TLAMACHTIL 19
Jehová kiteititia tlasojtlalistli uan melajkayotl ijkuak ikaj kichiua tlen amo kuali (eyi tlamachtil)
“Porque te tiDios amo mitspaktia tlen amo kuali uan amo uelis mouan yetos akin amo yolkuali” (SAL. 5:4).
TLAKUIKALI 142 Notlaneltokilis nechyolchikaua
XIKILNAMIKTOa
1. Ijkon ken kijtoa Salmo 5:4-6, ¿ken kita Jehová tlen amo kuali?
JEHOVÁ kitlajyaltia nochi tlen amo kuali (xiktlajtolti Salmo 5:4-6). Ik non, kitlajyaltia akinmej motekaj iuan konemej. Nin tlamantli amo kuali uan tetlajyalti. Tejuan tiiTlaixpantijkauan Jehová noijki techtlajyaltia non tlamantli (Rom. 12:9; Heb. 12:15, 16).
2, 3. ¿Tleka tikijtoaj akinmej motekaj iuan konemej kixnamikij “itlanawatil Cristo”?
2 Akin kineki motekas iuan konemej, kixnamiki “itlanawatil Cristo” porque ye okijto amo kuali ijkon ma tikchiuakan (Gál. 6:2). ¿Tleka ijkon tikijtoaj? Porque yichikome otimomachtijkej “itlanawatil Cristo” kiteititia tlasojtlalistli uan nochi kichiua ika melajkayotl. Akinmej tikchiuaj ken Cristo tiktlakamatij tlen kijtoa “itlanawatil Cristo”. Ik non, tikinmaluiaj konemej kuali ma yetokan uan tikintlasojtlaj. Pero akinmej kinekij motekaskej iuan konemej san kinekij moyolpaktiskej. Ik non, ijkuak ijkon kinchiuiliaj konemej, amo kuali momachiliaj uan mokuayejyekoaj amikaj kintlasojtla.
3 Sapanoa techtekipachoa porque axkan miakej motekaj iuan konemej uan noijki ijkon kinekij kichiuaskej akinmej kichiuaj ken Cristo. ¿Tleka? Porque itlamian tonalmej yetoskej miakej “amokualteh iwa tekajkayajkeh” uan sekimej xamo touan monechikoaj (2 Tim. 3:13). Sekimej kijtoaj tokniuan pero amo kuali mokuayejyekoaj uan motekaj iuan konemej. Axkan tikitaskej tleka nin tlamantli sapanoa tlajtlakoli uan tetlajyalti. Satepan tikitaskej tlen kichiuaj tlayekankej ijkuak ikaj moteka iuan se konetl uan tikitaskej tlen kichiuaskej tetajmej para kinmaluiskej inkoneuan.b
SAPANOA TLAJTLAKOLI IJKUAK IKAJ MOTEKA IUAN SE KONETL
4, 5. ¿Tleka sapanoa tlajtlakoli ijkuak ikaj moteka iuan se konetl?
4 Sapanoa tlajyouiaj konemej ijkuak ikaj inmiuan moteka. Noijki tlajyouiaj inkalchanejkauan uan tokniuan tlen inmiuan monechikoaj. Sapanoa tlajtlakolchiuaj akinmej motekaj iuan konemej.
5 Tlajtlakoli ijkuak ikaj moteka iuan se konetl.c Sapanoa tlajtlakoli ijkuak kintlajyouiltiaj oksekimej. Itech okse tlamachtil tikitaskej tlajtlakoli ijkuak ikaj moteka iuan se konetl porque sapanoa kitlajyouiltia. Konetl ayakmo ikaj itech tlaneltoka uan ayakmo kuali momachilia. Ik non, moneki ma tikinmaluikan konemej porque miakej kinekij kinchiuiliskej tlen amo kuali. Noijki moneki tikinyolchikauaskej akinmej ijkon yokinchiuilijkej (1 Tes. 5:14).
6. ¿Tleka tlajyouiaj nochtin tokniuan ijkuak ikaj moteka iuan se konetl?
6 Tlajyouiaj nochtin tokniuan ijkuak ikaj moteka iuan se konetl. Tla se tokni moteka iuan se konetl, kinsokiotia nochtin tokniuan (Mat. 5:16; 1 Ped. 2:12). Akin ijkon kichiua, kintlajyouiltia nochtin tokniuan maski amo itlaj okichijkej (Jud. 3). Tla akin omotekak iuan se konetl amo moyolkopa, amo tikkauiliskej ijkon ma kichijto porque kisokiotia totlanechikol.
7. ¿Tleka akin moteka iuan se konetl tlajtlakolchiua inmixpan tekiuajkej?
7 Akin moteka iuan se konetl tlajtlakolchiua inmixpan tekiuajkej. Biblia kijtoa akinmej kichiuaj ken Cristo “moneki makintlakitakah n tekiwajkeh” (Rom. 13:1). Tikintlakamatij tlanauatilmej tlen kintlaliaj tekiuajkej. Ijkuak se tokni moteka iuan se konetl tlajtlakolchiua inmixpan tekiuajkej (noijki xikita Hechos 25:8). Tlayekankej amo san techiluijtokej ma tikintlakamatikan tlanauatilmej tlen kintlaliaj tekiuajkej. Pero tla ikaj moteka iuan se konetl, amo yauij inmixpan tekiuajkej kipaleuitiuij. Tlayekankej kinkauiliaj tekiuajkej ma kixkomakakan (Rom. 13:4). Akin ijkon kichiua sapanoa tlajyouia (Gál. 6:7).
8. ¿Ken kita toTajtsin Dios ijkuak ikaj kitechiuilia tlen amo kuali?
8 Akin moteka iuan se konetl tlajtlakolchiua ixpan Jehová (Sal. 51:4). Ijkuak ikaj kitechiuilia tlen amo kuali, noijki tlajtlakolchiua ixpan toTajtsin Dios. Ma tikitakan se tlamantli tlen okijtoaya tlanauatil tlen Jehová okinmakak israelitas. Nin tlanauatil okijtoaya ijkuak ikaj otetlachtekiaya noijki otlajtlakolchiuaya ixpan Jehová (Lev. 6:2-4). Nin kijtosneki ijkuak se tokni moteka iuan se konetl, kichiua ayakmo kuali ma momachili konetl. Noijki tokni tlajtlakolchiua ixpan toTajtsin Dios uan kisokiotia itoka. Ik non, techtlajyaltia ijkuak ikaj moteka iuan se konetl.
9. ¿Tlen tlamantli yotechmakak ialtepe Jehová uan tleka?
9 Yimiak xiuitl ialtepe Jehová kikixtia miak tlamachtil kanin kijtoa ken moneki tikinpaleuiskej konemej amo ikaj inmiuan ma moteka. Itech revistas Akin Tetlapouijtok uan itech revistas ¡Ma titlachixtokan! yokiskej miakej tlamachtilmej kanin kijtoa ken tikinyolchikauaskej akinmej yokinchiuilijkej tlen amo kuali. Noijki kijtoa ken uelis tikinpaleuiskej, ken tikinmiluiskej amo ma mosotlauakan uan ken uelis tetajmej kinmaluiskej inkoneuan. Tlayekankej noijki yokinmiluijkej tlen moneki kichiuaskej ijkuak ikaj moteka iuan se konetl. Ialtepe Jehová nochipa techiluia tlen moneki tikchiuaskej ijkuak ikaj moteka iuan se konetl. Ijkon tikteititiaj tiktlakamatij tlen kijtoa itlanauatil Cristo.
¿TLEN TIKCHIUASKEJ IJKUAK IKAJ TLAJTLAKOLCHIUA?
10. ¿Tlen kilnamiktokej tlayekankej ijkuak ikaj tlajtlakolchiua uan tleka?
10 Tlayekankej kimatij tlen kichiuaskej ijkuak ikaj tlajtlakolchiua. Porque tla kinekij kitlakamatiskej itlanauatil Cristo moneki kintlasojtlaskej tokniuan uan kichiuaskej tlen kuali ixpan toTajtsin Dios. Ik non, onka miak tlamantli tlen kintekipachoa. Tlayekankej kitaj ma yeto chipauak itoka toTajtsin Dios (Lev. 22:31, 32; Mat. 6:9). Noijki tlayekankej kitaj tokniuan ma kipiakan chikauak intlaneltokilis uan noijki kipaleuiaj akin okichiuilijkej tlen amo kuali.
11, 12. Ijkon ken kijtoa Santiago 5:14, 15, ¿tlen kichiuaj tlayekankej?
11 Tlayekankej kipaleuiaj akin otlajtlakolchi oksepa kuali ma mouika iuan Jehová (xiktlajtolti Santiago 5:14, 15). Amo kipia chikauak itlaneltokilis akin mokuayejyekoa moyolpaktis ika tlen amo kuali uan satepan tlajtlakolchiua. Kijtosneki ayakmo kuali mouika iuan Jehová.d Tlayekankej katej ken tepajtijkej porque kipaleuiaj akin otlajtlakolchi. Tlen kiluiaj kisa itech Biblia uan ijkon kipaleuiaj oksepa ma mouika iuan toTajtsin Dios. Pero moneki moyolkopas tla kineki oksepa mouikas iuan toTajtsin Dios (Hech. 3:19; 2 Cor. 2:5-10).
12 Nin kiteititia tlayekankej kipiaj miak tekitl. Kinmaluiaj ichkatsitsiuan Jehová porque ijkon okinnauati (1 Ped. 5:1-3). Tlayekankej kinekij kuali ma yetokan tokniuan itech tlanechikol. Ik non, san niman itlaj kichiuaj ijkuak kimatij ikaj otlajtlakolchi noso ikaj omotekak iuan se konetl. ¿Tlen kichiuaj? Ma tikinmitakan tlajtlanilmej tlen katej itech párrafo 13, 15 uan 17.
13, 14. Xikijto kox tlayekankej kiteluiaj inmixpan tekiuajkej tla ikaj omotekak iuan se konetl.
13 ¿Tlayekankej kiteluiaj inmixpan tekiuajkej ijkuak ikaj moteka iuan se konetl? Kema. Tlayekankej ijkon kichiuaj tla kanin chantij ijkon tlanauatiaj (Rom. 13:1). Ninmej tlanauatilmej tlen kintlaliaj tekiuajkej amo kixnamikij itlanauatil toTajtsin Dios (Hech. 5:28, 29). Ik non, ijkuak tlayekankej kimatij ikaj omotekak iuan se konetl, san niman itlaj kichiuaj uan ijkon kiteluiskej inmixpan tekiuajkej.
14 Tlayekankej kinmiluiaj ikalchanejkauan akin okichiuilijkej tlen amo kuali, ma kiteluitij inmixpan tekiuajkej akin okichi tlen amo kuali uan noijki uelis kiteluitiuij akinmej okitakej. Pero ¿tla se tokni omotekak iuan se konetl uan nochtin okimatkej? ¿Kijtosneki akin okiteluito okisokioti itoka toTajtsin Dios? Amo. Kisokiotia itoka toTajtsin Dios akin otlajtlakolchi.
15. Ijkon ken kijtoa 1 Timoteo 5:19, ¿tleka moneki yetoskej ome tokniuan tlen okitakej tlen opanok uan ijkon tlayekankej kichiuaskej se comité judicial?
15 Para tlayekankej uelis kichiuaskej se comité judicial, ¿tleka moneki yetoskej ome tokniuan tlen okitakej tlen opanok? Porque Biblia ijkon kijtoa. Tla ikaj amo kiselia tlen okichi, moneki yetoskej ome tokniuan tlen kiteititiskej melauak otlajtlakolchi. Non kinpaleuis tlayekankej ma kichiuakan se comité judicial (Deut. 19:15; Mat. 18:16; xiktlajtolti 1 Timoteo 5:19). ¿Kijtosneki moneki yetoskej ome tokniuan iuan ijkon uelis kiteluiskej inmixpan tekiuajkej akin omotekak iuan se konetl? Amo. Tlayekankej amo moneki ijkon kichiuaskej ijkuak ikaj kiteluiskej inmixpan tekiuajkej.
16. ¿Tlen kichiuaj tlayekankej ijkuak ikaj kinmiluia se tokni omotekak iuan se konetl?
16 Tlayekankej kichiuaj ome tlamantli ijkuak ikaj kiteluiaj omotekak iuan se konetl. Achto kitaj tlen kichiuaskej para kiteluiskej akin okichi tlen amo kuali. Satepan kitemoaj tlen opanok uan non kinpaleuia tlayekankej kox moneki kichiuaskej se comité judicial ijkon ken kijtoa Biblia. Tla akin kiteluiaj kijtoa amo melauak otlajtlakolchi, kintlajtlaniaj akinmej okitakej tlen okichi. Ijkuakon kitlaliaj se comité judicial tla akin kiteluiaj melauak omotekak iuan se konetl. Kikakij akin okitelui uan noijki akin okitak omotekak iuan se konetl noso kiteititia miakej ijkon yokinchiuili.e Tla amo onka okse tlen okitak tlen opanok, amo kijtosneki san tlakajkayaua akin otlatelui. Ualeua amikaj okitak tlen opanok pero tlayekankej kitaj melauak otlajtlakolchi akin kiteluiaj. Noijki tlajyouiaj oksekimej tla ikaj omotekak iuan se konetl. Ik non, tlayekankej kinpaleuiaj akinmej tlajyouiaj uan kinmaluiaj tokniuan para amo kinmijtlakos akin otlajtlakolchi (Hech. 20:28).
17, 18. Xikijto tlen kichiuaj akinmej pouij itech comité judicial.
17 ¿Tlen kichiuaj akinmej pouij itech comité judicial? Tlayekankej kitaj kox akin otlajtlakolchi ok pouis itech tlanechikol. Tlajtoli “judicial” amo kijtosneki tlayekankej kixkomakaskej akin otlajtlakolchi uan yejuan kijtoskej kox kitsakuaskej. Noijki amo san kitemojtokej kox ikaj kox ikaj amo okitlakamatki se tlanauatil. Tlayekankej amo mokajkalakiaj ijkuak tekiuajkej ikaj kixkomakaj. Nochi non tlamantli kinkauiliaj tekiuajkej ma kiyektlalikan (Rom. 13:2-4; Tito 3:1).
18 Tlayekankej akinmej pouij itech comité judicial kitaj kox tikpiaj chikauak totlaneltokilis uan ken tikueyichiuaskej toTajtsin Dios. Moyekanaj ika tlen kijtoa Biblia ijkuak kitaj kox omoyolkopki akin otlajtlakolchi. Tla akin okichi tlen amo kuali kijtoa amo melauak tlen okichi, kikixtiaj itech tlanechikol uan kinmiluiaj tokniuan ayakmo iTlaixpantijka Jehová (1 Cor. 5:11-13). Pero tla omoyolkopki ok uelis touan monechikos. Pero yejuan tlayekankej kiluiskej xamo ayakmo keman kipias tekitl itech tlanechikol. Noijki tlayekankej kitaskej ken okachi kinmaluiskej konemej, ik non, xamo tlayekankej kinmiluiskej tetajmej ma kinmaluikan inkoneuan para amitlaj ma kinchiuili non akin otlajtlakolchi. Noijki tlayekankej amo moneki kinmiluijtinemiskej oksekimej akinmej okinchiuilijkej tlen amo kuali.
¿KEN UELIS KINMALUISKEJ TETAJMEJ INKONEUAN?
Tetajmej kinmaluiaj inkoneuan ijkuak kintlapouiaj ken moneki momaluiskej amo ikaj inmiuan ma moteka. Kintekitiltiaj amatlajkuilolmej tlen techmaka ialtepe Jehová. (Xikinmita párrafos 19 a 22).
19, 20. ¿Tlen moneki kichiuaskej tetajmej para kinmaluiskej inkoneuan?
19 Tetajmej moneki kinmaluiskej inkoneuan para amitlaj ma kinpano.f Tetajmej namokoneuan onamechintliokoli toTajtsin Dios (Sal. 127:3). Ik non, moneki nankimaluiskej. ¿Tlen uelis kichiuaskej tetajmej para amikaj ma moteka iuan inkoneuan?
20 Achto tlamantli, xikitakan tlen kichiuaj akinmej motekaj iuan konemej. Xikmatikan akinmej kinpaktia motekaskej iuan konemej uan tlen ika kinkajkayauaj. Nochipa xikinmaluikan konemej (Prov. 22:3; 24:3). Xikilnamiktokan ualeua konemej yikixmatij akin kichiua tlen amo kuali uan kineltokiliaj tlen kinmiluia.
21. ¿Tlen okse tlamantli kichiuaskej tetajmej tla kinekij kinmaluiskej inkoneuan?
21 Ome tlamantli, ximotlapouikan iuan namokoneuan (Deut. 6:6, 7). Moneki kuali xikinkakikan (Sant. 1:19). Xikilnamiktokan ualeua konemej amo kijtoaj tlen kinpanoa. Xamo mokuayejyekoaj amo nankinneltokiliskej. Noijki xamo akin inmiuan omotekak okinmilui amitlaj ma kijtokan. Tla nankitaj konemej itlaj kinpanoa, amo san xikinmajuakan ijkuak itlaj nankintlajtlaniskej. Moneki xikintlasojtlakan uan kuali xikinkakikan.
22. ¿Tlen okseki kinpaleuis tetajmej ma kinmaluikan inkoneuan? (Xikita ixko revista).
22 Eyi tlamantli, xikinmixtlamachtikan namokoneuan. Ijkuak moskaltijtiaskej xikinmiluikan tlen kijtosneki ijkuak se tlakatl moteka iuan isiua. Xikinmiluikan tlen kichiuaskej uan tlen kijtoskej ijkuak ikaj kinekis kinmajmachilis. Xikinmixtlamachtikan ika amatlajkuilolmej tlen yokinkixti ialtepe Jehová. Ompa kijtoa ken uelis nankinmaluiskej namokoneuan (xikita recuadro “Nin tlamantli namechpaleuis xikinmaluikan konemej”).
23. (1) ¿Ken tikitaj ijkuak ikaj moteka iuan se konetl? (2) ¿Tlen tiknankiliskej itech okse tlamachtil?
23 TiiTlaixpantijkauan Jehová techtlajyaltia ijkuak ikaj moteka iuan se konetl uan sapanoa tlajtlakoli. Tejuan timoyekanaj ika tlen kijtoa itlanauatil Cristo uan amo tikpaleuiaj akin moteka iuan se konetl. Pero ¿ken uelis tikinpaleuiskej akinmej yokinchiuilijkej tlen amo kuali? Nin tiknankiliskej itech okse tlamachtil.
TLAKUIKALI 103 ToTajtsin Dios okintlali tlayekankej
a Nin tlamachtil techpaleuis ma tikinpaleuikan konemej ijkuak ikaj kineki inmiuan motekas. Tikitaskej tlen uelis kichiuaskej tlayekankej uan ijkon kinpaleuiskej tokniuan. Noijki tikitaskej tlen uelis kichiuaskej tetajmej uan ijkon kinmaluiskej inkoneuan.
b TLEN OKACHI IPATI: Akin moteka iuan konemej san kineki moyolpaktis. Tlajtlakoli ijkuak kichiuaj nin tlamantli: Ijkuak motekaj iuan konemej, kitekitiltiaj inkamak para kinmajmachililiskej intlakayo (sexo oral) noso intsintenko (sexo anal) uan noijki ijkuak kinmajmachililiaj intlakayo uan kinchiuiliaj okseki tlamantli tlen amo kuali. Okachi miakej motekaj iuan takotsitsintin. Pero noijki miakej motekaj iuan chokotsitsintin. Nin tlamantli okachi kichiuaj tlakamej. Pero noijki sekimej siuamej noijki motekaj iuan konemej.
c TLEN OKACHI IPATI: Axkan uan chikome timomachtiskej konemej sapanoa tlajyouiaj ijkuak ikaj inmiuan moteka. Amitlaj intlajtlakol konemej tlen ijkon kinchiuiliaj. Akin moteka iuan konemej sapanoa kintlajyouiltia porque amo ueli mopaleuiaj.
d Akin tlajtlakolchiua amo uelis kijtos ijkon okichi porque amo kipia chikauak itlaneltokilis. Kuali kimati tlajyouis tla kichiuas tlen amo kuali uan kimaktilis Jehová nochi tlen kichiua (Rom. 14:12).
e Tla se konetl okichiuilijkej tlen amo kuali, ma kinmilui itatajuan noso ikaj para ma kinmatilti tlayekankej. Ijkon konetl amo okachi tlajyouis. Tlayekankej amo kinmiluiaj konemej ompa ma yetokan ijkuak ikaj kitlajtlaniaj tleka omotekak iuan se konetl.
f Nin tlamantli moneki noijki kichiuaskej akinmej kinmijtlaniaj konemej noso akinmej kinmiskaltiaj tekoneuan.