Ximochijchikaua pampa nochipa kualkan tiajsiti
1. ¿Tlen kuali neskayotl techmaka Jehová?
1 Jehová nochipa kichiua nochi ipan hora tlen kijtoa. Se neskayotl, ye nochipa kinpaleuia itekipanojkauan ijkuak okachi kinekij (Heb. 4:16). Noijki techmaka tlakuali espiritual “ipan hora” (Mat. 24:45). Ik non, kuali tikmatij itonal Jehová amo tlajkajtilis, ajsis ipan hora tlen yokijto (Hab. 2:3). ¡Melauak techpaleuia miak tikmatiskej Jehová kichiua nochi keman kijtoa! (Sal. 70:5.) Pero ken titlajtlakolejkej uan tikpiaj miak tlamantli tlen moneki tikchiuaskej, ualeua oui pampa tikchiuaskej nochi ipan hora tlen otikijtojkej. ¿Tleka moneki tikchiuaskej nochi ipan hora tlen otikijtojkej?
2. ¿Tleka tikueyichiuaj Jehová tla nochi tikchiuaj ipan hora tlen otikijtojkej?
2 Itech ninmej tonalmej miakej tlaltikpaktlakamej san intech mokuayejyekoaj, ik non, miakej amo mochijchikauaj pampa kichiuaskej nochi ipan hora tlen okijtojkej (2 Tim. 3:1-3). Ik non, ijkuak akinmej tikchiuaj ken Cristo kualkan tiajsij kanin titekitij, tonechikoluan uan tla iuan ikaj ijkon otimokajkej, tlaltikpaktlakamej kitaj uan kiueyichiuaj Jehová (1 Ped. 2:12). ¿Kualkan tiajsij kanin titekitij, pero titlajkajtiliaj pampa tonechikoluan uan pampa tetlapouilistli? Tla kualkan tiajsij itech tonechikoluan, achto titlakuikaskej uan mochiuas tlatlaujtilistli, tikteititiskej tejuan tikneki tikchiuaskej ken toTajtsin Jehová (1 Cor. 14:33, 40).
3. ¿Ken tikintlakaitaj oksekimej tla kualkan tiajsij?
3 Tla tejuan kualkan tiajsij tikteititiaj tikintlakaitaj oksekimej (Filip. 2:3, 4). Tla tejuan kualkan tiajsij itech tonechikoluan uan itech tetlapouilistli titlapaleuiaj pampa oksekimej amo ma motlapololtikan. Uan noijki, tla nochipa titlajkajtiliaj, uelis tikteititiskej tlen tejuan tikchiuaj okachi ipati. Uan tla nochipa tiajsij kualkan, tikteititiskej uelis totech tlaneltokaskej uan kitaskej tejuan uelis itlaj kuali tikchiuaskej, nin tlamantli kipatioitaskej nochtin.
4. ¿Tlen uelis tikchiuaskej pampa nochipa kualkan tiajsiskej?
4 Tla nochipa titlajkajtilia, ximotlajtlani, ¿tleka? Kuali ximoyektlali pampa uelis tikchiuas nochi ipan hora tlen moneki (Ecl. 3:1; Filip. 1:10). Xikilui Jehová ma mitspaleui (1 Juan 5:14). Tla kualkan tiajsij tikteititiaj tikpatioitaj ome tlanauatilmej tlen okachi inpati: ma tiktlasojtlakan Jehová uan noijki oksekimej (Mat. 22:37-39).