Se nejmachtilis itech tlen yiuejkika opanok

Jehová amo kinkauilis tlaltikpaktlakamej tlen amo yolkualmej ma kiijtlakokan Xochitlal. Ompa nemiskej san akinmej iyolikniuan. ¿Tlen kinpanos tlaltikpaktlakamej tlen amo yolkualmej? Pampa tikmatiskej tlanankilis, ma tikitakan tlen opanok itech itonaluan Noé. Noé yiuejkika onenki. Ye okatka se tlakatl yolkuali tlen nochipa kinekia kichiuas itlanekilis Jehová ika nochi ichikaualis. Maski ijkon, oksekimej tlaltikpaktlakamej okichiuayaj tlen amo kuali. Ik non, Jehová okilui Noé kiualikaskia se apachiuilistli uan ijkon kinmixpoloskia tlen amo yolkualmej. Noijki okinauati ma kichiua se akali uan ijkon momakixtiskia ye uan ichanejkauan ijkuak ualaskia Apachiuilistli (Hebreos 11:7).

Noé uan ichanejkauan okichijchijkej akali. Noé okinnejmachtij tlaltikpaktlakamej ke ualaskia se Apachiuilistli, maski ijkon, amo akaj okikakili. Uan yejuan ok okichiuayaj tlen amo kuali. Ijkuak Noé okitlami akali, okinkalaki yolkamej, uan noijki okalak ye uan ichanejkauan. Ijkuakon Jehová okiualikak se ejekakiauitl. Okiauik 40 tonal uan 40 youak, uan nochi Tlaltikpak oatemik (Mateo 24:37-39).

Tlaltikpaktlakamej tlen amo yolkualmej omikej, san Noé uan ichanejkauan omakiskej. Jehová okinmalui ijkuak ouala Apachiuilistli uan okinuikak itech Tlaltikpak kanin amo okatka tlen amo kuali (1 Pedro 3:20). Biblia kijtoa ke oksepa ijkon panos ijkuak Jehová kinmixpolos akinmej amo kinekij kichiuaskej tlen kuali. Akinmej yolkualmej amo kinmixpoloskej. Nemiskej nochipa ipan Tlaltikpak tlen mokuepas se Xochitlal (2 Pedro 2:5, 6, 9).

Itech totonaluan, miakej tlaltikpaktlakamej kichiuaj tlamantli tlen amo kuali. Itech nochi Tlaltikpak onka miak ouijkayotl. Jehová kintitlani iTlaixpantijkauan sepa uan oksepa pampa kinnejmachtiskej tlaltikpaktlakamej, maski ijkon, amo kinekij kikakiskej itlajtol Jehová. Amo kinekij kipatlaskej innemilis nion kinekij ke toTajtsin Dios ma kinmilui tlen kuali uan tlen amo kuali. ¿Tlen kinpanos nin tlaltikpaktlakamej? ¿Ajsis se tonal keman mopatlaskej? Miakej amo mopatlaskej. Yiualajsitok tonal ijkuak nochtin tlaltikpaktlakamej tlen amo yolkualmej kinmixpoloskej pampa nochipa (Salmo 92:7).

Tlaltikpak amo kixpoloskej; mochiuas se xochitlal. Akinmej mochiuaskej iyolikniuan toTajtsin Dios nemiskej nochipa ipan Xochitlal nikan Tlaltikpak (Salmo 37:29).