Tlamachtilmej para Toteki akinmej tikchiuaj ken Cristo
4-10 DE NOVIEMBRE
KEN TECHPALEUIA BIBLIA | 1 JUAN 1-5
“Amo ‘xiktlasojtlakah tlan onka itech nin tlaltíkpaktliʼ”
(1 Juan 2:15, 16) Ayakmó xiktlasojtlakah tlan onka itech nin tlaltíkpaktli nion tlan nika mochiwa. Tla aka kiwilita kichijtinemis tlan kichiwah n tlaltikpaktlakah tlajtlakolejkeh, non tlakatl amo milák kitlasojtla n Totajtsi Dios. 16 Porke nochi tlan onka itech nin tlaltíkpaktli tokuerpo kelewia, toixtololowah noiwa kelewiah tlan kita, iwa tikneki matechweyilikah, nochi noni amo wits de Dios, yej san itech nin tlaltíkpaktli.
w05-S 1/1 pág. 10 párr. 13
Ma tikchiuakan ken Jesús
13 Miakej mokuayejyekoaj, seki tlamantli tlen onka itech nin tlaltikpak kuali. Non melauak pero onka miak tlamantli tlen uelis kichiuas ayakmo ma tiktekichiuilikan Jehová. Noijki nochi tlen onka amo techpaleuia ma tikixmatikan toTajtsin Dios. Ik non, tla techpaktia tlen onka itech nin tlaltikpak maski uelis tikijtoskej non kuali, uelis techijtlakos (1 Timoteo 6:9, 10). Miak tlamantli tlen onka, kema techijtlakoa. Tla tikinmitaj películas noso okseki tlamantli tlen panoa itech televisión, kanin motaj moteuiaj, kinekij miak tlamantli uan auilnemij. Xamo satepan tikijtoskej nochi non tlamantli amo tlajtlakoli uan noijki titlajtlakolchiuaskej. Tla san timouikaj iuan akinmej san kinekij kipiaskej miak tlamantli noso kinekij kipiaskej tomin, xamo satepan tejuan noijki ijkon timokuayejyekoskej (Mateo 6:24; 1 Corintios 15:33).
(1 Juan 2:17) Nochi tlan onka itech nin tlaltíkpaktli ya tlanti, iwa nochi tlan pitsotik, pero akin kichiwah tlan Dios kineki nochipa yolitos.
w13-S 15/8 pág. 27 párr. 18
Ximokuayejyeko ken tikneki tikpias moyelis
18 Tla tiknekij tikixtopeuaskej “tlan onka itech nin tlaltíkpaktli”, moneki ma tikilnamiktokan tlen okijto Juan: “Nochi tlan onka itech nin tlaltíkpaktli ya tlanti, iwa nochi tlan pitsotik, pero akin kichiwah tlan Dios kineki nochipa yolitos” (1 Juan 2:17). Nochi tlen kiyekana Satanás mota kuali kajki uan amo keman tlamis pero nochi non pojpoliuis. Amo ma tikkauakan ma techkajkayaua tlen onka itech nin tlaltikpak porque san niman kipojpoloskej.
Ma tiktemokan ken techpaleuia Biblia
(1 Juan 2:7, 8) Notlasojikniwah, amo nomechijkuililia se yankuik tlanawátili, nin tlanawátili yowejka ononkipixtokah. Nin tlanawátili san ye non nomejwah yononkikakeh. 8 Pero tlan axa nomechijkuililia se yankuik tlanawátili, porke yomotenexti itech inemilis Jesús iwa itech nomonemilis, porke n tleyuálistli yakatlanti, iwa yopé tlawia n milajka tláwili.
w13-S 15/9 pág. 10 párr. 14
Tlen techiluia Jehová melauak
14 Itech Escrituras Griegas Cristianas miak uelta kijtoa ma timotlasojtlakan. Jesús noijki okijto: “Xiktlasojtla mokni kemi te timotlasojtla” (Mat. 22:39). Santiago, itlakpaikni Jesús okitokayoti “weyi tlanawátili” (Sant. 2:8). Tlatitlanil Juan okijkuilo: “Notlasojikniwah, amo nomechijkuililia se yankuik tlanawátili, nin tlanawátili yowejka ononkipixtokah. [...] Pero tlan axa nomechijkuililia se yankuik tlanawátili” (1 Juan 2:7, 8). ¿Tlen okinekiaya ma tikajsikamatikan ijkuak okijto: “Nin tlanawátili yowejka ononkipixtokah”? Kijtosneki moneki timotlasojtlaskej. “Yowejka” porque Jesús miak xiuitl achto yokijtojka ijkon ma tikchiuakan. Pero noijki “yankuik” porque ok omonekiaya kiteititiskej omotlasojtlayaj. Akinmej tikchiuaj ken Cristo timotlasojkamatij porque techilnamiktiaj moneki timotlasojtlaskej uan amo tikchiuaskej ken akinmej amo kixmatij Jehová.
(1 Juan 5:16, 17) Tla aka kita se ikni kichijtok tlajtlákoli, non amo ika se mikkis, mamotiotsajtsili inawak Dios makitlapojpolwi. Dios kimakas yolílistli non ikni, tla non tlajtlákoli amo tewika kan mikílistli. Pero onka tlajtlákoli non tewika kan mikílistli, iwa amo nomechilia ximotiotsajtsilikah por ye. 17 Nochi tlan amokuali se kichiwa, tlajtlákoli. Pero amo nochi tlajtlákoli tewika kan mikílistli.
it-2-S pág. 635 párr. 8
Ma techtlapojpoluikan
Moneki timotlatlaujtiskej inpatka oksekimej uan noijki inpatka akinmej pouij itech se tlanechikol. Ijkon okichi Moisés ijkuak okitlatlaujti toTajtsin Dios ma kintlapojpolui israelitas porque otlajtlakolchijkej uan Jehová okiseli ijkuak okitlatlaujti (Núm. 14:19, 20). Ijkuak Jehová okimaktilijkej teokali, Salomón omotlatlaujti para toTajtsin Dios ma kintlapojpolui israelitas tla otlajtlakolchiuayaj uan omoyolkopayaj (1 Rey. 8:30, 33-40, 46-52). Ijkuak Esdras omotlatlaujti inpatka israelitas tlen omokopkej inmialtepe, okijto tlen tlajtlakoli okichijkej. Tlen okijto Esdras, okinpaleui ma kipatlakan innemilis para Jehová ma kintlapojpolui (Esd. 9:13-10:4, 10-19, 44). Santiago noijki okijto tla ikaj otlajtlakolchi, ma kinnotsa tlayekankej para ipatka ma motlatlaujtikan “iwa tla itla tlajtlákoli okichi, kitlapojpolwilis [toTajtsin Dios]” (Sant. 5:14-16). Pero “onka tlajtlákoli non tewika kan mikílistli”, tla tikixnamikiskej espíritu santo, non kijtosneki titlajtlakolchiuaj porque ijkon tiknekij, amo techtlapojpoluiskej tla ijkon tikchiuaj. Akinmej tikchiuaj ken Cristo amo timotlatlaujtiskej inpatka akinmej san kinekij tlajtlakolchiuaskej (1 Juan 5:16; Mat. 12:31; Heb. 10:26, 27, TNM; noijki xikita ESPÍRITU; PECADO).
11-17 DE NOVIEMBRE
KEN TECHPALEUIA BIBLIA | 2 JUAN 1-13; 3 JUAN 1-14-JUDAS 1-25
“Ma timochijchikauakan tikchiuaskej tlen melauak”
(Judas 3) Notlasojikniwah, satlawel oniknek nomechtlajkuililis iwa nomechilnamiktis ika totemakixtilis non tiksepampixtokeh, onikmoli kuali manomechtlajkuilili para ximochijchikawakah por n tlaneltokálistli non Dios okinmajmak iaxkawah.
w04-S 15/9 págs. 11, 12 párrs. 8, 9
“Ximochijchikawakah itech ichikawalis n Toteko Cristo”
8 Tikmatij ken tekajkayaua Satanás porque iTlajtol toTajtsin Dios kijtoa ken kichiua (2 Corintios 2:11). Diablo okichi ma tlajyoui Job; amo okipiaya tlen ika mopanoltis, okichi ma mikikan ikoneuan, ma mokoko uan isiua okixnamik. Akinmej okijtoayaj iyolikniuan okitenejkej, ik non, maski okatka yolmelajki omoyolkoko uan omokuayejyeko toTajtsin Dios ayakmo okipaleuiaya (Job 10:1, 2). Maski amo nochipa itlajtlakol Satanás tlen amo kuali panoa, kema kichiua miakej tokniuan ma mosotlauakan, ye uelis kichiuas non ma techijtlako uan ijkon ma mochiua tlen kineki.
9 Axkan onka okachi miak tlamantli tlen uelis kichiuas ayakmo ma timouikakan iuan Jehová. Miakej kinekij kipiaskej miak tlamantli uan amo kipatioitaj mouikaskej iuan Jehová. Nochi tlen axkan onka kiteititia amo titlajyouiskej tla tiauilnemiskej. Sapanoa miakej kinpaktia “moyolpaktijtinemiskeh ika tlan amo kuali kelewia inkuerpo” uan ayakmo kitemoaj toTajtsin Dios (2 Timoteo 3:1-5). Tla amo timochijchikauaj tikchiuaskej ken tikmatij, techijtlakos tlen oksekimej mokuayejyekoaj, ik non, “[mati]mochijchikawakah por n tlaneltokálistli” (Judas 3).
Ma tiktemokan ken techpaleuia Biblia
(Judas 21, TNM) Xiyetokan itech itlasojtlalis toTajtsin Dios, ijkuak ok nankichiaj iteiknomatilis toTeko Jesucristo uan yolilistli tlen kajki namoixpan tlen amo keman tlamis.
“Tiktenextiah tiktlasojtla Dios”
3 Jehová kineki nochipa ma tikpiakan itlasojtlalis. Tejuan tikijtoskej tla tiknekij noso amo. ITlajtol toTajtsin Dios technauatia: “Xiyetokan itech itlasojtlalis toTajtsin Dios [...] uan yolilistli tlen kajki namoixpan tlen amo keman tlamis” (Judas 21, TNM). Tlajtoli “xiyetokan”, kijtosneki moneki itlaj tikchiuaskej uan ijkon tiyetoskej itech itlasojtlalis toTajtsin Dios. Ika tlen tikchiuaj itech tonemilis, moneki tikteititiskej noijki tiktlasojtlaj. Ik non, ma timotlajtlanikan: “¿Tlen moneki nikchiuas pampa nikititis melauak niktlasojtla toTajtsin Dios?”. Pampa uelis titlanankiliskej, ma tiktlajtoltikan tlen Jehová okilui ma kijkuilo tlatitlanil Juan: “Tiktenextiah tiktlasojtla Dios keman tikintlakitah itlanawatilwah, iwa amo owi se kintlakita [noso se kintlakamati]” (1 Juan 5:3). Pampa sapanoa tiknekij tikititiskej melauak tiktlasojtlaj, ma tikitakan tlen kijtosneki ninmej tlajtolmej tlen okijkuilo Juan.
(Judas 14, 15) Noiwa Enok non otlákatki ipan chikome tlakatl satepa de Adán, okinteneh ninteh tlakah iwa ijkí okijto: Onikitak n Toteko ompa wits iwa kualinwikah miaktikeh ángeles. 15 Tetlaxtlawikih iwa kintlaijyowiltis n tlajtlakolejkeh akimeh okichijkeh tlan amokuali iwa fiero okitenewayah.”
wp17.1-S pág. 12 párr. 1
Okimatki okiyolpakti toTajtsin Dios
¿Tlen profecía okijto Enoc? Ye okijto: “Onikitak n Toteko ompa wits iwa kualinwikah miaktikeh ángeles. Tetlaxtlawikih iwa kintlaijyowiltis n tlajtlakolejkeh akimeh okichijkeh tlan amokuali iwa fiero okitenewayah” (Judas 14, 15). Tlen okijto Enoc yetoskia ken itlaj tlen yopanok, yetoskia ken toTajtsin Dios yokichi tlen okijto. Miakej profetas noijki ijkon otlajkuilojkej. Ijkon okichiuayaj porque okinekiayaj kijtoskej melauak panoskia tlen toTajtsin Dios okijto uan yetoskia ken yopanok (Isaías 46:10).
wp17.1-S pág. 12 párr. 3
Okimatki okiyolpakti toTajtsin Dios
Ijkuak tikitaj ken otlaneltokaya Enoc, techpaleuia ma timotlajtlanikan kox timokuayejyekoaj ken toTajtsin Dios. Axkan noijki melauak uan miak ipati. Tlen okijto opanok ijkuak Jehová okichi ma atemi tlaltikpak uan akinmej amo yolkualmej omikej. Non okiteititi tlen panos satepan uan okachi miakej mikiskej (Mateo 24:38, 39; 2 Pedro 2:4-6, TNM). Axkan toTajtsin Dios noijki kintekitiltis ángeles para kinmixpoloskej nochtin akinmej amo yolkualmej. Ma tikchiuakan ken Enoc uan ma tikinmiluikan oksekimej tlen panos. Xamo tokalchanejkauan uan toyolikniuan amo kinpaktia tlen tikchiuaj. Ik non, ualeua timokuayejyekoskej tikatej toselti. Ma tikilnamiktokan Jehová amo keman okika Enoc uan amo keman kinkauas akinmej kitekichiuiliaj ika nochi inyolo.
18-24 DE NOVIEMBRE
KEN TECHPALEUIA BIBLIA | APOCALIPSIS 1-3
“Nikmati nochi tlan tikchiwa”
(Apocalipsis 1:20) Ye ni tlan kijtosneki n chikome sítlalteh non otikinmitak itech nomayekma, iwa ye ni tlan kijtosneki n chikome kandelerojteh de oro: n chikome sítlalteh, yejwah n chikome ángelteh de n chikome [tlanechikolmej], iwa n chikome kandelerojteh kijtosneki n chikome [tlanechikolmej].
w12-S 15/10 pág. 13 párr. 8
¿Ken tikpia moyelis?
8 Para amo ijkon tikpiaskej toyelis, ma tikilnamikikan Jesús kijtoa kinpia iyekma “chikome sítlalteh”. Non kineskayotia tlapejpenalmej tlen techyekanaj uan noijki nochtin tlayekankej itech tlanechikolmej. Ye kinyekana “sítlalteh” ken kineki (Apoc. 1:16, 20). Ken ye kinyekana nochi tlanechikolmej, kijtosneki nochtin tlayekankej kichiuaj ken ye kineki. ITlajtol toTajtsin Dios kijtoa “ixtololowah oxotlayah kemi yaskia tletl”, non kijtosneki ye kimati nochi tlen panoa, ik non, tla moneki kiyektlalis se tlayekanki, ye kimati keman uan ken kiyektlalis (Apoc. 1:14). Pero tejuan moneki tikintlakaitaskej porque okintlalijkej ika espíritu santo. Pablo okijkuilo: “Xikintlakitakah akimeh nomechyakanah iwa xikchiwakah tlan nomechnawatiah, porke yejwah nomechmokuitlawia [techmaluiaj], iwa kuali kimatokeh Dios kintlajtlanis kenomi onomechyakankeh. Xikintlakitakah para makichiwakah intekih ika pakílistli, iwa amo san matsoyontokah. Porke noni amitla nomechpalewis” (Heb. 13:17).
(Apocalipsis 2:1, 2) ’Xiktlajkuilili n tlayákanki non kajki Éfeso kan moololoah n tlaneltokakeh: “Ijkí kijtoa Akin kimpixtok n chikome sítlalteh itech imayekma, non nemi intlajkotiah n chikome kandelerojteh de oro: 2 Ne nikmati nochi tlan tikchiwa. Nikmatok kenomi chikawak titekiti iwa kenomi nochi tikxikoa, iwa noijki nikmatok amo tikxikoa tikinmitas n tlajtlakolejkeh. Ne kuali nikmatok yotikinyejyeko nekateh non motenewah tlatitlánilti pero mach milák, iwa yotikinmitak san tekajkayajkeh.
w12-S 15/4 pág. 29 párr. 11
Jehová techmaluia para timomakixtiskej
11 Tlen ijkuilitok itech Apocalipsis capítulo ome uan eyi, kiteititia Jesucristo okinmitak tlen okichiuayaj tokniuan itech chikueyi tlanechikolmej ompa Asia Menor. Tlen ompa ijkuilitok amo san techititia nochtin techita, noijki kiteititia kita tlen tisejse tikchiuaj. Ualeua noijki okijto intoka sekimej tokniuan, nochipa okinyolchika uan okinmilui tlen omonekiaya kichiuaskej. ¿Tlen techmachtia non? Tlen ompa ijkuilitok opejki panoa itech 1914. Chikuase nechikolmej kineskayotiaj tlapejpenalmej uan tlen ompa okinnejmachti uelis kinpaleuis tokniuan itech nochi tlaltikpak. Ik non, uelis tikijtoskej Jehová kitekitiltia iKone para kiyekanas ialtepe. ¿Tlen moneki tikchiuaskej para ma techpaleui ken techyekana?
w01-S 15/1 pág. 20 párr. 20
Ma tikchijtokan ken ialtepe Jehová technauatia
20 Tla tiknekij tikchijtoskej tlen kineki ialtepe toTajtsin Dios. Moneki tikmatiskej Jehová okitlali Jesucristo ken tlayekanki para ma kinyekana tlanechikolmej (Efesios 5:22, 23). Noijki moneki tikmatiskej tlen kijtoa Isaías 55:4: “¡Xikitakan! [Ne Jehová] oniktlali ken tlaixpantijka inmixpan altepemej, ma yeto tlayekanki uan ma tlanauati itech altepemej”. Nin kiteititia Jesús melauak kimati tlayekanas. Kuali kinmixmati akinmej kinyekana uan kimati tlen kichiuaj. Noijki ijkon okiteititi ijkuak okijto tlen okichiuayaj tokniuan itech chikome tlanechikolmej ompa Asia Menor. Makuili uelta okijto: “Nikmati nochi tlan tikchiwa” (Apocalipsis 2:2, 19; 3:1, 8, 15). Ijkon ken Jehová, Jesús kimati tlen techpoloa. Achto kijtoskia ken moneki timotlatlaujtiskej, okijto: “Totajtsi Dios ya kimatok tlan nomechpoloa achto de nonkitlajtlaniliskeh” (Mateo 6:8-13).
Ma tiktemokan ken techpaleuia Biblia
(Apocalipsis 1:7) Xikitakah. Cristo wits ipan mextli. Iwa nochteh n tlakah kitaskeh, asta non okikespantsopitijkeh; iwa nochteh n tlaltikpaktlakah chokaskeh ijkuak kitaskeh. Milák, ijkó mamochiwa.
kr-S pág. 226 párr. 10
ITekiuajkayo toTajtsin Dios kinmixpolos akinmej kikokoliaj
10 Kinxeloa ichkamej uan tentsomej. Akinmej kikokoliaj iTekiuajkayo toTajtsin Dios okachi moyolkokoskej ijkuak kitaskej tlen panos. Jesús okijto: “Ijkuakó nonnechitaskeh Ne Non onimochi ni tlakatl niwaltemotiwits itech mextli ika weyi weletílistli iwa weyílistli” (Marcos 13:26). Ijkuak ijkon panos kijtosneki Jesús ouala para nochtin kinmixkomakas. Biblia noijki kijtoa okseki tlamantli tlen kichiuas. Ijkuak okijto tlen kinpanos ichkamej uan tentsomej (xiktlajtolti Mateo 25:31-33, 46). Akinmej kipaleuiskej iTekiuajkayo toTajtsin Dios uan amo kikauaskej, kinmitaskej ken “ichkameh” uan ‘ajkotlachiaskeh porke san nima kinmakixtiskehʼ (Lucas 21:28). Pero kinmitaskej ken “tentsomeh” akinmej kikokoliskej iTekiuajkayo toTajtsin Dios. Yejuan sapanoa “chokaskeh” uan moyolkokoskej porque kinmixpoloskej (Mat. 24:30, TNM; Apoc. 1:7).
(Apocalipsis 2:7) Akin kineki kajsikamatis makikaki tlan n Espíritu kinmilia n tokniwah: Akimeh tlatlaniskeh, nikinmakas makikuakah itlakilo n kuawitl non kichiwa se mayolito nochipa, non kajki tlatlajkotia kan ixochitlalpa Dios.”
w09-S 15/1 pág. 31 párr. 1
Tlen okachi ipati tlen omotlajtolti itech Apocalipsis (1)
2:7 ¿Tlen kijtosneki “ixochitlalpa Dios”? Nin okinmiluijkej tokniuan tlapejpenalmej, ik non, “ixochitlalpa Dios” kijtosneki iluikak, kanin kajki Jehová. Ompa melauak kajki ken se xochitlali. Tlapejpenalmej yolmelajkej uelis kikuaskej “itlakilo n kuawitl non kichiwa” ma yoltokan nochipa uan kijtosneki toTajtsin Dios kichiuas amo keman ma ixpoliuikan (1 Cor. 15:53).
25 DE NOVIEMBRE-1 DE DICIEMBRE
KEN TECHPALEUIA BIBLIA | APOCALIPSIS 4-6
“Naui yauij ipan caballos”
(Apocalipsis 6:2) Onontláchixki iwa onikitak se kabayo istak, iwa akin ipa otlejkotoka okikitskijtoka se arko. Okimakakeh se korona, iwa okistewak [ken] se tlátlanki para okachi tlatlanis.
wp17.3-S pág. 4 párr. 3
¿Tlen kineskayotiaj akinmej yauij ipan caballos?
¿Akin kajki ipan caballo istak? Tla tiknekij tikmatiskej, moneki tikitaskej tlen kijtoa amochtli Apocalipsis. Itech seki capítulos kijtoa kitokayotiaj “Itlajtol Dios” (Apocalipsis 19:11-13). Tikmatij ijkon kitokayotiaj Jesucristo porque kitematiltia tlen kineki toTajtsin Dios (Juan 1:1, 14). Noijki kiluiaj “Ye n tlanawati non kinnawatia nochteh n tlanawatijkeh iwa Tekowa itech nochteh n tekowajkeh” uan Biblia kitokayotia “Milajkatlakatl iwa Kichiwa Tlan Kijtoa” (Apocalipsis 19:16). Ik non, tikmatij ye tekiua uan uelis tlaixkomakas, amo uelis ikaj kitlaxtlauis para ma kichiua itlaj amo kuali nion moueyineki. Pero onka okseki tlamantli tlen noijki moneki tikmatiskej.
wp17.3-S pág. 4 párr. 5
¿Tlen kineskayotiaj akinmej yauij ipan caballos?
¿Keman opejki yauij ipan caballos? Opejki ijkuak Jesús okimakakej se corona (Apocalipsis 6:2). ¿Keman opejki tlanauatia ompa iluikak? Amo okitlalijkej ijkuak ompa oajsito porque iTlajtol toTajtsin Dios kijtoa ok omochixki (Hebreos 10:12, 13). Jesús okinmilui imachtijkauan ken kimatiskiaj peuaskia tlanauatis iluikak. Okijto, ijkuak ualtlanauatis panoskia miak tlamantli amo kuali. Yetoskiaj guerras, miakej amo kipiaskiaj tlen kikuaskej uan miakej mokokoskiaj (Mateo 24:3, 7; Lucas 21:10, 11). Ijkuak opejki Primera Guerra Mundial itech 1914, omotak nochi tlen Jesús okijto uan ken kijtoa Biblia opejki “iksemi tonatijmeh” (2 Timoteo 3:1-5).
(Apocalipsis 6:4-6) Iwa okiski ok se kabayo chichiltik, akin ipa otlejkotiaya okiseli se espada iwa weletílistli para kintoktis san yejwah innewiah mamotekilmakakah iwa mamokechtsojtsontekikah n tlaltikpaktlakah. 5 Ijkuak n Ichkatsi okitsomoni non ipan eyi seyo, non ipan eyi kemi yolkatl onikak okijto: —¡Xiwiki! Oniontláchixki, iwa onikitak se kabayo tliliwik, iwa akin ipa otlejkotiaya okipixtoka se balansa itech ima. 6 Iwa intlajkotiah nonteh nawi non yolitokeh, onikak se tlájtoli non okijtoaya: —Se [litro] trigo noso eyi [litro] sebada ipati tlan se tlakéwali kitlani itech se tonati. Pero amo san xikawilti n aseite iwa n vino.
wp17.3-S pág. 5 párr. 2
¿Tlen kineskayotiaj akinmej yauij ipan caballos?
Nin kineskayotia guerra. Itech nochi altepemej ayakmo kinkauilia ma kipiakan yolseuilistli. Itech 1914 itech nochi tlaltikpak okichijkej guerra uan ayamo keman ijkon okichiuayaj. Satepan opejki Segunda Guerra Mundial, ijkuakon okachi miakej omikej. Seki ixtlamatkej kijtoaj ijkuak opejki guerra itech 1914 uan ika okseki guerras, yomikej kanaj cien millones. Noijki sapanoa miakej otlajyouijkej porque itlaj okinpanok uan amo keman opajtikej.
wp17.3-S pág. 5 párrs. 4, 5
¿Tlen kineskayotiaj akinmej yauij ipan caballos?
“Iwa onikitak se kabayo tliliwik, iwa akin ipa otlejkotiaya okipixtoka se balansa itech ima. Iwa intlajkotiah nonteh nawi non yolitokeh, onikak se tlájtoli non okijtoaya: —Se [litro] trigo noso eyi [litro] sebada ipati tlan se tlakéwali kitlani itech se tonati. Pero amo san xikawilti n aseite iwa n vino” (Apocalipsis 6:5, 6).
Akin yaui ipan nin caballo kineskayotia apistli. Tlen nikan kijtoa sapanoa temomojti, kijtoa se “[litro] trigo” (0,7 kilo) kinemakaskiaj ika se denario. Itech achto siglo se denario okitlaniayaj ijkuak otekipanoayaj nochi se tonal (Mateo 20:2). Noijki ijkon patiouaskia “eyi” litro cebada (2,1 kilos). Trigo okachi kuali amo ken cebada. Non kiteititia tla miakej san sekan chantij, tlajyouiskiaj. Satepan okijto amo ma kauilchiuakan aceite de oliva nion vino. Yiuejkika nochi non amo okatka patio uan nochtin ueli okikouayaj.
(Apocalipsis 6:8) Oniontláchixki iwa onikitak se kabayo kostik, iwa akin ipa otlejkotiaya omonotsaya Mikílistli, iwa n Miktla okualtokaya. Iwa akin otlejkotiaya ipan non kabayo okimakakeh weletílistli para makinmijmikti ika espada, ika apisotl, ika kokólisteh iwa ika yolkameh tekuanimeh, se kuarto de akimeh nemi ipan nin tlaltíkpaktli.
wp17.3-S pág. 5 párrs. 8-10
¿Tlen kineskayotiaj akinmej yauij ipan caballos?
Akin yaui ipan itlamian caballo kineskayotia mikilistli, kokolistli uan okseki tlamantli. Ijkuak opanok 1914, sapanoa miakej omikej ijkuak okipixkej gripe española. Ixtlamatkej kijtoa kanaj 500 millones okipixkej non kokolistli.
Pero ika gripe española san opejki tlajyouilistli. Sekimej ixtlamatkej kijtoaj itech siglo veinte noijki omikej kanaj trescientos millones ika viruela. Axkan noijki mikij sapanoa miakej ika sida, tuberculosis uan malaria, maski onka okachi miak pajtli.
Sapanoa miakej mikij ijkuak onka guerras, apistli uan kokolistli. Sapanoa miakej yomikej uan noijki ok mikij.
Ma tiktemokan ken techpaleuia Biblia
(Apocalipsis 4:4) Non yáyantli okiyawalojtokah sempoali iwa nawi (24) yáyanteh. Iwa ipan nonteh yáyanteh oewatokah sempóali iwa nawi tetajtsitsinteh non istaktlakentitokah, iwa sejse okipixtoka ipan intsonteko se korona de oro.
(Apocalipsis 4:6) Noiwa iyakapa non weyi yáyantli okatka se weyi atl kemi teskatl. Tlatlajkotia, iwa ik iyawalojka non weyi yáyantli, okatkah nawi non yolitokeh iwa ik inyakapah iwa ik inkuitlapa okimpiayah miakeh inmixtololowah.
re-S pág. 76 párr. 8
Sapanoa techtlajtlachialtia itrono Jehová
8 Juan okimatiaya youejka okintlalijkej teopixkej ma tekipanokan itech teokali, ik non, okitlajtlachialti tlen okitak: “Non yáyantli okiyawalojtokah sempoali iwa nawi (24) yáyanteh. Iwa ipan nonteh yáyanteh oewatokah sempóali iwa nawi tetajtsitsinteh non istaktlakentitokah, iwa sejse okipixtoka ipan intsonteko se korona de oro” (Apocalipsis 4:4). Amo okinmitak teopixkej, okinmitak 24 “tetajtsitsinteh”, okatkaj ipan tronos uan okipiayaj coronas porque tlanauatiaj. ¿Akinmej yejuan? Nochtin ninmej tlapejpenalmej tlen yokinyolitijkej uan katej iluikak, ijkon ken Jehová okinmilui. ¿Ken tikmatij non?
re-S pág. 80 párr. 19
Sapanoa techtlajtlachialtia itrono Jehová
19 ¿Tlen kineskayotiaj nonmej espíritus? Tlen okitak profeta Ezequiel noijki techpaleuia ma tikmatikan akinmej espíritus. Ezequiel okitak Jehová okatka ipan se carro ompa iluikak uan iuan oyayaj espíritus uan omotayaj ijkon ken okijkuilo Juan (Ezequiel 1:5-11, 22-28). Satepan Ezequiel oksepa okitak non carro-trono oyaya iuan nonmej espíritus. Pero ijkuak ijkon okitak, okijto nonmej espíritus querubines (Ezequiel 10:9-15). Naui espíritus tlen okinmitak Juan kinneskayotiaj sapanoa miakej querubines tlen katej inauak Jehová. Yejuan sapanoa chikauakej uan kitekichiuiliaj. Juan amo okitlajtlachialti kinmitas querubines inauak Jehová porque itech tabernáculo okatkaj ome querubines ochijchitokaj ika oro ipan arca itech tlajtolsenkaualistli uan okineskayotiayaj itrono Jehová. Intlajkotia ninmej querubines Jehová okinnauatiaya israelitas tlen omonekiaya kichiuaskej (Éxodo 25:22; Salmo 80:1).
(Apocalipsis 5:5) Ijkuakó seme de nonteh tetajtsitsinteh onechili: —Ayakmó xichoka, n lío non iwejkaixwi n Judá iwa n rey David, yotlátlanki iwa Ye weletis kitlapos non amatlajkuíloli iwa kintsomonis n chikome seyojteh.
cf-S pág. 36 párrs. 5, 6
“Lío non iwejkaixwi n Judá”
5 Ijkuak ikaj yolchikauak kineskayotiaj ika se león. ¿Yotikitak se ueyi león? Tla kema, xamo otsaktoka ijtik se zoológico. Maski otsaktoka xamo omitsmomojti. Ijkuak tikitaj se ueyi león, mota amo momojtia uan amo choloa. Biblia kijtoa nin yolkatl okachi chikauak uan amitlaj kimomojtia (Proverbios 30:30). Noijki Cristo yolchikauak ken se león.
6 Ma tikitakan eyi tlamantli ijkuak Jesús okiteititi yolchikauak ken se león: ijkuak okijto tlen melauak, ijkuak okiteititi melajkayotl uan ijkuak oksekimej okixnamikej. Noijki tikitaskej maski amo tinochtin tiyolchikauakej, uelis tikchiuaskej ken Jesús okichi.
© 2019 Watch Tower Bible and Tract Society of Pennsylvanias