TLAMACHTIL 34
¿Ken uelis tikteititiskej tiktlasojtlaj Jehová?
¿Tikmachilia timouika iuan Jehová porque timomachtijtok? ¿Mitspaktiskia okachi iuan timouikas? Tla ijkon tikneki tikchiuas, okachi tiktlasojtlas Jehová uan ye noijki okachi mitstlasojtlas uan mitsmaluis. ¿Ken uelis tikteititis tiktlasojtla?
1. ¿Ken tikteititiaj tiktlasojtlaj Jehová?
Tikteititiaj tiktlasojtlaj ijkuak tiktlakamatij (xiktlajtolti 1 Juan 5:3). Pero ye amo techchiualtia matiktlakamatikan. Ye techkauilia matikpejpenakan kox tiktlakamatiskej. ¿Tleka ijkon kichiua? Porque Jehová kineki matiktlakamatikan ika nochi toyolo (Romanos 6:17). Nin kijtosneki ye kineki xiktlakamati porque tiktlasojtla uan amo porque ikaj mitsiluia ijkon xikchiua. Tlen timomachtis itech sección 3 uan 4, mitspaleuis xikajsikamati tla tikneki tiktlasojtlas Jehová, moneki tikchiuas tlen kipaktia uan amo tikchiuas tlen ye kikokolia.
2. ¿Tleka ualeua oui tikteititiskej tiktlasojtlaj Jehová?
“Akin yokuali sapanoua tlajyouia” (Salmo 34:19). Ualeua tikitaj oui tiktlakamatiskej toTajtsin Dios porque titlajtlakolejkej. Noijki ualeua amo tikpiaj tlen ika timopanoltiskej, techchiuiliaj tlen amo kuali uan okseki tlamantli. Ijkuak titlajyouiaj, tikitaj oui tikchiuaskej tlen Jehová kineki uan xamo ayakmo tiknekiskej tiktlakamatiskej. Pero ijkuak timochijchikauaj tikchiuaj tlen ye kineki, tikteititiaj tiktlasojtlaj uan noijki san ye tikueyichiuaj. Ijkon Jehová amo keman techkauas uan nochipa techmaluis (xiktlajtolti Salmo 4:3).
MATIMOMACHTIKAN
Matikitakan tleka Jehová kipatioita matiktlakamatikan uan tlen uelis techpaleuis nochipa ijkon matikchiuakan.
3. Satanás okijto amo tiktlasojtlaj Jehová
Satanás okijto Job amo okitlasojtlaya Jehová, ijkon ijkuilitok itech amochtli Job. Pero amo okijto san Job ijkon okichiuaya, noijki nochtin itekipanojkauan Jehová. Xiktlajtoltikan Job 1:1 uan 1:6–2:10 uan satepan xikitakan tlen namechmachtia.
¿Tlen okijto Satanás itech Job? (Xikitakan Job 1:9-11).
¿Tlen kijtoua Satanás tikchiuaj tinochtin? (Xikitakan Job 2:4).
Xiktlajtoltikan Job 27:5b uan satepan xikitakan tlen namechmachtia.
¿Ken okiteititi Job okitlasojtlaya Jehová ika nochi iyolo?
Job okiteititi okitlasojtlaya Jehová porque nochipa okitlakamatki.
Tejuan noijki tikteititiskej tiktlasojtlaj Jehová tla nochipa tiktlakamatij.
4. Xikchiua Jehová mayolpaki
Xiktlajtoltikan Proverbios 27:11 uan satepan xikitakan tlen namechmachtia.
¿Ken momachilia Jehová ijkuak tiktlakamati uan tikchiua tlen ye kipaktia? ¿Tleka ijkon tikijtoua?
5. Uelis tiktlakamatis Jehová
Tiktlasojtlaj Jehová, ikinon tikinpaleuiaj oksekimej makixmatikan maski oksekimej techtlajyouiltiaj, ijkon tikchiuaj porque tiknekij nochipa tiktlakamatiskej. Xikitakan VIDEO uan satepan xikitakan tlen namechmachtia.
¿Tikita oui tikintlapouis oksekimej akin Jehová?
Ijkon ken otikitakej itech video, ¿tlen okipaleui Grayson amo mamomojti?
Amo oui tiktlakamatiskej Jehová tla techpaktia tlen ye kipaktia uan tikixtopeuaj tlen kikokolia. Xiktlajtoltikan Salmo 97:10 uan satepan xikitakan tlen namechmachtia.
Ijkon ken yotimomachti, ¿tlen kineki Jehová matikchiuakan uan tlen amo?
¿Tlen mitspaleuis xikchiua tlen kuali uan xikkokoli tlen amo kuali?
6. Kuali tiyetoskej tla tiktlakamatij Jehová
Nochipa techpaleuis tla tiktlakamatij Jehová. Xiktlajtoltikan Isaías 48:17, 18 uan satepan xikitakan tlen namechmachtia.
¿Tikneltoka Jehová kimati tlen techpaleuis? ¿Tleka ijkon tikijtoua?
¿Ken yomitspaleui timomachtis tlen kijtoua Biblia uan tikixmatis Jehová?
SEKIMEJ KIJTOUAJ: “Dios amo kita tlen nikchiua”.
¿Tlen texto uelis mitspaleuis xikinmilui oksekimej, tlen tikchiuaj uelis kiyolkokos noso kiyolpaktis Jehová?
XIKILNAMIKTO
Tikteititiaj tiktlasojtlaj Jehová ijkuak tiktlakamatij maski titlajyouiaj.
Matikojpauikan
¿Tlen mitsmachtia tlen okichi Job?
¿Ken tikteititis tiktlasojtla Jehová?
¿Tlen mitspaleuis nochipa xiktlakamati Jehová?
NIN NOIJKI MITSPAKTIS
Xikita ken nochipa tiktlakamatis Jehová uan tikinpaleuis tokniuan.
“Jehová amo keman kinkaua akinmej nochipa kitlakamatij” (16:44)
Xikita okseki tlamantli tlen okijto Satanás.
“Job okipixki iyolo ajsitok” (Biblia ¿tlen techiluia?, tlamachtil 6)
Xikita ken konemej noijki uelis kiteititiskej kitlasojtlaj Jehová.
¿Ken uelis kitlakamatiskej Jehová telpochmej uan ichpochmej maski oksekimej kinekiskej makichiuakan tlen amo kuali?