Biblia peua techtlapouia ken toTajtsin Dios okichijchi nochi kuajkualtsin itech iluikak uan Tlaltikpak. Tla tikinpia mokoneuan, xikinpaleui ma kipatioitakan nochi tlen okichijchi toTajtsin Dios. Xikinmachti ken Jehová kuali otechchijchi, ik non, ueli titlajtoaj, timokuayejyekoaj, titlakuikaj, timotlatlaujtiaj uan tikchiuaj miak tlamantli, nochi nin amo ueli kichiuaj yolkamej. Xikinpaleui mokoneuan ma kimatikan Jehová sapanoa chikauak uan ixtlamatki. Noijki xikinmachti Jehová techtlasojtla uan kitlasojtla nochi tlen okichijchi.

ToTajtsin Jehová otechchijchi. Ye okichijchi nochi tlen tikitaj uan tlen amo tikitaj. Achto okinchijchi sapanoa miakej ángeles. ¿Tikmati akinmej ángeles? Yejuan kipaleuiaj Jehová uan okinchijchi ken ye. Tejuan amo ueli tikitaj Jehová nion ángeles. Achto ángel tlen Jehová okichijchi okipaleui ijkuak okinchijchi sitlalimej, planetas uan okseki tlamantli. Tejuan tichantij itech se kuajkualtsin planeta tlen itoka Tlaltikpak.

Jehová okiyektlali Tlaltikpak para itech ma tichantikan uan noijki yolkamej. Okichi ma tlaui Tonaltsin. Noijki okichijchi tepeyo uan nochi ueyi atl.

¿Tlen opanok satepan? Jehová okijto: “Nikchijchiuas xiuitl uan kuajmej”. Ijkuakon, opejki tlaki tlatlamantli tlakilotl, xiuitl, kilitl uan xochitl. Jehová noijki okinchijchi miakej yolkamej: tlen patlanij, tlen katej ijtik atl uan tlen motilanaj. Okinchijchi yolkamej tsikitsitsintin ken kimichimej uan oksekimej uejueyij ken elefantes. ¿Tlen yolkatl okachi mitspaktia?

Satepan, Jehová okilui achto ángel tlen okichijchi: “Tikchijchiuaskej tlakatl”. Tlaltikpaktlakamej amo yetoskiaj ken yolkamej. Yejuan kichiuaskiaj miak tlamantli, tlajtoskiaj, uetskaskiaj uan motlatlaujtiskiaj. Noijki kinmaluiskiaj yolkamej uan Tlaltikpak. ¿Tikmati akin achto tlakatl okichijchijkej? Ma tikitakan itech okse tlamachtil.