¿Ken okatka nemilistli itech xochitlali Edén?

Jehová okinmakak Adán uan Eva miak tlamantli tlen kuali (Génesis 1:​28)

Jehová okichijchi achto siuatl, Eva, uan okimakak Adán pampa ma yeto isiua (Génesis 2:​21, 22).

Ijkuak Jehová okinchijchi Adán uan Eva amo okipiayaj tlajtlakoli. Okipiayaj se kuali inkuayejyekol uan se kuali innakayo, nochi kuali okatka.

Yejuan ochantiaj itech xochitlali Edén: melauak okatka kuajkualtsin, okipiaya se aueyatl, okatkaj yolkamej uan kuajmej tlen okipiayaj tlakilotl.

Jehová omotlapouiaya imiuan uan okinmachtiaya. Tla yejuan kikakiliskiaj, uelis yoltoskiaj nochipa itech xochitlali ipan Tlaltikpak.

ToTajtsin Dios okinnauati amo ma kikuakan itlakilo se kuauitl (Génesis 2:​16, 17)

Jehová okinmititi Adán uan Eva itlakilo se kuauitl tlen okatka itech xochitlali uan okinmilui tla kikuaskiaj mikiskiaj.

Se ángel amo okitlakamatki toTajtsin Dios. Non ángel amo yolkuali itoka Satanás akin noijki itoka Diablo.

Satanás kinekia Adán uan Eva amo ma kitlakamatikan Jehová. Ik non, okitekitilti se koatl pampa ma kilui Eva tla kikuaskia tlakilotl tlen toTajtsin Dios okinmilui amo ma kikuakan amo mikiskia, okilui mochiuaskia ken toTajtsin Dios. ¡Nin okatka se tlakajkayaualistli! (Génesis 3:​1-5.)