¿Kineltokaj iTlaixpantijkauan Jehová tlaltikpak okichijchijkej itech chikuase tonalmej de 24 horas?

Amo, amo ijkon kineltokaj. Maski iTlaixpantijkauan Jehová tikneltokaj toTajtsin Dios okichijchi tlaltikpak, amo tikneltokaj okichijchi itech chikuase tonalmej de 24 horas. ¿Tleka? Porque sekimej tlen ijkon kineltokaj, kixnamikij tlen kijtoua Biblia. Matikitakan ome tlamantli.

1. Kech uejkaua chikuase tonalmej ijkuak otlachijchijkej. Sekimej kineltokaj sejse tonal ijkuak okichijchijkej tlaltikpak ouejka 24 horas. Pero itech Biblia ijkuak kijtoua tonal ualeua kijtosneki miak xiuitl (Génesis 2:4; Salmo 90:4).

2. Keski xiuitl kipia tlaltikpak. Sekimej noijki kineltokaj tlaltikpak kipia san kanaj keski xiuitl. Pero Biblia kijtoua tlaltikpak uan universo yipa yokatkaj uan satepan opanokej chikuase tonalmej ijkuak otlachijchijkej (Génesis 1:1). Ikinon iTlaixpantijkauan Jehová amo tikixtopeuaj tlen melauak kijtouaj ixtlamatkej, ijkuak kijtouaj tlaltikpak sapanoua yiuejkika kajki.

Maski iTlaixpantijkauan Jehová tikneltokaj toTajtsin Dios okichijchi nochi tlen onka, amo tikixnamikij ciencia. Okachi kuali, tikitaj tlen Biblia tlamachtia mouika ika tlen kijtouaj ixtlamatkej.