¿Tlen uelis nikchiuas tla ikaj kineki iuan ma nimoteka?

¿TLEN TIKCHIUASKIA?

Ximokuayejyeko itech nin tlamantli: Heather uan Mike yikin kipiaj ome metstli moixmatij, pero Heather kimachilia ken yiuejkika kixmatiskia. Nochipa kinmotitlaniliaj mensajes, motlapouiaj ika teléfono uan hasta kuali kimatokej tlen kijtoskej ijkuak ayamo itlaj kijtoaj. Pero Mike ayakmo kineki san iuan motlapouis.

Mike uan Heather san yomomakitskijkej uan yomopipitsojkej. Heather amo kineki kichiuas okse tlamantli, pero ok kineki mouikas iuan inovio. Mike kichiua ma momachili sapanoa kuajkualtsin uan ma mokuayejyeko amo ikaj okse ken ye. Mokuayejyekoa: “Amo itlaj temojti, Mike uan ne timopaktiaj, ¿noso amo?”.

Tla yitikpiaskia miak xiuitl pampa ikaj iuan timoixmatis uan mitspanoskia ken Heather, ¿tlen tikchiuaskia?

XIMOKUAYEJYEKO

Tla titlejkoskia itech se kuauitl uan timotlamotlaskia pampa tikneki tipatlanis ken se tototl, timokojkos. Noijki ijkon mitspanos tla amo tiktlakamati tlen kijtoa Biblia pampa tikpias chipauak monemilis, ken ijkuak kijtoa amo xiauilnemi, noijki kijtosneki ijkuak se tlakatl iuan se siuatl motekaj maski ayamo monamiktiaj (1 Tesalonicenses 4:3).

¿Tlen uelis panos tla amo tiktlakamatis nin tlanauatil? Biblia kijtoa: “Akin momekatia, tlajtlakolchiwa iwa inewia kijtlakoa ikuerpo” (1 Corintios 6:18). ¿Tlen kijtosneki?

Seki estudios kiteititiaj miakej telpokamej uan ichpokamej akinmej motekaj iuan ikaj ijkuak ayamo monamiktiaj moneki kixikoskej nin tlamantli:

• MOYOLKOKOAJ. Miakej telpokamej uan ichpokamej tlen san sekan omotekakej achto monamiktiskej, moyolkokoaj pampa ijkon okichijkej.

• AYAKMO INTECH TLANELTOKAJ. Satepan ijkuak san sekan yomotekakej, sekimej motlajtlaniaj akin iuan okse yomotekak.

• AMO IJKON TLEN OKINEKIAYAJ. Miakej ichpokamej kinpaktia yetoskej iuan ikaj pampa ma kinmalui uan amo ikaj tlen san inmiuan kineki motekas. Uan miakej telpokamej ayakmo kinpaktiaj ichpokamej tlen san niman kinekij inmiuan motekaskej.

• Saiktlami: tla ikaj iuan timoteka ijkuak ayamo nanmonamiktiaj, tikpolos se tlamantli tlen miak ipati: tlakaitalistli (Romanos 1:24). Motlalnakayo sapanoa miak ipati. ¡Xikmalui!

Ximochijchikaua uan amo ikaj iuan ximoteka ijkuak ayamo timonamiktia (1 Tesalonicenses 4:3). Ijkuak timonamiktis, uelis tikchiuas. Ijkuakon uelis tikchiuas uan amo timotekipachos uan itech titlaneltokas, akinmej motekaj iuan ikaj ijkuak ayamo monamiktiaj tlajyouiaj (Proverbios 7:22, 23; 1 Corintios 7:3).

¿KEN TIKITA?

• Tla ikaj mitstlasojtla, ¿amo melauak kinekiskia kuali xiyeto uan amo itlaj ma mitstekipacho?

• Uan tla ikaj melauak motech motekipachoa, ¿mitsiluiskia xikchiua itlaj tlen kichiuas ayakmo kuali ximouika iuan toTajtsin Dios? (Hebreos 13:4).