TLAPOUALISTLI 13

Abrahán... iyolikni toTajtsin Dios

SATEPAN opanok Apachiuilistli, sekimej tlaltikpaktlakamej ochantitoj sekan kanin itoka Ur. Ur okatka se altepetl ueyititok tlen okipiaya kuajkualtsin kalmej. Uan tlaltikpaktlakamej tlen ompa ochantiayaj okinueyichiuayaj teotsitsintin. Noijki ijkon okichiuayaj itech Babel. Tlaltikpaktlakamej tlen ochantiayaj itech Ur uan Babel amo okatkaj ken Noé uan ikone Sem, akinmej okitekichiuiliayaj Jehová.

Uan, 350 xiuitl satepan opanok apachiuilistli, yolmelajki Noé omikik. Ome xiuitl satepan, oneski tlakatl tlen tikita itech nin tlaixkopinal. ToTajtsin Dios okitlasojtlaya miak. Tlakatl omotokayotiaya Abrahán. Ochantiaya iuan ichanejkauan itech altepetl Ur.

Se tonal Jehová okilui Abrahán: ‘Xikaua Ur uan mochanejkauan, uan xio itech okse ueyi altepetl tlen nimitsititis’. ¿Abrahán okitlakamatki toTajtsin Dios uan okikajte nochi tlamantli kuali tlen okipiaya itech Ur? Kema, ijkon okichi. Uan ken Abrahán nochipa okitlakamatiaya toTajtsin Dios, omoixmatki ken iyolikni toTajtsin Dios.

Sekimej ichanejkauan Abrahán noijki okiskej ijkuak ye okiski itech Ur. Itajtsin Taré noijki okiski. Noijki isobrino Lot. Uan noijki okiuikak isiua Sara. Satepan, nochtin oajsitoj kanin kiluiaj Harán, uan ompa Taré omikik. Okatkaj uejka itech Ur.

Satepan, Abrahán uan ichanejkauan okiskej itech Harán, uan oyajkej kanin kiluiaj Canaán. Ompa Jehová okijto: ‘Nin tlali nikinmakas mokoneuan’. Abrahán omoka itech Canaán uan ochantiaya itech mantajkalmej.

ToTajtsin Dios opejki kipaleuia Abrahán uan ijkon okipixki miakej ichkamej uan oksekimej yolkamej, uan noijki miakej itlakeualuan. Maski ijkon, Abrahán uan Sara amo okipiayaj inkoneuan.

Ijkuak Abrahán okipiaya 99 xiuitl, Jehová okilui: ‘Nimitsmaka notlajtol te tiyetos intajtsin tlaltikpaktlakamej itech miakej uejueyij altepemej’. Maski ijkon, ¿ken uelis mochiuaskia nin, ijkuak Abrahán uan Sara yokipiayaj miak xiuitl pampa kipiaskiaj se inkone?

Génesis 11:27-32; 12:1-7; 17:1-8, 15-17; 18:9-19.