Nochipa xitetlapoui kuali tlajtolmej itech Tekiuajkayotl
1. ¿Tlen techmachtia ineskayo David?
1 Maski ueyi tekiua David okipanok miak tlamantli, non amo okitsakuili pampa ayakmo itlaj kichiuaskia. Se neskayotl, okinekiaya kichijchiuas iteokal Jehová, pero ye amo kichijchiuaskia. Ik non, okipatlak tlen okinekiaya kichiuas uan otlayektlali pampa ikone, Salomón, ma kichijchiua teokali (1 Rey. 8:17-19; 1 Crón. 29:3-9). Amo omoyolkoko itech tlen amo uelis kichiuaskia, okachi kuali, okitak tlen kema uelis kichiuas. ¿Ken uelis tikchiuaskej ken David pampa tiktemoskej ken okachi kuali titetlapouiskej itech Tekiuajkayotl?
2. ¿Ken uelis tikitaskej kox okachi uelis itlaj tikchiuaskej?
2 Tlen uelis tikchiuaskej. Miakej tokniuan kikauaj miak tlamantli itech innemilis uan ijkon uelij tekitij ken precursores auxiliares noso regulares (Mat. 6:22, TNM). ¿Uelis ijkon tikchiuas? Xiktlatlaujti Jehová uan xikita kox tiuelis, kanaj tikitas okachi ‘weletis tiktekitilis Dios’. Tla tikita tiuelis, san niman xikchiua (1 Cor. 16:8, 9).
3. Tla amo uelis titekitiskej ken precursores, ¿tlen uelis tikchiuaskej pampa okachi titetlapouiskej?
3 ¿Uan tla amo uelis titekitiskej ken precursores? Ma timokuayejyekokan tlen uelis tikchiuaskej. Se neskayotl, tla inmiuan titekiti akinmej amo tlaneltokaj, ¿tleka amo timochijchikaua pampa tikintlapouis ijkuak uelis? Noso tla timokokoa uan timopajtiti, ¿tleka amo timochijchikaua pampa tikintlapouis akinmej tlapajtiaj? Akinmej mokokoaj, yokokoxkatikej noso youeuejtikej uan ayakmo okachi uelij tetlapouiaj, uelis kitemakaskej keski horas otetlapouijkej maski san quince minutos. Ijkuak tiktemakaskej keski horas otitetlapouijkej, noijki ma tikijkuilokan keski horas otitetlapouijkej itech ojtli, keski amatlajkuilolmej otikintemakakej, amatsitsintin uan yoleualistli itech iCena toTeko noso ueyi nechikol regional. Mitstlajtlachialtis nochi tlen otikchi.
4. ¿Tlen tiknekij tikchiuaskej?
4 Maski san tlen techpanotok, ma tiktemokan ken uelis tiktematiltiskej kuali tlajtolmej. Ijkon kuali timomachiliskej pampa otimochijchikajkej otikpaleuijkej Tekiuajkayotl (Mar. 14:8; Luc. 21:2-4).