús, omotlankuaketski uan sapanoa ochokak. Okilui: “NoTeko, tla nikan tiyetoskia, tokni amo mikiskia”. Jesús okitak sapanoa omoyolkokoaya uan noijki ochokak. Akinmej ompa okatkaj, okitakej Jesús ochokatoka uan okijtojkej: “Jesús sapanoa okitlasojtlaya Lázaro”. Pero oksekimej omotlajtlanijkej: “¿Tleka amo okimakixti iyolikni?”. ¿Tlen okichi Jesús?

Ye oyajki kanin okitokakej Lázaro, okatka ken se cueva uan otsaktoka ika se tetl. Jesús okijto: “Xikachiuakan tetl”. Marta okilui: “Yikipia naui tonal ijtik mikakoyoktli, uelis yipotoni”. Pero okachijkej tetl uan Jesús omotlatlaujti: “NoTajtsin, nimitstlasojkamatilia tinechkaki. Ne nikmatok nochipa tinechkaki, pero chikauak nimitstlapouia para ma kineltokakan te otinechualtitlanki”. Ijkuakon, chikauak okijto: “¡Lázaro, xikisa!”. San niman opanok itlaj tlen melauak tetlajtlachialti: Lázaro oualkiski uan okimilitoka ika tsotsoli. Jesús okijto: “Xikkixtilikan tsotsoli uan xikkauakan ma uia”.

Miakej okitakej tlen okichi Jesús uan itech otlaneltokakej, pero sekimej okinmiluitoj fariseos tlen opanok. Fariseos opejkej mokuayejyekoaj ken kimiktiskiaj Lázaro uan Jesús. Se itlatitlanil Jesús tlen omotokayotiaya Judas Iscariote, san ichtaka okintlajtlanito fariseos: “¿Kech nannechtlaxtlauiskej tla namechpaleuia xikitskikan Jesús?”. Okiluijkej kimakaskiaj 30 platajtomin uan Judas okiseli. Ijkuakon, Judas opejki mokuayejyekoa ken kitemaktiskia Jesús.

Judíos okichiuayaj Pascua sejse xiuitl itech tonal 14, metstli nisán. Ijkon okilnamikiayaj Jehová okinmakixti ijkuak okatkaj tlakeualmej ompa Egipto uan okinuikak itech tlali tlen okinmilui kinmakaskia. Itech xiuitl 33, Jesús uan itlatitlaniluan okichijkej Pascua ijtik se cuarto tlen okatka ikuapak se kali itech Jerusalén. Ijkuak otlanki otlakuajkej, Jesús okijto: “Ikaj tlen nikan kajki nechtemaktis”. Itlatitlaniluan omotlajtlachialtijkej uan okitlajtlanijkej: “¿Akin?”. Jesús okinnankili: “Akin nikmakas nin pedazo pan”. Ijkuakon okimakak Judas Iscariote se pedazo pan. Judas san niman omoketski uan oyajki.

Satepan, Jesús okichi se tlatlaujtilistli, okitlajtlapanki se pan uan okinmakak itlatitlaniluan tlen omokajkej. Okinmilui: “Xikuakan nin pan. Kineskayotia notlalnakayo tlen niktemakas namopatka”. Satepan okichi okse tlatlaujtilistli ika vino, okinpanoltili itlatitlaniluan uan okinmilui: “Xikonikan nin vino. Kineskayotia noeso tlen niktemakas para ma namechtlapojpoluikan. Namejuan nouan nantlanauatiskej iluikak. Xikchiuakan nin tlamantli sejse xiuitl para nannechilnamikiskej”. Itech ninmej tonalmej, akinmej kichiuaj ken Cristo monechikoaj sejse xiuitl non tonal ijkuak kalaki Tonaltsin. Nin nechikol itoka iCena toTeko.

Ijkuak otlanki cena, itlatitlaniluan Jesús okinekiayaj kimatiskej akin okachi oueyititoka uan omokualanijkej. Pero Jesús okinmilui: “Akin okachi ueyititok amo moneki moueyinekis”.

Jesús noijki okinmilui: “Namejuan noyolikniuan. Ik non, namechiluia nochi tlen noTajtsin kineki xikmatikan. Ayakmo miak poliui para nimokuepas iluikak, ompa kajki noTajtsin. Pero namejuan nikan nanmokauaskej uan tla nanmotlasojtlaj, oksekimej kimatiskej namejuan nomachtijkauan. Moneki ximotlasojtlakan ijkon ken ne namechtlasojtla”.

Saiktlami, Jesús okitlatlaujti Jehová ma kinmalui nochtin imachtijkauan uan ma kinpaleui para san sekan kitekichiuiliskiaj ika yolseuilistli. Noijki omotlatlaujti para ma mochipaua itoka Jehová. Satepan, Jesús uan itlatitlaniluan okitlakuikilijkej Jehová uan oyajkej. Ijkuakon, yikikitskiskiaj Jesús.

Jesús uan itlatitlaniluan oyajkej itech tepetl Olivos uan okipanouijkej ixtlauak Cedrón. Yopanoaya tlajko yoak uan otlametstonaya. Ijkuak oajsitoj xochitlali Getsemaní, Jesús okinmilui: “Nikan ximokauakan uan xiijsatokan”. Satepan, Jesús oyajki oksekan uan omotlankuaketski. Sapanoa omotekipachoaya uan okilui Jehová: “Ma mochiua tlen te tikneki”. Jehová okititlanki se ángel ma kiyolchikauati Jesús. Satepan, Jesús omokuepki kanin okatkaj eyi itlatitlaniluan uan okinmajsito okochtokaj. Ye okinmilui: “¡Xiijsakan! Axkan amo uelis nankochiskej. Yoajsik hora nechtemaktiskej innauak akinmej nechkokoliaj”.

San niman, oajsito Judas uan sekimej tlakamej tlen okiuikayaj espadas uan kuauitl. Judas miak uelta oyajki xochitlali Getsemaní iuan Jesús uan itlatitlaniluan, ik non, okimatiaya kanin kajsiskia Jesús. Judas okinmilui soldados kinmititiskia akin Jesús. Omotoki inauak Jesús uan okilui: “Panolti Tlamachti” uan okixpipitso. Jesús okilui: “Judas, ¿otinechixpipitso para tinechtemaktis?”.

Jesús omotoki tlayekapan uan okintlajtlani: “¿Akin nankitemoaj?”. Yejuan okiluijkej: “Jesús Nazareno”. Ye okinnankili: “Ne akin nankitemoaj”. Yejuan otsinkiskej uan ouetsitoj. Jesús oksepa okintlajtlani: “¿Akin nankitemoaj?”. Yejuan oksepa okinankilijkej: “Jesús Nazareno”. Jesús okinnankili: “Yonamechilui ne akin nankitemoaj. Xikinkauilikan ninmej tlakamej ma yakan”.

Ijkuak Pedro okitak tlen opanotoka, okikixti se espada uan okitekili inakas Malco, se itlakeual ueyi teopixki. Pero Jesús okikitskili inakas uan okipajti. Uan okilui Pedro: “Xiktlati moespada. Tla timoteuia ika espada, mitsmiktiskej ika espada”. Soldados okikitskijkej Jesús uan okimailpijkej, pero itlatitlaniluan ocholojkej. Satepan, okiuikakej Jesús ixpan ueyi teopixki Anás. Ye okitlajtlani Jesús seki tlamantli uan okititlanki ichan ueyi teopixki Caifás. Pero ¿tlen okinpanok itlatitlaniluan?

Jesús okinmilui itlatitlaniluan ijkuak saiktlami inmiuan otlakua: “Nin yoak nochtin namejuan nannechkauaskej”. Pedro okilui: “Ne amo ijkon nikchiuas. Maski nochtin mitskauaskej, ne amo keman nimitskauas”. Pero Jesús okilui Pedro: “Eyi uelta tikijtos amo tinechixmati uan satepan tlakuikas se kaxtil”.

Ijkuak soldados okiuikakej Jesús ichan Caifás, itlatitlaniluan Jesús ocholojkej, san Pedro uan okse omokajkej. Pedro okalak itech patio tlen okatka ichan Caifás uan omotoki kanin okatka tlitl para mototoniskia. Ompa, se siuatl okitak uan okijto: “¡Ne nimitsixmati! ¡Te otikatka iuan Jesús!”.

Pedro otlanankili: “Amo melauak. Amo nikmati tlen tikijtoa”. Satepan oyajki kaltempa. Ompa okse siuatl okitak uan okinmilui oksekimej: “¡Nin tlakatl okatka iuan Jesús!”. Pedro okijto: “¡Nion nikixmati Jesús!”. Se tlakatl noijki okijto: “Te inmiuan otikatka. San niman mota porque titlajtoa ken galileos ijkon ken Jesús”. Pero Pedro okijto: “¡Amo nikixmati!”.

Ijkuakon, se kaxtil otlakuikak. Pedro okitak Jesús okitlatoka uan okilnamik tlen okilui. Ik non, okiski uan sapanoa ochokak.

Sanedrín omonechiko ichan Caifás para kixkomakaskiaj Jesús. Itech Sanedrín opouiayaj tlayekankej itech tlaneltokalismej tlen otlaixkomakayaj. Yejuan okinekiayaj kimiktiskej Jesús uan omokuayejyekojtokaj ken kiteluiskiaj para ma kimiktikan. Pero ken Jesús amo itlaj okichi, amo okimatiayaj ken kiteluiskiaj. Caifás okitlajtlani Jesús: “¿Te tiikone toTajtsin Dios?”. Jesús okinankili: “Kema”. Caifás okijto: “Amo moneki okachi tiktlajtlaniskej. ¡Tlen kijtoa se ueyi tlajtlakoli!”. Tlayekankej noijki ijkon omokuayejyekojkej uan okijtojkej: “Nin tlakatl moneki mikis”. Okixtlajtlatsinijkej, okixchijchauijkej, okixtsakej, okiuitekej uan okiluijkej: “¡Tla titeotlajtojki, techilui akin omitsuitek!”.

Ijkuak otlaneski, okiuikakej Jesús kanin omonechikoaya Sanedrín uan oksepa okitlajtlanijkej: “¿Te tiikone toTajtsin Dios?”. Jesús okinnankili: “Kema. Namejuan ijkon yonankijtojkej”. Yejuan okijtojkej okiuijuikalti toTajtsin Dios uan okiuikakej ixpan tekiua romano Poncio Pilato. ¿Tlen opanok satepan? Tikitaskej itech okse tlamachtil.

Tlayekankej teopixkej okiuikakej Jesús ixpan tekiua. Ompa Pilato okintlajtlani: “¿Tlen okichi nin tlakatl?”. Yejuan okinankilijkej: “¡Kijtojtinemi ye ueyi tekiua!”. Pilato okitlajtlani Jesús: “¿Te tikinnauatia judíos?”. Jesús okinankili: “NoTekiuajkayo amo kajki nikan Tlaltikpak”.

Satepan, Pilato okititlanki Jesús ixpan Herodes akin otlanauatiaya Galilea, ye kitaskia kox itlaj okichi. Herodes okitak Jesús amo itlaj okichi uan oksepa okititlanki kanin okatka Pilato. Satepan, Pilato okinmilui akinmej ompa okatkaj: “Nion Herodes nion ne otikitakej kox nin tlakatl okichi itlaj tlen amo kuali. Nikkauas ma uia”. Pero yejuan chikauak okijtojkej: “¡Xikmikti! ¡Xikmikti!”. Soldados okixchijchauijkej Jesús uan okiuitekej. Okitlalilijkej se corona tlen okichijchijkej ika uitstli, okipinauijkej uan okiluijkej: “¡Panolti, inueyi tekiua judíos!”. Pilato oksepa okinmilui akinmej ompa okatkaj: “Nin tlakatl amo okichi tlen amo kuali”. Pero yejuan chikauak okijtojkej: “¡Xikpilo itech kuauitl!”. Ik non, Pilato okitemakti Jesús para ma kimiktikan.

Okiuikakej Jesús itech se tlali tlen omotokayotiaya Gólgota. Okipilojkej itech se kuauitl uan ompa okikajtejkej. Jesús okilui Jehová: “NoTajtsin, xikintlapojpolui porque amo kimatij tlen kichijtokej”. Sekimej okipinauijkej Jesús uan okiluijkej: “¡Tla tiikone Dios, xitemo itech kuauitl uan ximomakixti!”.

Se tlakatl tlen okipilojkej inakastlan Jesús okilui: “Xinechilnamiki ijkuak tiyetos itech moTekiuajkayo”. Jesús okilui: “Nouan tiyetos itech Xochitlali”. Non tiotlak, eyi horas otlayoak. Sekimej imachtijkauan Jesús ompa okatkaj, hasta María, inantsin Jesús ompa okatka. Jesús okilui Juan ma kimalui María ken yetoskia inantsin.

Saiktlami, Jesús okijto: “¡Yomochi!”. Omokuatolo, oelsisiuik uan omikik. Ijkuakon, chikauak otlalolinki. Itech teokali, okatka se ueyi cortina tlen okixeloaya Santo itech Santísimo uan non cortina otlajkotsayanki. Tlakatl tlen okinyekanaya soldados okijto: “Nin tlakatl melauak okatka ikone Dios”.

Satepan ijkuak okimiktijkej Jesús, se tlakatl tlen okipiaya miak tomin tlen omotokayotiaya José, okiluito Pilato ma kikauili kitemouis itlalnakayo Jesús tlen okatka itech kuauitl. José okikimilo Jesús ika kuali lino tlen okiajuialijkej uan okitlali ijtik se yankuik mikakoyoktli. Satepan otlanauati ma kitsakuakan mikakoyoktli ika se ueyi tetl. Tlayekankej teopixkej okiluijkej Pilato: “Amo tiknekij imachtijkauan Jesús ma kichtekikan itlalnakayo uan ma kijtokan toTajtsin Dios okiyoliti”. Pilato okinmilui: “Kuali xiktsakuakan mikakoyoktli kanin toktok Jesús uan xikintlalikan sekimej ma tlamaluikan”.

Eyi tonal satepan, sekimej siuamej kualkan oyajkej kanin otoktoka Jesús. Okitakej ikaj okolini tetl uan mikakoyoktli otlapotoka. Ijtik mikakoyoktli okatka se ángel uan okinmilui: “Amo ximomojtikan. ToTajtsin Dios okiyoliti Jesús. Xikinmiluitij imachtijkauan ma yakan Galilea ma kinamikitij”.

María Magdalena totoka okintemoto Pedro uan Juan. Okinmilui: “Ikaj okiuikak itlalnakayo Jesús”. Pedro uan Juan totoka oyajkej kanin otoktoka Jesús. Ijkuak okitakej amo ompa okatka, omokuepkej inkalijtik.

Satepan, María oksepa oyajki kanin okatka mikakoyoktli. Ijtik mikakoyoktli okinmitak ome ángeles uan okinmilui: “Amo nikmati kanin okiuikakej noteko”. Satepan, okitak se tlakatl uan omokuayejyeko okatka jardinero uan okitlajtlani: “Tlakatsintli, nimitstlatlaujtia, xinechilui kanin otiktlali”. Nin tlakatl okilui: “¡María!” uan María okimatki okatka Jesús uan okilui: “¡Tlamachti!” uan okikitski. Jesús okilui: “Xikinmilui nokniuan yotinechitak”. San niman, María omotlalo uan okinmiluito imachtijkauan Jesús tlen okitak.

Non tiotlak, ome imachtijkauan Jesús tlen okatkaj Jerusalén oyayaj altepetl Emaús. Se tlakatl opejki inmiuan nejnemi uan okintlajtlani tlen omotlapouijtokaj. Yejuan okiluijkej: “¿Amo tikmati tlen opanok? Yikipia eyi tonal, tlayekankej teopixkej otlanauatijkej ma kimiktikan Jesús. Pero sekimej siuamej kijtojtinemij yoltok”. Tlakatl okintlajtlani: “¿Amo nankineltokaj tlen okijkuilojkej teotlajtojkej? Yejuan okijtojkej Cristo mikiskia uan satepan toTajtsin Dios kiyolitiskia”. Uan itech ojtli, non tlakatl okinyekilui okseki tlamantli itech iTlajtol toTajtsin Dios. Ijkuak oajsitoj altepetl Emaús, imachtijkauan Jesús okiluijkej non tlakatl inmiuan ma mokaua. Ijkuak otlakuajtokaj, non tlakatl okonanki pan uan omotlasojkamatki inauak toTajtsin Dios uan yejuan okimatkej ye Jesús. Ijkuakon, ayakmo okitakej non tlakatl.

Ome imachtijkauan Jesús totoka oyajkej Jerusalén. Oajsitoj itech kali kanin omonechikojkej itlatitlaniluan Jesús uan okinmiluijkej tlen opanok. Ijkuak okatkaj ijtik kali, Jesús okinmonextili. Tlatitlanilmej amo okineltokayaj kox okatka Jesús. Pero ye okinmilui: “Xikinmitakan nomauan uan xinechtelkokan. Yoijkuilitoka Cristo kiyolitiskiaj”.

Satepan ijkuak Jesús okinmonextili itlatitlaniluan, Pedro okinkitskito michimej itech mar de Galilea. Tomás, Santiago, Juan uan oksekimej imachtijkauan Jesús oyajkej iuan Pedro. Nochi yoak okintemojkej michimej pero amo itlaj okikitskijkej.

Ijkuak otlaneski, okitakej se tlakatl omoketoka itempa ueyi atl uan desde ompa okinmilui: “¿Onankinkitskijkej michimej?”. Yejuan okinankilijkej: “Amo”. Tlakatl okinmilui: “Xiktlamotlakan michayatl iyekma barco”. Ijkuak okitlamotlakej, okinkitskijkej miakej michimej uan ayakmo ueli okitlejkoltiayaj michayatl itech barco. San niman, Juan okimatki non tlakatl okatka Jesús uan okijto: “¡Ye toTeko!”. Pedro san niman omotlamotlak ijtik atl uan omajkuik hasta itempa ueyi atl. Oksekimej imachtijkauan Jesús oyajkej ipan barco hasta itempa ueyi atl.

Ijkuak oajsitoj itempa ueyi atl, okinmitakej sekimej michimej uan panes ipan tlitl. Jesús okinmilui ma kinualikakan okachi michimej tlen okinkitskijkej para kinmikxitiskia uan okinmilui ma tlakuakan.

Ijkuak otlankej otlakuajkej, Jesús okitlajtlani Pedro: “¿Tinechtlasojtla okachi uan amo ninmej michimej?”. Pedro okinankili: “Kema noteko, te tikmati nimitstlasojtla”. Jesús okilui: “Tla ijkon, xikintlamaka nochkauan”. Jesús oksepa okitlajtlani: “Pedro, ¿tinechtlasojtla?”. Ye okinankili: “Noteko, te tikmati nimitstlasojtla”. Jesús okilui: “Xikinmalui nochkatsitsiuan”. Satepan, Jesús oksepa ijkon okitlajtlani. Pedro omoyolkoko uan okinankili: “Noteko, te nochi tikmati uan tikmati nimitstlasojtla”. Jesús okilui: “Xikintlamaka nochkatsitsiuan”. Uan satepan okilui: “Xiuiki nouan”.

Jesús uan imachtijkauan omonechikojkej Galilea. Ye okinnauati itlaj tlen miak ipati: “Xiakan uan xikinchiuakan nomachtijkauan itech nochtin altepemej. Xikinmachtikan nochi tlen yonamechmachti uan xikinapolaktikan”. Noijki okinmilui: “Xikilnamiktokan, ne nochipa namouan niyetos”.

Satepan ijkuak toTajtsin Dios okiyoliti Jesús, 40 tonalmej ye okinmonextili miakej imachtijkauan itech Galilea uan Jerusalén. Okinmachti miak tlamantli tlen miak ipati uan okichi miakej milagros. Saiktlami, omonechiko iuan itlatitlaniluan itech tepetl Olivos. Jesús okinmilui: “Amo xikisakan Jerusalén. Xikchixtokaj ma mochiua tlen toTajtsin onamechilui”.

Tlatitlanilmej amo okajsikamatkej tlen okijto Jesús, ik non, okitlajtlanijkej: “¿Yipeuas titlanauatis itech Israel?”. Jesús okinnankili: “Jehová ok ayamo kineki ma nitlanauati. Pero san niman nankiseliskej espíritu santo tlen namechmakas chikaualistli uan nanyetoskej notlaixpantijkauan. Xiakan uan xitetlapouikan Jerusalén, Judea, Samaria uan itech nochi Tlaltikpak”.

Ijkuakon, Jesús otlejkok iluikak uan opoliuik ijtik mixtli. Imachtijkauan otlachixtokaj iluikak, pero ayakmo okitayaj.

Imachtijkauan Jesús tlen okatkaj itech tepetl Olivos omokuepkej Jerusalén. Ompa omonechikoayaj uan omotlatlaujtiayaj ijtik se cuarto tlen okatka ikuapak se kali. Yejuan okichiayaj Jesús ma kinmilui tlen okseki tlamantli kichiuaskiaj.