TIKCHIUAJ KEN CRISTO

Okseki tlamantli timomachtiskej itech Toteki akinmej tikchiuaj ken Cristo

Desde enero 2018, itech tonechikol Toteki akinmej tikchiuaj ken Cristo peuas timomachtiskej seki notas, tikinmitaskej tlaixkopinalmej uan videos tlen katej itech Traducción del Nuevo Mundo de las Santas Escrituras (nwtsty). Okichijchijkej para ika timomachtiskej, kajki itech Internet maski ayamo tikpiaj ika totlajtol. Nochi tlen ompa kajki okachi techpaleuis kuali timomachtiskej para tonechikoluan. Noijki techpaleuis okachi ma timouikakan iuan Jehová akin sapanoa techtlasojtla.

TIMOMACHTISKEJ IKA NOTAS

Ninmej notas kiyekijtoaj miakej tlaxelolmej; ken uan kanin ochantiayaj yiuejkika uan tlen tlajtoli okipiayaj.

Mateo 12:20

Imecha candil popoka: Yiuejkika omotlauiliayaj ika candil, okinchijchiuayaj ika sokitl uan okintemitiayaj ika aceite de oliva. Aceite okichichinaya mecha tlen ochijchitoka ika lino. Non motlajtolkuepa ika griego ken “mecha ochijchitoka ika lino tlen popoka” uelis kijtosneki ok popoka porque ok okatka totonik maski ayakmo otlauiaya. Ken kijtoa Isaías 42:3, Jesús oteiknomatki; ye amo keman okiseui tlen okineltokayaj akinmej okatkaj yolyamankej uan otlajyouiayaj.

Mateo 26:13

De milajka, de milajka: Amén ika tlajtoli hebreo noijki ijkon omoka ika tlajtoli griego, kijtosneki “ijkon ma mochiua” noso “melauak mochiuas”. Jesús achto non okijtoaya ijkuak kijtoskia se profecía noso tlen Jehová kichiuaskia. Ijkon okiteititi melauak tlen okijtoaya. Sekimej kijtoaj tlajtoli tlen Jesús okitekitilti “de milajka” noso “amén” san ye ijkon okitekitilti. Ijkuak okijto (amén amén), itech Evangelio de Juan motlajtolkuepa “de milajka, de milajka” (Juan 1:51).

TLAIXKOPINALMEJ UAN VIDEOS

Tlaixkopinalmej uan videos tlen amo kipia audio uan okseki videos, kiteititiaj tlen kijtoa Biblia.

Betfagué, tepetl Olivos uan Jerusalén

Nin video amo uejkaua uan kiteititia ojtli tlen yaui Jerusalén ik kanin kisa tonaltsin desde kanin axkan kajki et-Tur, sekimej kijtoaj nin altepetsintli opouiaya itech altepetl Betfagué tlen ijkuilitok itech Biblia uan nin omokauaya itech tepetl Olivos. Betania kajki ik este Betfagué, itempa tepetl Olivos, tlen kajki ik kanin kisa tonaltsin. Ijkuak Jesús iuan imachtijkauan oyayaj Jerusalén, nochipa omokalotiayaj Betania. Axkan nin altepetl itoka el-Ázariyeh (El Éizariya), ika tlajtoli árabe kijtosneki “Kanin kajki Lázaro”. Nochtin kimatij Jesús omokalotiaya inkalijtik Marta, María uan Lázaro (Mat. 21:17; Mar. 11:11; Luc. 21:37; Juan 11:1). Okisaya inkalijtik ijkuak oyaya Jerusalén, uelis opanoaya itech se ojtli ken mota itech video. Itech tonal 9 de nisán xiuitl 33, uelis okiski itech Betfagué ipan se burro, opanok itech tepetl Olivos uan oyajki itech ojtli tlen oajsiaya Jerusalén.

Ojtli tlen kisa Betania uan ajsiti Betfagué
Betfagué
Tepetl Olivos
Ixtlauak Cedrón
Kanin kajki teokali

Omitl okitsoponilijkej se clavo

Nin tlaixkopinal san se copia, kiteititia ikaj okitsoponilijkej se clavo itech ikxi. Nin clavo chijchitok ika tepostli, ueyak 11,5 centímetros. Itech xiuitl 1968 ik norte Jerusalén ijkuak otlachkuakej okajsikej non omitl uan okimatkej okitokakej ijkuak Roma otlanauatiaya. Okajsikej ijtik se tekochtli kanin okitlaliayaj omitl ijkuak ouakiaya uan ayakmo okipiayaj nakatl. Nin kiteititia romanos okintsoponiliayaj clavos itech inmikxiuan akinmej okinpiloayaj. Xamo ijkon okatkaj clavos tlen romanos okintsoponilijkej Jesús ijkuak okipilojkej itech kuauitl. Nin omitl ika clavo noijki kiteititia ijkuak ikaj okipiloayaj uelis okitokayaj (Mat. 27:35).