TLAMACHTIL 36
Nochipa matikchiuakan tlen kuali
Tinochtin tiknekij timouikaskej inuan akinmej amo techkajkayauaj. Jehová noijki kineki mouikas inuan akinmej kichiuaj tlen kuali. Pero ualeua oui tikitaj porque miakej san tlakajkayauaj. ¿Ken techpaleuis tla amo titlakajkayauaj?
1. ¿Tleka moneki nochipa matikchiuakan tlen kuali?
Ijkuak tikchiuaj tlen kuali tikteititiaj tiktlasojtlaj Jehová uan tiktlakaitaj. Xikilnamikto Jehová kimatok nochi tlen timokuayejyekouaj uan tlen tikchiuaj (Hebreos 4:13). Ye kita ijkuak tikchiuaj tlen kuali uan kiyolpaktia. Biblia kijtoua: “Jehová kikokolia akin kitlatia iyelis pero Ye kuali mouika iuan akinmej yolmelauakej” (Proverbios 3:32).
2. ¿Keman moneki tikchiuaskej tlen kuali?
Tla tiknekij tikchiuaskej tlen Jehová kipaktia, moneki tikinmiluiskej oksekimej “tlen melauak” (Zacarías 8:16, 17). Ikinon amo tikinkajkayauaj akinmej inuan titekipanouaj, tokniuan, tekiuajkej uan tofamilia. Timochijchikauaj tikchiuaj tlen kuali, amo titlachtekij nion titlakajkayauaj (xiktlajtolti Proverbios 24:28 uan Efesios 4:28). Noijki tiktlaxtlauaj impuestos (Romanos 13:5-7). Tejuan nochipa tiknekij tikchiuaskej “tlen kuali uan “amo keman tiknekij titlakajkayauaskej” (Hebreos 13:18).
3. ¿Ken techpaleuis tla amo titlakajkayauaj?
Ijkuak oksekimej kitaj amo titlakajkayauaj, techtlakaitaj. Ijkuak ijkon tikchiuaj titlapaleuiaj kuali mayetokan tokniuan uan tikmachiliaj ken tiyetoskiaj iuan tofamilia. Noijki totlalnamikilis amo techkuejsoua. Tla amo titlakajkayauaj, tikteititiskej techpaleuia “tlen tlamachtia toTajtsin Dios akin techmakixtia” uan noijki tikinpaleuiskej oksekimej makinekikan kitekichiuiliskej Jehová (Tito 2:10).
MATIMOMACHTIKAN
Matikitakan tla amo titlakajkayauaj, techpaleuis okachi matimouikakan iuan Jehová uan noijki tikitaskej ken uelis nochipa tikchiuaskej tlen kuali.
4. Jehová amo kineki matitlakajkayauakan
Xiktlajtoltikan Salmo 44:21 uan Malaquías 3:16 uan satepan xikitakan tlen namechmachtia.
¿Melauak amikaj kimatis ijkuak titlakajkayauaj? ¿Tlen tikijtoua?
Maski tikita oui ¿ken timokuayejyekoua momachilis Jehová tla amo titlakajkayauaj?
Ijkuak konemej amo tlakajkayauaj, intatajuan yolpakij. Ijkuak tejuan amo titlakajkayauaj, tikyolpaktiaj Jehová.
5. Amo keman matitlakajkayauakan
Miakej kijtouaj kuali tiyetoskej tla titlakajkayauaj, pero ¿melauak tlen kineltokaj? Xikitakan VIDEO.
Xiktlajtoltikan Hebreos 13:18 uan satepan xikitakan ken uelis tikchiuaskej tlen kuali ijkuak...
... tikatej iuan tofamilia.
... tikatej kanin titekipanouaj noso kanin timomachtiaj.
... tikchiuaj okseki tlamantli.
6. Kuali tiyetoskej tla amo titlakajkayauaj
Xamo ijkuak tikijtouaj tlen melauak amo nochtin kinpaktis, pero tla ijkon tikchiuaskej kuali tiyetoskej. Xiktlajtoltikan Salmo 34:12-16 uan satepan xikitakan tlen namechmachtia.
¿Tleka okachi tiyolpakiskej tla amo titlakajkayauaj?
Akinmej yomonamiktijkej okachi kuali mouikaj ijkuak amo mokajkayauaj.
Tla kanin titekipanouaj amo titlakajkayauaj, okachi techpatioitaskej.
Ijkuak amo tikinkajkayauaj tekiuajkej, yejuan techtlakaitaj.
SEKIMEJ KIJTOUAJ: “Tla titlakajkayauaj para titlapaleuiskej, amo tlajtlakoli”.
¿Kineki Jehová nochipa matikijtokan tlen melauak? ¿Tleka ijkon tikijtoua?
XIKILNAMIKTO
Jehová kineki iyolikniuan nochipa makichiuakan tlen kuali uan amo matlakajkayauakan.
Matikojpauikan
¿Keman moneki tikijtoskej tlen melauak?
¿Melauak amikaj kimatis ijkuak titlakajkayauaj?
¿Tleka amo moneki titlakajkayauas?
NIN NOIJKI MITSPAKTIS
¿Ken uelis tetajmej kinpaleuiskej inkoneuan amo matlakajkayauakan?
¿Ken techpaleuis tla tikchiuaj tlen tikijtouaj?
Ximomachti kox moneki tiktlaxtlauaskej impuestos maski ualeua amo kuali kitekitiltiaj tomin.
“¿Moneki tiktlaxtlauas impuestos?” (Akin Tetlapouijtok, 1 de septiembre 2011)
¿Tleka se tlakatl okipatlak inemilis uan ayakmo okichi tlen amo kuali?
“Onikajsikamatki Jehová yolkuali uan tetlapojpoluia” (Akin Tetlapouijtok, mayo uan junio 2015)