1, 2. (1) ¿Tlen kinyolpaktia itekipanojkauan Jehová? (2) ¿Tlen moneki ma kajsikamatikan telpokamej?

CHRISTOPHER san okipiaya 12 xiuitl uan yokinekiaya moapolaktis. Ijkuakon se tlayekanki okilui: “Yiuejkika nimitsixmati. Uan nechyolpaktia nikmatis tikneki timoapolaktis, pero xinechilui: ¿tleka tikneki timoapolaktis?”. Kuali tlen okinekiaya kimatis tokni tlayekanki. Tiitekipanojkauan Jehová sapanoa tiyolpakij pampa sejse xiuitl moapolaktiaj miakej telpokamej (Eclesiastés 12:1).^[1] (Xikita nota kanin tlami tlamachtil). Pero tetajmej uan tlayekankej moneki kimatiskej kox kimatij tleka kinekij moapolaktiskej uan tlen kijtosneki tlen kichiuaskej.

² Biblia kijtoa ijkuak ikaj motemaka iixpan Jehová uan moapolaktia, ijkuakon mochiua itekipanojka toTajtsin Dios. Nin kijtosneki Jehová sapanoa kiteochiuas, pero noijki Satanás kitlajyouiltis (Proverbios 10:22; 1 Pedro 5:8). Ik non, tetajmej moneki kinpaleuiskej inkoneuan ma kajsikamatikan tlen kijtosneki mochiuaskej imachtijkauan Jesús. ¿Uan tla itatajuan telpochtli amo momachtiaj? Ijkuakon, tlayekankej itech tlanechikol ika miak tlasojtlalistli kipaleuiskej ma kajsikamati tlen kijtosneki motemakas iixpan Jehová uan moapolaktis (xiktlajtolti Lucas 14:27-30). Ijkuak ikaj kineki kichijchiuas se ueyi kali, achto moneki kuali moyektlalis. Noijki tla se telpochtli kineki moapolaktis moneki moyektlalis. Ijkon nochipa uelis yetos yolmelajki iixpan Jehová (Mateo 24:13). ¿Tlen kinpaleuis telpokamej pampa nochipa kitekichiuiliskej Jehová? Ma tikitakan.

3. (1) ¿Tlen okijtojkej Jesús uan Pedro itech apolaktilistli? (xiktlajtolti Mateo 28:19, 20, TNM; 1 Pedro 3:21, TNM). (2) ¿Tlen tlajtlanilmej tikinnankiliskej axkan? (3) ¿Tleka miak ipati ijkon ma timotlajtlanikan?

³ ¿Titelpochtli uan tikneki timoapolaktis? ¡Non melauak kuali! Timoapolaktis uan timochiuas iTlaixpantijka Jehová se ueyi tlateochiualistli. Jesús okijto nochtin akinmej melauak kichiuaj ken Cristo moneki ma moapolaktikan. Uan tlatitlanil Pedro okijto nin miak ipati pampa uelis momakixtiskej ijkuak tlamis nochi tlen amo kuali (xiktlajtolti Mateo 28:19, 20a, TNM; 1 Pedro 3:21b, TNM). Axkan tikinnankiliskej eyi tlajtlanilmej tlen mitspaleuiskej xikita kox yiuelis timoapolaktis: “¿Nikpia chikauak notlaneltokilis? ¿Tleka nikneki nimoapolaktis? ¿Nikajsikamati tlen kijtosneki nimotemakas iixpan Jehová?”. Miak ipati xikinmochiuili ninmej tlajtlanilmej. ¿Tleka? Pampa ijkuak timoapolaktis, tikteititis yotikijto nochipa tiktekichiuilis Jehová. Ninmej tlajtlanilmej mitspaleuiskej xikchiua tlen otikijto.

“¿CHIKAUAK NOTLANELTOKILIS?”

4, 5. (1) ¿Tlen kijtosneki tikpiaskej chikauak totlaneltokilis? (Xikita tlaixkopinal tlen ika peua tlamachtil). (2) ¿Tleka moneki ma kipiakan chikauak intlaneltokilis akinmej moapolaktiskej?

⁴ Biblia amo kijtoa keski xiuitl moneki tikpiaskej pampa uelis timoapolaktiskej. Proverbios 20:11 kijtoa: “Telpochtli moixmati ika tlen kichiua, tla inemilis chipauak uan melauak”. Nin techmachtia se chokotsin uelis kimatis kox itlaj kuali noso amo, uan noijki uelis kajsikamatis tlen kijtosneki timotemakaskej iixpan Jehová. Ik non, tla se telpochtli kiteititia chikauak itlaneltokilis uan yomotemakak iixpan Jehová, miak ipati uan moneki ma moapolakti (Proverbios 20:7).

⁵ ¿Tlen kijtosneki tikpiaskej chikauak totlaneltokilis? Amo san akinmej kipiaj okachi xiuitl uelis kipiaskej chikauak intlaneltokilis. Biblia kijtoa akinmej chikauak intlaneltokilis “kuali kimatih kiyejyekoliah tlan kuali iwa tlan amokuali” (Hebreos 5:14). Kijtosneki tikmatiskej tlen kuali uan tiknekiskej tikchiuaskej ika nochi toyolo. Akin chikauak itlaneltokilis mochijchikaua amo kichiuas tlen amo kuali, uan amo kichia oksekimej ma kiluikan moneki ma kichiua tlen kuali. Tla timoapolaktis, moneki tikchiuas tlen kuali maski amo mitsitaskej motatajuan noso oksekimej tlaltikpaktlakamej (xikita Filipenses 2:12).

6, 7. (1) ¿Tlen ouijkayotl okipanok Daniel itech ueyi altepetl Babilonia? (2) ¿Ken okiteititi okipiaya chikauak itlaneltokilis?

⁶ ¿Uelis se telpochtli kipias chikauak itlaneltokilis? Ximokuayejyeko itech tlen okichi se itekipanojka toTajtsin Dios tlen omotokayotiaya Daniel. Uelis ye okatka telpochtli ijkuak san ye okiuikakej Babilonia ken tlakeuali. Ompa okipanok miak tlamantli amo kuali. Se neskayotl, nochtin akinmej ochantiayaj Babilonia amo okiueyichiuayaj toTajtsin Dios. Uan ompa opejkej kitaj ken ikaj akin sapanoa miak ipati. Uan ye okatka itech sekimej telpokamej tlen okinpejpenkej ma kitekichiuilikan ueyi tekiua (Daniel 1:3-5, 13). Omotaya Daniel okachi kuali yetoskia itech Babilonia amo ken ijkuak okatka Israel.

⁷ Pero Daniel okipiaya chikauak itlaneltokilis, ik non, okixkomakak nochi nin tlamantli. ¿Ken okichi? Ye amo okinkauili babilonios ma kipatlakan tlen otlaneltokaya uan nochipa okitlakamatki Jehová. Biblia kijtoa: “Daniel okijto itech iyolo amo mosokiotiskia”. Daniel amo okinekiaya kichiuas nion se tlamantli tlen okichiuayaj akinmej amo okiueyichiuayaj toTajtsin Dios (Daniel 1:8). Ijkon okiteititi okipiaya chikauak itlaneltokilis.

8. ¿Tlen techmachtia ineskayo Daniel?

⁸ ¿Tlen mitsmachtia ineskayo Daniel? Tla titelpochtli uan tikpia chikauak motlaneltokilis, moneki tiktlakamatis Jehová maski sapanoa titlajyouis. Amo moneki tikchiuas ken camaleón, nin yolkatsintli kipapatla itlapal pampa ijkon uelis motas ken okseki tlamantli tlen onka kanin kajki. Amo uelis timouikas iuan toTajtsin Dios ijkuak timonechikoaj iuan tokniuan uan satepan timouikas iuan nochi tlen onka itech Tlaltikpak kanin timomachtia. Okachi kuali, moneki tiyetos tiyolmelajki iixpan toTajtsin Dios maski titlajyouis (xiktlajtolti Efesios 4:14, 15).

9, 10. (1) ¿Tleka moneki timokuayejyekos tlen otikchi ijkuak omitspanok itlaj oui? (2) ¿Tlen kijtosneki apolaktilistli?

⁹ Uan ken tinochtin titlajtlakolejkej, telpokamej noso akinmej okachi yikipiaj miak xiuitl ualeua uelis kichiuaskej itlaj tlen amo kuali (Eclesiastés 7:20). Pero tla tikneki timoapolaktis, moneki ximotlajtlani kox melauak nochipa tikchiuas tlen Jehová kineki. ¿Yikipia seki kauitl tiktlakamati Jehová? Ximokuayejyeko tlen otikchi ijkuak otikpixki se ouijkayotl. ¿Ueli otikpejpenki tlen kuali noso uelis mitspanoa ken Daniel? Uelis ikaj omitsilui xiktemo tlen okachi ipati itech tlen onka itech Tlaltikpak. Ijkuak mitspanoa seki tlamantli oui ken tlen otikijtojkej, ¿ueli tikajsikamati tlen kineki Jehová xikchiua? (Efesios 5:17).

¹⁰ ¿Tleka moneki ijkon ximotlajtlani? Pampa nin mitspaleuis xikajsikamati apolaktilistli miak ipati. Ijkuak timoapolaktis, tikteititis yotimotemakak iixpan Jehová pampa tiktlasojtlas uan nochipa tiktekichiuilis ika nochi iyolo (Marcos 12:30). Tinochtin akinmej timoapolaktiaj moneki timochijchikauaskej tikchiuaskej tlen otikiluijkej Jehová (xiktlajtolti Mateo 5:33).

“¿NIKNEKI NIMOAPOLAKTIS?”

11, 12. (1) Tla tikneki timoapolaktis, ¿tlen moneki tikchiuas? (2) ¿Ken uelis tikitas apolaktilistli ken kita Jehová?

¹¹ Biblia kijtoa tinochtin tiitekipanojkauan toTajtsin Dios tiktekichiuiliskej ika yolpakilistli, uan noijki telpokamej (Salmo 110:3). Ik non, tla tikneki timoapolaktis, moneki kuali timokuayejyekos kox tikchiua pampa te tikneki. Nin miak ipati, uan okachi tla nochtin mokalchanejkauan iTlaixpantijkauan Jehová.

¹² Ijkuak otimoskaltijtia uelis otikitak oksekimej yomoapolaktijkej. Uan uelis sekimej moyolikniuan noso mokniuan noijki yomoapolaktijkej. Pero ximomalui. Amo moneki timoapolaktis san pampa oksekimej yomoapolaktijkej tlen inmiuan otimoskalti. ¿Tlen mitspaleuis xikita apolaktilistli ken kita Jehová? Xikxelo kauitl pampa timokuayejyekos tleka miak ipati timoapolaktis. Tlen timomachtijtokej axkan uan chikome mitspaleuis xikita tleka miak ipati.

13. ¿Ken uelis tikmatis tleka tikneki timoapolaktis?

¹³ ¿Ken uelis tikmatis tleka tikneki timoapolaktis? Ximokuayejyeko ken tiktlatlaujtia Jehová. Ximotlajtlani: “¿Miak uelta niktlatlaujtia Jehová noso san ualeua? ¿Niktlatlaujtia itech tlen melauak nikneki, noso san tlen tlamantli nikiluia?”. Ninmej tlajtlanilmej mitspaleuiskej xikita kox melauak timouika iuan toTajtsin Dios (Salmo 25:4). Miak uelta Jehová technankilia ika tlen kijtoa Biblia. Ik non, pampa tikmatis tleka tikneki timoapolaktis, moneki tikitas ken timomachtia Biblia (Josué 1:8). Ximotlajtlani: “¿Mojmostla nimomachtia Biblia? ¿Nechpaktia nikueyichiuas Jehová ken kalchanejke?”. Ninmej tlajtlanilmej mitspaleuiskej xikita tleka tikneki timoapolaktis, kijtosneki, tleka otikpejpenki tiktekichiuilis Jehová ika nochi moyolo uan tleka iuan timouikas.

“¿NIKAJSIKAMATI TLEN KIJTOSNEKI NIMOTEMAKAS IIXPAN JEHOVÁ?”

14. ¿San se tlamantli kijtosneki timotemakas iixpan Jehová uan timoapolaktis?

¹⁴ Sekimej telpokamej kijtoaj yomotemakakej iixpan Jehová, pero ayamo uelis moapolaktiskej. Pero nin amo uelis panos. Pampa amo kuali kajsikamatij tlen kijtosneki motemakaskej iixpan Jehová uan moapolaktiskej. Timotemakas iixpan Jehová kijtosneki tiktlatlaujtis uan tikiluis nochipa tikneki tiktekichiuilis. Uan satepan timoapolaktis pampa nochtin ma kimatikan yotimotemakak iixpan Jehová. Ik non, amo uelis timoapolaktis tla amo tikmati tlen kijtosneki timotemakas iixpan toTajtsin Dios.

15. ¿Tlen kijtosneki timotemakas iixpan Jehová?

¹⁵ Ijkuak timotemakas iixpan Jehová, tikiluis itech non tonal ik tlayekapan nochi monemilis iaxka. Timotemakas iixpan Jehová kijtosneki okachi tikpatioitas nochipa tiktekichiuilis (xiktlajtolti Mateo 16:24). Ik non, timotemakas iixpan Jehová sapanoa miak ipati (Mateo 5:33). ¿Ken uelis tikteititis monemilis iaxka toTajtsin Dios? (Romanos 14:8).

16, 17. (1) Xikijto ika se neskayotl ken uelis tikteititis monemilis ayakmo moaxka. (2) ¿Tlen kiluijtok Jehová akin iixpan motemaka?

¹⁶ ¿Ken uelis tikteititis monemilis axkan ayakmo moaxka? Ximokuayejyeko motajtsin mitstliokolia se tlali uan mitsiluia moaxka. Pero satepan mitsiluia ye kimokauis tlalamatl uan san ye uelis ompa tekitis. ¿Tikijtos melauak omitstliokoli tlali? ¿Noso ok iaxka?

¹⁷ Ijkuak ikaj motemaka iixpan Jehová, kiluijtok: “Noyolilis moaxka”. Uan Jehová kichia ijkon ma kichiua. Pero ximokuayejyeko ichtaka peua kisa iuan ikaj akin amo iTlaixpantijka Jehová. Noso peua tekiti kanin amo majxilis tetlapouis noso monechikos. Nin tlaltikpaktlakatl amo kichijtos tlen okilui toTajtsin Dios. Ye kichiuaskia ken teta akin kimokauia tlalamatl. Ik non, tla timotemakas iixpan Jehová, nochipa moneki tikchiuas tlen ye kineki, maski amo mitspaktia. Uan non tlen okichi Jesús. Jesús okilui Jehová: “Ne amo oniwaltemok de ilwikak para nikchiwas tlan Ne nechpaktia, yej para nikchiwas tlan kipaktia Akin onechaltítlanki” (Juan 6:38).

18, 19. (1) ¿Tlen kijtoa Rose uan Christopher itech apolaktilistli? (2) ¿Tlen timokuayejyekoa itech apolaktilistli?

¹⁸ Timoapolaktiskej sapanoa miak ipati. Se ueyi tlateochiualistli timotemakaskej iixpan Jehová uan timoapolaktiskej. Tla tiktlasojtla Jehová uan tikajsikamati tlen kijtosneki iixpan timotemakas, san niman timoapolaktis. Uan amo mitsyolkokos tla ijkon tikpejpenas. Se ichpochtli tlen itoka Rose kijtoa: “Sapanoa niktlasojtla Jehová, uan sapanoa nechyolpaktia niktekichiuilis. Ijkuak onikpejpenki nimoapolaktis, kuali onikmatiaya tlen okachi kuali uelis nikchiuaskia”.

¹⁹ Ijkuak opejki nin tlamachtil otikitakej ineskayo se telpochtli tlen itoka Christopher. Ye omoapolakti ijkuak okipiaya 12 xiuitl. ¿Tlen kimachilia pampa non okipejpenki? Ye kijtoa sapanoa yolpaki. Ijkuak okipiaya 17 xiuitl opejki tekiti ken precursor regular, ijkuak okipiaya 18 xiuitl okiluijkej ma tekiti ken siervo ministerial uan axkan tekiti itech kali Betel. Ye kijtoa: “Kuali onikpejpenki ijkuak onikijto nimoapolaktiskia. Axkan niktekichiuilia Jehová uan ialtepe, uan non kichiua ma niyolpaki”. ¿Uan te? ¿Timokuayejyekojtok timoapolaktis? Tla ijkon, ¿ken uelis timoyektlalis? Nin timomachtiskej chikome.

1, 2. (1) ¿Tleka sapanoa miak ipati apolaktilistli? (2) ¿Tlen moneki tikmatis achto timoapolaktis?

¿TITELPOCHTLI uan tikneki timoapolaktis? Timoapolaktis melauak se ueyi tlateochiualistli. Pero nin se tlamantli tlen sapanoa miak ipati, ijkon ken yotimomachtijkej. Ijkuak timoapolaktia, inmixpan miakej tikteititia yotimotemakak iixpan Jehová. Kijtosneki, tikteititia yotikilui Jehová nochipa tiktekichiuilis uan nin tlen okachi ipati itech moyolilis. Nin se tlamantli tlen miak ipati, pampa uelis timoapolaktis moneki tikmatis kox chikauak motlaneltokilis, uan kox tikneki timoapolaktis pampa tiktekichiuilis Jehová uan noijki moneki tikajsikamatis tlen kijtosneki timotemakas iixpan Jehová.

² ¿Tikneltoka yiuelis timoapolaktis? Uelis timokuayejyekoa ayamo uelis timoapolaktis. Noso uelis tikneltoka yiuelis timoapolaktis, pero motatajuan mitsiluiaj ximochia okachi ximoskalti uan okachi ma mochikaua motlaneltokilis. Pero amo ximoyolkoko. Ximochijchikaua pampa san niman uelis timoapolaktis. Axkan timomachtiskej eyi tlamantli tlen uelis tikchiuas pampa timoapolaktis. Tlen tikneltoka, tlen tikchiua uan tlen tikmachilia itech Jehová.

TLEN TIKNELTOKA

3, 4. ¿Tlen uelis kimatiskej telpokamej itech Timoteo?

³ Ximotlajtlani: “¿Tleka nikneltoka onka toTajtsin Dios? ¿Tleka nikneltoka Biblia melauak iTlajtol toTajtsin Dios? ¿Tleka nikintlakamati itlanauatiluan toTajtsin Dios uan amo tlen kichiuaj tlaltikpaktlakamej?”. Tikinnankilis ninmej tlajtlanilmej mitspaleuis xikchiua tlen okijto tlatitlanil Pablo: “Ijkó weletis nonkimatiskeh tlan kimonekiltia Dios, xikchiwakah tlan kuali, tlan kipaktia, iwa tlan yekmilajka” (Romanos 12:2). Nin kijtosneki moneuia moneki tikmatis okachi kuali tiyetos tla tikchiuas tlen toTajtsin Dios kineki. ¿Tleka moneuia moneki tikmatis nin tlamantli?

⁴ Ximokuayejyeko tlen okipanok Timoteo. Isitsin uan inantsin okimachtijkej, nin telpochtli kuali okimatiaya tlen tlamachtia Biblia. Pero tlatitlanil Pablo okilui Timoteo: “Nochipa xikneltoka tlan omitsmachtijkeh, non te yotikyekneltokak” (2 Timoteo 3:14, 15). Ijkuak tlatitlanil Pablo okilui Timoteo “non te yotikyekneltokak” noijki kijtosneki ineuia Timoteo okimatki tlen okimachtijkej melauak. ¿Tleka ijkon okineltokaya? ¿San pampa isitsin uan inantsin ijkon okiluijkej? Amo. Ye okimatki nin pampa kuali omokuayejyeko. Kijtosneki Timoteo omokuayejyeko itech nochi tlen okimachtijkej uan okajsikamatki melauak (xiktlajtolti 1 Tesalonicenses 5:21). Telpokamej uelis momachtiskej miak itech tlen okichi Timoteo.

5, 6. ¿Tleka miak ipati ximokuayejyeko?

⁵ Uelis te noijki yiuejkika tikmati tlen kijtoa Biblia. Tla ijkon, xikchiua ken Timoteo uan ximokuayejyeko tleka ijkon tikneltoka. Ijkuak okachi tikneltokas nochi nin, okachi mochikauas motlaneltokilis. Uan noijki amo san ijkon tikneltokas pampa tlen oksekimej kijtoaj nion san pampa ijkon tikmachilia.

⁶ Miak ipati san niman ximokuayejyeko. ¿Tleka? Pampa ijkon uelis titlanankilis ijkuak mitstlajtlaniskej: “¿Tleka tikneltoka melauak onka toTajtsin Dios? Tla toTajtsin Dios tetlasojtla, ¿tleka kitekauilia ma titlajyouikan? Tla toTajtsin Dios okichijchi nochi, ¿akin okichijchi toTajtsin Dios?”. Ijkuak timokuayejyekos itech ninmej tlajtlanilmej amo kichiuaskej ximotlajtlani tleka ijkon tikneltoka. Nin kichiuas xikneki okachi kuali ximomachti Biblia.

7-9. ¿Ken uelis mitspaleuis www.jw.org pampa okachi ma yeto chikauak motlaneltokilis?

⁷ Tla kuali timomachtia Biblia, uelis tikinnankilis tlajtlanilmej, tikmatis seki tlamantli tlen amo tikajsikamati uan noijki tikmatis tleka ijkon titlaneltoka (Hechos 17:11). TiiTlaixpantijkauan Jehová tikinpiaj miakej amatlajkuilolmej tlen uelis mitspaleuiskej. Se neskayotl, miakej telpokamej yokinpaleui amatlajkuilol El origen de la vida uan noijki amochtli ¿Existe un Creador que se interese por nosotros? Miakej noijki yokinpaleui tlamachtil tlen itoka ¿Que enseña realmente la Biblia? tlen kajki itech www.jw.org/es. Nin tikajsis kanin kijtoa ENSEÑANZAS BÍBLICAS > JÓVENES. Nikan tikinmajsis miakej tlamachtilmej tlen mitspaleuiskej okachi kuali tikajsikamatis miak tlamantli itech Biblia.

⁸ Ken yotimomachti Biblia, uelis yitikmati seki tlamantli tlen tikajsis itech www.jw.org. ¿Tleka melauak tikneltoka? Nin mitspaleuia kuali ximokuayejyeko itech miakej tlaxelolmej tlen katej itech Biblia uan mitspaleuia xikijkuilo tlen tikneltoka. Uan noijki mitspaleuis ken uelis tikinyekiluis oksekimej tlaltikpaktlakamej. Tla tikpia nin tlapaleuilistli, kuali xiktekitilti pampa timomachtis uan okachi ma mochikaua motlaneltokilis itech nochi tlen timomachtia itech Biblia.

⁹ Miak ipati moneuia xikneltoka melauak tlen timomachtia itech Biblia. Nin mitspaleuis ximoapolakti. Se tokni kijtoa: “Achto nikpejpenaskia nimoapolaktis, kuali onimomachti Biblia uan ijkon onikmatki nin tlaneltokalistli tlen melauak”. Uan axkan ye kijtoa okachi kineltoka nin tlaneltokalistli melauak.

IKA TLEN TIKCHIUA

10. Akin yomoapolakti, ¿tleka moneki ma kiteititi tlaneltoka ika tlen kichiua?

¹⁰ Biblia kijtoa: “Tla aka kijtoa kineltoka Dios pero amo kichiwa tlan kuali, amitla ipati tlan kijtoa, noni kijtosneki miktok itlaneltokalis” (Santiago 2:17). Ik non, tla titlaneltoka itech toTajtsin Dios, moneki xikteititi ika tlen tikchiua. Tikchiuas ijkon ken kijtoa Biblia. “Xiktlakitakah Dios iwa xikchiwakah nochi tlan kuali” (xiktlajtolti 2 Pedro 3:11).

11. ¿Tlen kijtosneki “xiktlakitakah Dios”?

¹¹ ¿Tlen kijtosneki “xiktlakitakah Dios”? Kijtosneki tikpiaskej chipauak tonemilis. Se neskayotl, ximokuayejyeko tlen yotikchi itech nin tlajko xiuitl. Ijkuak itlaj otikpejpenki, ¿kuali otikitak tlen kuali uan tlen amo kuali? (Hebreos 5:14). ¿Tikilnamiki itlaj tlen otikmoxikolti noso itlaj tlen oksekimej okinekiayaj mitschiualtiskej? ¿Tikpia kuali moyelis itech escuela uan tikteititia se kuali neskayotl? ¿Tikchiua tlen Jehová mitsiluia noso tikchiua tlen oksekimej mitsiluia pampa amo ma mitspinauikan? (1 Pedro 4:3, 4). Ken tinochtin titlajtlakolejkej, ualeua sekimej tokniuan tlen yikipiaj miak xiuitl kitekichiuiliaj toTajtsin Dios pinauaj kijtoskej iTlaixpantijkauan. Pero akin yomotemakak iixpan toTajtsin Dios moneki kipatioitas pampa iTlaixpantijka Jehová uan ma kiteititi chipauak inemilis.

12. ¿Tlen kijtosneki “xikchiwakah nochi tlan kuali” uan ken moneki tikitas?

¹² ¿Tlen kijtosneki “xikchiwakah nochi tlan kuali”? Nin kijtosneki tlen tikchiua itech motlanechikol, ken ijkuak tio nechikolmej uan ijkuak titetlapouia. Pero noijki kijtosneki tlen moselti tikchiua, ken ijkuak tiktlatlaujtia Jehová uan timomachtia Biblia. Akin motemaka iixpan Jehová yolpaki kichiuas nin tlamantli uan amo san pampa moneki kichiuas. Momachilia ken ueyi tekiua David akin okijto: “Ijkuak nikchiua motlanekilis, oh noTajtsin Dios, nechyolpaktia, uan motlanauatil kajki noijtik” (Salmo 40:8).

13, 14. (1) ¿Tlen uelis mitspaleuis xikchiua “nochi tlen kuali”? (2) ¿Ken yokinpaleui sekimej telpokamej tlen kijtoa amochtli Los jóvenes preguntan?

¹³ ¿Tlen mitspaleuis xikchiua “nochi tlen kuali”? Uelis tiktekitiltis amochtli Los jóvenes preguntan, volumen 2, páginas 308, 309. Ika tlajtlanilmej tlen kinpia uelis tikinnankilis ninmej tlajtlanilmej: “¿Tikiluia Jehová tlen okachi moneki? Ika tlen tikijtoa, ¿mota tiktlasojtla Jehová?”. “¿Tlen timomachtia?”. “¿Titetlapouia maski motatajuan amo tetlapouiaj?”. Itech non páginas uelis tikijkuilos tlen mitspaktiskia tikchiuas pampa okachi kuali timotlatlaujtis, timomachtis Biblia uan kuali titetlapouis.

¹⁴ Miakej telpokamej akinmej kinekij moapolaktiskej kijtoaj nin amochtli yokinpaleui. Se ichpochtli tlen itoka Tilda kijtoa ninmej tlajtlanilmej okipaleuijkej ma mokuayejyeko tlen kichiuas. Kijtoa: “Yolik onikchijtia tlen onikijto nikchiuas, uan se xiuitl satepan kuali yonikmatiaya tleka oniknekiaya nimoapolaktis”. Okse telpochtli tlen itoka Patrick kijtoa: “Ne yonikmatiaya tlen omonekiaya nikchiuas, pero nikijkuilos onechpaleui okachi ma nimochijchikaua pampa uelis nikchiuas”.

15. ¿Tleka san te uelis tikpejpenas kox timotemakas iixpan Jehová?

¹⁵ Itech amochtli Los jóvenes preguntan noijki tikitas nin tlajtlanilistli: “Tla motatajuan ayakmo kinekiskej kitekichiuiliskej Jehová, ¿te ok tiktekichiuilijtos?”. Xikilnamiki, san te moneki tikijtos kox timotemakas iixpan Jehová. Ijkuak timotemakas iixpan Jehová uan timoapolaktis, peuas timouikas iuan Jehová, uan ika nochi tlen tikchiuas ye mitstlajtlanilis tleka ijkon otikchi. Ik non, tlen tikchiuas pampa Jehová, amo kipia kitas ika tlen kichiuaskej motatajuan noso oksekimej. Tla axkan tikchiua tlen kuali, tikteititis melauak tikmati nin tlaneltokalistli tlen melauak uan tikneki tikintlakamatis itlanauatiluan Jehová. Ijkuakon yiuelis timoapolaktis.

XIKTLASOJKAMATILI JEHOVÁ

16, 17. (1) Tla ikaj kineki moapolaktis uan kichiuas ken Cristo, ¿tlen moneki kichiuas? (2) Ika se neskayotl xikijto, ¿tleka moneki timokuayejyekoskej itech tlen okichi Jesús?

¹⁶ Se tonal se tlakatl tlen kuali okimatiaya tlanauatil tlen Jehová okitemakak ika Moisés, okitlajtlani Jesús tlen tlanauatil okachi ipati. Jesús okilui: “Moneki tiktlasojtlas Jehová moDios ika nochi moyolo uan ika nochi moyolilis uan ika nochi motlalnamikilis” (Mateo 22:35-37, TNM). Pampa ikaj uelis moapolaktis uan melauak kichiuas ken Cristo, moneki ma kitlasojtla Jehová. ¿Tlen uelis tikchiuas pampa okachi tiktlasojtlas Jehová? Ximokuayejyeko itech imikilis Jesús (xiktlajtolti 2 Corintios 5:14, 15; 1 Juan 4:9, 19). Tla timokuayejyekoa itech nin kualtsin tetliokolil tlen otechmakak Jehová, tiknekis tiktlasojkamatilis.

¹⁷ Ximokuayejyeko tika ijtik atl uan yitimeltsintok uan ikaj mitsmakixtia. ¿Tlen tikchiuaskia? ¿San ijkon tiaskia mokalijtik uan amo tiktlasojkamatiliskia akin omitsmakixti? ¡Amo! Melauak tiktlasojkamatilis. Noijki pampa tikpiaj tlajtlakoli uan mikilistli axkan tinochtin tikatej ken timeltsintoskiaj. Pero Jehová uan Jesús techmakixtiaj pampa sapanoa techtlasojtlaj. Ik non, tejuan uelis tiyoltoskej itech Tlaltikpak tlen mokuepas se kualtsin Xochitlali. Axkan moneki ma tikintlasojkamatilikan.

18, 19. (1) ¿Tleka amo moneki timomojtis timotemakas iixpan Jehová? (2) ¿Tleka tikijtoaj ijkuak timoapolaktis okachi tiyolpakis?

¹⁸ ¿Tiktlasojkamatilia Jehová nochi tlen mopampa yokichi? Tla tiktlasojkamatilia, moneki timotemakas iixpan uan timoapolaktis. Ken yotikmatki, timotemakas iixpan Jehová kijtosneki tikiluis nochipa tikchiuas itlanekilis. Pero amo ximomojti. ¿Tleka? Pampa Jehová kineki kuali xiyeto, uan ye kijtoa kinteochiuas akinmej kitlakamatij (Hebreos 11:6). Ijkuak timotemakas iixpan Jehová uan timoapolaktis okachi kuali tikpias monemilis. Se iTlaixpantijka Jehová tlen kipia 24 xiuitl uan tlen omoapolakti ijkuak ok okatka chokotsin kijtoa: “Tla nimochiaskia okse xiuitl kuali nikmatiskia tlen onikchijtoka. Pero apolaktilistli onechpaleui amo ma nikchiua tlen amo kuali”.

¹⁹ Ken yotikijtojkej, Jehová kineki xiyolpaki. Pero Satanás amo mitspatioita pampa ye nexikoli. Tla tikchiua tlen kineki Satanás, ye amo mitsmakas tlen kuali. ¿Ken uelis mitsmakas itlaj kuali, tla ye amo kipia itlaj kuali? Akinmej kitlakamatij Satanás ye amo kinmiluia tlamantli kuali nion uelis kichiaskej itlaj kuali. Amo uelis kinmakas itlaj kuali satepan pampa ye noijki satepan amo kichia itlaj kuali (Apocalipsis 20:10).

20. ¿Tlen mitspaleuis pampa uelis timotemakas iixpan Jehová uan timoapolaktis? (Noijki xikita recuadro “Tlen mitspaleuis okachi kuali ximouika iuan toTajtsin Dios”).

²⁰ Timotemakas iixpan Jehová non tlen okachi kuali uelis tikchiuas. ¿Yotimoyektlali pampa ijkon tikchiuas? Tla kuali yotimoyektlali, amo ximomojti. Pero tla tikneltoka ayamo kuali timoyektlalia, xikchiua ijkon ken otimomachtijkej pampa uelis kuali timoyektlalis. Tlatitlanil Pablo okinmilui tokniuan itech Filipos ma mochijchikauakan pampa ma mochikaua intlaneltokilis (Filipenses 3:16). Tla ijkon tikchiua, amo tiuejkauas timotemakas iixpan Jehová uan timoapolaktis.