Ijkuak omochi Apachiuilistli, ¿akinmej otlakakej uan akinmej amo?

Ijkuak Noé onemia, nochtin tlaltikpaktlakamej okichiuayaj tlen amo kuali (Génesis 6:5)

Adán uan Eva okinpixkej inkoneuan, uan ijkon tlaltikpaktlakamej omomiaktilijkej itech nochi Tlaltikpak. Satepan sekimej ángeles okichijkej ken Satanás uan amo okitlakamatkej toTajtsin Dios.

Yejuan oualtemokej itech Tlaltikpak uan omochijkej ken tlakamej pampa uelis monamiktiskiaj iuan siuamej. Siuamej okinpixkej konemej tlen amo okatkaj ken oksekimej, okipiayaj miak chikaualistli uan otetlajyouiltiayaj.

Itech nochi Tlaltikpak okatkaj miakej tlaltikpaktlakamej tlen okichiuayaj tlen amo kuali. Biblia kijtoa: “Tlaltikpaktlakamej sapanoa okichiuayaj tlen amo kuali, uan intech inyolo nochipa omokuayejyekoayaj kichiuaskej tlen amo kuali”.

Noé okikak toTajtsin Dios uan okichijchi se akali (Génesis 6:​13, 14, 18, 19, 22)

Noé okatka se tlakatl yolkuali. Jehová okilui Noé kinmixpoloskia tlaltikpaktlakamej tlen amo yolkualmej ika se apachiuilistli.

ToTajtsin Dios okinauati Noé ma kichijchiua se ueyi akali tlen itoka arca, uan ompa ma kinkalaki ichanejkauan uan tlatlamantli yolkamej.

Noé okinnejmachti tlaltikpaktlakamej ualaskia se apachiuilistli, maski ijkon, amo akaj okikakili. Sekimej okiuejuetskilijkej Noé, uan oksekimej okualankej uan okikokolijkej.

Ijkuak Noé otlanki okichijchi akali ompa okinkalaki yolkamej.