¿Yotikitak kox melauak?
“Semanauak san iselti omochijchi” (Ixtlamatkej Stephen Hawking uan Leonard Mlodinow, 2010).
“ToTajtsin Dios okichijchi iluikak uan tlaltikpak” (La Biblia, Génesis 1:1).
¿ToTajtsin Dios okichijchi semanauak noso san iselti omochijchi? Okse tlamantli okijtojkej ixtlamatkej kanin peua nin tlamachtil uan Biblia okse tlamantli kijtoua. Sekimej kineltokaj seki tlamantli uan oksekimej okse tlamantli. Miakej kijtouaj melauak tlen ijkuilitok itech seki amochmej uan tlen kipanoltiaj itech televisión. Uan miakej amo kimatij tlen kineltokaskej.
Xamo akinmej mitsmachtiaj yomitsiluijkej semanauak uan nochi tlen yoltok san iselti omochijchi. Pero ¿omitsititijkej non melauak? Noso xamo yotikkak sekimej tlen tlayekanaj itech inreligión kijtouaj ikaj nochi otlachijchi. Pero ¿omitsititijkej non melauak noso omitsiluijkej san moneki titlaneltokas?
Xamo yotimokuayejyeko amikaj uelis kimatis kox ikaj okichijchi nochi tlen yoltok uan noijki xamo timotlajtlania kox mitspaleuis tla non tikmatis.
Itech nin revista tikitas seki tlamantli tlen kiteititia ikaj otlachijchi. Noijki kiteititia tleka moneki tikmatis ken opejki nochi tlen yoltok.