Ma tlaxikokan

¿TLEN KIJTOSNEKI?

Tla titlaxikoskej, timoyolchikauaskej uan tikmatiskej tikixnamikiskej ouijkayotl. Tikmatiskej ken titlaxikoskej ijkuak techpanotias miak tlamantli. Ijkon ken se konetl uetsi ijkuak peua nejnemi, amo kimatis itlaj kixnamikis tla amitlaj kipanos.

¿TLEKA MIAK IPATI?

Ualeua sekimej konemej moyolkokoaj ijkuak amo kuali kisa tlen kichiuaj, ijkuak kixnamikij ouijkayotl noso ijkuak ikaj kinmiluia amo kuali tlen okichijkej. Oksekimej ayakmo itlaj kinekij kichiuaskej. Pero moneki ma kajsikamatikan nin tlamantli:

• Amo uelis nochi kuali tikchiuaskej (Santiago 3:2).

• Tinochtin titlajyouiaj (Eclesiastés 9:11).

• Tikpatlaskej toyelis tla ikaj techiluia tlen amo kuali tikchiuaj (Proverbios 9:9).

Tla namokoneuan kimatij tlaxikoskej, moyolchikauaskej uan non kinpaleuis ma kixnamikikan san tlen ouijkayotl.

¿KEN NANKINMACHTISKEJ MA TLAXIKOKAN?

Ijkuak namokoneuan itlaj amo kuali kichiuaj

PRINCIPIO BÍBLICO KIJTOA “Akin yolmelauak uelis uetsis chikome uelta uan oksepa moketsas” (Proverbios 24:16).

Xikinpaleuikan namokoneuan ma kitakan kox melauak ayakmo itlaj uelis kichiuaskej ijkuak itlaj kinpanoa. Ma tikijtokan mokone amo kuali okichi se examen, ¿san niman mosotlauas uan kijtos: “¡Amitlaj kuali nikchiua!”?

Tla nankinekij ma tlaxikokan, xikinpaleuikan ma mokuayejyekokan tlen uelis kinpaleuis okachi kuali ma kichiuakan tlen achto amo kuali okichijkej. Ijkon mochijchikauaskej okachi kuali kichiuaskej uan amo san moyolkokojtoskej.

Noijki amo xikyektlalikan ouijkayotl tlen kixnamikij, xikinpaleuikan inneuian ma kiyektlalikan. Uelis nankintlajtlaniskej: “¿Tlen uelis nankichiuaskej para okachi kuali nankajsikamatiskej tlen namechmachtiaj?”.

Ijkuak kinpanoa itlaj amo kuali

PRINCIPIO BÍBLICO KIJTOA: “Amo nonkimatih tlan tlamochiwas mostla” (Santiago 4:14).

Amo tikmatij keman titlajyouiskej. San niman uelis timokokoskej noso tikpoloskej nochi tlen tikpiaj. Biblia kijtoa: “Akinmej totoka motlaloaj amo nochipa tlatlanij, akinmej chikauakej amo nochipa tlatlanij itech guerra, [...] porque tlamantli tlen amo tikchiaj, nochtin uelis techpanos” (Eclesiastés 9:11).

Xamo nanmochijchikauaj nochipa nankinmaluiaj namokoneuan. Pero amo uelis nochipa nankinyektlaliliskej ouijkayotl tlen kixnamikiskej.

Xamo namokoneuan ayamo tekipanoaj noso amo kinpoloa tomin. Pero xamo kixnamikiskej okseki tlamantli. Ualeua inyolikniuan ayakmo kinnotsaj noso ixpoliui se inkalchanejka.a

Ijkuak namokoneuan kinmiluiaj ma kipatlakan inyelis

PRINCIPIO BÍBLICO KIJTOA: “Xikkaki ijkuak mitsnojnotsaj [...], ijkon satepan okachi tiixtlamatis” (Proverbios 19:20).

Amo kijtosneki kinpinauiaj ijkuak kinmiluiaj ma kipatlakan inyelis. Non kinpaleuis ayakmo ma kichiuakan tlen amo kuali.

Tla nankinmachtiaj ma kinkakikan akinmej kinmiluiaj tlen amo kuali kichiuaj, amo okachi nantlajyouiskej namejuan uan namokoneuan. Se teta tlen itoka John okijto: “Tla nochipa nankinyektlaliliskej tlen amo kuali kichiuaj, namokoneuan amo keman kimatiskej tlen kichiuaskej. Nochipa kipiaskej ouijkayotl uan nochipa nankinpaleuijtinemiskej. Non namechtlajyouiltis namejuan uan namokoneuan”.

¿Ken nankinpaleuiskej ma kiselikan ijkuak kinmiluiaj ma kipatlakan inyelis? Amo xikualanikan tla ijkon kinmiluiaj kanin momachtiaj noso oksekan. Okachi kuali xikintlajtlanikan:

• “¿Tikmati tleka ijkon omitsiluijkej?”.

• “¿Tlen moneki okachi kuali tikchiuas?”.

• “¿Tlen tikchiuas ijkuak oksepa ijkon mitspanos?”.

Xikilnamiktokan ijkuak moskaltiskej kinpaleuis tla axkan kinmiluiskej ma kipatlakan inyelis.