TLAMACHTIL 40
¿Tlen techpaleuis matiyetokan tichipauakej ixpan toTajtsin Dios?
Matikijtokan se siuatl kiyektlalia ikone para yas escuela. Ye kipaleuia para mayeto chipauak, tlen kichiua inantsin kipaleuia chokotsin amo mamokoko uan noijki kiteititia kitlasojtla. Jehová techtlasojtla ikinon kineki matiyetokan tichipauakej uan noijki matikpiakan chipauak tonemilis. Tla tichipauakej, amo timokokoskej uan noijki tikueyichiuaskej toTajtsin Dios.
1. ¿Tlen moneki tikchiuaskej para tiyetoskej tichipauakej?
Jehová techiluia: “Moneki nanyetoskej nanyolchipauakej” (1 Pedro 1:16). Ikinon moneki tiyetoskej tichipauakej uan noijki moneki tikpiaskej tonemilis ken Jehová kipaktia. Moneki nochipa matimaltikan, matimotlapakikan, mayeto chipauak tokalijtik uan noijki tocarro. Noijki moneki matitlachipauakan kanin timonechikouaj. Tla tichipauakej, oksekimej noijki kiueyichiuaskej Jehová (2 Corintios 6:3, 4).
2. ¿Tlen amo tikchiuaskej tla tiknekij tiyetoskej tichipauakej?
Biblia techiluia: “Matikkauakan nochi tlen kisokiotia tocuerpo uan tlen kisokiotia totlayejyekol” (2 Corintios 7:1). Ikinon amo tikonij nion tikmotlaliliaj itlaj tlen uelis techijtlakos noso kichiuas ayakmo kuali matimokuayejyekokan. Noijki amo timokuayejyekouaj tlen sokio porque tiknekij tikyolpaktiskej Jehová (Salmo 104:34). Noijki timochijchikauaj tikijtoskej tlen kuali (xiktlajtolti Colosenses 3:8).
¿Tlen uelis kichiuas amo matikpiakan chipauak tonemilis? Seki tlamantli uelis techijtlakos, ikinon amo tikchichinaj tabaco, ixijyo coca nion marihuana, nion tikonij okseki tlamantli. Amo tiktekitiltiaj nochi non tlamantli porque tikpatioitaj tonemilis uan amo tiknekij timokokoskej. Tiknekij tikpiaskej chipauak tonemilis, ikinon amo tikchiuaj tlen toTajtsin Dios amo kipaktia ken masturbación uan noijki amo tikitaj pornografía (Salmo 119:37; Efesios 5:5).a Akin ijkon kichiua xamo kitas oui kikauas pero Jehová kipaleuis (xiktlajtolti Isaías 41:13).
MATIMOMACHTIKAN
Matikitakan ken uelis tikueyichiuaskej Jehová tla tichipauakej, noijki tikitaskej tlen techpaleuis ayakmo matikchiuakan tlen amo kuali.
3. Tla tichipauakej, tikueyichiuaj Jehová
Tlen okinnauati Jehová israelitas techmachtia kineki matiyetokan tichipauakej. Xiktlajtoltikan Éxodo 19:10 uan 30:17-19 uan satepan xikitakan tlen namechmachtia.
¿Ken techmachtiaj ninmej versículos Jehová kineki matiyetokan tichipauakej?
¿Tlen techpaleuis matiyetokan tichipauakej?
Tla tiknekij tiyetoskej tichipauakej, moneki timochijchikauaskej. Uelis ijkon tikchiuaskej maski san kanin tichantij uan maski tikpiaj tomin noso amo. Xikitakan VIDEO uan satepan xikitakan tlen namechmachtia.
Tla oksekimej kitaj tichipauakej uan noijki chipauak tlen tikpiaj, ¿kinpaleuis makitlakaitakan Jehová? ¿Tleka ijkon tikijtoua?
4. Ayakmo xikchiua tlen amo kuali
Jehová techpaleuis ayakmo matikchiuakan tlen amo kuali.
Tla tejuatsin titlachichina noso tiktekitiltia drogas, xamo tikita oui ayakmo ijkon tikchiuas. Pero mitspaleuis tla timokuayejyekos ken mitsijtlakojtok tlen tikchijtok. Xiktlajtoltikan Mateo 22:37-39 uan satepan xikitakan tleka tla titlachichinas noso tiktekitiltis drogas uelis kichiuas...
... ayakmo ximouika iuan Jehová.
... ayakmo ximouika iuan mofamilia uan noijki inuan oksekimej.
Ximokuayejyeko tlen uelis tikchiuas para ayakmo mitsijtlakos tlen tikchijtok.b Xikitakan VIDEO.
Xiktlajtoltikan Filipenses 4:13 uan satepan xikitakan tlen namechmachtia.
Timokuayejyekoua tla ikaj motlatlaujtis, momachtis Biblia uan monechikos, ¿kipaleuis makikaua tlen amo kuali kichijtok? ¿Tleka ijkon timokuayejyekoua?
5. Ayakmo ximokuayejyeko nion xikchiua tlen amo kuali
Xiktlajtoltikan Colosenses 3:5 uan satepan xikitakan tlen namechmachtia.
¿Ken tikmatij tlajtlakolchiuaj akinmej kitaj pornografía, kichiuaj sexteoc uan kinpaktia masturbación?
¿Kuali kichiua Jehová ijkuak technauatia matikpiakan chipauak tonemilis? ¿Tleka ijkon timokuayejyekoua?
Xikita tlen mitspaleuis para amo timokuayejyekos tlen amo kuali. Xikitakan VIDEO.
Jesús otechmachti tleka moneki matikpiakan chipauak tonemilis. Xiktlajtoltikan Mateo 5:29, 30 uan satepan xikitakan tlen namechmachtia.
Tlen Jesús okijto techmachtia moneki timomaluiskej, ¿tlen moneki tikchiuaskej para amo timokuayejyekoskej tlen amo kuali?d
Xikilnamikto Jehová kipatioita ijkuak timochijchikaua ayakmo timokuayejyekos tlen amo kuali. Xiktlajtoltikan Salmo 103:13, 14 uan satepan xikitakan tlen namechmachtia.
¿Timokuayejyekoua mitspaleuis tlen otiktlajtoltijkej tla timochijchikajtok ayakmo tikchiuas tlen amo kuali? ¿Tleka ijkon timokuayejyekoua?
Amo ximokuayejyeko amo keman uelis tikkauas tlen amo kuali
Tla oksepa tikchiuas tlen amo kuali, xamo tikijtos: “Ayakmo nimochijchikauas”. Matikijtokan ikaj akin motlaloua uetsi, non amo kijtosneki ayakmo uelis tlatlanis. Noijki ijkon ijkuak oksepa tikchiuas tlen amo kuali, amo kijtosneki amo keman tikkauas. Miak ipati tlen yotikchi para tikkauas, xamo ualeua timotlapololtis uan oksepa tikchiuas tlen achto otikchiuaya. Ikinon ¡amo ximosotlaua! Jehová mitspaleuis xikkaua tlen amo kuali.
SEKIMEJ KIJTOUAJ: “Amo keman uelis nikkauas tlen amo kuali”.
Tla ikaj ijkon mitsiluis, ¿ika tlen texto tikititis Jehová kipaleuis makikaua tlen amo kuali?
XIKILNAMIKTO
Tikyolpaktiskej Jehová tla tikpiaj chipauak tonemilis uan noijki tokuayejyekol.
Matikojpauikan
¿Tleka moneki tiyetoskej tichipauakej?
¿Tlen moneki tikchiuaskej para tiyetoskej tichipauakej?
¿Tlen moneki tikchiuaskej para mayeto chipauak tlen timokuayejyekouaj uan tlen tikchiuaj?
NIN NOIJKI MITSPAKTIS
¿Tlen techpaleuis matiyetokan tichipauakej maski amo tikpiaj miak tomin?
Xikita tlen uelis tikchiuas para ayakmo titlachichinas.
“¿Tlen mitspaleuis ayakmo xitlachichina?” (¡Ma titlachixtokan!, mayo 2010)
Xikita ken teijtlakoua pornografía.
“¿Techijtlakos tla tikitaj pornografía?” (Akin Tetlapouijtok, 1 de agosto 2013)
Xikita tlen okipaleui se tlakatl ayakmo makita pornografía.
“Onimochijchika ayakmo nikitas pornografía” (Akin Tetlapouijtok, núm. 4 2016)
a Masturbación kijtosneki ijkuak ikaj momajmachilia kanin amo moneki.
b Kanin kijtoua: “Nin noijki mitspaktis”, kajki se tlamachtil tlen itoka: “¿Tlen mitspaleuis ayakmo xitlachichina?”. Tlen ompa kijtoua mitspaleuis xikkaua tlen mitsijtlakojtok.
c Sexteo kijtosneki ijkuak kinmotitlaniliaj mensajes, fotos uan videos kanin kichijtokej tlen sokio.
d Tla tikneki ikaj tikpaleuis makikaua masturbación, xikita “¿Tlen uelis nikchiuas para ayakmo nimomajmachilis (masturbación)?” (Telpochmej uan ichpochmej tlajtlanij. Nin kinpaleuis [volumen 1], tlamachtil 25).