Sekimej techtlajtlaniaj

¿Akinmej okatkaj policías itech teokali uan tlen okichiuayaj?

Sekimej levitas amo okatkaj teopixkej pero okatkaj policías itech teokali. Okinnauatiaya akin okiyekanaya teokali. Se tlakatl judío itoka Filón okijto tlen tekitl okichiuayaj: “Sekimej otlamaluiayaj kanin okatkaj puertas, sekimej otlamaluiayaj kanin okatka santuario uan ijkon amikaj kalakiskia. Oksekimej okintlaliayaj ma kimaluikan teokali nochi se tonal uan nochi se youak”.

Nochtin nonmej policías okinnauatiayaj akinmej okiyekanayaj Sanedrín. San policías okinkauiliayaj ma kinpiakan teposmej.

Se tlakatl ixtlamatki itoka Joachim Jeremias, okijto: “Jesús amo kijtoskia tleka amo okikitskijkej ijkuak otlamachtiaya kanin okatka teokali tlamo yetoskiaj policías” (Mat. 26:55). Noijki non tlakatl okijkuilo, akinmej se tonal okinekiayaj kikitskiskej Jesús noijki okatkaj policías (Juan 7:32, 45, 46). Satepan akin otlayekanaya itech teokali uan isoldados otlanauati ma kinuikakan imachtijkauan Jesús inmixpan akinmej okiyekanayaj Sanedrín. Noijki xamo nonmej policías okikitskijkej Pablo ompa kiauak kanin okatka teokali (Hech. 4:1-3; 5:17-27; 21:27-30).