Biblia kijtoa san sekimej okitekichiuiliayaj toTajtsin Dios satepan ijkuak Tlaltikpak oatemik. Se neskayotl, Abrahán okixmatiayaj ken iyolikni Jehová. Tikitaskej tleka ijkon okixmatiayaj. Tla tikinpia mokoneuan xikinpaleui ma kimatikan Jehová intech motekipachoa uan kineki kinpaleuis. Tejuan uelis tikiluiskej toTajtsin Dios ma techpaleui ijkon ken okichijkej Abrahán, Lot, Jacob uan oksekimej. Uan moneki tikneltokaskej Jehová kichiuas nochi tlen yokijto.

Satepan ijkuak Tlaltikpak oatemik, ikoneuan Noé okinpixkej miakej inkoneuan. Inkalchanejkauan omomiaktilijkej uan opejkej chantij itech nochi Tlaltikpak, ijkon ken Jehová okinnauati.

Pero sekimej amo okitlakamatkej Jehová. Okijtojkej: “Nikan ma timokauakan, ma tikchijchiuakan se altepetl uan se torre tlen ajsiti hasta iluikak. Ijkon nochtin techixmatiskej”.

Jehová amo okipakti tlen okichijkej, ik non, ayakmo okinkauili ma kitlamikan non torre. ¿Tikmati tlen okichi? Okichi ma tlajtokan tlatlamantli tlajtolmej. Non altepetl okitokayotijkej Babel, nin tlajtoli kijtosneki “ayakmo okimatiayaj tlen okimoiluiayaj”. Ken ayakmo omoajsikamatiayaj, ayakmo okitlamijkej torre uan oyajkej oksekan ochantitoj. Pero ok okichiuayaj tlen amo kuali kanin ochantitoj. ¿Tikneltoka okatka ikaj tlen okitlasojtlaya Jehová? Tikitaskej itech okse tlamachtil.