Onechititijkej tetlasojtlaj

IKALCHANEJKAUAN John ochantiayaj ompa Gujarat (India). Itajtsin John omoapolakti yikanaj 60 xiuitl. John uan makuili ikniuan uan inantsin okatkaj sapanoa católicos uan amo okinpaktiaya tlen intajtsin okineltokaya.

Se tonal itajtsin okinauati ma kinkauiliti seki amamej se tokni tlen okatka iyolikni. Non kualkan ijkuak yaskia kinkauati amamej, John omomateki ijkuak okitlapo se bote. Pero ken okinekiaya kitlakamatis itajtsin, okilpi ima uan okinkauato amamej.

Ijkuak oajsito ikalijtik tokni, ompa okatka isiua uan ye okinseli amamej, ye noijki okatka iTlaixpantijka Jehová. Ijkuak okitak ima, tokni okilui kipajtiliskia. Tokni okikuito nochi tlen omonekiaya para kipajtis, okipajtili imajpil uan okikimilo. Satepan okiposonili té noso tsopelikatl uan noijki kualtsin omotlapouijkej itech Biblia.

Ijkuakon John opejki kita ayakmo okinchikoitayaj iTlaixpantijkauan Jehová. Ik non, okitlajtlani seki tlamantli tokni. John okineltokaya Jesús okatka Dios uan María noijki omonekiaya kitlatlaujtis pero itajtsin amo ijkon okineltokaya. Tokni yokimatiaya tlajtoli gujarati, ik non, okitlapoui ika itlajtol John, okikixti Biblia uan okinankili tlen okitlajtlani. Satepan okimakak se amatlajkuilol “Estas buenas nuevas del reino”.

Ijkuak John okitlajtolti amatlajkuilol, okitak non tlen melauak tlamachtia Biblia. Oyajki teopan okitato teopixki uan noijki okitlajtlani tlen tokni okitlajtlani. Pero teopixki okualanki, okitlamochili se Biblia uan okitsatsajtsili: “¿¡Yotimochi tiSatanás!? ¿Kanin kijtoa Biblia Jesús amo Dios? ¿Kanin kijtoa amo ma tiktlatlaujtikan María? ¿¡Kanin!?”. John amo okajsikamatiaya tleka ijkon okitsatsajtsili non teopixki. John okilui teopixki: “Ayakmo keman niuits teopan” uan ayakmo keman oyajki.

John opejki momachtia Biblia iuan iTlaixpantijkauan Jehová, okipatlak tlen omokuayejyekoaya uan opejki kitekichiuilia Jehová. Oksekimej ikalchanejkauan noijki ijkon okichijkej. Imajpil John ok mota kanin okiteki, ijkuak kita imajpil kilnamiki tokni tlen okipajtili maski yikipia sesenta xiuitl ok kilnamiki ken opejki momachtia Biblia (2 Cor. 6:4, 6).