Tlen moneki kimatiskej tetajmej

Tetajmej, namejuan nankinekij namokoneuan ma kitlasojtlakan Jehová uan ixpan ma motemakakan. ¿Ken uelis nankinpaleuiskej para ma moapolaktikan? Moneki ma moapolaktikan, ¿pero keman uelis ijkon kichiuaskej?

Jesús okinnauati akinmej okichiuayaj ken ye ma tlamachtikan uan ma teapolaktikan itech nochi altepemej (Mat. 28:19, TNM). Ik non, ijkuak ikaj kineki moapolaktis, achto moneki ma kichiua ken Jesús. Non amo san kijtosneki tikneltokaskej uan tikajsikamatiskej tlen Jesús otlamachti, moneki ma tikchiuakan nochi tlen otlanauati. Noijki telpokamej noso ichpokamej uelis ijkon kichiuaskej.

Xiktlakamatikan Jehová uan ijkon nankinmititiskej namokoneuan tlen yejuan moneki kichiuaskej uan xikinmachtikan tlen Jehová tlanauatia (Deut. 6:6-9). Xikinmachti ika amochtli Tiyoltos uan tiyolpakis uan ijkon nankinmachtiskej moneki moyekanaskej ika principios bíblicos. Xikinmachtikan ma kiyekijtokan tlen kineltokaj (1 Ped. 3:15). Namokoneuan moapolaktiskej uan kitekichiuiliskej Jehová tla inmiuan nanmomachtiaj Biblia uan nankinyolchikauaj. Noijki moneki inselti ma momachtikan Biblia, ma monechikokan uan ma mouikakan iuan akinmej kinyolchikauaj. Noijki xikinpaleuikan ma mokuayejyekokan ken okachi uelis kitekichiuiliskej Jehová.

Proverbios 20:11 kijtoua: “Telpochtli moixmati ika tlen kichiua, tla inemilis chipauak uan melauak”. ¿Yikichijtokej mokoneuan ken Jesús? ¿Yiuelis moapolaktiskej?

Biblia kijtoua maski Jesús yokipiaya 12 xiuitl okintlakamatiaya itatajuan (Luc. 2:51). Noijki ijkon, telpochtli noso ichpochtli tlen kineki moapolaktis, moneki kintlakamatis itatajuan (Hech. 5:29; Col. 3:20). Namokoneuan ualeua motlapololtiskej pero moneki mochijchikauaskej kichiuaskej ken Jesús uan noijki oksekimej ma kitakan tetlakamatij.

Moneki mokoneuan ma kiteititikan kinekij okachi kimatiskej tlen kijtoua Biblia (Luc. 2:46). Ximotlajtlanikan: “¿Kinpaktia nokoneuan monechikoskej uan tlanankiliskej? ¿Kinpaktia kitlajtoltiskej uan momachtiskej Biblia?” (Sal. 122:1; Mat. 4:4).

Chokotsin noso takotsin tlen kineki moapolaktis, melauak kipatioita kitekichiuilis toTajtsin Dios, ik non, mochijchikaua kitekichiuilis (Mat. 6:33). Kilnamiktok moneki tetlapouis uan tlatlamantli kichiua. Amo pinaua kinmiluis ye iTlaixpantijka Jehová akinmej inmiuan momachtiaj uan akinmej kimachtiaj. Noijki kuali momachtia ijkuak panoua itech nechikol Toteki akinmej tikchiuaj ken Cristo.

Mochijchikaua chipauak kipias inemilis. Ik non, san mouika iuan akinmej yolkualmej uan kuali kinpejpena tlakuikalmej, películas uan okseki tlamantli tlen kita itech televisión. Noijki kuali kinpejpena videojuegos uan noijki tlen kita itech Internet (Prov. 13:20; 1 Cor. 15:33).

Miakej telpokamej uan ichpokamej kineltokaj uan kichiuaj tlen kijtoua Biblia. Noijki yomoapolaktijkej porque intatajuan omochijchikajkej uan okinpaleuijkej. Jehová ma kiteochiua nochi tlen nankichiuaj para namokoneuan ma moapolaktikan.

Tlen moneki kimatiskej akinmej ayamo moapolaktiaj

Tikixmati toTajtsin Dios porque timomachtia Biblia, ik non, tikneltoka tlen yokijto kichiuas, okachi kuali timouika iuan Jehová uan yititetlapouia. Kuali tlen tikchijtok (Juan 17:3; Heb. 11:6).

Xamo ijkuak ayamo otimomachtiaya Biblia iuan iTlaixpantijkauan Jehová, yotikpiaya moreligión noso amitlaj otikneltokaya. Xamo otikchiuaya tlen Biblia kijtoua amo ma tikchiuakan. Pero yotimoyolkopki porque titlaneltoka uan timoyolkokoua porque otitlajtlakolchi. Noijki yotikpatlak monemilis, kijtosneki yotika tlen achto otikchiuaya uan axkan san tikneki tikchiuas tlen toTajtsin Dios kipaktia (Hech. 3:19).

Xamo omitsmachtijkej iTlajtol toTajtsin Dios desde ijkuak otikatka tikonetl, ik non, kuali tikpia monemilis uan amo titlajtlakolchiua (2 Tim. 3:15). Maski sekimej mitsiluiaj xikchiua tlen amo kuali, amo tikchiua. Yotikteititi titlaneltoka porque tikueyichiua Jehová ken ye kineki uan titetlapouia. Otimomachti moneki titetlapouiskej, ik non, titetlapouia maski ayamo timoapolaktia.

Maski yiuejkika noso yikin opejki tikixmati Jehová, xamo yitikneki ixpan timotemakas uan timoapolaktis. Timotemakaj ixpan Jehová ijkuak tiktlatlaujtiaj uan tikiluiaj nochipa san ye tiktekichiuiliskej (Mat. 16:24). Ik non, timoapolaktiaj (Mat. 28:19, 20, TNM). Ijkuak timotemakaj ixpan Jehová uan timoapolaktiaj, timochiuaj tiiTlaixpantijkauan. ¡Non se ueyi tlateochiualistli!

Ijkuak Jesús omoapolakti, satepan “n Espíritu okiwík n Jesús kan amaka chanti para n amokualitlakatl kitoktis matlajtlakolchiwa” (Mat. 4:1). Ijkon ken yotimomachti itech Biblia, noijki tikpias ouijkayotl uan okachi ijkuak yotimoapolakti (Juan 15:20). Xamo mofamilia amo kinekis xiktekichiuili Jehová, mitspinauiskej akinmej inmiuan titekiti noso timomachtia uan noijki akinmej inmiuan otimouikayaj (Mat. 10:36). Ik non, xikilnamikto tlen okijto Jesús: “De milajka nomechilia, akin kikawa icha, ikniwah, iweltiwah, itajwah, ipilwah, noso ialtépeu por kitetlapowia n kualitlájtoli, kiselis axa itech nin tlaltíkpaktli okachi de se siento: kalmeh, ikniwah, iweltiwah, itajwah, iwa itlalwah, maya noiwa [kitlajyouiltiskej], iwa itech non ok se tlaltíkpaktli, [amo] ok ayik mikkis yej nochipa yolitos” (Mar. 10:29, 30). Maski san tlen mitspanos, amo keman xikkaua Jehová uan nochipa xiktlakamati tlen technauatia.

Ijkuak tiknekis timoapolaktis, xikilui akin kinyekana tlayekankej. Tlayekankej mouan momachtiskej tlajtlanilmej tlen katej itech nin amatlajkuilol uan kitaskej kox yiuelis timoapolaktis. Uelis timomachtis ninmej tlajtlanilmej ijkuak moselti timomachtia Biblia.

Ijkuak timomachtis ninmej tlajtlanilmej, xikintlajtolti nochi textos uan ximokuayejyeko tlen kijtouaj. Xikijkuilo nochi tlen tikneki tikilnamiktos. Ijkuak tlayekankej mitstlajtlaniskej, uelis tiktlapos nin amatlajkuilol uan tikitas tlen otikijkuilo. Tla itlaj amo tikajsikamati, xikilui tokni akin mitsmachtia noso se tlayekanki ma mitspaleui.

Xitlanankili tlen otikajsikamatki. Amo moneki tikijtos miak tlamantli, san moneki titlanankilis tlen mitstlajtlaniskej. Noijki uelis tikinmijtos se noso ome textos kanin kijtoua tlen titlanankilis.

Tla tlayekankej kitaskej ok moneki okachi tikajsikamatis tlen okachi moneki se kimatis itech Biblia, yejuan kiluiskej ikaj ma mitspaleui para tikajsikamatis uan tikyekijtos iTlajtol toTajtsin Dios uan ijkon satepan uelis timoapolaktis.

[Tlayekankej: Itech páginas 54 hasta 59 kijtoua ken moneki nankichiuaskej nechikolmej ijkuak nanmotlapouiskej iuan akinmej kinekij moapolaktiskej].