Se ueyi tlateochiualistli tikinchijchiuaskej uan tikinmaluiskej kalmej kanin timonechikoaj

Ijkuak israelitas okichijchijkej teokali, sapanoa omochijchikajkej uan okitekitiltijkej miak tomin, pero okichijkej ika miak pakilistli (1 Crón. 29:2-9; 2 Crón. 6:7, 8). Satepan, ijkuak okimaluiayaj teokali omotaya ken okatka intlaneltokilis (2 Rey. 22:3-6; 2 Crón. 28:24; 29:3). Itech ninmej tonalmej, akinmej tikchiuaj ken Cristo timochijchikauaj pampa tikinchijchiuaskej, tikinchipauaskej uan tikinyektlaliskej kalmej kanin timonechikoaj uan kanin mochiuaj uejueyij nechikolmej. Ijkon noijki tikueyichiuaj toTajtsin Dios. ¡Melauak se ueyi tlateochiualistli titekitiskej iuan Jehová! (Sal. 127:1; Apoc. 7:15).

¿KEN UELIS TITLAPALEUISKEJ?

• 

  Moneki kuali titlayektlaliskej ijkuak tlamis nechikol. Uelis titlachipauaskej uan titlayektlaliskej kanin otimotlalijkej.

• 

  Moneki titlapaleuiskej ijkuak mochipauas uan moyektlalis kali kanin timonechikoaj. Tla miakej tlapaleuiaj okachi kuali mochiua tekitl uan tikchiuaj ika pakilistli (lv tlamachtil 8 párr. 18).

• 

  Uelis tiktemakaskej tomin. Jehová kitlasojkamati tomin tlen tiktemakaj ika nochi toyolo, maski amo miak tiktemakaskej (Mar. 12:41-44).

• 

  Tla uelis, ma titlapaleuikan ijkuak mochijchiuaskej noso moyektlaliskej kalmej kanin tikueyichiuaj Jehová. Pampa titlapaleuiskej, amo moneki ma tikmatikan ken mochijchiua se kali.