Itech ninmej tlamachtilmej tikitaskej tlen okinpanok José, Job, Moisés uan israelitas. Satanás okintlajyouilti, pero yejuan otlaxikojkej. Sekimej okinchiuilijkej tlen amo kuali, oksekimej okintsakej, okatkaj tlakeualmej uan omikej akinmej okintlasojtlayaj. Pero Jehová okinmalui. Tla tikinpia mokoneuan, xikinpaleui ma kimatikan itekipanojkauan Jehová nochipa itech otlaneltokakej maski sapanoa otlajyouijkej.

Ika majtlaktli chauistli Jehová okiteititi sapanoa chikauak uan amo dioses tlen okatkaj Egipto. Xikinpaleui mokoneuan ma kajsikamatikan yiuejkika Jehová okimalui ialtepe uan axkan noijki kimaluia.

José oneski ijkuak Jacob yokipiaya miak xiuitl. Ikniuan José tlen okachi yiuejueyij okitakej intajtsin okachi okitlasojtlaya José. ¿Ken omomachiliayaj? Okikokoliayaj José. Se tonal, José okochtemik seki tlamantli uan okinmilui ikniuan. Yejuan omokuayejyekojkej tlen José okochtemik okijtosnekiaya se tonal motlankuaketsaskiaj ixpan José, ik non, okachi okikokolijkej.

Se tonal, ikniuan José okinmaluijtokaj ichkamej ik altepetl Siquem. Uan Jacob okilui José ma kinmitati ken okatkaj ikniuan. Ijkuak ikniuan José okitakej, okijtojkej: “Ompa uits akin kochtemiki. ¡Ma tikmiktikan!”. Ik non, okitlamotlakej ijtik se tekochtli uejkatlan. Pero se ikni tlen omotokayotiaya Judá, okijto: “Amo xikmiktikan. Okachi kuali, ma tiknemakakan para ma yeto tlakeuali”. Uan ijkon okichijkej. Okinemakakej innauak sekimej tlakamej tlen otlanemakayaj, ika 20 platajtomin. Yejuan oualayaj itech altepetl Madián uan oyayaj Egipto.

Satepan, ikniuan José okitlalilijkej itlaken ieso se tentso uan okiuikilijkej intajtsin uan okiluijkej: “¿Amo nin iaxka mokone?”. Jacob omokuayejyeko se yolkatl okimikti José uan sapanoa omoyolkoko. Amo ikaj ueli okiyolseuiaya.

Itech Egipto, se tlakatl ueyititok tlen omotokayotiaya Potifar okiko José para yetoskia itlakeual. Pero Jehová okatka iuan José. Potifar okitak José kuali otekitiaya uan itech otlaneltokaya. San niman, José okiyekanaya nochi tlen okipiaya Potifar.

Isiua Potifar okipaktiaya José porque kuajkualtsin omotaya uan okatka chikauak. Ik non, okiluiaya iuan ma moteka. ¿Tlen okichiuaya José? Okixtopeuaya uan okiluiaya: “Non amo kuali. Noteko notech tlaneltoka uan te tiisiua. Nitlajtlakolchiuas ixpan toTajtsin Dios tla mouan nimotekas”.

Se tonal, isiua Potifar okinekiaya kichiualtis José iuan ma moteka. Okikitskili itlaken, pero José san niman ocholo. Ijkuak Potifar oajsito ikalijtik, isiua okikajkaya uan okilui José okinekiaya kichiualtis iuan ma moteka. Potifar sapanoa okualanki uan otlanauati ma kitsakuakan José. Pero Jehová amo okilka José.